Aktualitet

“Prokuroria hesht dhe në vend të fletës së arrestit për Kajmakun, nis letra për Partinë Demokratike duke i kërkuar provat që i ka në sistemin TIMS” u shpreh sot në një deklaratë e për mediat, ish-deputeti i PD-së Ervin Salianji.

Duke akuzuar prokurorinë për moszbatim të ligjit, Salianji shton se “Prokuroria nuk zbaton kodin penal dhe ligjin e dekriminalizimit për të vënë para drejtësisë të kërkuarin në Greqi, i cili ka trafikuar para të falsifikuara dhe mashtruar në formularin e dekriminalizimit. Agim Kajmaku duhet të largohet nga zyra e zaptuar paligjshmërisht në bashkinë e Vorës”.

Po ashtu Salianji shton se Partia Demokratike “prej më shumë se një javë, me prova të pakundërshtueshme ka denoncuar kandidatin e PS-së për bashkinë e Vorës, Agim Kajmaku apo siç njihet dhe kërkohet nga drejtësia greke me emrin Jorgo Toto”.

“Dokumente nga gjykata dhe prokuroria e Athinës të publikuara provojnë se Agim Kajmaku është i inkriminuari. Të dhënat e sistemit TIMS rrëzuan çdo alibi apo përpjekje për të gënjyer, duke provuar se Agim Kajmaku është personi i arrestuar në Greqi si Jorgo Toto nën akuzën e trafikimit të parave të falsifikuara. Partia Demokratike provoi gjithashtu se foto e pasaportës me të cilën është arrestuar në Greqi, Jorgo Toto, është e njëjtë me foton e pasaportës Agim Kajmaku. Me gjithë këto prova të pakundërshtueshme, Kajmaku fshihet pas heshtjes së prokurorisë”, argumenton ai.

Gjithashtu Salianji tha se “zgjedhjet e lira e të ndershme parlamentare dhe lokale njëkohësisht me një qeveri tranzitore janë e vetmja rrugë shpëtimi”. /atsh

“Garantimi i votës së emigrantëve për zgjedhjet e vitit 2021 dhe depolitizimi i administratës zgjedhore mbeten prioritete të Partisë Socialiste, që do të adresohen me reformën zgjedhore”, deklaroi sot kryetari i grupit parlamentar të Partisë Socialiste, Taulant Balla.

I ftuar në një studio televizive, Balla tha se “detyrimi ynë është që duhet t’i japim Shqipërisë një kod të ri zgjedhor brenda këtij sesioni parlamentar”.

“Jam shpresëplotë, pasi edhe në konferencën e kryetarëve sot, bashkë me grupet parlamentare të opozitës kemi dakordësuar rëndësinë që ka përmbyllja e kësaj reforme brenda këtij afati. Në tetor do të kemi në dispozicion edhe rekomandimet e OSBE/ODIHR-it për zgjedhjet e fundit por edhe për zgjedhjet e 2015-2017”, – tha Balla.

Opozita parlamentare, sipas tij, kërkon hulumtimin e sistemeve zgjedhore, por këto nuk bëjnë pjesë në detyrimet që lindin nga adresimi i rekomandimeve të OSBE/ODIHR-it.

Ai uroi që opozita jashtëparlamentare të zërë vendin e saj në komisionin për reformën zgjedhore dhe të marrë përgjegjësitë që i takon në mënyrë që të kemi një Kod Zgjedhor të plotë që të garantojmë zgjedhjet e përgjithshme të qershorit 2021.

Balla tha se në pushtet vihet vetëm me votë dhe opozita e di këtë gjë.

Sa i takon infrastrukturës zgjedhore, Balla tha se “duhet të bëjmë hapa të rëndësishëm drejt teknologjive për kalkulimin e votave që edhe në Shqipëri rezultati zgjedhjeve të dali brenda natës të së dielës”.

Po ashtu, Balla tha se “Kuvendi do të vijojë punën për zbatimin e Reformës në Drejtësi”. “Shumë shpejt Kuvendi do të vihet në lëvizje për përzgjedhjen e anëtarëve të rinj të Gjykatës Kushtetuese, pasi 3 anëtarë përzgjidhen nga Kuvendi. Kuvendi ka shpallur edhe vakancën e e re pas konstatimit të mosplotësimit të numrit të nevojshëm të kandidatëve. Janë disa reforma të rëndësishme që do të adresohen”, tha Balla.

Sa i takon zgjedhjeve të pjesshme në bashkinë e Shkodrës, Balla tha se “kjo nuk është hera e parë që zhvillohen zgjedhje të pjesshme, pasi vetëm në periudhën 2015-2019 ka pasur zgjedhje në 2 bashki, në Dibër dhe Kolonjë”.

