Lajmi i fundit

Yuri Kim është zyrtarisht ambasadorja e Shteteve të Bashkuara në Shqipëri.

Yuri Kim bëri sot betimin si ambasadore e Shteteve të Bashkuara në Shqipëri.

Zonja Kim, u emërua nga Presidenti Donald Trump në qershor të këtij viti. Ajo ka thënë se do të nxisë udhëheqësit e Shqipërisë për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE.

Zonja Kim ka thënë gjithashtu se do të inkurajojë Shqipërinë të zbatojë plotësisht reformat në drejtësi. Ajo është shprehur se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional.

Zonja Kim pritet gjithashtu të inkurajojë Shqipërinë për të arritur nivelin 2 përqind në shpenzimet e mbrojtjes deri në vitin 2024.

Floreta Faber, Ambasadorja e Shqipërisë në SHBA ka njoftuar se tashmë Yuri Kim ka kryer dhe betimin dhe është zyrtarisht Ambasadore e SHBA-ve në Tiranë.

“Betohet Ambasadorja Kim! Ajo është tashmë zyrtarisht Ambasadorja e Shteteve të Bashkuara në Shqipëri! Urimet më të mira dhe suksese në misionin tuaj, me bindjen se do kemi një bashkëpunim të frytshëm!”-, shprehet Faber.

Më 20-dhjetor 2019, Yuri Kim, ka marrë edhe aprovimin e fundit për të qenë ambasadore e SHBA në Shqipëri. Senati amerikan, në takimin e fundit për vitin 2019, ka konfirmuar diplomaten Kim si ambasadore të Shteteve të Bashkuara në Republikën e Shqipërisë.

Ambasadorja Yuri Kim, në një seancë para Komisionit të Jashtëm të Senatit për konfirmimin e saj në fund të tetorit, tha se do të nxiste udhëheqësit e vendit për bashkëpunim në mënyrë që të forcohet perspektiva e hapjes së negociatave të anëtarësimit në BE.

Yuri Kim është gruaja e parë koreano-amerikane që përfaqëson SHBA në postin e një ambasadori dhe personi i parë nga territori amerikan i Guamit që shërben në një post të tillë. Ajo ka lindur në Kore dhe është rritur në ishullin Guam, një territor i SHBA në Oqeanin Paqësor.

Ajo ka shërbyer në Departamentin e Shtetit si Drejtore e Zyrës së Çështjeve të Evropës Jugore, ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake. /atsh

“Nuk jam këtu të krijoj probleme, por që të zgjidh probleme”, – deklaroi sot nga Vjena Kryeministri Edi Rama, në një konferencë të përbashkët për shtyp me Sekretarin e Përgjithshëm të OSBE-së, Thomas Greminger.

I pyetur mbi krizën në Ukrainë, Kryeministri Rama deklaroi se si kryesues i OSBE-së, do të punojë që kjo krizë mes dy vendeve të mos thellohet.

“Dua të theksoj atë që thashë në hyrje të kësaj konference shtypi, që si kryesues i OSBE-së unë nuk dua të shpreh qëndrime, pikëpamje e mendime të cilat mund të jenë të natyrshme kur flas si kryeministër i Shqipërisë dhe në emër të qeverisë shqiptare, por në këtë pozitë që jam, si kryesues i OSBE-së, kjo nuk është e mundur”, – tha Rama.

Ai shtoi se “si kryetar i OSBE-së, bashkë me Sekretarin dhe gjithë të tjerët, detyra ime është të nxis sa më shumë të jem e mundur që të kemi dialog dhe mënyrën si do ecim para që të garantojmë paqe”.

