Lajmi i fundit

Kryeministri Edi Rama deklaroi sot se “pas publikimit të paketës së zgjeruar të mbështetjes për 176 mijë familje, bashkë me familjet që u përfshinë në paketën e parë, ne jemi në një shifër që prek dhe ndihmon drejtpërdrejt më shumë sesa gjysmën e të punësuarve në sektorin privat në Republikën e Shqipërisë”.

Kryeministri Rama sqaroi sot qytetarët mbi pyetjet e ndryshme që kanë lidhur me paketën e zgjeruar të mbështetjes financiare.

Rama tha se “ne duam që kjo pagë prej 400 mijë lekësh të vijë drejtpërdrejt tek qytetari, jo të kalojë nëpërmjet pronarit apo kompanisë”.

Duke folur mbi përzgjedhjen e punonjësve, Rama tha se është bazuar në listëpagesat e paraqitura nga kompanitë.

“Të gjithë ata që figurojnë të larguar, të papaguar javë pas jave në këto lista janë të identifikuar dhe do të duhet vetëm që në momentin që do të hapet faqja përkatëse në adresën online të Drejtorisë së Përgjithshme të Tatimeve, thjesht të konfirmojnë. Ne e disponojmë emrin e qytetarit i cili duhet vetëm të konfirmojë”, tha Rama.

Ai theksoi se “është një konfirmim shumë i thjeshtë, pa asnjë procedurë verifikimi siç ndodh me paketën e parë ku është e detyrueshme të bëhet një verifikim edhe në terren nga inspektorët”. “Për paketën e parë është një procedurë pak më e gjatë. Sot që flasim janë paguar 31 mijë persona, mbeten ende edhe 40 mijë të tjerë pa u paguar”, tha Rama.

Kryeministri siguroi se “askush nuk do të mbetet pa marrë pagën, por verifikimi kërkon kohën e vet sa i përket kontabilitetit shtetëror”.

Ndërsa për personat e përfshirë në paketën e zgjeruar është thjesht dhe vetëm një klik, një konfirmim që “po, jam unë dhe kaq”.

“Të gjithë ata që janë si në kategorinë e parë dhe të dytë, do t’i marrin paratë në llogarinë e tyre të drejtpërdrejtë, jo duke kaluar nga pronari. Ne duam që paratë siç janë të vijnë drejtpërdrejt në arkën e familjes tuaj”, tha Rama. /atsh

Ashpërsimi i Kodit Penal kundrejt mosrespektimit të masave të sigurisë në periudhën e pandemisë do të kenë afat vetëm për periudhën e pandemisë.

Kryeministri Edi Rama, gjatë një komunikimit me qytetarët tha se masat ndëshkimore do të jenë ekzemplare, pasi nuk do lejohet që rezultati i kësaj lufte të cenohet nga disa të papërgjegjshëm.

“Ne do të miratojmë futjen në Kodin Penal të masave që lidhen me situatë epidemie, që nuk i kemi pasur fare në Kodin Penal, ku kemi patur karantinimin e kafshëve, por jo të njerëzve. Këto janë kushte lufte, masat janë për këtë periudhë dhe nuk janë për t’u shtrirë përtej periudhës së epidemisë dhe ndëshkimet do të jenë ekzemplare, shembullore për të gjithë ata që do na kërcënojnë rezultatin që kemi arritur dhe fitoren e kësaj lufte”, – tha Rama.

“Kush thotë që gjobat janë për popullin, ai është një individ, nuk është populli, pasi populli nuk i shkel rregullat, populli po t’i kishte shkelur rregullat epidemia do kishte shkaktuar shumë më shumë të sëmurë e mijëra të vdekur. Por jo, gjobat janë për të pabindurit, të papërgjegjshmit, për fajtorët. Nuk janë për të mbushur buxhetin, nuk janë fare për këtë. Nuk mbushet buxheti për ato fare pak gjoba, se janë pak në raport me popullin, por gjobat janë për të dhënë mesazhin se kjo luftë, por dhe jo vetëm kur ka luftë, ka rregulla, jo kush është më i forti”, – tha Rama. /atsh

Shërbimi i gjendjes civile është funksionale vetëm për rastet e lindjeve apo të vdekjeve për të bërë çregjistrimin.

