Nesër nis viti i ri shkollor, ku pas mësimit online dhe pushimeve verore, shkollat rihapin dyert për të pritur nxënësit, por këtë herë nën masa të rrepta higjieno- sanitare dhe distancimi social, kushte të diktuara nga pandemia e COVID-19.
Me nisjen e shkollave Ministria e Shëndetësisë dhe Mbrojtjes Sociale ka bërë një apel kundrejt të gjithë mësuesve, prindërve, nxënësve, të tregojnë kujdes me zbatimin me përpikëri të masave që frenojnë përhapjen e COVID-19.
Ministria e Shëndetësisë apelon për respektimin e distancimit social, vendosjen e maskave ose barrierave mbrojtëse, larjen ose dezinfektimin e duarve, ajrosjen e ambienteve, matjen e temperaturës së nxënësve çdo ditë. Të gjitha institucionet arsimore që fillojnë ditën e nesërme mësimin duhet të zbatojnë me rigorozitet Udhëzimin mbi masat anti-COVID19 me qëllim parandalimin e përhapjes së koronavirusit.
Strukturat e sistemit shëndetësor janë në gatishmëri për t’ju përgjigjur çdo problematike, si dhe për të identifikuar dhe izoluar në kohë çdo rast të dyshuar.
Ndërsa më herët ministria e Arsimit ka nxjerrë protokollin e sigurisë që duhet zbatuar për hapjen e shkollave dhe se si do të veprojnë në rast se ka nxënës apo mësues të prekur nga COVID-19.
Në festivalin italian të muzikës, Sanremo këtë vit ishte pjesë edhe moderatorja e njohur Alketa Vejsiu.
Mirëpo duket se skena e “Ariston” i ka sjellë fat moderatores, pasi mediat italiane shkruajnë se Alketa do të jetë shtrish pjesë e Sanremo, si partnere e drejtuesit artistik Amadeus.
Mirëpo kësaj radhe, Alketa nuk do të jetë një nga prezantueset në skenë, por do të ketë rol tjetër.
Roli i saj nuk është zbuluar, teksa deri në Sanremo 2021 i cili do të mbahet në muajin mars, pritet të mësohet pozicioni i saj. /noa.al
Baba Mondi i ftuar në emisionin “Rudina”, ka folur për rolin e gruas në familje. Ai është shprehur se një grua e mirë mund të mbajë familjen e bashkuar dhe jo të përçarë, madje ato udhëheqin edhe njerëzimin.
Baba Mondi: Familjarët duhet të jenë të bashkuar dhe jo të përçarë. Këtu rol të madh luajnë gratë, nënat, motrat, të cilat duke qenë të përgatitura, ato e udhëheqin dhe njerëzimin.
Gratë janë nënat, ato rrijnë me fëmijët, ato i edukojnë, kjo është bektashizmi. Në bektashizëm falen në një faltore edhe burrat edhe gratë, nuk ndahen veç.
Rudina Magjistari: Për këtë arsye ju bëni diferencën dhe konsideroheni si një besim shumë i emancipuar.
Baba Mondi: Kush e ka gruan të mirë është i ngrënë dhe i pirë. Parajsa ndodhet në këmbët e nënës.
Rudina Magjistari: Në këto kohë të vështira që po jetojmë prej Covidit, cili është mesazhi që do jepnit ju për të gjithë njerëzit?
Baba Mondi: Njerëzit nuk duhet të tremben, nëse besojnë Zotin, nuk duhet të kenë frikë. Zoti na udhëheq neve për të mos gabuar dhe për të na mbrojtur nga çdo gjë e keqe.
Çfarë është caktuar për njeriun, do e marrë ai njeri, prandaj duhet të kenë kujdes njerëzit, rregullat duhet të zbatohen dhe nuk duhet të kenë frikë sepse kanë Zotin me vete.
Siç thotë një ajet Kuranor “nuk mund të të zërë as qielli, as toka as dheu, të zë zemra e besimtarit të bindur. Familjarët duhet të jenë të bashkuar dhe jo të përçarë.
Rudina Magjistari: Baba Mondi keni të dhëna, sa besimtarë bektashinj ka në Shqipëri?
Baba Mondi: Gati gjysma e popullsisë shqiptare janë besimtarë bektashinj.
Rudina Magjistari: 50%?
Baba Mondi: Po, pavarësisht se politika apo regjistrimet që janë bërë janë të gabuara. Ne kemi filluar regjistrimin vetë për t’i treguar njerëzve se sa bektashinj ka në Shqipëri. Nga 70% e myslimanëve në Shqipëri, 50% janë bektashinj.