“Është e qartë që kriza në Ukrainë dhe rreth saj është një sfidë mjaft e madhe sigurie në Europë. Prioriteti ynë bazë është të mbështesim punën e Misionit, të punojmë me Përfaqësuesin Special që sapo u caktua, dhe në të njëjtën kohë të jemi sa më të dobishëm që të jetë e mundur që të dyja palët të afrohen drejt një konkluzioni pozitiv. Të gjithë e dimë që kështu duhet të jetë. Nuk është pa arsye që kam vendosur të bëjë vizitën time të parë në Ukrainë. Jam fuqimisht i angazhuar për të bërë më të mirën time që kjo krizë që ka vazhduar për më shumë se 6 vjet mos të përshkallëzohet më tutje dhe nga tjetër të vazhdojë zbatimi i plotë i Marrëveshjes së Minskut, atë kemi si bazë dhe është njohur gjithashtu si e tillë nga të dyja palët”, – tha Rama.

I pyetur se përse nuk përmendi Krimenë, Rama tha se “e kam thënë dhe e përsëris edhe një herë, që ne duhet të shikojmë të gjitha mënyrat e mundshme që të sjellim të gjitha palët afër njëra-tjetrës”.

“Si qeveri dhe si Shqipëri ne kemi qenë të hapur për çështjen e pyetjes, por si kryesues i OSBE-së nuk dua të jem kaq i hapur, sepse nuk do të kisha rezultatet e duhura, se si kjo organizatë me 57 anëtarë, me ide të ndryshme të arrijë një konkluzion më të shpejtë në zgjidhjen e problemeve të ndryshme. Nuk jam këtu të krijoj probleme, por që të zgjidh probleme”, – tha Rama.

Duke folur për prioritetet, Rama tha se “sfida jonë është të fokusohemi tek parimet elementare, bazike”.

“Nuk kemi marrë drejtimin e OSBE-së për të rishpikur botën, as për të rishpikur OSBE-në, por duke studiuar dhe duke analizuar me shumë përkushtim të shkuarën në funksion të marrjes së drejtimit të OSBE-së kemi konkluduar që mbase jemi të vlefshëm si një vlerë e shtuar, duke iu referuar parimeve elementare që janë në themelet e OSBE-së. Kjo do të thotë që jo thjesht të mjaftohemi me këto parime si fjalë kyçe që i përdorin të gjitha vendet anëtare, as si pika të përbashkëta referimi parimore, por si objektiva që çdo anëtar duhet nxitur t’i implementojë në jetën e përditshme”, – tha Rama.

Nga ana tjetër, ai tha se “është sfida jonë në këtë rast, jo e OSBE-së, por e jona, që t’i japim drejtimit tonë një profil sa më respektues për të gjithë”.

“Sapo dola nga një seancë me ndjenjë inkurajimi nga fjalët që u thanë. Sepse është legjitime të them që disa anëtarë dhe mund të kenë qenë pak skeptikë, kanë shprehur skepticizëm për faktin se sa të gatshëm jemi ne për të përballuar këto detyra me përgjegjësi”, tha Rama.

Ai shtoi se “kjo është një ditë historike për Shqipërinë, pasi është dita e parë në historinë e saj që ka një rol në skenën ndërkombëtare”. “Për çdo shqiptar që e di rrugën e gjatë që na duhej të arrinim deri këtu kjo është një arsye që ne të jemi krenar. Sot përcaktuam prioritetet tona për vitin në vazhdim. Theksuam vendosmërinë për t’u përqendruar në parimet themelore. Ne nuk do të shikojmë që të rishpikim botën, apo ndonjë gjë të re në lidhje me këtë organizatë, por të sigurohemi që gjatë këtij viti parimet themelore, baza do të ngelen ashtu siç janë dhe nuk do të prishen nga disa erëra që janë mjaft rrezikuese në botën ku jetojmë”, shtoi ai.

“Moszbatimi i parimeve kryesore bazë të Helsinkit dëmton integritetin e vetë OSBE-së, sepse mund të dobësojë demokracitë dhe mund të sjellë rreziqe të papranueshme për qytetarët. Pika e tretë është të ndërtojmë stabilitet përmes dialogut”, tha Rama. /atsh

Ministrja e Mbrojtjes Olta Xhaçka tha sot se efektivët komando po stërviten në terrene alpine para se të bëhen pjesë e elitës së Forcave të Armatosura.

Ministrja e Mbrojtjes Xhaçka ka përzgjedhur si foto të ditës një nga komandot elitë të FA.