“Partitë politike kanë detyrimin të marrin pjesë në garë, ndërsa janë institucionet e Presidentit dhe KQZ-së që garantojnë këto zgjedhje. Presidenti duke dekretuar datën dhe KQZ duke organizuar procesin”, – tha ai.

Lidhur me rastin e Valdrin Pjetrit, Balla tha se “përgjegjësia është individuale dhe standardi që ka vendosur PS është që ka hequr dorë nga çdo lloj mburoje politike për të zgjedhurit e saj”.

“E kundërta ndodh. Marrëdhënia me ligjin është marrëdhënie juridike individuale dhe përgjegjësinë nuk mund ta marri forca politike. Ne jemi vënë në dijeni të një certifikate, ajo që lëshon Ministria e Drejtësisë, që ka të bëjë me të mosqenit i dënuar. Nëse nuk e deklaron, ligji e ka të qartë edhe dënimin”, – tha ai. /atsh

Kryetari i Kuvendit, Gramoz Ruçi deklaroi sot se, “Kuvendi mbylli sesionin e kaluar dhe fillon këtë sesion parlamentar si një institucion funksional me një kuorum kushtetues, me shumicë të kualifikuar për të miratuar çdo akt ligjor”.

Në nisje të sesionit të ri parlamentar, Ruçi tha se “sesioni që mbyllëm nuk ishte i lehtë, por me gjithë vështirësitë që u shkaktuan nga lënia e mandateve të deputetëve të opozitës, kjo nuk cenoi funksionimin e sistemit tonë politik, produktivitetin dhe rezultatet e Kuvendit”.

“Rreth 70% e mandateve, ose 40 nga 58 mandate u zëvendësuan nga deputetët e rinj të opozitës. Kjo ndihmoi në rikthimin e normalitetit dhe legjitimitetit të Kuvendit. Kuvendi ushtroi me intensitet funksionin kryesor, atë legjislativ”, – tha Ruçi.

Sipas tij, “gjatë sesionit të kaluar u depozituan 64 projektligje dhe u miratuan 57 gjithsej, ose 2 më shumë sesa në të njëjtin sesion të vitit të kaluar”.

“U miratuan 76 vendime, u miratuan 5 ligje me 3/5, ndërkohë që vitin e shkuar me 3/5 nuk u votua asnjë projektligj; u miratuan 28 ligje me konsensusin e opozitës, ose 21 ligje më shumë sesa periudha janar-korrik 2018. Deputetët morën 19 nisma ligjore ose 8 më shumë se viti i kaluar, njëra prej të cilave kishte të bënte me ndryshimet në Kodin Penal, deputetët e opozitës kërkuan 6 interpelanca, ose 2 më shumë se viti i kaluar prej të cilave u zhvilluan 5”, – tha Ruçi.

Ai tha se, “Kuvendi përballoi me dinjitet sfida të jashtëzakonshme dhe unike dhe demokracia liberale u provua si demokraci kushtetuese si asnjëherë në historinë e pluralizmit dhe Kushtetuta u rezistoi aventurave”.

Po ashtu, Ruçi vlerësoi Reformën në Drejtësi si meritë ekskluzive të Kuvendit të Shqipërisë.

Ruçi shpalli edhe objektivat për sesionin e ri parlamentar duke theksuar se të gjithë presin negociatat, ndërsa dora e shumicës është e shtrirë për opozitën jashtë parlamentit për reformën zgjedhore.

“Rekomandimi i komisionit për çeljen e negociatave është produkt i arritjeve, në mbledhjen e këshillit në tetor shkojmë me sigurinë e plotësimit të këtyre detyrave. Dëshira e të gjithë shqiptarëve është çelja e negociatave. Ne duhet ta përdorim këtë fillim sesioni për të kompensuar atë që nuk bëmë mirë në sesionin e kaluar”, – tha ai.

Ruçi theksoi se “prioriteti i parë do të jetë përmbyllja e reformës zgjedhore”. “Do të jetë një produkt konsensual i Kuvendit duke përfshirë edhe opozitën jashtëparlamentare. Dora e shtrirë e Kuvendit nuk është mëshirë. Mbrojtja e Kushtetutës është garancia e Shqipërisë së nesërme. Reforma në Drejtësi do të vijojë duke filluar me ngritjen e institucionet e reja. Gjykata Kushtetuese dhe ILD do të bëhen funksionale shumë shpejt”, – tha Ruçi. /atsh