Aktualitet

Voton senatori italian me shtetësi shqiptare: Vota është fitore e madhe, s’duhet të jetë kurrë problem

Aktualitet / /

Këtë të dielë, qendrave të votimit në Tiranë i janë drejtuar edhe të huajt të cilët kanë marrë shtetësi shqiptare. Një prej tyre është edhe senatori Italian Luciano D’Alfonso, i cili nga viti 2003-2009 ka qenë kryebashkiak i Peskarës dhe ka shërbyer si President i rajonit të Abruzzos në Itali.

Në një prononcim për mediet, Luciano D’Alfonso theksoi se i është drejtuar kutisë së votimit pasi vota është një fitore e madhe prej së cilës nuk duhet hequr dorë. Ai nënvizoi se vota nuk mund të jetë kurrë problem, ndërsa theksoi se të votosh do të thotë edhe të vlerësosh, të njohësh rrugën e madhe që po bën një qytet si Tirana, që gjithnjë e më shumë po shndërrohet në një qytet referues në të gjithë botën.

“Të votosh nuk mund të jetë kurrë një problem, sidomos për zgjedhjet vendore. Të votosh do të thotë edhe të vlerësosh, të njohësh rrugën e madhe që po bën një qytet si Tirana që gjithnjë e më shumë po shndërrohet në një qytet referues në të gjithë botën. Tirana po kthehet kësisoj në një kryeqytet botëror, pra jo vetëm i Shqipërisë. Kështu që, të votosh do të thotë të shprehësh vlerësimin tënd. Unë vij nga një shtet i madh siç është Italia, edhe kur ka probleme politike nuk mund të heqësh dorë nga vota. Vota është një fitore e madhe”, tha D’Alfonso.

Ai iu drejtua me një mesazh edhe të huajve të tjerë me të drejtë vote në Shqipëri. “Që duhet mbështetur kjo rrugë e madhe drejt Europës që vë përballë si demokracinë kombëtare të Shqipërisë, ashtu edhe demokracinë lokale të qyteteve si Tirana. Punë të mbarë kryetarëve të bashkive, një shtrëngim dore për gjithë klasën politike. Unë uroj që të kthehet arsyetimi dhe bashkëpunimi në të gjitha nivelet institucionale. Shqipëria duhet të jetë një dritë kalimi i Ballkanit drejt Europës”, deklaroi D’Alfonso./atsh

Voton senatori italian me shtetësi shqiptare: Vota është fitore e madhe, s’duhet të jetë kurrë problem Read More »

Zgjedhjet lokale, radhë të gjata në qendrat e votimit në kryeqytet

Aktualitet, Lajmi i fundit / /

Që prej orës 7:00 të ditës së sotme ka nisur votimi në të gjitha qendrat e votimit për zgjedhjen e kryetarëve të rinj të bashkive dhe këshillave bashkiak.

Votimi ka vijuar normalisht. Ndërkohë është vënë re se radhë të gjata votuesish janë krijuar në qendrën e votimit ‘At Zef Pllumi’ në Bashkinë Tiranë.

Qytetarët kanë mbërritur prej orëve të para të mëngjesit, në 07:00 kur janë hapur qendrat, për të votuar për zgjedhjet lokale.

Në këtë qendër votimi vihet re pjesëmarrje e lartë e votuesve.

Edhe në qendrat e tjera të votimit në kryeqytet, ka vijuar normalisht procesi i votimit dhe pjesëmarrja e qytetarëve.

Pjesëmarrje e lartë e qytetarëve për të votuar është vënë re edhe në qendrën e votimit në Kashar ku qytetarët kanë mbërritur prej orëve të para të mëngjesit./atsh

Zgjedhjet lokale, radhë të gjata në qendrat e votimit në kryeqytet Read More »

Rama: Sot mësimi historik se nuk luhet me popullin

Aktualitet, Lajmi i fundit, Votime Sondazhe / /

Kryeministri Edi Rama votoi sot në Qendrën e Votimi në Surrel, i shoqëruar edhe nga bashkëshortja e tij, Linda.

Pas votimit, kryeministri Rama deklaroi se, “sot është shumë herë më e rëndësishme Shqipëria dhe mësimi historik që kjo ditë do t’i japë të gjithëve, sesa vota për njërin apo tjetrin që është e fshehtë. Besoj që kjo ditë konfirmon njëherë e përgjithmonë se me popullin nuk luhet, se sovraniteti i popullit nuk është një fjalë boshe. Dhe kush tenton t’ja marrë popullit sovranitetin nuk ka asnjë fund tjetër përveç se fundit me dështim dhe me turp”.

