Aktualitet

Afërsia fizike e prindërve me beben e tyre ndikon në zhvillimin e inteligjencës së tyre. Një anketim ka zbuluar se sa më shumë që e përqafoni beben, aq më shumë përfiton truri i tij.

Sipas një studimi të publikuar në revistën “Development and Psychopathology”, përqafimet kanë ndikim pozitiv në nivel molekular.
Mjedisi i jashtëm dhe lidhja me prindërit ndikon në zhvillimin mendor të fëmijëve.

Një mjedis mund të ndryshojë disa nga efektet negative që kanë ndodhur në shtatëzani në zhvillimin e fëmijëve.

Studimi u bë me mostra të lëkurës së foshnjës, të cilat u përdorën për analizat e metilimit të ADN-së dhe gjenerimit të gjenit.

Gjendja e foshnjës ishte gjithashtu e lidhur ndjeshëm me një komponent kryesor që përbënte 11.9% të ndryshimeve në metilimin e ADN-së me gjenin.

Këto efekte ishin më të dukshme kur krahasuan fëmijët me një stil të sigurt kundrejt një stili të çorganizuar të lidhjes me prindërit dhe më të theksuar tek nënat.

Ky studim ofron prova se lidhja e foshnjave mund të rregullojë disa nga efektet negative të hershme në sjelljen e foshnjës. /atsh

Fëmijët e shkollës 9-vjeçare “Seit Pepa” në orët e tyre të punës komunitare u përkujdesën për hapësirat e gjelbra, në njësinë Papër të Elbasanit.

Kryetari i bashkisë së Elbasanit, Gledian Llatja ndërsa pa nga afër kujdesin e treguar prej tyre për hapësirat e gjelbra, u shpreh se është bukur kur brezi i ri rritet me kulturën e vullnetarizmit.

“Është bukur të shoh një brez që rritet dhe edukohet me kulturën e vullnetarizmit për të mbajtur pastër ambientin që i rrethon”, – tha Llatja. /atsh

Kompania ajrore britanike “British Airways” përshëndeti sot një etapë pozitive në konfliktin në lidhje me pagat e pilotëve, të cilët kërcënuan se do të bënin grevë për Krishtlindje.

“Kjo është një etapë pozitive”, deklaroi pa shumë komente kompania pas një informacioni nga “Financial Times”, sipas të cilit dy palët kishin arritur një marrëveshje mbi pagat, që pritet të votohet nga pilotët e BA.

Nëse këta të fundit e miratojnë, ashtu si rekomandon sindikata e tyre Balpa, sipas FT, kjo do t’i jepte fund një konflikti të gjatë disamujor, pas dy ditëve grevë më 9 dhe 10 shtator.

Këto greva kanë shkaktuar anulimin e të gjitha fluturimeve këto dy ditë.

Sipas të përditshmes FT, kompania ka shtuar një klauzolë mbrojtëse për të kompesuar inflacionin, në rritjen e ardhshme të pagave me 11,5% në tre vjet.

Ajo ka propozuar gjithshtu përmirësim të kushteve të punës./ atsh

Në qytetin e Vlorës po zhvillohet sot aksioni për pastrimin e Pyllit të Sodës nga mbeturinat, në kuadër të nismës “Ta pastrojmë Shqipërinë në një ditë”.

Në këtë aksion po marrin pjesë punonjës të të gjitha institucioneve vendore në qytetin bregdetar.

Kryetari i bashkisë së Vlorës, Dritan Leli, tha se se “sfida jonë për heqjen e mbeturinave është një sfidë ku duhet të përfshihemi të gjithë. Sot në këtë ditë sensibilizimi të transmetojmë mesazhin për të gjithë qytetarët që jetojnë në Vlorë dhe për vizitorët që të kujdesemi për atë që është pronë e të gjithëve dhe mbi të gjitha për ambientin”.

“Aksioni i sotëm është përqendruar në pyllin e Sodës që është një nga gangrenat e këtij qyteti, ku keqbërësit, papërgjegjshmëria bëhen shpeshherë pjesë e kronikave televizive. Do të doja shumë që sot të transmetoj mesazhin që të kujdesemi për pasuritë e qytetit, që garantojnë të ardhmen e fëmijëve tanë”, – theksoi Leli.

Kryebashkiaku Leli i bëri apel qytetarëve të bëhen pjesë e iniciativave të tilla për të pasur një Vlorë më të pastër dhe për të pasur të garantuar të ardhmen e Vlorës të turizmit dhe mbi të gjitha për fëmijët./atsh

Shqiptarja Arta Cika merr pjesë në garën “TechWomen100 award”, që zhvillohet në Britani.

“Cika është mes 200 grave të tjera profesioniste nga Britania e Madhe”, bëri të ditur ministri i Shtetit për Diasporën, Pandeli Majko.

Fusha e saj e kërkimit shkencor përfshin teoritë e informacionit, rrjetet hapësinore, grafikët e rastit gjeometrike dhe entropinë grafike.

Arta Cika ka mbaruar studimet për inxhinieri komunikimi në Universitetin Politeknik të Torinos.

Aktualisht, kandidate për titullin Doktor në Departamentin e Shkencës së Inxhinierisë në Universitetin e Oksfordit, Angli, ajo gjithashtu është anëtare e Komitetit të Grave në Shoqërinë Inxhinierike në Universitetin e Oksfordit si dhe pjesë e Programit RisingWISE (Gratë në Shkencë dhe Inxhinieri).

Votimi për “TechWomen100 award” është i hapur deri më datë 29 nëntor./atsh

Drejtoria e Përgjithshme e Arkivave dhe Agjencia Shtetërore e Arkivave të Kosovës prezantuan sot numrin e ri të revistës “Arkivat Shqiptare”.

Revista “Arkivat Shqiptare” është organ shkencor dhe profesional, i botuar për herë të parë më 1999 nga Drejtoria e Përgjithshme e Arkivave.

Qëllimi i revistës është shkëmbimi i informacionit për dokumentet, tematikat dhe larminë e tyre, organizimi i veprimtarisë arkivore dhe komunikimi me profesionistët, shqiptarë e të huaj.

“Arkivat Shqiptare” nuk është vetëm një periodik i DPA, por një botim i përbashkët me Agjencinë Shtetërore të Arkivave të Kosovës, duke kthyer në realitet unitetin profesional të arkivistëve të të dy vendeve.

Në këtë numër paraqiten aktet e Konferencës Mbarëkombëtare të Arkivistikës “Arkivat dhe të drejtat e njeriut”, e cila u zhvillua në qershor të vitit 2019 në Shkup të Republikës së Maqedonisë së Veriut, me bashkëpunimin e Institutit të Trashëgimisë Shpirtërore e Kulturore të Shqiptarëve, Shkup. /atsh