“Foto e ditës. Efektivët e Kursit XV Komando po stërviten për terrene alpine përpara se të bëhen pjesë e njësisë elitë të FA”, shprehet ajo.

Kursi Komando XV janë trupat elitare të Forcave të Armatosura që stërviten çdo ditë.
Në këtë kurs marrin pjesë të gjitha forcat e FA dhe jo vetëm nga ato tokësore, duke rritur cilësinë dhe sfidën për të qenë pjesë e njësisë elitë.

Misioni i kursit komando është të transformojë ushtarakët që përzgjidhen të jenë pjesë e kursit komando, nga një ushtarak konvencional, në një ushtarak të përgatitur dhe të aftë për të vepruar në çdo situatë, në kushte të vështira moti dhe terreni në interes të misionit të batalionit.

Risi për kursin XV komando është pjesëmarrja e efektivëve nga repartet e tjera të FA, gjë që rrit interesin për t’u bërë pjesëtar i këtij batalioni elitë. /atsh

Programi IPARD II, që mbështet me grante fermerët apo sipërmarrësit që investojnë në sektorin rural, nuk ka si kriter kufizimin e moshës.

Agjencia e Zhvillimit Bujqësor dhe Rural (AZHBR) shpjegon se në programin IPARD II, mund të aplikojnë të rinj e të reja, mbi 18 vjeç e deri tek personat në moshë pensioni.

Ajo që kërkohet me domosdoshmëri, citon AZHBR-ja, është fakti që “çdo projekt duhet të analizohet në lidhje me standardet kombëtare dhe ato europiane, që duhet të plotësojë sipas rastit, në përfundim të investimit”.

Nëse investimi/legjislacioni kërkon, ose jo plotësimin e standardeve, janë Trupat Teknike, të cilët do ta konfirmojnë. Para dorëzimit të aplikimit në Agjencinë IPARD, çdo projekt duhet të analizohet në lidhje me standardet minimale kombëtare, që do të arrihen
nga ndërmarrja në fund të investimit, thekson AZHBR.

Norma bazë e përfitimit të grantit nga Masa 1 është 60%, për Fermerët e Rinj është 65% dhe për Zonat malore 70%. /atsh

Në vitin 2019, numri i azilkërkuesve në Gjermani ka regjistruar rënie.

Rreth 142 509 kërkesa janë regjistruar nga refugjatët e mbërritur për herë të parë në vend, rreth 40 000 më pak se një vit më parë.

Ministria e Brendshme ka njoftuar 111 094 kërkesa për azil duke përdorur një metodë të re llogaritjeje.

Procedurat janë hequr për fëmijët e refugjatëve, të lindur në Gjermani.

Tre vendet e para të origjinës së azilkërkuesve janë Siria (26 435), Iraku (10 894) dhe Turqia./atsh

Kryeministri Edi Rama thekson nga Vjena se nuk është surprizuar nga deklarata e liderit suprem të Iranit, Ali Khamenei, i cili e quajti Shqipërinë “një vend të vogël dhe të keq”, për shkak të strehimit të mbi 3000 anëtarëve të opozitës iraniane MEK.

