Aktualitet

Zëvendëskryeministri Erion Braçe deklaroi sot se “në tregun e karburanteve vazhdon të gëlojë paligjshmëria në aspektin fiskal, por kjo paligjshmëri është bërë aq e gjerë deri në kufijtë e një krimi të rëndësishëm të paraparë edhe nga Kodi Penal i Republikës së Shqipërisë”.

Në një komunikim për mediet mbi përshkallëzimin e luftës kundër informalitetit, me zero tolerancë ndaj abuzuesve, Braçe theksoi se ” administrata tatimore ka zbuluar shkelje të rënda të ligjit, në kufijtë e krimit, veçanërisht në skemën kriminale të qëndrueshme të kalimit dhe operimit në kasat me regjim manual, të ndaluar rreptësisht me ligj”.

“Administrata tatimore ka zbuluar diferenca të thella mes litrave të regjistruara në pompa të shitura mes tyre dhe natyrisht litrave të regjistruara në kasat fiskale, diferenca që dëshmojnë për evazion fiskal të rëndësishëm”, nënvizoi Braçe.

Sipas tij, këto diferenca arrijnë në mijëra tonë në harkun kohor nga vjeshta e 2017 deri më sot.

“Grupet e përbashkëta të tatimeve dhe metrologjisë ligjore që po verifikojnë gjendjen aktuale të regjimit të kasave në çdo pompë karburanti janë udhëzuar të lexojnë në litrat e regjistruara e të shitura në pompa dhe litrat e regjistruara dhe të shitura në kasa”, tha Braçe.

Zv/kryeministri Braçe u shpreh se “diferenca në litra në çdo pompë do t’i nënshtrohet detyrimeve fiskale litër për litër deri në qindarkën e fundit”.

Ndërkohë, vijoi ai, të gjithë të përfshirë në këtë veprimtari kriminali duke nisur nga dy të parat që janë vënë tashmë nën pranga, shtuar me administratorë kompanish, administratorë të stacioneve të karburanteve administratorë e përgjegjës të kasave fiskale do t’i jepen drejtësisë pavarësisht emrit, madhësisë së kompanisë, parave që kanë akumuluar, miqve dhe shokëve në politikë, drejtësi e jo vetëm.

Braçe tha se “dua të mbështes veprimet konkrete të prokurorëve në Elbasan dhe në Tiranë, por edhe të kërkoj prej tyre të thellojnë hetimet deri tek përgjegjësi më i fundit”.

“Hetimet e tyre janë jetike për t’i dhënë fund këtij krimi për buxhetin e shtetit. Ndërkohë administrata tatimore ka shtrirë kontrollet në magazinat e lira të kompanive të mëdha të karburanteve. Ndërkohë, Administrata Doganore ka shtrirë kontrollet në magazinat e lira të kompanive të mëdha të karburanteve: në 48 orët e fundit, janë zbuluar diferenca të rëndësishme në inventarët e këtyre magazinave kryesisht në produktin benzinë që arrijnë po përsëri, në dhjetëra ton”, – nënvizoi ai.

Administrata tatimore, vijoi Braçe, po llogarit përsëri detyrimet fiskale të munguara dhe penalitetet në të njëjtën vlerë për secilën nga këto kompani.

“Të dyja administratat janë udhëzuar që të bëjnë bilancin e naftës së importuar, të prodhuar këtu e të hedhur në tregun e brendshëm, shitjeve të deklaruara për ti dhënë fund njëherë e mirë evazionit, por mbi të gjitha edhe mishelimit që cenon rëndë cilësinë e karburantit, një tjetër formë e rëndë e grabitjes së qytetarëve thuajse në çdo pikë ku shitet apo tregtohet ky produkt.”, tha Braçe./atsh

https://www.facebook.com/edirama.al/videos/1215214278639157/?t=0

Ministri i Brendshëm, Sandër Lleshaj e ka cilësuar dokumentarin e Rai3 për fuqizim të grupeve kriminale shqiptare në trafikun e lëndëve narkotike, si një mishmash i denjë për të ilustruar epideminë e ‘fake news’.

Në një reagim për mediet, Lleshaj deklaron se lufta kundër kanabisit është një bast i fituar për mazhorancën dhe se për këtë ka dokumente dhe shifra zyrtare, të cilat thekson se nuk janë evidentuar në asnjë pjesë të shkrimit.

“Një emision i televizionit italian “Rai 3” i pak ditëve më parë i mjaftoi opozitës që, si përherë, të nxitonte për të kërcyer tek konkluzione haluçinante, të cilat meritojnë vërtet keqardhje. Disa histori nga e shkuara si Lazarati, kjo “markë” autentike e PD, apo edhe episode të tjera të shkuara (përzier në një sallatë televizive sensacionale, pa asnjë vlerë dokumentare, po me synimin e vetëm audiencën e interesuar për show) kanë frymëzuar opozitën e plandosur jashtë-parlamentare. Ajo ka rimarrë vrullin e një shiu vere, për të akuzuar Policinë e Shtetit dhe Qeverinë për njollat që ata vetë i kanë vënë vendit kur ishin ne pushtet. E vërteta është krejt ndryshe nga ç’ka paraqet mishmashi televiziv i përgatitur nga njerëz që janë larg së qeni në nivelin e respektit tonë për kanalin publik italian. Falë edhe bashkëpunimit të ngushtë me partnerët italianë, lufta kundër kanabisit si fenomen, është një luftë e fituar e shtetit shqiptar”, thekson ministri.

Ai thekson se rezultatet në këtë fushë, të konfirmuara nga monitorimi i specializuar i partnerëve italianë, janë kokëforta dhe të mirënjohura.

“Kultivimi apo sasitë e kanabisit me origjinë nga Shqipëria, të kapura nga vendet fqinje, kanë rënë në minimumet historike. Monitorimi nga ajri vijon intensivisht, duke provuar ecurinë e shkëlqyer të përpjekjes sonë. Ndërkohë, goditja në tokë dhe në det nga Policia e Shtetit dhe agjencitë ligjzbatuese, është konstante dhe shkurajuese për krimin. Rrjetet dhe organizatat kriminale që kanë vepruar në këtë fushë janë goditur rëndë në të gjitha aspektet, përfshirë edhe atë financiar”, shprehet ministri.

Fenomeni ‘Kanabis’, vijon Lleshaj është tanimë një histori e të shkuarës dhe lufta kundër tij një “bast” i fituar i kësaj mazhorance. Të gjitha shifrat provojnë këtë fakt.

“Fatmirësisht, autoritetet italiane e njohin shumë mirë dhe nga shumë afër, të vërtetën e luftës kundër kanabisit dhe bashkëpunimin e shkëlqyer policor mes dy vendeve. Ato kanë folur në të gjitha nivelet për këtë dhe unë besoj se do te shprehen edhe pas këtij reportazhi të Rai 3 – një mishmash i denjë për të ilustruar epideminë e ‘fake news’”, tha ministri Lleshaj.atsh