Aktualitet

Kryetari i grupit parlamentar të Partisë Socialiste, Taulant Balla e ka quajtur antikushtetues vendimin e Presidentit Ilir Meta për dekretimin e Marsida Xhaferllarit anëtare të Gjykatës Kushtetuese.

Gjatë një interviste, Balla deklaroi se Presidenti Ilir Meta sot mund të dekretonte në këtë post edhe Enkelejd Alibeajn, bashkëjetuesin e Marsida Xhaferllarit.

“Presidenti Meta mund të dekretonte edhe Enkelejd Alibeajn sot, sepse është po aq e pavlefshme sa edhe dekretimi i bashkëjetueses së Alibeajt. Unë e kam thënë dy ditë më parë në seancën e Kuvendit, që Presidenti Meta nuk ka asnjë bazë kushtetuese në vendimmarrjen e sotme. Meta ka pasur mundësinë të zgjedhë një prej tre kandidatëve të renditur të parët. Nuk e ushtroi këtë të drejtë brenda 30 ditëve. Afati kushtetues i Metës për ta dekretuar ka qenë 7 nëntori. Presidenti Ilir Meta e ka ezauruar të drejtën për të zgjedhur në këtë rast, sepse KED pas përfundimit të afatit 30 ditë ka emëruar atë që është renditur e para në listë.

Nuk ka asnjë dallim nga qasja e Ilir Metës edhe për zhdekretimin e 30 qershorit. Ilir Meta mund të dekretojë anëtar të Gjykatës Kushtetuese Sali Berishën, por ai është anëtar i Gjykatës Kushtetuese për Ilir Metën, por nuk mund të jetë për Kushtetutën e vendit dhe për institucionin e Gjykatës Kushtetuese në këtë vend”, – tha Balla.

Duke e cilësuar si jolegjitime zgjedhjen e Xhaferllarit, Balla e akuzoi Presidentin Meta si një nga kundërshtarët e paepur të reformës në drejtësi.

“Gjykata Kushtetuese do të ndërtohet. Ju thatë këtu para pak minutash që reforma në drejtësi po kalon në shtigje të vështira. Është e vërtetë. Reforma në Drejtësi në Shqipëri prej vitesh ka pasur disa kundërshtarë ndër të cilët një ndër më të spikaturit mbetet z. Ilir Meta. Si kundërshtar i paepur i implementimit të plotë të Reformës në Drejtësi.

Nuk ka asnjë diskutim për këtë çështje. Ajo që dua të them është se Kuvendi i Shqipërisë ka qenë modeli edhe në seancën e ditës së hënë, i një procesi tejet të rregullt brenda 30 ditëve”, – deklaroi Balla. /atsh

Ministri i Punëve të Brendshme, Sandër Lleshaj i ka bërë edhe një herë thirrje të gjithë qytetarëve që u skadojnë letërnjoftimet dhe pasaportat, të nxitojnë pranë zyrave të aplikimit për t’u pajisur me to.

Sipas të dhënave më të fundit, këtë vit në krahasim me një vit më parë, janë shtuar me 61% zyrat e pritjes dhe me 109% sportelet e aplikimit.

Kështu, nga 90 zyra pritje në 2018, këtë vit janë 166 zyra pritjeje ndërsa sportelet e aplikimit, nga 145 në 2018, janë 303 këtë vit.

Sipas ministrit Lleshaj, “2019-a është një vit rekord për shtimin dhe përmirësimin e kushteve për pajisjen me pasaportë dhe letërnjoftim”.

“Që të shmanget stresi në fund të dhjetorit, kur dokumentet e vjetër skadojnë dhe zhgënjimi i janarit, kur shumë shërbime nuk mund të jepen pa dokumentet e identitetit, sot kërkohet që qytetarët të nxitojnë për të aplikuar në zyrat përkatëse”, – shprehet Ministri i Brendshëm./atsh

Panairi më i madh i bujqësisë, blegtorisë dhe agropërpunimit “Shqipëria punon tokën” do të zhvillohet në datat 16-17 Nëntor 2019, në Sheshin “Skënderbej” në Tiranë.

Kryeministri Edi Rama ftoi sot gjithë qytetarët që të mos humbin këtë event, që promovon produktet shqiptare.

