Aktualitet

Kancelarja e Gjermanisë, Angela Merkel deklaroi sot se nuk është arritur vendim unanim për hapjen e negociatave mes Bashkimit Europian dhe Shqipërisë, edhe pse siç tha ajo, Shqipëria ka bërë përparime.

Merkel shprehu keqardhje për këtë vendim duke theksuar se qëndrimi i Gjermanisë ka qenë për të nisur bisedimet me Shqipërinë.

“Më vjen shumë keq për këtë vendim. Pozicioni i Gjermanisë ka qenë për të nisur bisedimet. Janë disa vende që kanë rezerva. Ne kemi diskutuar në lidhje me këtë. Patjetër që do të zhgënjehen, si kryeministri i Maqedonisë së Veriut dhe ai i Shqipërisë”, tha Merkel.

Kancelarja u shpreh se “kur bëjmë premtime patjetër që duhet t’i përmbajmë ato. Nuk do t’i kthejmë shpinën vendeve ndërkohë që kemi bërë premtime”.

“Unë e mbështes në një pikë presidentin Macron për sa i përket procesit të zgjerimit që duhet reformuar”, u shpreh kancelarja.

“Kemi rënë dakord për disa gjëra që duhen bërë. Gjermania dëshiron që të hapen negociatat me Shqipërinë dhe Maqedoninë e Veriut. Maqedonia e Veriut ka bërë shumë sa i përket hapjes së negociatave deri tek ndryshimi i emrit. Ka qenë progres i madh. Edhe Shqipëria ka bërë progres. Mendoj që Shqipëria ka bërë shumë progres, por nuk u arrit të marrim një vendim unanim për sa i përket Shqipërisë”, tha ajo.

Merkel u shpreh se bëhet fjalë për hapjen e negociatave, jo për anëtarësim.

“Ata patjetër duhet të përballen me disa kushte që kemi vendosur. Në Shqipëri vijon të ketë probleme përfshi dhe emigrimin. Megjithatë Shqipëria ka bërë maksimumin sa i përket emigracionit. Kur bëjmë premtime patjetër që duhet t’i përmbajmë ato. Dhe nuk do t’i kthejmë shpinën vendeve ndërkohë që kemi bërë premtime. Në fakt ka disa faza për sa i përket anëtarësimit. Vërtet dua që këto vende të bëhen anëtare, por më parë duhet të kalojnë në faza të ndryshme të këtij procesi”, tha ajo.

“Franca dha refuzimin e saj për hapjen e negociatave. Duhet gjithmonë të shohim anët pozitive dhe anët negative të një vendimi të caktuar. Si Maqedonia e Veriut dhe Shqipëria kanë bërë shumë progres. Rasti i Maqedonisë së Veriut ka qenë më i veçantë pikërisht për marrëveshjen e emrit. Nuk është se bëmë një votim. Në rastin e Shqipërisë pati disa vende nga BE që kundërshtuan hapjen e negociatave me Shqipërinë”, theksoi Merkel./atsh

Kryeministri Edi Rama duke iu përgjigjur pyetjes gjatë Konferencës për shtyp në lidhje me një mocion besimi në parlament pas mosarritjes së dakordësisë për çeljen e negociatave në Këshillin Europian, u shpreh se verdikti final ishte i Francës, për shkak të përplasjeve me Gjermaninë mbi metodologjinë e funksionimit të BE.

“Mund t’ia kërkoj parlamentit francez, popullit shqiptar s’kam pse ia kërkoj”, – u shpreh Kryeministri. “Maqedonia ka 14 vjet që pret çeljen e negociatave. Ka 14 vjet nga Këshilli në Këshill merr sinjale pozitive dhe s’merr PO. E detyruan të ndërrojë emrin, duke premtuar që, “u bë kjo, u zgjidh”. Ja ku jemi! Kishte plot që thonin “do ndahet Shqipëria nga Maqedonia e Veriut”. Por kishte dhe zëra dhe zëra brenda familjes europiane që thonin se asnjëherë nuk ka qenë opsion. E kemi rrezikuar në maj-qershor, për shkak të katrahurave këtu. Nuk ka lidhje vendimmarrja me çfarë ka bërë njëri apo tjetri. U gjendën në një moment të historisë së BE, ku ndodh një përplasje mes Francës e Gjermanisë jo thjesht për zgjerimin, por edhe për elementë të tjerë të funksionimit të BE”, – u shpreh Kryeministri Rama.

