Aktualitet

“Plani vjetor 2020 i Autoritetit Kombëtar të Ushqimit do të jetë gur themeli për garantimin e sigurisë ushqimore”, deklaroi sot drejtori i AKU-së, Robert Lili.

Autoriteti Kombëtar i Ushqimit zhvilloi sot takimin e radhës për përmirësimin e planit vjetor të monitorimit mbi bazë risku për vitin 2020, me asistencën e Projektit “Food Safety”, financuar nga BE.

Motoja e këtij takimi ishte: “Të bëjmë ushqimin më të sigurtë, të mbrojmë shëndetin e njerëzve, të bimëve dhe kafshëve”.

Në takim u diskutua për rritjen e efektivitetit të mëtejshëm të veprimtarisë së AKU-së dhe përqasjen e kësaj veprimtarie me praktikat e mira europiane.

Komunikimi i riskut, strategjia e bashkëpunimit me qytetarët dhe jo vetëm, si dhe plani për trajnimin e inspektorëve të AKU-së në funksion të përmirësimit të performancës së tyre ishin pjesë e diskutimit të kësaj tryeze.

Drejtori i Përgjithshëm i AKU-së, Robert Lili shprehu gatishmërinë dhe vullnetin e tij për të kontibuar në aktivitetet e planifikuara nga ekspertët e projektit, duke e konsideruar të çmueshme përvojën e tyre në këtë drejtim.

Ai paraqiti vizionin dhe theksoi se, AKU është në krah të ligjit dhe synon zbatim rigoroz të tij, ndaj plani vjetor 2020 do të jetë gur themeli për garantimin e sigurisë ushqimore./atsh

Ministri i Bujqësisë dhe Zhvillimit Rural, Bledi Çuçi, ka pritur sot në takim një përfaqësi të grupit të fermerëve që protestuan përpara disa ditësh lidhur me ngërçin e krijuar për shitjen e prodhimeve bujqësore, kryesisht të domates. Në takim u diskutuan me radhë të gjitha kërkesat që fermerët kanë parashtruar.

Ministri Çuçi garantoi fermerët se një grup ekspertësh i kryesuar nga zv/ministri Dhimo Kote ka ditë që po punon për të gjitha çështjet që kanë ngritur fermerët. Ministri garantoi fermerët se kërkesat që lidhen direkt me Ministrinë e Bujqësisë dhe Zhvillimit Rural, janë thuajse të realizueshme të gjitha.

“Zgjidhjet dhe vendimet merren gjithmonë duke u ulur së bashku në tryezën e punës. Sot ishte takimi i parë me përfaqësinë e një grupi fermerësh që kanë dalë në protestë. Ne kemi ngritur një grup pune në ministri, i kryesuar nga zv.ministri Dhimo Kote, për të adresuar si duhet kërkesat që ata kanë paraqitur. Në ditët dhe javët e ardhshme besoj se do të kemi takime të tjera për të shkuar drejt rezultateve konkrete. Kërkesat që lidhen direkt me Ministrinë e Bujqësisë, janë të parat që besoj se mund të përmbushen së shpejti brenda hapësirave dhe mekanizmave që ne kemi. Nuk do të lemë pa trajtuar as kërkesat e tjera që shkojnë përtej kësaj ministrie,” shprehet Çuçi.

Por kjo do të bëhet duke hapur një diskutim më të gjerë edhe me grupet e tjera të interesit, apo shoqatat e tjera rreth të cilave janë grupuar fermerët. Ndërkohë për kërkesat e tjera që nuk lidhen me Ministrinë e Bujqësisë dhe kërkojnë ndryshim në paketën fiskale, apo kanë efekt në buxhetin e shtetit, do të përfshihen në proces edhe Ministria e Financave, si dhe do të shqyrtohen në qeveri.

“Kurrë më parë s’është bërë kaq shumë për bujqësinë në Shqipëri sa kemi bërë ne. Rritja prodhimit bujqësor dhe nivelit të eksporteve është treguesi më domethënës i këtij fakti. Gjatë këtij viti kemi bërë zero, si asnjë vend tjetër në rajon, TVSH-në për imputet bujqësore. E megjithatë bujqësia ka probleme sepse është një sektor delikat në çdo vend të botës, jo vetëm në Shqipëri. Përtej të gjithave, ne jemi të vendosur të shtojmë mbështetjen dhe lehtësitë ndaj fermerëve,” deklaroi më tej ministri Cuci.

Takimi i sotëm ishte hapi i parë i një pune të përbashkët që do të vijojë në ditët dhe javët e ardhshme për të adresuar si duhet shqetësimet e fermerëve. /atsh

Në Institucionin e Kreut të Shtetit u zhvillua sonte ceremonia e betimit përpara Presidentit Ilir Meta, të tre anëtareve të reja të Gjykatës Kushtetuese.

Fillimisht në presidencë u betua Elsa Toska për plotësimin e vakancës së parë të Kuvendit që zëvendëson ish-gjyqtarin Vladimir Kristo.

Duke vendosur dorën mbi Kushtetutën e Shqipërisë, gjyqtarja Toska u betua para Presidentit Meta: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë!”.

Gjithashtu në presidencë u betua dhe anëtarja e re të Gjykatës Kushtetuese, Marsida Xhaferllari, plotësimi i vakancës së dytë të Presidentit Meta që zëvendëson ish-gjyqtaren, Altina Xhoxhaj.

Duke vendosur dorën mbi Kushtetutën e Shqipërisë, gjyqtarja Xhaferllari u betua para Presidentit Meta: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë!”. Presidenti Meta i uroi shumë suksese dhe punë të mbarë në këtë detyrë shumë të rëndësishme.

Në Institucionin e Kreut të Shtetit u betua përpara Presidentit Meta dhe anëtarja e re e Gjykatës Kushtetuese, Fiona Papajorgji. Ky është plotësimi i vakancës së dytë të Kuvendit që zëvendëson ish-gjyqtarin, Bashkim Dedja.

Duke vendosur dorën mbi Kushtetutën e Shqipërisë, gjyqtarja Papajorgji u betua para Presidentit Meta: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë!”.

Pas betimit të tre anëtareve të Kushtetueses, Meta tha se: “I lumtur që më në fund, pas dy vitesh, fillon sot nga funksionimi Gjykata Kushtetuese e Republikës së Shqipërisë. Urime tre anëtareve të reja të kësaj Gjykate, Elsa Toska, Marsida Xhaferllari dhe Fiona Papajorgji”./atsh