Lajmi i fundit

Në kuadër të masave të marra për të shmangur përhapjen e koronavirusit COVID-19, me qëllim zvogëlimin sa më shumë të kontakteve fizike në zyrat tona të Shërbimit, Drejtoria e Përgjithshme e Tatimeve fton të gjithë tatimpaguesit dhe individët e interesuar, të përdorin mënyrat elektronike të komunikimit për marrjen e shërbimeve që iu nevojiten:

Duke aplikuar online në portalin “e-Albania” për 11 shërbimet e mëposhtme:
Nr. Emërtimi i shërbimit
1 Vërtetim për pagim detyrimesh
2 Vërtetim për pagimin e kontributeve nga subjekti
3 Vërtetim për pagimin e kontributeve për individin
4 Vërtetim për posedim mjeti
5 Vërtetim për regjistrim të investitorit
6 Vërtetim për statusin e tatimpaguesit (aktiv-pasiv)
7 Vërtetim për përgjegjësitë tatimore
8 Vërtetim për tatimpaguesit e regjistruar për qarkullimin e realizuar për 3 vitet e fundit
9 Vërtetim për individ të paregjistruar
10 Lëshim certifikatë rezidence për subjekte
11 Konfirmim listëpagesash
Duke dërguar kërkesën në llogarinë e deklarimit elektronik e-filing, në menynë Çështje të Përgjithshme, për: ndryshim apo shtim të përgjegjësive tatimore, për vërtetime të ndryshme të cilat nuk mund të aksesohen nga portali “e-Albania”, apo informacione të ndryshme në lidhje me legjislacionin tatimor, etj.
Për çdo problematike që do të hasni, apo shërbime të asistencës së përgjithshme, ju mund të kontaktoni:
Nëpërmjet e-mailit apo telefonit, Zyrat e Shërbimit për tatimpaguesit në çdo Drejtori Rajonale Tatimore:
Nr Drejtoria Rajonale Pref. Nr.Tel. E-mail
1 Tatimpaguesit e Mëdhenj 04 2425902 [email protected]
2 Tirana 04 2425903 [email protected]
3 Durrësi 052 222 061 [email protected]
4 Vlora 033 237055 [email protected]
5 Berati 032 235994 [email protected]
6 Fieri 034 222 405 [email protected]
7 Elbasani 054 258 207 [email protected]
8 Korça 0822 43 304 [email protected]
9 Lezha 0215 22467 [email protected]
10 Shkodra 022 254866 [email protected]
11 Dibra 0218 222 29 [email protected]
12 Gjirokastra 084 262205 [email protected]
13 Kukësi 0242 22628 [email protected]
14 Saranda 0852 25264 [email protected]
Qendrën e Thirrjeve në numrin pa pagesë 0800 0002 si dhe Live chat nëpërmjet faqes zyrtare e internetit: https://www.tatime.gov.al/
Ndërkohë që mund të dorëzoni kërkesën tuaj në:
kutinë postare tek çdo DRT, apo
mund ta dërgoni atë nëpërmjet shërbimit postar.
Drejtoria e Përgjithshme e Tatimeve kërkon mirëkuptimin e çdo subjekti apo qytetari dhe ju fton të përdorni mënyrat e mësipërme të komunikimit, për të parandaluar sa më shumë përhapjen e virusit COVID-19./atsh

Në kuadër të masave të ndërmarra nga qeveria për të minimizuar mundësinë për përhapjen e koronavirusin, Covid 19, Shefi i Shtabit të përgjithshëm të Forcave të Armatosura, Bardhyl Kollçaku ka nisur inspektimet në të gjitha postoblloqet e ngritura në Tiranë.

Sipas njoftimit të Ministrisë së Mbrojtjes, Shefi i Shtabit të FA, Kollçaku dhe komandanti i Policisë Ushtarake, Altin Kurti, nisën inspektimet nga piramida, për të kaluar në të gjitha postoblloqet e ngritura nga FA-të dhe Policia në Tiranë.