Drejtori i Gjendjes Civile, Bledar Doracaj, gjatë një interviste televizive theksoi se janë vetëm dy shërbime që ofrohen sot nga zyrat e gjendjes civile, për shkak të situatës së krijuar nga COVID-19

“Të vetmet shërbime që ofron shërbimi i gjendjes civile janë lindjet dhe vdekjet. Të gjitha shërbimet e tjera nuk ofrohen sot, për arsye të radhës në sportele dhe përcjelljes së infeksionit”,- tha Doracaj.

“Prej disa ditësh në të gjitha sportelet ofrohet shërbimi i lindjeve dhe vdekje. Isha sot personalisht tek materniteti “Koço Gliozheni” ku ndoqa nga afër procesin, i cili po ecën mirë në të gjithë vendin dhe para datës 7 prill e kishim të bllokuar për shkak të pandemisë, tashmë e ofrojnë, por nëpunësit janë me masa mbrojtëse”,- shtoi Doracaj.

“Ne ofrojmë shërbime në 4 maternitete, 2 shtetërore dhe 2 private, dhe në të gjitha maternitetet në vend, në maternitetet e mëdha kemi një punonjës përgjatë gjithë kohës atje, ku ka më pak nëpunësi funksionon sapo merret në telefon, dhe atje ka gjithë infrastrukturën teknike për ta kryer shërbimin në maternitet”,- tha Doracaj.

“Martesa është një kontratë ligjore, por dhe një traditë, sot kur tradita nuk mund të respektohet, edhe kjo pjesë ligjore, akti i martesës para nëpunësit të gjendjes civile, nuk mund të ofrohet. Nuk është kontrata para nëpunësit ajo që i bën dy njerëz të bashkëjetojnë apo të krijojnë familje”,- u shpreh Doracaj.

Prej ditës së shtunë ka filluar procesi i shpërndarjes së kartave të identitetit dhe të pasaportës, biometrike, por dhe ky proces realizohet përmes masave të rrepta të sigurisë

“Sot është dita e dytë, po ecën normalisht mirë. Qytetarëve u kërkohet të ruajnë distancën fizike, si dhe të jenë të pajisur me maska dhe doreza. Pa këto masa mbrojtëse nëpunësit nuk do t’i ofrojnë shërbim. Mesazhi lajmëron qytetarin të paraqitet në orën e caktuar, 10-15 minuta distancë nga njëri-tjetri”,- tha Doracaj.

“I/E Nderuar! Në datë 11 Prill 2020 ora xx:yy, ju lutemi të tërhiqni Pasaportën Tuaj pranë sportelit Aleat. Respektoni orarin! (nëse paraqiteni me vonesë nuk mund të merrni shërbimin). Ruani distancën 2 metër nga qytetarët e tjerë, mbani maske dhe doreza, përndryshe nuk mund të procedojmë me procesin e shpërndarjes së Dokumentit. Tregojini këtë SMS punonjësve në hyrje të Rajonit të Policisë. Ju falënderojmë në emër të Ministrisë së Brendshme, ALEAT”, – është teksti i mesazhit që njofton qytetarët./atsh

Përveç mjekëve dhe infermierëve që janë në vijën e parë të luftës ndaj COVID-19, edhe epidemiologët në qytete të ndryshme të vendit po bëjnë një punë të palodhur për gjurmimin e rasteve.

Njësia Vendore e Kujdesit Shëndetësor Vlorë solli sot shembullin e epidemiologut Agron Bashllari dhe laborantëve të virologjisë për punën e palodhur derë më derë për të bërë gjurmimin e rasteve.

“Heronj që testojnë orar pa orar edhe në mesnatë, duke bërë të pamundurën për të kapur në kohë rastet dhe për të frenuar përhapjen e epidemisë së COVID-19. Faleminderit epidemiologut Agron Bashllari dhe laborantëve të virologjisë. Punë e shkëlqyer në gjurmimin e rasteve”, – shprehet NJVKSH Vlorë./atsh

Gjatë 24 orëve të fundit, 15 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 232.

Ministria e Shëndetësisë ka bërë të ditur se në shërbimin infektiv aktualisht janë 43 të shtruar. 7 pacientë janë në terapi intensive, ndërsa 2 prej tyre janë të intubuar.

Në spitalin COVID 2 “Shefqet Ndroqi”, janë 9 pacientë të shtruar. 7 pacientë janë në terapi intensive, ndërsa 5 prej tyre janë të intubuar.

Në dy spitalet COVID aktualisht po marrin shërbim 52 pacientë. Ndërkaq, betejën me këtë sëmundje e kanë humbur deri tani 23 qytetarë, megjithë përpjekjet e jashtëzakonshme të personelit shëndetësor./atsh