Duke iu referuar deklaratës së homologut holandez, Kryeministri tha se asnjë prej arsyeve nuk qëndron, pasi e vërteta e kësaj vendimmarrje ishte diku tjetër.

“Dëgjova kryeministrin e Holandës. Tha se Shqipëria ka bërë progres të madh, por jo mjaftueshëm. Mjaftueshëm në raport me çfarë? Se nëse e konsiderojmë progresin si një progres lidhur me gatishmërinë e Shqipërisë për t’u bërë anëtare e BE është e pamjaftueshme, por nëse krahasojmë çfarë na është kërkuar dhe çfarë kemi bërë është shumë më tepër, jo se jemi më të zotë, por sepse procesi ka ardhur duke u bërë më i vështirë e kërkues. Shtimi i bishtave nuk është korrekt. Cilido nga vendet që ka hyrë në BE pas rënies së komunizmit të ishte në vendin tonë nuk e merrte PO-në, sepse tema ishte gjetkë, “çfarë do bëjmë me BE?””, deklaroi Rama, duke shtuar në anën tjetër, se, “Presidenti i Francës ishte brutalisht i hapur në atë që tha. Vuri në pikëpyetje gjithë metodologjinë e negociatave, gjithë procesin, duke kërkuar ndryshimin e procesit, sipas tij për ta bërë më efektiv për BE. E quajti proces ultraburokratik dhe kërkon ndryshim metodologjie. Është në të drejtën e tij. Po ku hyjmë ne tani këtu në këtë mes?!” /atsh

Kreu i delegacionit të Bashkimit Europian në Tiranë, ambasadori Luigi Soreca ka deklaruar sot se Shqipëria dhe Maqedonia e Veriut nuk janë fajtore për mosdakordësinë e vendeve anëtare të BE për hapjen e negociatave.

Duke cituar deklaratën e Presidentit të Këshillit Europian, Donald Tusk, Soreca thekson se, “Maqedonia e Veriut dhe Shqipëria nuk janë fajtorë për këtë”.

“Sot unë do të doja t’ju dërgoja një mesazh miqve tanë në Shqipëri dhe Maqedoninë e Veriut, ju lutem mos hiqni dorë”, thekson ai.

“Unë nuk kam asnjë dyshim absolutisht se një ditë do të bëheni anëtarë të plotë të Bashkimit Europian”, përfundon ai./atsh

Kryeministri Edi Rama thotë se Shqipëria nuk do të shkojë në zgjedhje të parakohshme nëse Këshilli Europian nuk çel negociatat për anëtarësim në BE.

Ndryshe nga homologu i tij i Maqedonisë së Veriut, Zoran Zaev i cili e konfirmoi se shteti i tij do të shkojë në zgjedhje të parakohshme në rast mos-hapje negociatash, Rama tha se një gjë e tillë nuk ka për të ndodhur me Shqipërinë, pasi janë dy kontekste të ndryshme.

Deklarata e Ramës:

Maqedonia e Veriut ka ndryshuar emrin dhe ka bërë diçka që e kanë kërkuar ata, ka bërë një sakrificë për ata, dhe duke bërë këtë sakrificë kryeministri i ka kërkuar popullit të vetë të dalë në referendum. Jemi në kontekste të ndryshme.

Jemi në një kontekst krejt tjetër, jo vetëm që nuk do shkojmë në zgjedhje të parakohshme por ne do të vazhdojmë të bëjmë këtë që kemi bërë, datën 19 dielli lind përsëri. Shqipëria nuk ka pse shkon në zgjedhje të parakohëshme se nuk i ka lënë gjë mangut këtij procesi. Nëse zgjedhjet e parakohshme në Shqipëri do të zgjidhnin problemin mes Gjermanisë dhe Francës, do ta bënim.

Moti do të jetë me kthjellime dhe vranësira në shtim deri mesatare në Juglindje ku nuk përjashtohet mundësia e reshjeve të shiut.

Era do të jetë me drejtim Veriperëndim (NW) me shpejtësi maksimale 7 m/sek në bregdet. Valëzimi i forcës 3 me lartësi vale 0,3- 0,5 metër në det të hapur. Temperaturat do të jenë me rënie graduale.

Temperaturat min dhe max:

Zonat malore 12/23°C

Zonat e ulëta 12/27°C

Zonat bregdetare 15/27°C