Rama tha se, “sot është e rëndësishme që çdo qytetar dhe qytetare në këtë vend të votojë ose të mos votojë, por të respektojë të drejtën e kujtdo për të votuar ose për të mos votuar. Kjo është gjëja më e rëndësishme”.

“Prandaj thashë. Historia e solli që këto zgjedhje shumë më tepër sesa zgjedhje për kryetarët dhe këshillat e rinj të bashkive janë zgjedhje për Shqipërinë që duam për të gjithë fëmijët tanë”, tha kreu i qeverisë.

Rama tha se “jam i bindur se sot në Shqipëri po ndodh diçka historike dhe është një mësim që nuk do të harrohet kurrë nga asnjë parti politike, nga asnjë politikan dhe kurrë më interesat e një pale apo hesapet e politikës nuk do të mund t’i bien ndesh interesit të madh kombëtar dhe hesapeve të popullit për të pasur një shtëpi të përbashkët ku fëmijët tanë të rriten ashtu siç e meritojnë”.

I pyetur sesi ishte të votojë pas kaq kohësh si në kohën e komunizmit, Rama tha se, “jam në paqe me ju. Ju dua shumë. Nuk më tundoni dot. Akoma nuk e mësuat që rruga nuk i zihet askujt që është në të drejtën e vet. A mund të ma hapni rrugën. Ja ndryshimi i madh me dje dhe sot. Sot të zënë rrugën gazetarët”. /atsh

Rama: Sot mësimi historik se nuk luhet me popullin Read More »

Zgjedhjet lokale/ Meta: Nesër të respektojmë vendimin e gjithësecilit, t’i shërbejmë të ardhmes europiane

Aktualitet, Lajmi i fundit, Votime Sondazhe / /

Presidenti i Republikës Ilir Meta, ka bërë thirrje për qetësi ditën e dielë, 30 qershorin e zgjedhjeve vendore, ku shqiptarët votojnë për të zgjedhur 61 kryebashkiakët e rinj.

“Të dashur qytetarë, përsëris thirrjen time për të respektuar në mënyrë civile dhe demokratike vendimin e gjithësecilit gjatë ditës së nesërme. Sërish ju ftoj të gjithëve të silleni me qetësi dhe mençuri! Është shumë e rëndësishme vetëpërmbajtja e gjithsecilit!”, citohet Presidenti Meta.

Ai thekson në mesazhin e tij edhe një herë, “rëndësinë e jashtëzakonshme që ka nesër ruajtja e paqes sociale”.

“Të gjithë duhet t’i shërbejmë asaj dhe së ardhmes europiane të Shqipërisë. Shmangni provokimet që mund t’ju çojnë drejt dhunës, në mënyrë që dallimet politike të mos cenojnë bashkëjetesën qytetare në çdo familje, në çdo lagje, në çdo fshat, në çdo qytet dhe në të gjithë shoqërinë tonë”, – thekson Presidenti në mesazhin e tij. /atsh

Zgjedhjet lokale/ Meta: Nesër të respektojmë vendimin e gjithësecilit, t’i shërbejmë të ardhmes europiane Read More »

90 KZAZ-të po shpërndajnë materialet zgjedhore drejt 5417 Qendrave të Votimit

Aktualitet, Lajmi i fundit / /

Komisioni Qendror Zgjedhor njofton se, sot, sipas Kodit Zgjedhor të 90 KZAZ-të po shpërndajnë materialet zgjedhore drejt 5417 Qendrave të Votimit në të gjithë Shqipërinë.

Në një njoftim për shtyp KQZ, bën të ditur se, procesi i shpërndarjes së materialeve zgjedhore ka përfunduar nga 53 Komisione të Zonave të Administrimit Zgjedhor, ndërkohë që të gjitha KZAZ-të e tjera janë drejt përfundimit të këtij procesi.

Përjashtim bën KZAZ nr. 6, bashkia Vau i Dejës, ku për shkaqe tashmë të njohura, materialet zgjedhore u ridërguan në orët e para të ditës së sotme, çka diktoi vonesën në nisjen e procesit të shpërndarjes së bazës materiale për 53 Qendrat e Votimit që ka kjo KZAZ.

Ndërkohë, në Qarkun Shkodër, rezulton që rreth 50% e qendrave të votimit vazhdojnë ende të mbahen të mbyllura nga autoritetet vendore. Komisioni Qendror i Zgjedhjeve i bën thirrje kryetares së bashkisë Shkodër të bashkëpunojë në respekt të ligjit.

