Lajmi i fundit

Turqia vijon të sjellë ndihma për të prekurit nga tërmeti në Shqipëri. Pas ekipeve turke të kërkim shpëtimit që iu bashkëngjitën specialistëve nga shumë vende të botës për nxjerrjen e personave të mbetur nën rrënoja, tashmë shteti turk ka dërguar edhe ndihma materiale për të gjithë ata që kanë mbetur pa strehë nga tërmeti shkatërrimtar i 26 nëntorit.

Ministrja e Mbrojtjes, Olta Xhaçka ka falenderuar vendin mik, Turqinë për ndihmën e pakursyer në drejtim të Shqipërisë, e cila sikurse është bërë e ditur tashmë do të pasohet nga një ndihmë akoma më e madhe, ajo e ndërtimit të 500 banesave të familjeve që nuk kanë më një çati të sigurtë.

“Faleminderit qeverisë dhe popullit turk për ndihmën e vazhdueshme për banorët e zonave të prekura nga tërmeti që në momentet e para. Ndihmat e sotme materiale vijnë pas ekipeve të kërkim – shpëtimit dhe do pasohen nga bujaria e pazëvendësueshme për ndërtimin e 500 banesave,” shprehet Xhaçka.

Ndihmat e qeverisë dhe Gjysmëhënës së Kuqe turke kanë mbërritur tashmë në vendin tonë dhe do të shpërndahen në zonat e prekura nga tërmeti. /atsh

Më shumë se 1500 fëmijë po marrin kujdesin e duhur psiko-social nga 300 psikologë dhe punonjës socialë në pikat e emergjencës.

Ministrja e Shëndetësisë dhe Mbrojtjes Sociale, Ogerta Manastirliu thotë se fëmijëve po marrin përkujdesje të veçantë.

“Forca më e madhe për t’u ringritur nga kjo fatkeqësi natyrore janë fëmijët ndaj po garantojmë shërbime psiko-sociale për çdo fëmijë në hotele dhe pikat e emergjencës, ku janë strehuar familjet e mbetura pa strehë nga tërmeti.Nën koordinimin e Ministrisë së Shëndetësisë dhe Mbrojtjes Sociale, nëpërmjet Agjencisë për Mbrojtjen e Fëmijëve dhe Shërbimit Social, me mbështetjen e pakursyer të organizatave partnere, 150 po argëtohen me aktivitete të ndryshme në hotel Rafaelo, me shpresën për të lënë pas sa më parë pasojat e tërmetit! Më shumë se 1500 fëmijë po marrin kujdesin e duhur psiko-social nga 300 psikologë dhe punonjës socialë në pikat e emergjencës”, -informon ministrja.?atsh

Kishte mbledhur me muaj për të realizuar udhëtimin e ëndrrave të saj, një shëtitje në Paris, por ka vendosur t’i japë kursimet e saj për të prekurit e tërmetit të 26 nëntorit. Është kjo historia sa prekëse e frymëzuese e 7-vjecares, Semona Ndou, e cila bashkë me familjen e saj jeton në Firence.

Në këto ditë të vështira për qytetarët e prekur ngë tërmeti, lajmet e trishta që vinin nga Shqipëria kanë prekur zemrën e Semonës së vogël, e cila edhe pse vetëm 7 vjece, vendos të solidarizohet me bashkëmoshatarët e saj në Atdhe. ‘Udhëtimin mund ta bëj një herë tjetër, këto do i dërgojmë në Shqipëri” – janë fjalët që vogëlushja u ka drejtuar prindërve, ndërsa në dorë mbante arkën e kursimeve.
Ka qenë halla e saj, e cila e ka sjellë atë në redaksinë e News24, janë plot 70 euro, të cilat stafi i televizionit ka vendosur t’ia dërgojë një prej bashkëmoshatarëve të saj, i preku nga tërmeti i fortë i së martës së një jave më parë.

Në kavanozin ku Semona ka ruajtur kursimet e saj, ka edhe një mesazh, shkruar bukur prej saj me shkrim dore. “Për të gjithë bashkëatdhetarët e mi që u tronditën nga tërmeti, unë jap kursimet e mia për t’i ndihmuar me keqardhje nga Firence. Semona”.

Para pak minutash Kryeministri i Shqipërise, Edi Rama, përmes faqes së tij në Facebook u ka bërë sërish thirrje mediave që të tregohen më të kujdesshme në informacionet që shpërndajnë.

