Aktualitet

Çeli siparin sot në Tiranë edicioni i 26 i Panairit Ndërkombëtar të Tiranës Klik Ekspo Group në mjediset e Pallatit të Koncerteve ku Klik Ekspo Group është pozicionuar dhe do të qëndrojë i hapur nga datat 23-26 nëntor.

Stendat të pasura me produktet e sipërmarrjeve dhe informacionet për shërbimet nga agjencitë dhe institucionet publike e private u vizituan me kërshëri nga delegacionet e huaja të ftuara në këtë panair, të cilët pas vizitës në biznese dhe bisedave të shkurtra, morën pjesë në konferencën e hapjes.

Në fjalën e tij përshëndetëse Ministri për Mbrojtjen e Sipërmarrjes Eduard Shalsi dha për biznesin lajmin e gëzueshëm se Tirana do të ketë Qendrën e Vetë të Panaireve.

“Panairet janë moment i mirë për të bërë një rezyme për punën e gjithë vitit. Çdo vit panairi zhvillohet, Tirana pasurohet dhe transformohet. Shqipëria po bëhet dita-ditës tërheqëse për investimet e huaja. Megjithë vështirësitë, ne jemi shumë të vendosur për të përmirësuar klimën e biznesit përmes reformave dhe kuadrit ligjor për të zhvilluar sipërmarrjen e shëndetshme, sepse besojmë tek ai”- u shpreh ministri Shalsi.

Ai gjithashtu bëri me dije për biznesin se sapo është krijuar një rrjet koordinatorësh për bizneset për të shmangur burokracirat e panevojshme që pengojnë bizneset në punën e tyre.

Edhe nënkryetarja e Bashkisë së Tiranës Anisa Ruseti kishte një lajm për të shtuar dozat festive të kësaj dite. Ajo njoftoi të ftuarit se Tirana do të jetë Kryeqyteti Europian i Rinisë për vitet 2020-2020 pas çmimit të fituar duke thënë se “Tirana është shtëpia e 1 mln banorëve dhe një mjedis që lejon të gjitha sipërmarrjet e vendit dhe të huaja për të shpalosur avantazhet e tyre konkurruese për tu rritur e zhvilluar më tej”.

Në këtë edicion të 26 të panairit marrin pjesë edhe 20 sipërmarrje kineze. Ky 23 nëntor shënon një ditë të veçantë për marrëdhëniet mes Shqipërisë dhe Kinës, atë të 70-vjetorit të marrëdhënieve mes dy vendeve.

Marrëdhëniet tregtare sipas INSTAT mes Kinës dhe Shqipërisë për 2018-ën rezultojnë të jenë 551 mln dollarë amerikanë duke e renditur Kinën partnerin e katërt tregtar.

Megjithatë, u shpreh ambasadori kinez në Tiranë, Zhon Ding, “Kina është shumë e interesuar për të rritur marrëdhëniet tregtare. Ambasada e Kinës ka patur shumë kërkesa që Shqipëria të eksportojë në Kinë prodhime bujqësore. Panairi është qasja më e mirë për njohje dhe thellim të bashkëpunimit. Jam i bindur që sipërmarrjet kineze do të marrin përvoja të reja dhe të veçanta nga ky panair”. Ambasadori vërejti gjithashtu se në këtë 1 vit e gjysmë në Shqipëri ka vërejtur se Tirana gjallëron nga aktivitetet dhe duket se dëshiron ta mbushë shpirtin dhe ta materializojë duke treguar edhe eksperiencën e disa ditëve në Panairin e Librit.

Përshëndeti edicionin e 26 të Klik Ekspo Group edhe Presidenti i Dhomës Serbe të Tregtisë Mihailo Vezoviç i cili falenderoi për eksperiencën 16 vjeçare në këtë panair.

Një nga partnerët e nderit të këtij panairi, Dhoma e Tregtisë dhe Industrisë së Stambollit, me eksperiencë 130 vjeçare dhe me 430 mijë biznese anëtare, përfaqësohej në Klik Ekspo Group nga zëvendës presidenti i saj Izrafill Kurullai.