Rudina Magjistari: Këto janë statistikat dhe të dhënat tuaja?
Baba Mondi: Jo jo janë dokumentet edhe sikur të mos duam ne. Merren regjistrimet e Zogut dhe jo regjistrimet sipas politikës. Ne jemi 2%. 2% jemi ne në Shqipëri? Nuk janë 2% por kjo është politika që ka ngatërruar gjëra të tilla. Megjithatë ne nuk kemi kundërshtuar pavarësisht se kemi filluar regjistrimin vetë. Ka 848 tyrbe në Shqipëri dhe 116 teqe.
Rudina Magjistari: Çfarë sekreti ka ky mali i Tomorrit?
Baba Mondi: Vendet e mia janë gjithmonë vende të cilat kanë energji pozitive. Të çlodhin nga ajo rrumuja, ngarkesa që merr gjatë ditës apo gjatë vitit. Shenjtorët që kanë fuqi si Zoti, të lehtësojnë barën. Ti prandaj futesh e falesh për të shkuar mbarë dita, muaji, familja dhe shoqëria ku jeton. Lutjet Zoti t’i dëgjon edhe shenjtorët na i plotësojnë dëshirat të cilat japin atë enegji edhe atë frymëzim që ne të përballojmë vështirësitë.
Rudina Magjistari: Cilat janë pikat më të forta përsa i përket kësaj energjie të bektashinjve në Shqipëri?
Baba Mondi: Është Mali i Tomorrit, Sarisalltiku në Krujë dhe Kaptina e Martaneshit, këto janë peligrinazhe jo vetëm shqiptare por edhe ndërkombëtare. Të gjitha teqet janë të shenjta, edhe kryegjyshata botërore. Njerëzit vijnë një kryegjyshatë për t’u shkarkuar nga energjia negative. Zoti dhe shenjtorët e dinë se për çfarë shkojmë ne dhe për çfarë lutemi dhe na japin frymëzim për të përballuar vështirësitë e kësaj bote.
Fytyra e re e Policisë së Shtetit synon rritjen e bashkëpunimit me qytetarët dhe rritjen e sigurisë publike.
Kreu i Policisë së Shtetit, Ardi Veliu, gjatë prezantimit të forcës së posaçme “Shqiponjat” të Drejtorisë Vendore të Policisë Vlorë, të premten, nënvizon se shtimi me 500 vende në strukturën e Policisë, synimi i madh dhe i vetëm është të garantojmë rritjen e rendit dhe sigurisë publike
“Sot në Vlorë, në takim e tetë, prezantojmë skuadrën e re “Shqiponja të krijuar falë mbështetjes së qeverisë dhe në veçanti të Kryeministrit Rama e Ministrit të Brendshëm Lleshaj, që mundësuan shtimin me 500 vende në strukturën e Policisë, duke krijuar në çdo Drejtori Vendore, forcën e posaçme, si dhe shitnim në pikat e kalimit dhe në kufirin e gjelbër me vajza e djem të rinj”,- u shpreh Veliu.
Veliu theksoi se “kjo nuk është një reformë, kjo është Policia moderne që kemi filluar të bëjmë realitet së bashku me qytetarët”.
“Fytyra e re e Policisë së Shtetit, me këta të rinj e të reja, nuk është më ngjallja e frikës ndaj të gjithë qytetarëve, por bashkëpunimi me qytetarët e ndershëm në misionin e përbashkët për ta bërë shoqërinë dhe vendin më të sigurt, zhvillimin ekonomik, turizmin, ku veçoj potencialet e mëdha që ka gjithë zona e Vlorës në këtë aspekt.
Gjatë gjithë këtyre ditëve, më kanë ardhur qindra mesazhe e telefonata nga qytetarë të ndryshëm, përfaqësues institucionesh, intelektuale të fushave të ndryshme, të cilët më kanë shprehur vlerësim për krijimin e kësaj force, pasi po krijon që në fillesat e saj një perceptim dhe opinion pozitiv në komunitet, por edhe duke më sugjeruar e bërë prezent shqetësimet e tyre”,- shtoi Veliu.
