Lajmi i fundit

Policia amerikane ka identifikuar viktimën e një aksidenti tragjik që ndodhi të premten në mëngjes në Waterbury. Autoritetet amerikane thonë se bëhet fjalë për 14-vjeçaren Adrijana Mina, me origjinë shqiptare.

Mina ishte një prej katër adoleshentëve që ndodheshin në një Hyundai Sonata të vjedhur kur u përplas me një Ford Escape. Përplasja ishte shumë e fortë.

Mina ka dalë jashtë mjetit si pasojë e impaktit ndërsa pavarësisht se u dërgua në spital, plagët ishin shumë të rënda dhe humbi jetën. Policia thotë se makina ku udhëtonin adoleshentët kaloi rrugën me të kuqe dhe në kryqëzim u përplas me Fordin.

Dy 15-vjeçarë të tjerë ndodhen në spital në gjendje të rëndë si pasojë e kësaj ngjarje. Një vajzë 15-vjeçare mori lëndime më të lehta dhe u lirua nga spitali të premten.

Shoferi i Fordit ka dalë po ashtu nga spitali. Të gjithë adoleshentët ishin nxënës të shkollës në Waterbury. Mina la pas babain e saj, Gabriel A. Mina dhe nënën Albulena Rizvani. Në SHBA, ajo kishte edhe gjyshërit.

Ceremonia mortore për 14-vjeçaren do të zhvillohet të martën në qendrën Shqiptaro-Amerikane Kulturore dhe Islamike në Waterbury. Siç raportojnë mediat amerikane, varrimi do të kryhet sipas traditave shqiptare në Varrezat Myslimane Shqiptare në Waterbury.

Ministri i Brendshëm, Taulant Balla ka zhvilluar sot një takim me Prokurorin e Përgjithshëm, Olsian Çela. Balla dhe Çela për dy orë me radhë kanë diskutuar lidhur me rritjen e bashkëpunimit mes Policisë së Shtetit dhe Prokurorisë me fokus intensifikimin e luftës kundër krimit dhe korrupsionit.

Balla i kërkoi Prokurorisë së Përgjithshme mbështetjen në goditjen e “të fortëve” dhe rrjeteve të shpërndarësve të drogës. Bashkëpunimi i ngushtë u vlerësua nga të dyja palët si parakusht dhe çëlësi i suksesit për realizimin e objektivave të përbashkëta.

Prokurori i Përgjithshëm dhe Ministri i Brendshëm vunë gjithashtu theksin edhe tek nevoja e rritjes së cilësisë së hetimeve dhe një qasje proaktive në monitorimin dhe procedimin e “të fortëve” në lagje, në sheshe e qendra të banuara në të gjithë vendin, me qëllim goditjen dhe parandalimin e fenomeneve kriminale që prekin nga afër qytetarët. Në takim ishin të pranishëm edhe Drejtori i Përgjithshëm i Policisë së Shtetit Muhamet Rrumbullaku, Drejtuesi i Prokurorisë së Tiranës, Arens Çela dhe Drejtori i Agjencisë së Mbikëqyrjes Policore, Ardi Veliu.

Lirohet nga burgu 28-vjeçari Sofokli Baxheri, i cili u akuzua se bëri negociata për t’i dhënë me qira vilën në fshatin Nivicë, personave të dyshuar të rrëmbimit dhe vrasjes së Leonard Thodhori dhe Fatmir Sulovari. Vendimi u dha nga Gjykata e Sarandës. Familjarët dyshojnë që dy 46-vjeçarët janë vrarë, pasi nuk kanë kontakt me ta.
Mësohet se ndaj të riut, është caktuar masa “detyrim paraqitje”, ndërkohë që ai do të hetohet në gjendje të lirë për veprën penale “Veprime që pengojnë zbardhjen e të vërtetës”.

Policia e Sarandës ka kryer disa kontrolle banesash, përfshirë edhe zyrtarëve apo ish-zyrtarëve. Kontrollet janë kryer për çështje tokash, por nuk dihet nëse është një procedim i veçuar apo hetimi për zhdukjen e dy 46-vjeçarëve ka nxjerrë në skenë ngjarje të tjera në Sarandë. Dyshimet janë se dy 46-vjeçarët janë ekzekutuar dhe janë groposur.

Dy të zhdukurit rezultojnë me precedentë penalë në fushën e narkotikëve, si dhe për vepra të tjera të rënda. Thodhori, 46-vjeç i njohur si “Koçole” rezulton i dënuar disa herë, i dyshuar si pjesëmarrës në masakrën e Qafë-Gjashtës në 1997, ku u vra oficeri i policisë Gjergj Mehmeti. Në vitin 2003 ai u arrestua për “moskallëzim krimi”. Disa vite më vonë u prangos sërish për “vjedhje” dhe “mashtrim”. Ka qenë i proceduar edhe për “trafik droge”. Për një sërë akuzash rezulton i proceduar edhe i zhdukuri tjetër, Fatmir Sulovari. Ka vuajtur dënimin për “armëmbajtje pa leje” dhe “plagosja e lehtë me dashje”. Ai u arrestua edhe në prill të 2022 në Lushnje, pasi në mjetin e tij “BMW” X5 u gjet një sasi kanabis e ndarë në doza gati për shitje.

Një aksident i rëndë që ndodhi mbrëmjen e djeshme në një fshat në Përmet i ka marrë jetën operatorit të emisionit Stop, Gert Hoxha, në moshën 45-vjeçare.