“Kemi organizuar pesë panaire të prodhimeve turke në Shqipëri. Jemi të nderuar të marrim pjesë edhe në këtë panair kaq të madh e të rëndësishëm për sipërmmarjen. 300 biznese turke janë prezantuar në tregun shqiptar.Këto iniciativa kanë sjellë 3-fishim ose 1 mld dollar në vit shkëmbime tregtare. Pozita gjeografike e Shqipërisë me Turqinë, marrëdhëniet politike të deritanishme janë një ogur për thellimin e të gjitha marrëdhënieve tona”, tha ai. /atsh

Fieri dhe Tirana janë dy qarqet ku u regjistruan shpenzimet më të larta për konsum nga familjet.

Instituti i Statistikave publikoi vjetarin statistikor, i cili paraqet një vështrim gjithëpërfshirës të treguesve statistikorë më të rëndësishëm të vendit, në nivel qarku dhe bashkie.

Për sa i përket shpenzimeve në nivel qarku sipas nivelit të arsimit të kryefamiljarit vihet re që shpenzimet më të larta janë regjistruar në kategorinë e kryefamiljarëve me arsim të lartë apo pasuniversitar ndjekur nga kategoria e të arsimuarve në shkolla të mesme të përgjithshme ose profesionale.

Vlerat më të larta të shpenzimeve për vitin 2018 në kategorinë e arsimit të lartë/pas universitar janë regjistruar në qarqet Fier dhe Tiranë, ndërsa vlerat më të larta për kategorinë e të arsimuarve në shkolla të mesme të përgjithshme ose profesionale janë regjistruar në qarqet Tiranë dhe Korçë.

Qarqet Berat, Elbasan, Gjirokastër dhe Vlorë kanë regjistruar rritje të shpenzimeve për konsum në vitin 2018 për të tre kategoritë e arsimit të përfunduar të kryefamiljarit, ndërkohë për të njëjtat kategori në qarqet Dibër dhe Durrës shpenzimet kanë shënuar ulje, krahasuar me vitin 2016./atsh

Presidenti Ilir Meta në kuadër të 75-vjetorit të Çlirimit ka nderuar me dekoratën “Nderi i Kombit” Organizatën e Veteranëve të Luftës Antifashiste Nacionalçlirimtare.

Kreu i shtetit thotë se gjaku për Çlirimin e Atdheut nuk mund të bëhet ujë.

“Kam kënaqësinë të ndaj me ju vendimin tim për të nderuar, në kuadër të 75-vjetorit të Çlirimit të Shqipërisë, Organizatën e Veteranëve të Luftës Antifashiste Nacionalçlirimtare, me dekoratën e lartë “Nderi i Kombit”. Gjaku për Çlirimin e Atdheut nuk mund të bëhet ujë”, shprehet Meta. /atsh

Kryetari i Kuvendit, Gramoz Ruçi, mori pjesë në ceremoninë e përurimit të bustit të shtetarit, diplomatit e poetit Ali Asllanit në Vajzë të Vlorës, vendlindjen e këtij personaliteti të shquar. Busti i Ali Asllanit është realizuar nga Skulptori i Popullit Muntaz Dhrami.

“Labëria ka nxjerrë burra të mendjes, penës dhe pushkës, shtetarë dhe administratorë, artistë e profesionistë, poetë dhe oratorë. Por, rrallë ndodh që në një njeri të vetëm të gjenden bashkë të gjitha këto vlera e virtyte. Ali Asllani është njeri prej tyre. Ali Asllani ishte një personalitet poliedrik, poet, artist, shtetar, administrator dhe diplomat i shquar. Ai ishte një “dhuratë” e Vajzës, Labërisë dhe Vlorës për Shqipërinë”, – u shpreh kryetari i Kuvendit.

Në ceremoni ishin të pranishëm banorë të krahinës, përfaqësues të pushtetit vendor, deputetë, intelektualë dhe personalitete të njohur të artit, kulturës dhe politikës.

“Me veprimtarinë e tij si kryebashkiak e administrator Ali Asllani krijoi një model të shkëlqyer të funksionarit publik në shërbim të qytetarëve. Me veprimtarinë diplomatike Ali Asllani krijoi modelin e diplomatit patriot në shërbim të interesave të larta të atdheut. Me artin dhe poezinë e tij krijoi një udhë-hartë për të ndërtuar një shoqëri me drejtësi sociale dhe një “Manual” për të bashkëpunuar me qytetarët, fisnikët dhe bujarët e këtij vendi, kundër zuzarëve, maskarenjve dhe shushunjav/atshe të korrupsionit. Mesazhet e veprës së Ali Asllanit janë sot tepër aktuale.”, theksoi në fjalën e tij kryetari i Kuvendit, Gramoz Ruçi./atsh