“Këto qindra mesazhe e telefonata të marra posaçërisht për “Shqiponjat”, sugjerimet dhe vërejtjet e tyre, më kanë inkurajuar, si Drejtor i Përgjithshëm që së bashku me drejtuesit e tjerë të Policisë dhe me mbështetjen e Ministrit të Brendshëm të punojmë më shumë e të gjejmë forma e metoda sa më efikase që çojnë në rritje të besimit të komunitetit te Policia, në rritje të parametrave të sigurisë dhe në goditje më të ashpër të krimit. Ky është shembulli më i mirë se siguria nuk mund të jetë sipërmarrje vetëm e policisë. Përkundrazi, është sipërmarrje e përbashkët e shoqërisë, qytetarëve, biznesit, shoqërisë civile, medias, institucioneve, drejtësisë, dhe sigurisht, me rolin specifik që luan Policia e Shtetit”,- tha Veliu.
Kreu i Policisë së Shtetit bëri të ditur se “bëhet fjalë për ndryshime në mënyrën e policimit në komunitet, struktura më efikase për të kontrolluar më mirë territorin dhe për t’iu shërbyer më mirë qytetarëve përmes shërbime online, trajnimin e vazhdueshëm të punonjësve të Policisë, pajisjen me bazë logjistike dhe në rinovim mbi 30 % të flotës së automjeteve, ripërtëritjen e moshës së Policisë. Janë mbi 2 mijë të reja e të rinj që i janë bashkuar Policisë së Shtetit”.
“Aktualisht jemi në një proces rekrutimi, i cili fillon ditën e mërkurë, në 16 shtator, me fazën e parë të testimit me shkrim. Në këtë fazë janë mbi 2 100 aplikantë – për 350 vende, çka tregon një interes të madh të të rinjve për të qenë pjesë e Policisë së Shtetit”,- tha Veliu.
Kryepolici tha se Vlora paraqitet me parametra relativisht normal sa i takon sigurisë dhe rendit. “Është një qark me tendencë kriminale të trashëguar. Ndaj puna e Policisë pavarësisht sa efektive ka qenë, nuk është mbështetur gjithmonë nga gjyqësori ndër vite, çka ka bërë që shumë elemente kriminale të mos dënohen nga drejtësia e vjetër. Tashmë me krijimin e drejtësisë së re besojmë se do ketë një bashkëpunim dhe koordinim të veprimeve hetimore, për të ndëshkuar me ligj ata që tentojnë të kryejnë krime ndaj personit, ndaj pronës, trafiqe të paligjshme dhe kultivim e trafikim të lëndëve narkotike. Pas Prokurorisë së posaçme, BKH është një garanci më shumë në këtë luftë, kundër krimit të organizuar dhe korrupsionit”,- tha Veliu.
“Strukturat që operojnë në Vlorë kanë përballuar me sukses luftën kundër kultivimit të kanabisit, sezonin turistik, ngarkesën e pandemisë, parandalimin e trafiqeve të paligjshme në rrugë detare, duke bashkëpunuar edhe me homologët Guardia di Finanza-s, si dhe në parandalimin dhe goditjen e krimit në përgjithësi”,- nënvizoi Veliu. /atsh
Skuadra “Shqiponja” në Vlorë do të jetë më e madhja në vend, pas Tiranës, tha ministri i Brendshëm Sandër Lleshaj gjatë ceremonisë së prezantimit të kësaj njësie në Vlorë.
Në takim morën pjesë drejtuesit më të lartë të pushtetit vendor, drejtuesit kryesorë të Policisë së Shtetit e zyrtarë të tjerë vendorë.
Ministri Lleshaj përsëriti apelin për të rinjtë universitarë që t’i bashkohen Policisë së Shtetit për ta luftuar krimin në ato hapësira ku kërkohen dije të posaçme siç janë hapësira kibernetike, transaksionet bankare etj. Lleshaj u shpreh gjithashtu se programi i rritjes në numër, cilësi dhe pajisje i Policisë së Shtetit, do të vijojë edhe në të ardhmen në mënyrë që policia jonë të këtë një nivel sa më të lartë profesional.
“Sot ne vijmë në Vlorë për të prezantuar një risi, për të prezantuar një strukturë të re, strukturën e posaçme operacionale “Shqiponja”, e cila me sa duket në Vlorë ka edhe madhësinë përkatëse, që i shkon Vlorës, pra është më e madhja nga numri për strukturat e ngritura në në qarqet e tjera, përjashtuar Tiranën”, – thekson Lleshaj.
“Sigurisht që sot kjo njësi vjen si një aset i plotë, një njësi e kompletuar, së pari me njerëzit e saj, djemtë dhe vajzat e saj, të cilët janë trajnuar, janë përzgjedhur në kuadër të një procesi intensiv përzgjedhje, ndërmjet mijëra të tjerëve. Janë trajnuar, pajisur me gjithçka, pra është një skuadër e plotë që i ka të gjitha. Ka njerëzit, ka mjetet, ka motivimin, ka kualifikimin, ka dëshirën, ka mbështetjen e të gjithëve dhe prandaj besoj që kjo është mënyra për të prezantuar dhe për të filluar një projekt të ri të madh”, – u shpreh Lleshaj.
