Aktualitet

Rritja e mëtejshme e parametrave të sigurisë në portin më të madh në vend, ishte tema kryesore e takimit të zhvilluar të premten mes drejtorit të Përgjithshëm të Policisë së Shtetit, Ardi Veliu, Drejtorit të Përgjithshëm të Doganave, Gjon Bardhi dhe Drejtorit të Përgjithshëm Ekzekutiv të Autoritetit Portual Durrës, Pirro Vengu.

Pas një analize të detajuar të situatës, bashkëbiseduesit u ndalën tek nevoja për të rivlerësuar masat e sigurisë në territorin e portit. Duke shprehur vlerësimin e Autoritetit Portual përkundrejt mbështetjes maksimale që po japin Policia e Shtetit dhe Doganat në këtë përpjekje, Vengu theksoi gatishmërinë e APD-së për të pasur një bashkëveprimin edhe më efektiv me institucionet ligjzbatuese që operojnë në hapësirat portuale.

Si pika hyrëse/dalëse kryesore në vendin tonë, Porti i Durrësit luan një rol kyç nga pikëpamja e sigurisë kombëtare dhe duhet të jetë brenda çdo standardi me elementët e sigurisë, u tha ndër të tjera në këtë takim. Në këtë drejtim u miratua një plan i përbashkët veprimi mes Autoritetit Portual Durrës dhe institucioneve ligjzbatuese, i cili përfshin një numër masash konkrete që synojnë rritjen e sigurisë në Portin e Durrësit në planin afat-shkurtër.

Në takim morën pjesë gjithashtu dhe Drejtori i Drejtorisë Vendore të Policisë Durrës, z. Lorenc SHEHU, Drejtori Vendor për Kufirin dhe Migracionin Durrës, Ndue Doçi dhe përfaqësues të tjerë të Policisë së Shtetit./atsh

Kryeministri Rama nga Zvicra ku ndodhet për të marrë pjesë në punimet e Forumit Ekonomik Botëror, publikoi një videomesazh të veçantë me një polic shqiptar.

“Ja shqiptarët që ruajnë Zvicrën, siç ruajnë edhe Kombet e Bashkuara, siç ruajnë edhe shumë vende”, – thotë Rama.

Polici konfirmon prejardhjen e tij nga Gjilani, teksa Kryeministri e pyeti se nga ishte.

“Të fala të gjithëve në Gjilan, në Kosovë, në Shqipëri nga policia shqiptare e Zvicrës”, – thotë Rama teksa përfundon videomesazhin special./atsh

Banka Europiane e Investimeve (BEI) dhe Fondi Shqiptar i Zhvillimit (FSHZH) kanë nënshkruar një marrëveshje bashkëpunimi prej 200.000 euro për asistencë teknike për përgatitjen e një programi rajonal investimesh në Veri të Shqipërisë.

Ky është hapi i parë i një programi më të gjerë asistence teknike, që do të zbatohet në partneritet me FSHZH-në për të mbështetur rajonin me një vlerë deri në 3 milionë euro.

Asistenca teknike do të përfshijë vijën bregdetare të Adriatikut midis Shëngjinit dhe Velipojës, bregun e liqenit të Shkodrës, lumin Buna dhe portën e Koplikut në Alpet shqiptare, si dhe një pjesë të territoreve të bashkive të Shkodrës, Lezhës dhe Malësisë së Madhe.

Në kuadër të këtij bashkëpunimi, BEI do të asistojë FSHZH për përcaktimin e strategjisë së turizmit të integruar dhe përmirësimit urban të Portës Bregdetare të Alpeve, marrjen në konsideratë të aseteve natyrore dhe potencialet e zonës, si dhe çështjet mjedisore.

“Duke ndihmuar për hartimin e një programi investimesh në infrastrukturën publike bazuar në potencialin e turizmit rajonal dhe një analize të thelluar të mangësive në infrastrukturën ekzistuese, Banka do të kontribuojë në zhvillimin e potencialit të pashfrytëzuar të Shqipërisë së Veriut”, tha Alessandro Bragonzi, përfaqësuesi i BEI-t për Shqipërinë, Kosovën dhe Maqedoninë e Veriut.

Ky partneritet ilustron mbështetjen e BEI-t ndaj autoriteteve shqiptare për zhvillim të qëndrueshëm që sintentizon planet dhe sektorët ekzistues dhe u jep përparësi investimeve strategjike.