Ai ka lënë pas bashkëshorten dhe dy fëmijët, ndërkohë që përveç se një profesionist dhe detajit i kamerës, ai ka qenë dhe themelues i shoqatës së Vespës në Shqipëri. Në lidhje me vdekjen e tij kanë reaguar dhe kolegët, përmes një postimi në rrjetet sociale, ku shkruhet:

Qofsh në dritë Gert Hoxha.
Një aksident tragjik dje në mbrëmje ndërpreu në mes jetën e njërit prej operatorëve më të talentuar dhe kurajozë të emisionit “Stop”. Gert Hoxha u nda nga të dashurit e zemrës, miqtë, të afërmit e bashkëpunëtorët, të cilëve u mësoi si të jetonin e ta dashuronin cdo ditë.

Jetoi me shpejtësi e po me aq shpejtësi nxitoi të prekë Parajsën. Gerti punoi prej më shumë se 20 vjetësh në media dhe në formatet investigative në Top channel, Agon channel e së fundi në Tv Klan. Mjeshtër i kameras, i këmbënguljes e pasionit në cdo gjë që bënte, Gerti do të mbetet në zemrën e atyre, që e deshën dhe memorien e atyre, që e njohën.

Stafi i emisionit “Stop” i shpreh ngushëllimet më të thella familjarëve të Gertit dhe i gjendet pranë në këtë humbje të pazëvendësueshme! Gert! Shijo parajsën sic thithe cdo grimcë të jetës!

Ndërkohë në reagimin e shoqatës së Vespave thuhet:

Me hidherim te thelle bej nje lajmerim qe sdo te doja ta beja me kurre! E gjithe bota e vespizmit Shqipetar eshte ne zi ! Ka nderruar jete ne nje aksident me vespa GERT HOXHA (ÇOMI) ! Vespist shume i apasionuar dhe themelues i Vespa Club Tirana. Mos mungoni te marrim pjese te gjithe ne xhiron e tij te fundit!

Nuk gjej fjale te shpreh hidherimin tim…

Ngushellime familjes miqve dhe shokeve!

Një 50-vjeçar shqiptar ka humbur jetën në një aksident tragjik ditën e djeshme në Ravenna të Itlisë.

Shqiptari ishte duke udhëtuar me një motor tip ‘Yamaha R1’ kur u përplas me një makinë tip ‘Mitsubishi’, që drejtohej nga një grua 53-vjeçare e cila u dërgua në spital me lëndime të lehta.

Ajo që e bën më tragjike këtë rast është se të gjithë ngjarjen e ka ndodhur në sytë djalit të viktimës. Ky i fundit ishte me një tjetër motor pas të atit kur ndodhi aksidenti.

Rruga në fjalë u bllokua për t’i dhënë hapësirë hetimeve. Deri më tani mbeten të paqarta arsyet e këtij aksidenti.

Është publikuar foto e autorit të ngacmimit seksual ndaj një vajze të re në qytetin e Pogradecit, ngjarje kjo e ndodhur të shtunën.

Një 25 vjeçare punonjëse në një subjekt privat është çuar pa ndjenja në spitalin e Pogradecit. Pas referimit të ngjarjes nga mjekët në polici, kjo e fundit ka nisur hetimet dhe ka marrë në pyetje vajzën pasi ajo ka marrë veten.

Nga deklarimet e vajzës rezultoi se ajo ishte ngacmuar seksualisht në vendin e saj të punës nga shtetasi Arian Mema dhe për pasojë kishte humbur ndjenjat, e gjithë ngjarja kishte ndodhur teksa Mema ka qenë duke montuar dushe në subjektin ku vajza punonte si pastruese.

Pas të gjitha deklarimeve të 25 vjeçares me origjinë nga Trebinja e Mokrës, policia ka vënë në pranga 54 vjeçarin.

Arian Mema është i njohur për policinë pasi për një ngjarje të tillë është akuzuar edhe në 2020, vit kur punonte si inspektor tatimesh në Drejtorinë e Tatimeve të Korçës. Pas arrestimit të atëhershëm ai u shkarkua nga puna dhe punonte në sektor privat me shitje dhe montim dushesh diellorë.

Tashmë pas 3 vitesh ai bie sërish në prangat e policisë sërish me të njëtën akuzë atë të ngacmimit seksual.

Mësohet se ai është shoqëruar në paraburgimin e Korçës nga ku më pas do të njihet në vazhdim me masën e sigurisë nga gjykata.

Ndërkohë e reja dyshohet se vuante nga epilepsia, çka ka bërë që ajo të humbasë ndjenjat kur është përballur me Memën.

Për ngjarjen reagoi edhe policia: Specialistët për Hetimin e Krimeve të Komisariatit të Policisë Pogradec arrestuan në flagrancë shtetasin A. M., 54 vjeç, banues në Pogradec, pasi dyshohet se ka ngacmuar seksualisht një 25-vjeçare.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

Fusha e mbetjeve urbane në Vlorë është përfshirë sërish nga flakët.

Flakët kanë përshkuar pothuajse të gjithë fushën e mbetjeve urbane të qytetit. Siç shihet në pamje, si tymi ka pushtuar një sipërfaqe të madhe, duke shkaktuar dëm kolosal për qytetin, duke ditur përbërjen dhe kimikatet që çlirohen nga djegia e mbeturinave.
s
Forca të shumta zjarrfikës por dhe punonjës se bashkisë janë duke punuar për te izoluar flakët, por era që fryn ka përkeqësuar situatën duke bërë që zjarri të afrohet tek banesat dhe të rrezikojë ato. Situata është tepër e rënduar.