Sipas KQZ-së, në bazë të Kodit Penal këto veprime konsiderohen vepër penale; shpërdorim detyre dhe pengim i subjekteve zgjedhore.

KQZ në mbledhjen e sotme me vendim ka autorizuar ndryshimin e disa vendndodhjeve të qendrave të votimit.

“Ky ndryshim, pavarësisht se jo për shkak të forcave madhore, ashtu sikundër Kodi Zgjedhor përcakton, ishte i detyrueshëm për të garatuar që çdo qendër votimi, ditën e nesërme të jetë e hapur për zgjedhësit shqiptarë. Të gjitha KZAZ-të që administrojnë procesin zgjedhor në zonat ku u bënë ndryshime të qendrave të votimit, do të afishojnë listat e zgjedhësve në vendndodhjet e reja, të caktuara me vendim të KQZ-së. Ndaj, KQZ kërkon mirëkuptimin e zgjedhësve të këtyre qendrave të votimit për këtë veprim të detyruar, si edhe kërkon që të informohen dhe të kontrollojnë faqen zyrtare të KQZ-së, për të qenë të mirorientuar ditën e nesërme për t’iu drejtuar qendrave të votimit”, citon njoftimi i KQZ-së. /atsh

90 KZAZ-të po shpërndajnë materialet zgjedhore drejt 5417 Qendrave të Votimit Read More »

Përfaqësues të medieve sllovake të impresionuar nga Shqipëria: Destinacion i rëndësishëm turistik në Europë

Aktualitet, Turizem / /

Shqipëria turistike këtë herë ishte në syrin e disa përfaqësuesve të medieve sllovake. Gjatë udhëtimit të tyre ata bënë një itinerar turistik dhe kulturor ku vizituan qytete si Tirana, Durrësi, Fieri (Apolloni) dhe Vlora.

Para largimit nga Shqipëria, për Agjencinë Telegrafike Shqiptare, ata shprehën impresionet e tyre për këtë udhëtim interesant në Shqipëri.

Ata e cilësuan vendin tonë si një nga destinacionet turistike të rëndësishme në Europë. Gjithashtu gazetarëve sllovakë, të cilët mbulojnë sektorin e turizmit, u kishte lënë mbresa ndërthurja e mrekullueshme mes kulturës, bukurive natyrore, trashëgimisë dhe gastronomisë.

“E shohim që Shqipëria është në fazën e zhvillimit të turizmit. Mund të bëhet një destinacion shumë interesant pasi ofron detin, historinë, trashëgiminë dhe gjelbërim. Me siguri do bëhet një destinacion i rëndësishëm në Europë. Ditën e parë vizituam Tiranën, pastaj Durrësin dhe pata një eksperiencë të mrekullueshme në Apolloni. Njerëz shumë të këndshëm, miqësorë dhe simpatikë. Në muzeun arkeologjik të Durrësit takuam studentë të cilët ishin shumë të qeshur dhe të sjellshëm me ne. Ata janë e ardhmja juaj”, tha njëra nga gazetaret sllovake.

Ndërsa një tjetër gazetar sllovak u shpreh se, “kam qenë këtu tri vite me parë në Shëngjin dhe duhet të them se sa më shumë të zbresësh në jug aq më bukur është. Vlora ka qenë një destinacion i preferuar për turistë por besoj se dhe zonat e tjera janë shumë tërheqëse. Jam i lumtur që kthehem dhe shoh se keni bërë shumë përparim. Në Durrës, Golemi ishte shumë i bukur, por edhe Vlora më ka impresionuar shumë. Në darkë ishte shumë bukur, kishte hapësira ku mund të bisedoje me njerëzit dhe të kaloje një pasdite shumë të këndshme”.

“Jam impresionuar shumë nga udhëtimi në Shqipëri. Ishte i mirëorganizuar dhe Shqipëria më pëlqeu shumë. Më pëlqeu Durrësi, një qytet i bukur, Vlora, dhe sigurisht vizita në parkun e Apollonisë. Shqipëria ofron një kombinim shumë të mirë të kulturës, gastronomisë, historisë por edhe të elementëve modernë të cilat i pashë në Vlorë dhe në Tiranë. Njerëzit që kam takuar ishim shumë miqësorë, mikpritës. Ushqimi ishte shumë i mirë. Pres me padurim të kthehem në vendin tuaj”, u shpreh një tjetër përfaqësues i medieve sollvake.

