Aktualitet

Ministri i Shtetit për Diasporën, Pandeli Majko theksoi sot se falë marrëveshjes mes Shqipërisë dhe Kandasë për mbrojtjen shoqërore, përfitojnë dhe ata shtetas shqiptarë me dyshtetësi që lëvizin nga shtete të tjera drejt Kanadasë.

Majko tha se, “me urdhër të kryeministrit është krijuar një koordinator shtetëror vetëm për çështjen e marrëveshjeve për pensionet. Ky është zv/ministri i jashtëm. Një delegacion permanent i ministrisë së jashtme me ministrinë e Financave dhe sigurisht dhe nga Agjencia e Diasporës diskuton në komunikim me kancelaritë përkatëse për marrëveshjet”.

Këto tha Majko, “nuk janë marrëveshje të lehta. Për disa shtete si Italia dhe Greqia kanë kosto të jashtëzakonshme. Këto marrëveshje kanë rëndësi jo vetëm për numrin matematikor të prezencës tonë atje, pra të shtetasve tanë që kanë edhe dokumente kanadeze. Por kjo ka rëndësi sepse krijon hapësira ligjore për mbrojtjen e emigrantëve tanë, përveç se në Kanada edhe në vende të tjera me të cilët të dy vendet kanë marrëveshje dypalëshe”.

“Ka shumë sot shtetas italianë me kombësi shqiptare, pra që kanë dy shtetësitë apo nga Greqia që kanë shkuar në Kanada. Përshembull ne kemi marrëveshjen me Zvicrën. E njëjta gjë ndodh kur shtetasit tanë nga Greqia shkojnë në Zvicër. Përfitojnë pension dhe këtë e merr ndërmjet shtetit zviceran. Edhe me këtë marrëveshje kush shtetas shqiptar me letra greke ka shkuar për në Kanada është një përfitues”, u shpreh ministri Majko.

Pra, theksoi ai, “ne e kemi futur në sistem kapilar të gjithë këtë histori. Duhet ta shikojmë sepse kam përshtypjen që ndonjëherë duket sikur janë si puzzle, Kanadaja dhe vetëm atje, vetëm Zvicra dhe vetëm atje, Gjermania dhe vetëm atje, vetëm Austria. Jo në fakt këtu është një sistem kapilar që është shumë i rëndësishëm të ndiqet hap pas hapi. Dhe ne jemi duke e ndjekur., një herë në tre muaj bëhet raportimi dhe çohet në Komitetin Shtetëror të Diasporës. Dhe jemi të gatshëm të ofrojmë çfarëdolloj informacioni”./atsh

Këshilli i Lartë i Gjyqësorit është mbledhur sot për të shqyrtuar dhe verifikuar 14 kandidatët për gjyqtarë në Gjykatën e Larët nga radhët e juristëve më të spikatur.

Në rendin e ditës janë shtatë pika. Pika e parë është, shqyrtimi i projektvendimeve për gjendjen e faktit dhe ligjin e zbatueshëm në lidhje me verifikimin e kushteve dhe kritereve për 14 kandidatë për gjyqtar në Gjykatën e Lartë, nga radhët e juristëve të spikatur, përgatitur nga relatorët përkatës.

Mësohet se nga 22 kandidatë që aplikuan, 13 nuk janë kualifikuar, njëri është tërhequr dhe vetëm 8 kanë mundur që të kalojnë këtë fazë për të vijuar garën. Gjyqtarët e kualifikuar janë, Jetmira Rragami, Ervin Pupe, Rezarta Melo, Theodhori Sollaku, Kestrin Katro, Sokol Sadushaj, Ilir Panda dhe Ardita Alsula.

Kandidatët e skualifikuar janë: Sergjio Mazreku, Ndue Pjetra, Ergys Misha, Aldona Sulaj, Jordan Daci, Lindita Troja, Alma Loci, Hermina Albunesa, Agron Lamaj, Vjosa Bodo Mujo, Shaqir Hasanaj, Anton Lleshaj dhe Altin Binaj.

Pika e dytë është Shqyrtimi i projektvendimit “Për shpalljen e procedurës së emërimit në Gjykatën e Lartë, nga radhët e juristëve të spikatur” (në fushën e të drejtës civile), i përgatitur nga Komisioni i Zhvillimit të Karrierës.

Më tej është pika e tretë e rendit të ditës, shqyrtimi i projektvendimit “Për përjashtimin e gjyqtarëve Margarita Buhali dhe Fatri Islamaj nga procedura e ndarjes së çështjeve me short”, i përgatitur nga Komisioni i Vlerësimit të Etikës dhe Veprimtarisë Profesionale. Shqyrtimi i opinioneve për kandidatët nga radhët e gjyqtarëve që kanë shprehur interes për komandimin pranë Këshillit të Lartë Gjyqësor, i përgatitur nga Komisioni i Zhvillimit të Karrierës. Shqyrtimi i projektvendimit “Për përsëritjen e transferimit të përkohshëm të gjyqtarit Gentian Marku në Gjykatën Administrative të Shkallës së Parë Shkodër”, i përgatitur nga Komisioni i Zhvillimit të Karrierës.

Shqyrtimi i projektvendimit “Për ndërprerjen e transferimit të përkohshëm të gjyqtarit Besmir Stroka në Gjykatën e Rrethit Gjyqësor Pukë dhe kthimin e tij në pozicionin e mëparshëm”, i përgatitur nga Komisioni i Zhvillimit të Karrierës

Dhe në fund, do KLGJ do të vendos caktimin e gjyqtarëve për gjykimin e çështjeve gjyqësore të veçanta në gjykata të tjera, të ndryshme nga ato ku ushtrojnë funksionet në mënyrë të përhershme, i përgatitur nga Komisioni i Zhvillimit të Karrierës. /atsh