Në një intervistë për televizionin Top Channel, Rama tha se “në vigjilje të një momenti historik, pasi Shqipëria merr për herë të parë në historinë e saj një rol të rëndësishëm në skenën ndërkombëtare për kryesimin e OSBE-së, nuk jam fare i surprizuar nga deklarata në fjalë”.
“Shqipëria ka bërë atë që duhet në respekt të traditës së saj, në respekt të faktit që jemi aleatë strategjikë të SHBA dhe nuk jemi kontributorë në këtë aleancë të madhe me raketa apo bomba, por jemi kontributorë në ofrimin përmes një operacioni humanitar, të strehës për një grup njerëzish të kërcënuar me vdekje nga një regjim diktatorial”, tha Rama.
“Sa i përket aspektit të sigurisë, kemi qenë dhe jemi ngushtësisht të koordinuar me SHBA, që do të thotë që gjithnjë ka një shqetësim kur bëhet fjalë për t’u gjendur në situata kur shqetësohet një diktaturë, sidomos një diktaturë si ajo e Iranit, por nga ana tjetër ne ka momente jo vetëm kur duhet të marrim, por edhe të japim. U them të gjithë shqiptarëve që nuk duhet të ketë asnjë shqetësim, dhe SHBA-të janë shumë vëmendshme dhe të angazhuara në sigurinë e vendit tonë”, – u përgjigj Rama.
I pyetur se çfarë do të përfitojë Shqipëria nga drejtimi i OSBE-së, Kryeministri Rama theksoi se “Shqipëria ka marrë nga OSBE për shumë vite, dhe sot është momenti kur Shqipëria është në pozitën që të japë. Në radhë të parë, ky është një prestigj shumë i madh për Shqipërinë. Në radhë të dytë, sigurisht për ne do të jetë një eksperiencë e jashtëzakonshme. Ne e ndiejmë përgjegjësinë shumë të madhe, por është dhe një mundësi e jashtëzakonshme për të manifestuar ndërkombëtarisht tiparet dhe kapacitetet e një Shqipërie që paskëtaj, të jeni të sigurt që do të shihet edhe me më shumë respekt nga ata që e njohin, dhe me më shumë respekt nga ata që deri më sot nuk e njohin”.

Në përgjigje të pyetjes, nëse Shqipëria i ka kapacitetet për të drejtuar një organizatë ku aderojnë 57 vende, Rama u shprehe se “sot kemi qenë në Vjenë, në zyrat e posaçme të këtij misioni të jashtëzakonshëm që kemi marrë përsipër. Aty ka një skuadër me ekspertë shqiptarë dhe ndërkombëtarë, që janë një garanci absolute për suksesin e misionit”.

“Nesër është marrja zyrtare e drejtimit të OSBE-së dhe do t’i drejtohem të gjithë përfaqësisë së gjerë që do të jenë prezent përmes ambasadorëve të tyre, duke iu komunikuar sfidat dhe prioritetet”, – deklaroi Rama. /atsh

https://www.facebook.com/edirama.al/videos/529428740998583/?t=0

Një efektiv i policisë Rrugore në Tiranë u nda papritur nga jeta në një moshë mjaft të re. Mariglen Mestani, luftoi 12 orë me vdekjen por nuk arriti të mbijetojë, pasi u shua nga temperatura e lartë pas një infeksioni.

Marigleni punonte prej 6 vitesh si efektiv i Rrugores në Tiranë dhe u shua në moshën 27-vjeçare.

Zëdhënësi i Policisë së Shtetit, Gentian Mullai në një postim mjaft prekës për ndarjen nga jeta të efektivit të ri, thotë se ndarja e tij nga jeta duhet të shërbejë si këmbanë për zgjimin e ndërgjegjës së të gjithëve për të vlerësuar sakrificën e punonjësve të policisë.

“Mariglen Mestani, u prehsh në paqe!

12 orë luftove me vdekjen, për të shpëtuar jetën, ashtu siç e kemi edhe në misionin tonë, por kësaj here luftove për të shpëtuar jetën tënde dhe s’ia dole dot. E sonte, ti miku, shoku e kolegu ynë ndërrove banesë. E dhimbshme, e trishtueshme, pikëlluese për të gjithë ne që të njihnim e që punuam me ty.

6 vite në rrugët e Tiranës, mes pluhurit, erës, borës, ngricës, shiut e diellit, duke shërbyer me ndershmëri e përkushtim në trafikun rrugor. Sa e sa fundjava kemi ndarë bashkë në minus gradë e në 30+, për të parandaluar aksidentet rrugore, në kontrolle me drager për alkoolin.

E ti, sonte, miku ynë, s’je më fizikisht mes nesh. Ikja jote nga një infeksion i papritur dhe vrastar ka shokuar gjithë familjen tonë të madhe, Policinë e Shtetit, e cila bëri çdo përpjekje për të të shpëtuar jetën, por koha e shkurtër që na la në dispozicion e keqja ishte e pamjaftueshme për të të shpëtuar ty miku ynë.