“Ne do ta vazhdojmë me vendosmëri kursin e ndjekur gjatë viteve të fundit për ta shtuar policinë në numër, për ta modernizuar atë në pajisje, për ta perfeksionuar atë në trajnim, në kualifikim dhe për ta mbështetur atë në të gjitha aspektet e mundshme. Janë dy tendenca, janë dy grafikë pas meje, që tregojnë dy tendenca të kundërta me njëra-tjetrën. Është një grafik që rritet dhe ky është grafiku i numrit të policisë, në këto vite, i cili është shtuar në mënyrë të ndjeshme, 17% është shtuar numri neto i punonjësve të policisë që nga viti 2013, duke arritur sot një nivel të pranueshëm, ndonëse jo stacioni fundor.
Ndërkohë ka një tendencë tjetër, ka një grafik tjetër, që është grafiku në rënie i të gjitha figurave të krimit në Shqipëri. Mbrapa meje është paraqitur vetëm një tendencë, tendenca e uljes së numrit të vrasjeve, e cila ka shkuar sot në gjysmën e atyre që ishin në 2013. Por nuk janë vetëm vrasjet si tregues, janë të gjithë indikatorët e tjerë që masin nivelin e rendit dhe sigurisë publike, që janë në këtë tendencë rënieje, pra përmirësimi të vazhdueshëm”, – theksoi Ministri i Brendshëm.
“Përgjigjja për pse-në e këtij zhvillimi pozitiv, për pse-në e këtij suksesi është pikërisht investimi serioz në sigurinë e vendit, në Policinë e Shtetit, në organet e tjera ligj zbatuese. Tashmë përditë e më tepër siç jeni në dijeni edhe në sistemin e drejtësisë”, – sqaroi Lleshaj.
“Përveç shtimit të numrit të policisë ne kemi ndjekur edhe një politikë të shtimit të kapaciteteve të saj, pra nuk kemi shtuar thjesht numrin, nuk kemi shtuar njësitë ekzistuese, apo kapacitetet ekzistuese, por kemi ngritur kapacitete të reja të munguara për t’iu përgjigjur sfidave të reja, të cilat janë të shumta dhe ndryshojnë përditë. Për këtë arsye e kemi krijuar strukturën e skuadrës “Shqiponja”, në të gjithë vendin”, – tha ai.
“Po përveç këtyre kemi krijuar një numër të konsiderueshëm njësish të reja të specializuara në nivelin qendror duke filluar me njësinë “E”, që është njësia e luftës kundër krimit ekonomik; me njësinë “I”, që është njësia e inteligjencës; me njësinë “C”, që është njësia e luftës kundër krimit kompjuterik dhe atij kibernetik; me njësinë “K” që është njësia e kapjes së personave që i janë shmangur drejtësisë në vite; dhe me OFL-në që është struktura e ngarkuar me luftën kundër aseteve kriminale. Thelbi i të gjithë kësaj përpjekjeje është një – të ngushtojmë hapësirën e krimit dhe të mundësojmë që krimi të sulmohet nga të gjitha anët, një sulm koncentrik, jo vetëm ndaj individëve që bëjnë vepra kriminale, por ndaj pasurive të tyre, ndaj aseteve të tyre, ndaj lidhjeve të tyre, ndaj ndikimit të tyre e kështu me radhë”, – theksoi Lleshaj.