“FSHZH në rolin e vet si agjenci zhvillimore rajonale përmes kësaj nisme synon të sigurojë vizionin strategjik për zhvillimin e qëndrueshëm të portës së Alpeve që sintetizon planet ekzistuese, strategjitë sektoriale dhe investimet strategjike të mëparshme e të kohëve të fundit. Fondi Shqiptar i Zhvillimit sheh te BEI një partner të rëndësishëm nga i cili ka marrë mbështetje të vazhdueshme prej shumë vitesh, për të realizuar misionin e vet në mbështetje të objektivave të qeverisë shqiptare. Përmes kësaj nisme ne kemi ndërmend të ndërtojmë një program gjithëpërfshirës investimesh, që do t’i përgjigjet nevojave dhe potencialeve territoriale, përmes një qasjeje të integruar ndërhyrjesh, duke përmirësuar atraksionet e kësaj zone, duke nxitur potencialin e gjenerimit ekonomik, duke investuar te njerëzit dhe shërbimet, si dhe duke përmirësuar shërbimet publike”, tha Dritan Agolli, drejtor Ekzekutiv i FSHZH. /atsh

Në kuadër të Javës Kombëtare të Ujit në Shqipëri, Ministrja e Infrastrukturës dhe Energjisë, Belinda Balluku, së bashku me zëvendësministrin, Hantin Bonati dhe kreun e AKUM, Alqi Bllako, ishin në shkollën “E Kuqe” në Tiranë, ku biseduan me nxënës të kësaj shkolle rreth vlerave të ujit, por edhe rëndësisë së mos shpërdorimit të tij.

Në bisedën me nxënësit, ministrja Balluku e cilësoi tepër të rëndësishëm rolin e tyre për ndërgjegjësimin e gjithë shoqërisë për një çështje kaq jetike, jo vetëm në Shqipëri por në të gjithë botën. Ministrja e Infrastrukturës dhe Energjisë, tha se në vitet e fundit Qeveria shqiptare ka investuar shumë në rrjetin ujësjellës me qëllim përmirësimin e furnizimit me ujë të pijshëm për banorët, jo vetëm në zonat urbane por dhe ato rurale.

“Vitet e fundit Qeveria shqiptare ka investuar shumë në sektorin e ujit. Pavarësisht se Shqipëria është një nga vendet më të pasura me rezerva ujore të ëmbla, nuk kemi pasur rrjete funksionale sidomos në zonat rurale. Ne sot jemi duke investuar shumë në këtë pjesë që t’i ofrojmë të gjithë banorëve të Shqipërisë, kudo që ata jetojnë, si në zonat rurale ashtu dhe në qytete, sepse nganjëherë edhe qytetet i kanë linjat e amortizuara dhe të vjetra, ujë të pijshëm 24 orë pasi, siç ju e dini uji i pijshëm është një e drejtë e çdo qytetari”, tha ministrja Balluku.

Ministrja kërkoi që nxënësit e kësaj shkolle të bëhen shembull edhe për moshatarët e tyre dhe jo vetëm për ujin por edhe për çështje të tjera sensitive.

“Dua që ju të jeni një shembull për të gjithë fëmijët e tjerë dhe të gjithë shkollat e tjera në vendin tonë. Është shumë e rëndësishme që ju të luani rol në shoqëri. Shkolla është detyrim për të gjithë, siç është puna për të gjithë, kurse roli i një njeriu, i cili punon për mbrojtjen e planetit , për të sensitivizuar të tjerët, për çështje që janë çështje jetike, është një veprim që jo të gjithë e bëjnë. Dhe ju, që jeni këtu duhet të bëheni shembull për fëmijët e tjerë. Vullnetarizmi ndoshta në ditët e sotme është ajo që duhet të bëjmë, si për të mbrojtur mjedisin, si për të ndihmuar shtresat në nevojë”, theksoi ministrja Belinda Balluku.

Zëvendësministri Bonati krahas kujdesit që duhet treguar në menaxhimin e ujit u ndal edhe tek një tjetër shqetësim, siç është ndotja e tij që vjen nga plastika. “Ne duhet të kemi shumë kujdes në përdorimin e ujit. Gjithashtu, kujdes në çështjet e ujit duhet të kemi dhe nga plastika që është një nga problematikat kryesore sot në botë. Përveç mbrojtës së burimit ujor dhe konsumin e tij duhet ta mbrojmë këtë ujë për të ardhmen. Për ne uji është baza e jetës dhe duhet të kujdesemi të gjithë për të”, u shpreh Bonati.

Kreu i AKUM, Alqi Bllako, ndau me nxënësit angazhimin e Agjencisë që drejton, që brenda një kohe shumë të shkurtër në të gjithë Shqipërinë të ketë furnizim të pandërprerë dhe me cilësi me ujë të pijshëm. “Ne jemi të angazhuar në të gjithë Shqipërinë dhe po bëjmë të mundur që brenda shumë pak kohe të sigurojmë furnizim të pandërprerë dhe cilësor, jo vetëm për gjithë qytetet tona, por për të gjithë banorët e Shqipërisë sepse është një fakt shumë i rëndësishëm, ne jemi vend i bekuar, jemi vendi i dytë në Europë sa i përket burime ujore”, nënvizoi Bllako.

Gjatë këtij aktiviteti, së bashku me nxënësit e klubit të mjedisit në shkollën “E Kuqe” u demonstrua një prej mënyrave të matjes së cilësisë së ujit të pijshëm./atsh