Sot shumë statuse të janë dedikuar ty Mariglen, moshës 27-vjeçare dhe kontributit tënd, por përtej respektit pas vdekjes, ikja jote është dhe një kambanë për të zgjuar ndërgjegjen e të gjithëve, që puna dhe sakrifica e punonjësve duhet vlerësuar më shumë nga të gjithë kur jemi gjallë, kur jemi në detyrë duke shërbyer, se sakrifikojmë aq shumë, sa e keqja nuk pyet as për moshë e as për vlera.

E di që do ketë edhe nga ata që kur ta lexojnë këtë status, do heshtin për të respektuar zakonin, edhe pse mund të jenë të pakënaqur për punën apo sjelljen e ndonjërit prej nesh, por gjithsecili të mos harrojë se dhe ne jemi pjesë e juaja, lindur, rritur e zhvilluar në proporcion të drejtë me zhvillimin e shoqërisë, por kemi një gjë më shumë se ju, rrezikun për jetën e në respekt të jetës, meritojmë më shumë respekt, vëmendje, besim, bashkëpunim e mirëkuptim, që së bashku të bëjmë më të mirën.

Buzëqeshja jote, ngushëllim për të gjithë ne. Lamtumirë Mariglen Mestani. Zoti të deshi pranë e aty u prehsh në paqe”, shkruan zëdhënësi i Policisë së Shtetit, Gentian Mullai.

Nga 151 dokumente që i kërkoheshin qytetarit deri tani pranë Agjencisë Shtetërore të Kadastrës, sot janë thjeshtuar 101 prej tyre. Këto dokumente do t’i marrin vetë punonjësit e ASHK-së për qytetarin.

Kryeministri Edi Rama u ndal sot në zyrat e ADISA-s, të cilat po ndihmojnë qytetarët për 472 shërbimet e reja online, përveçse për mbi 150 shërbime qendrore dhe vendore që kanë ofruar më parë.

Pranë Agjencisë Shtetërore të Kadastrës sot mund të aplikosh për 52 shërbime online. Ka mbetur vetëm një shërbim, i cili është në proces, ai i rivlerësimit të pasurisë së paluajtshme.

Edhe pagesa nga ana e qytetarit tashmë mund të kryhet jo vetëm përmes bankës, por dhe online gjatë aplikimit, me kartë debiti apo krediti.

Kryeministri Edi Rama duke e konsideruar revolucion ofrimin e shërbimeve online, theksoi se tashmë nuk do të ketë mundësi as për sekser dhe as për zvarritje të qytetarëve.

“Faza finale që e bën të gjithë shtetin në xhepin e qytetarit është kthimi i të gjitha shërbimeve online, të mund të marrësh edhe hipotekën online”, – u shpreh Kryeministri.

Zyrat e pritjes, theksoi Rama më tej, nuk do të shërbejnë më për të të pritur qytetarin, por për të pritur aplikimet e tyre online.

“Kjo zyrë nuk do të jetë më zyrë pritjeje, por një zyrë që do të punojë me kompjuterin për të pritur kërkesat që njerëzit do të nisin nga shtëpitë e tyre. Është komplet revolucion”, – theksoi ai.

Për sa i përket moshave të caktuara që nuk do munden të kryejnë vet aplikimin online, Kryeministri theksoi se edhe ato do të gjejnë mënyrën për të aplikuar, sepse do të jetë më e lehtë për ta për të marrë shërbimin, se sa të vijnë vetë fizikisht. Ata, shtoi Rama, mund të asistohen nga të afërm të tyre.

Për shërbimet të cilat aplikimi kryhet online, por nevojitet që përgjigja të merret fizikisht, Rama tha se përgjigja do të kthehet përmes Postës.

“Qytetari do të mund të ndjekë online statusin e aplikimit të tij dhe do të informohet po online qe përgjigjja është gati dhe se mund ta tërheqë online”, – deklaroi Kryeministri./atsh

https://www.facebook.com/edirama.al/videos/507649079870523/?t=0