“Siguria është një e mirë e madhe publike, e cila nuk mund të ndërtohet vetëm nga policia, vetëm nga organet ligjzbatuese. Ajo ndërtohet nga pjesëmarrja e qytetarëve. Për këtë arsye na duhet që këtë ta konsiderojmë drejtimin e parë të punës sonë, marrëdhënien për të fituar qytetarët, për t’u bërë palë me to, për të qenë pjesë e tyre dhe jo përballë tyre. Asnjëherë përballë tyre, gjithmonë në krah dhe mes tyre edhe gjithmonë përballë krimit. Kjo është deviza që duhet të ndjekim, dhe me këtë rast u uroj të gjithë djemve dhe vajzave që i bashkohen sot skuadrës së re “Shqiponja” në Vlorë, punë të mbarë, faqebardhë. Ndihuni me fat se jeni në Vlorë. Jo se të tjerët nuk janë me fat, por ju duhet të jeni me fat ngaqë jeni në Vlorë, jeni në këtë peizazh të mrekullueshëm, në këtë vend me potencial të jashtëzakonshëm turistik, kulturor, shoqëror dhe shpreh bindjen që ju do ta ngrini më lart imazhin e Policisë së Shtetit, do ta forconi më tej marrëdhënien e saj me komunitetin dhe do ta fuqizoni më shumë efektivitetin e saj në luftën kundër krimit dhe do të shërbeni më mirë për të vendosur parametra më të larta të rendit dhe sigurisë publike”, – përfundoi Lleshaj./atsh
Bëhet me dije se sot është ndarë nga jeta në moshën 83 vjeçare një prej figurave të shquara të stomatologjisë shqiptare, mjeku stomatolog Zenel Kokomiri. Lajmin e hidhur të ndarjes së tij nga jeta e ka dhënë urdhri i Stomatologjisë Shqiptare, i cili përmes një postimi shpreh ngushëllime për ndarjen e tij nga jeta.
Ai ishte një ndër themeluesit e katedrës së “Terapisë Stomatologjike” në Fakultetin e Mjekësisë, Dega Stomatologji.
Postimi i Urdhrit të Stomatologjisë:
Është ndarë nga jeta në moshën 83 vjeçare një ndër figurat e shquara të stomatologjisë shqiptare, mjeku stomatolog Zenel Kokomiri. Ai ka lindur në qytetin e Korçës 26 Prill 1937. Në vitin 1954 mbaroi arsimin e mesëm profesional (Politeknikumin Mjekësor të Tiranës). Filloi Fakultetin e Mjekësisë , Dega Stomatologji në vitin 1959 dhe u diplomua si mjek stomatolog në vitin 1964, brezi i parë i mjekëve stomatologë shqiptarë.
Ai ishte një ndër themeluesit e katedrës së “Terapisë Stomatologjike” në Fakultetin e Mjekësisë, Dega Stomatologji.
Dr.Zeneli që në fillimet e veta si pedagog i Stomatologjisë u shqua si tepër i talentuar në kërkimin shkencor dhe në kuturën e tij të gjithëanëshme gjë e cila e shënjestroi për një persekutim të pastër politik me regjimin e kohës.
Dr.Zenel Kokomiri si një intelektual elitar i viteve ’60, ’70 nuk u mposht nga persekutimi asnjëherë, por vazhdoi kërkimin shkencor si rrallëkush në fushën e Stomatologjisë.
Edhe sot stomatologët e parë shqiptarë e pëmendin si pedagog të talentuar Dr.Zenelin për vetë peripecitë e jetës. Doktori gjithë jetën ia kushtoi vetëm dhe vetëm Stomatologjisë dhe kërkimit shkencor në këtë fushë.
Në 100-vjetorin e Pavarësisë Dr .Zenel Kokomiri nderohet nga Ministria e Shëndetësisë me çertifikatë mirënjohjeje se bashku me 72 mjekë në të gjithë vendin.
Sot Stomatologjia shqiptare humbi një nga vlerat më të shquara të kërkimit shkencor në këtë fushë.
Në emër të Urdhrit të Stomatologut të Shqipërisë dhe gjithë dentistrisë shqiptare i shprehim ngushëllimet familjes dhe miqve e kolegëve të tij!
Covid është përhapur frikshën në burgun e Drenovës ku 2 prej të dënuarve kanë ndërruar jetë, njëri prej të cilëve vetëm një ditë më parë.
Dhimitraq Jani, i cili ka nipin që vuan dënimin, i shqetësuar për këtë situatë ka shkuar ta takojë sot në burg.
Ai është paraqitur këtë mëngjes në ambientet e burgut të Drenovës për të mësuar më shumë për të afërmin e tij për të cilin shprehet se ka 4 muaj pa e parë.
“Kam ardhur për nipin, ka hyrë brenda për një çështje sherri, plagosi me thikë dikë. Sot erdha për ta takuar por nuk më lanë të futem, nuk i dija rregullat” tha ai.
“Më ka marrë malli për të kam 4 muaj që se kam parë. Më thanë që të flas në ‘skype’, po ku di unë. Unë jam 85 vjeç”.
“Këtu erdha se i solla ca gjëra nipit. Nuk vij dot ta takoj. Frikë kemi shumë por ishallah nuk ndodh gjë, ndaj erdha ta takoj”, u shprehet i moshuari për mikrofonin e ABC News.