Postimi i Edi Ramës në Facebook:

APEL I DETYRUAR MEDIAVE

Gjatë periudhës së gjendjes së jashtëzakonshme të fatkeqësisë natyrore, Japonia ka masa ekstreme për mediat private, që mesa duket edhe në Japoninë e urtësisë së vjetër, paskan qenë taksirat mbi taksiratin e madh të tërmetit! Mos na detyroni të bëjmë atë që s’ua rrok imagjinata!

Filtroni informacionet dhe verifikoni ato që thoni! Menaxhoni debatet dhe ndaloni klithmat nëpër studiot tv dhe përfshihuni në qetësimin e shpirtrave të goditur më keq se banesat! Kontribuoni për të kanalizuar energjinë e jashtëzakonshme të solidaritetit mbarëshqiptar!

Kjo është koha për kurimin psikologjik të popullit që ju ndjek dhe jo për rrenat e shamatatë karakteristike të veprimtarisë së zakonshme të një pjese të madhe të sferës suaj!

Kryeministri Edi Rama deklaroi sot se “buxheti i shtetit do të mbajë barrën më të madhe pas tërmetit tragjik”.

Në mbledhjen e jashtëzakonshme të qeverisë, Kryeministri Rama theksoi se “sot kemi një takim konkludues me ministrin e Financave me kryetarin e grupit për rindërtimin për të parë si do të riorganizojmë buxhetin, pasi buxheti duhet të miratohet në parlament në datën 5, kështu që buxheti duhet të ketë brenda fokusin tek fatkeqët dhe tek fillimi i procesit të rindërtimit”.

“Buxheti ka një barrë të jashtëzakonshme për të mbajtur të gjitha nevojat, sepse jeta normale do të kthehet dhe dielli do të dalë prapë dhe asgjë nga ato që bëhen nuk mund t’u privohet njerëzve. Mendoj që idetë janë të mira dhe skema që po formësohet për të adresuar problemin është fituese, buxhet, donatorë dhe kontributet e njerëzve, të cilat janë të rëndësishme dhe konsistente , por që janë të papërfillshme në raport me të tërën, në kuptimin e nevojës”-, theksoi Rama.

Kreu i qeverisë u shpreh se “sot brenda ditës në bashkinë e Durrësit do të merret lista e ndërtuesve të të gjitha pallateve të dëmtuara dhe të gjithë duhet të njoftohen sot nëse nuk paraqiten vetë që të paraqiten dhe të marrin përsipër riparimin e të gjitha dëmeve që janë shkaktuar, por nën supervizimin e rreptë të grupeve të inspektimit.

“Dua të bëj edhe një sqarim ose shpjegim për qytetarët për periudhën e gjendjes së jashtëzakonshme platforma dixhitale e bashkëqeverisjes dhe i gjithë ekipi i bashkëqeverisjes do të vihen në dispozicion ekskluzivisht të komunikimit me të gjithë njerëzit që kanë nevojë të komunikojnë shqetësimin e tyre që kanë në lidhje me banesën po ashtu fluksit, informacionit që shpërndahet lart e poshtë të jetë i përqendruar dhe nga platforma të kalojë tek shtabet përkatëse dhe njerëzve tu jepet përgjigje”, – theksoi Rama.

Ai tha se “nuk kemi pse habitemi, as nuk i mirëkuptojmë të gjithë njerëzit që duan inspektimin në të njëjtën kohë ndërkohë që kjo fizikisht kjo është pamundur.
Por komunikimi është i domosdoshëm në mënyrë që njerëzit të mos çojnë mesazhe që ngelën në ajër, që njerëzit të mos rrinë në pritje të diçkaje që nuke dinë kur do vijë , por sipas blloqeve ka një plan si do zhvillohet inspektimi bllok për bllok dhe sipas blloqeve njerëzve do tu thuhet në bllokun ku gjendet banesa juaj inspektorët do të mbërrijnë në filan datë, ose ju thuhet na dërgoni fotografi të situatës , por është është shumë themelore te mos harrojmë nevojën e trajtimit të barabartë të atyre që janë në qytet dhe atyre që janë në fshat”.

“Plotësim i nevojës së tyre për çadra sepse ata nuk duan të ikin nga fshati se kanë jetën e tyre dhe nuk mund të spostohen dhe të shkëpusin çdo lidhje se kanë gjënë e gjalle atje”, tha Rama./atsh