“Për mua Shqipëria ishte një eksperiencë komplet e re. Kam vizituar të gjitha vendet e Europës, përveç Shqipërisë. Është një vend me klimë shumë të nxehtë në këtë periudhë, por shumë i këndshëm dhe i bukur. Jam impresionuar nga gjithçka që kam vizituar, por mbi të gjitha nga parku antik i Apollonisë ku mësova shumë për historinë e antikitetit tuaj. Është një vend shumë interesant. Mendoj se po rritet numri i turistëve që vizitojnë Shqipërinë”, u shpreh një tjetër gazetar, i cili vizitonte për herë të parë Shqipërinë../atsh

Përfaqësues të medieve sllovake të impresionuar nga Shqipëria: Destinacion i rëndësishëm turistik në Europë Read More »

Programi “100 fshatrat” mbështet agroturizmin në Katundin e Vjetër, Mirditë

Aktualitet, Turizem / /

Pjesë e programit “100 Fshatrat”, Katundi i Vjetër në Mirditë po tërheq çdo ditë turistët vendas dhe të huaj në atraksionet turistike të saj si: Shpella e piktogrameve, Manastiri Françeskan, alpinizëm, turizëm kulinar etj.

Për të rritur standardet e agroturizmit dhe zhvilluar ekonominë në fshat, programi “100 fshatrat” po mbështet investimet e banorëve të zonës në ngritjen e bujtinave, të cilat ofrojnë më shumë se një turizëm kulinar për kënaqësinë e turistëve, që kërkojnë natyrë dhe rekreacion.

E përshkuar nga përrenj të pacenuar, mes pyjeve dhe burimeve ujore, bujtina e re që është ndërtuar këtu përbën një pjesë të ekosistemit të zonës së Mirditës.

Agjencia Zhvillimit Bujqësor dhe Rural (AZHBR) ka mbështetur këtë investim në agroturizëm, me një vlerë financimi prej 5,2 milionë lekë.

Nëpërmjet mbështetjes së AZHBR, synohet zhvillimi ekonomik i zonave rurale, evidentimi, promovimi i orientuar në lokalitete përmes shfrytëzimit të resurseve, nxitjes së investimeve dhe rritjes në punësim. Çka do të thotë rritje të ardhurash, konsum dhe zhvillimi i bizneseve të tjera utilitare me kontribut në rritjen e të ardhurave nga taksat, të cilat i rikthehen zonave rurale në formën e investimeve të reja publike.

Programi “100 fshatrat” synon rilindjen rurale dhe kthimin tek njerëzit. Rezultatet e para kanë filluar me programet e mbështetjes nga AZHBR. Zona e Mirditës ka pritur 65 mijë vizitorë në sezonin turistik 2018, ndërsa kanë filluar të zhvillohen bujtinat e para./atsh

Programi “100 fshatrat” mbështet agroturizmin në Katundin e Vjetër, Mirditë Read More »

Nga një ngrehinë e vjetër, në një qendër moderne mjekësore, transformohet Poliklinika e Vlorës

Aktualitet, Shendetesi / /

Poliklinika e re e Vlorës, e pozicionuar në qendër të qytetit, është transformuar nga themelet.

Investimi i buxhetit të shtetit me vlerë prej 111 milionë lekësh ka shndërruar ngrehinën e vjetër në një qendër moderne mjekësore, e cila ofron për qytetarët vlonjatë dhe jo vetëm shërbime të specializuara të standardeve europiane, si dhe kushte moderne pune për 70 mjekë dhe infermierë.

Kryeministri Edi Rama ishte sot në Poliklinikën e re, e cila u shërben mbi 150 mijë qytetarëve vlonjatë, por edhe pushuesve të shumtë gjatë sezonit turistik.

Ministrja e Shëndetësisë dhe Mbrojtjes Sociale, Ogerta Manastirliu tha se një investim i rëndësishëm është dhe ai i bërë në pajisjet e Poliklinikës, të cilat janë të teknologjisë bashkëkohore.

“Poliklinika është simbol i shëndetësisë në Vlorë dhe ishte një nga investimet që planifikuam ta konceptonim, jo vetëm si infrastrukturë, por edhe si pajisje, për të gjitha shërbimet që do të ofronim për qytetarët. Poliklinika i ofron shërbime 150 mijë banorëve, por edhe pushuesve që vijnë në Vlorë. Janë një staf prej rreth 70 mjekë dhe infermierë që ofrojnë shërbimet këtu, me kushte tërësisht të ndryshuara, me standarde, ku prej dekadash nuk ishte investuar në këtë poliklinikë. Tani quhet xhevahiri i bulevardit”.atsh

https://www.facebook.com/edirama.al/videos/435248207059514/?t=0

Nga një ngrehinë e vjetër, në një qendër moderne mjekësore, transformohet Poliklinika e Vlorës Read More »