“Mirëmëngjes dhe me ftesën për të mos humbur takimin e madh për Bujqësinë, me njerëzit që çdo ditë punojnë tokën e që në datat 16-17 Nëntor do të jenë në Sheshin Skënderbej me produktet e tyre më të mira shqip, ju uroj një ditë të mbarë”, tha Rama.

Panairi i këtij viti vjen pas suksesit të vjetshëm, si eventi më i madh bujqësor dhe blegtoral në shkallë vendi, i cili sjellë aromën e prodhimit autokton shqiptar dhe më të mirën e industrisë së përpunimit ushqimor në vend.

Në këtë edicion pritet një pjesëmarrje me mbi 400 fermerë, sipërmarrës të agrobiznesit dhe 12 biznese agroturistike, që do të bëhen bashkë në Panairin “Shqipëria Punon Tokën” për të sjellë ‘aromën’ e prodhimit autokton shqiptar dhe më të mirën e industrisë së përpunimit ushqimor në vend.

Hapësira ekspozuese prej 23400 m2 në zemër të Tiranës do të kthehet në arenën më të madhe ekspozuese të produktit, traditës, muzikës dhe kulinarisë shqiptare, ku mjeshtrat e kuzhinës dhe restorantet, do të ofrojnë mundësinë e degustimit të recetave më të spikatura./atsh

13 Nëntori njihet ndryshe edhe si dita botërore e Mirësjelljes. Kjo është dita e cila në gjithë botën është e kushtuar për njohjen e asaj që vërtet do të thotë të jesh i sjellshëm. Kjo do të thotë t’i kushtoni vëmendje dhe kujdes të tjerëve.

Japonezët e promovuan këtë iniciativë: Dita botërore e mirësjelljes lindi në Japoni falë Japan Small Kindness Movement, e themeluar në vitin 1988 në Tokio.

A e dini me të vërtetë se çfarë është mirësjellja? Para së gjithash, është edukim i mirë, sjellje të mira. Thuaj: “faleminderit”, “ju lutem”, “më fal”. Por kjo nuk mjafton. Mirësjellja është gjithashtu një person i mirë: altruist, bujar dhe i dobishëm me të tjerët, pa interes. Ju duhet ta dini se mirësjellja është e mirë jo vetëm për ata që e marrin atë, domethënë për të gjithë ata që janë përreth jush, por mbi të gjitha për ata që e bëjnë këtë. Për më tepër, është gjithashtu e mirë për zemrën tuaj, duke ju bërë të ndiheni të qetë dhe të relaksuar!

Pra, ka kaq shumë arsye për të mësuar se si ta bëni atë me lehtësi dhe me një vëmendje ndaj tjetrit. Dhe jo vetëm në ditën që feston mirësjelljen, por çdo ditë të jetës suaj. /atsh

Kryetari i grupit parlamentar të Partisë Socialiste, Taulant Balla kërkoi sot hetim të plotë për çështjen e pagesës prej 650 mijë dollarë nga Partia Demokratike me qëllim lobimin në SHBA për fushatën e elektorale të vitit 2017.

Balla tha se “po ashtu duhet të zbardhet edhe se kush ishte personi që transportoi paratë nga Shqipëria në Skoci”.

Ai solli në vëmendje deklaratën e djeshme të Arben Ristanit, ish-sekretari i Përgjithshëm i Partisë Demokratike, i cili u shpreh se “kemi një kontratë zyrtare të firmosur nga kryetari i partisë dhe një lobist amerikan, Muzin”.

“…Është një marrëdhënie që Kryetari në emër të PD-së ka lidhur një marrëveshje me lobuesin, unë nuk kam qenë në dijeni”, deklaroi dje Ristani.

Balla tha se “më qartë se kaq nuk ka, e thotë vetë PD”. Sipas tij, “Ristani është sa bashkëpunëtor aq edhe dëshmitar”.

“I pandehuri: Lulzim Basha i biri i Xhelal dhe i Remzije i datëlindjes 12.06.1974, lindur dhe banues në Tiranë, Pallati afër ish-Hotel Sheraton, me gjendje civile i martuar, me shtetësi shqiptare, me gjendje gjyqësore i pandehur, hetuar pa masë sigurimi. Akuzuar se ka kryer veprën penale të “Falsifikimi i vulave, i stampave ose i formularëve” dhe të “Pastrimit të produkteve të veprës penale ose veprimtarisë kriminale” të parashikuar nga nenet 190/3 dhe 287-ç/2 të Kodit Penal”, tha Balla.atsh