Kollçaku deklaroi se detyrat e FA-ve janë në mbështetje të Policisë së Shtetit për të kontrolluar apo sensibilizuar qytetarët, kryesisht ata që kanë udhëtuar në Itali e Greqi. Sipas tij, nuk ka një afat se sa do të zgjasë ky plan por deklaroi se do të jenë edhe në qytete të tjera jo vetëm në Tiranë.

“Detyrat e FA-ve në këto moment janë që të jenë në mbështetje të policisë së shtetit për të kontrolluar, sensibilizuar qytetarët, kryesisht ata që kanë udhëtuar në Itali e Greqi për t’i detyruar të vetëkarantinohen. Do të vazhdojnë për aq kohë sa është e nevojshme. Planet tona janë fleksibël. Aktualisht shtrihen dhe në qytete të tjera të Shqipërisë, ka një plan të detajuar”,- deklaroi Kollçaku.atsh

Në mbledhjen e Këshillit të Ministrave, për masa të tjera për parandalimin e koronaviruesit, Kryeministri Edi Rama tha se “është e domosdoshme të kufizojmë lëvizjet duke marrë një sërë masash për kufizimin e lëvizjes, si puna nga shtëpia e një pjesë të administratës, leje pushimi nënat me fëmijë në kopshte e çerdhe, si dhe mbyllja e shërbimit ADISA dhe shërbimet do merren online, apo kufizimi i vizitave në spitale”.

Në fjalën e tij, Rama tha se është e domosdoshme të kufizojmë lëvizjet, lëvizje që në jetën e përditshme janë të nevojshme, por që nuk janë jetike dhe sot është një luftë për të mbrojtur jetën e çdo kujt rreth nesh.

“Nuk mund dot të shkojmë në klub dhe t’ja sjellim koronën gjyshes apo gjyshi. Nuk mund dot të shkojmë në palestër dhe t’ja sjellim sëmundjen, bashkëshortes shtatzënë. Nuk është një luftë që do zgjasë me vite por është një luftë që çdo minut është sa një vit. Kërkon vullnet dhe disiplinë në një të përditshme të reduktuar”, tha ai.

Për këto arsye, Rama theksoi se “nga dita e nesërme do çojmë në shtëpi të gjithë atë pjesë të administratës që mund të vazhdojë të punojë përmes kompjuterit, që bën punë zyre që kanë kompjuter dhe zakonisht bënë atë punë”.

Po ashtu, Rama tha se “për këtë arsye ne nga nesër nuk do të japim më shërbime dhe për sportelet për të gjithë aplikimet online. Për këtë arsye nesër shërbimi i ADISA mbyllet dhe të gjitha shërbimet do të merren online”.

Gjithashtu, Rama tha se “për këtë arsye të gjithë prindërve që kanë një fëmijë në moshën e çerdhes, kopshtit apo arsimit bazë, dhe që nuk janë në këtë pjesë të administratës që do të shkojnë nga shtëpia për të punuar nga shtëpia ne do t’i japim menjëherë leje për të shkuar në shtëpi dhe mbajtur fëmijë për të kufizuar kontaktet me të tjerët”.

Rama tha se do të përballemi me seriozitet me dinjitet duke kontribuuar për familjen për njëri-tjetrin dhe shoqërinë.

“Nuk do të lejojmë të shkojnë pranë spitaleve jo vetëm ata që janë të afër të sëmurëve por edhe ata të cilën në ditë të zakonshme nisen drejt spitalit për të parë njëherë se mos kanë ndonjë gjë, jo. Konsulta në spital do të bëhet sipas skenarit dhe planifikimit për gjendjen e luftës”, tha ai./atsh

Në mbledhjen e Këshillit të Ministrave ministrja e Shëndetësisë dhe Mbrojtjes Sociale, Ogerta Manastirliu ka apeluar për të të gjithë qytetarët që të mos drejtohen menjëherë në spital, por të telefonojnë 127 që të ruajnë veten dhe të tjerët.

“Çdo person të kontaktojë në numrin 127. Është i vetmi numër për personat që kanë simptoma apo kontakte në vendet e prekura. Është i vetmi numër që duhet të kontaktojnë, është numri unik. Vetëm dje kanë telefonuar 1 mijë qytetarë të cilët kanë shprehur shqetësimet e tyre dhe janë informuar. Për ato raste që ka patur indikacione, janë marrë mostrat që janë analizuar sipas protokolleve në laboratorin e virologjisë në ISHP”, tha Manastirliu .

Manastirliu apeloi që qytetarët të zbatojnë rregullat për vetëkarantinim dhe karantinim, pasi bazuar në informacionet e skenarëve do të ketë një numër në rritje të rasteve të konfirmuara.

“Dua të informojë që sipas skenarëve që tashmë janë të ndërtuar prej Komitet te Koronavirusit që janë fleksibël, dinamik të ndërtuar nga komiteti i ekspertëve, sipas tyre parashikohet dhe është e pritshme për një rritje të numrit të rasteve. Ky është momenti që ne të kërkojmë që qytetarët të respektojnë masat”, tha Manastirliu.

“Jemi të vendosur për karantinën e detyrueshme, sido që të jetë ne do kujdesemi për ata që janë më të pambrojtur në këtë situatë, për të moshuarit dhe do të kujdesemi që të mos përhapet ky virus”, -tha Manastirliu. /atsh

Kryeministri Edi Rama ka apeluar sot të gjithë që të shmangin sa më shumë lëvizjet për të mos përhapur koronavirusin.

“Fëmija yt nuk rrezikohet në jetën e tij larg qoftë, por duke pasur kontakte të afërta fizike jashtë shtëpisë mund ta transportojë virusin jashtë shtëpisë. Vajza dhe djem që me të gjithë të drejtën e Zotit dhe të robit kanë dëshirë që të shkojnë dhe të argëtohen në mbrëmje duhet ta dinë që u bënë shumë party në Milano me temën ne s’pyesim për koronën. Ashtu sikundër u bënë edhe shumë shfaqje aerobike në palestra ne i thyejmë brinjët koronës. Nuk janë gjëra të duhura, përkundrazi janë me dëm të madh për të gjithë’, tha Rama.

“E dyta ti mund të mos e marrësh vesh kurrë që e kishe koronavirusin. 80% s’kanë për ta marrë vesh kurrë sepse e ke dhe s’ka asnjë simptomë, por t’i e transporton dhe tek dikush shfaqet një simptomë dhe tek dikush tjetër që është hallka më e dobët godet. Kjo është arsyeja që nuk është çështja sa trima apo guximtarë jemi, por sa të vetëdijshëm dhe sa solidarë jemi. Sa të gatshëm jemi, duke sakrifikuar një stil jetese që është e përditshmja jonë dhe duke e vendosur të përditshmen tonë në atë pikë ku jemi të frontit të madh të një lufte me një armik të padukshëm”, theksoi Rama.

Për mediat, Rama tha se, ”sigurisht që mund të jemi të detyruar që të shkojmë larg edhe në raport me mediat, por midis të shkuarit larg në raport me mediat, për t’u siguruar që nuk ka burime faktesh alternative, sepse faktet janë një. Mendimet janë alternative dhe me këtë rast nuk është koha për të dhënë mendime për çështje që janë strikte të kufizuara në fushën e një grupi të ngushtë njerëzish, ekspertësh dhe autoritetesh të shëndetësisë, por padyshim që shumë më mirë është që me atë fuqi dhe me atë mundësi për të komunikuar me ata që ju ndjekin të bëni më të mirën që në këtë luftë të fitojë qetësia, vendosmëria, informacioni dhe gatishmëria dhe jo paniku, pasiguria, ankthi e kështu me radhë”.

“E përsëris këtu s’ka vend për frikë. Nëse sot mesazhi im ishte ndryshe nga ditët e tjera, sepse sot është një ditë ndryshe nga ditët e tjera. Nesër do të jetë një ditë tjetër nga ditët e tjera. Vetëm kështu ne mund ta fitojmë këtë luftë. Ndryshe na merr përpara inercia e të marrurit me sportivitet të një beteje që është luftë nuk është lojë”, tha Rama./atsh