Aktualitet

Kryetari i PD, Lulzim Basha, anuloi vizitën në Athinë, ku kishte planifikuar të festonte, bashkë me shqiptarët në Greqi, Ditën e Flamurit.

Basha ishte i ftuar të merrte pjesë në Kongresin e Nea Demokracisë. Lajmin e anulimit të kreut të PD-së e njoftoi kryetari i degës së PD në Athinë, Fatmir Gjoçi.

“Pas situatës së vështirë që po kalon vendi ynë, për shkak të fatkeqësisë natyrore që shkaktoi humbje jetësh, Kryetari i Partisë Demokratike të Shqipërisë Lulzim Basha, e anulloi vizitën e tij në Athinë.”- shprehet kreu i degës së PD-së së Athinës.

Basha kishte planifikuar një sërë takimesh, me kryeministrin e Greqisë Mitsotakis, ministrin e Punëve të Jashtme Nikos Dendias dhe një sërë personalitetesh të larta të shtetit grek, si dhe personalitete ndërkombëtare diplomatike, që ishin të ftuar në Kongres. /atsh

Kryeministri Edi Rama deklaroi sot se “kjo është barra jonë prandaj kemi filluar që dje me ministrin e Turizmit, të punojmë për një marrëveshje me të gjithë strukturën hoteliere të Durërsit dhe Kavajës për ti akomoduar të gjitha familjet pa çati”.

Në fjalën e tij në mbledhjen e qeverisë Kryeministri Rama theksoi se “gatishmëria ka qenë shumë e madhe, kjo nuk është çështje e një jave apo një muaji, këto familje nuk kanë nevojë për një javë apo një muaj, kanë nevojë për shumë më tepër prandaj nuk mund ta mendosh jo më ta provojmë që sipërmarrësve të hotelerisë tu kërkojmë që me shpenzimet e tyre individuale të mbajnë infrastrukturën hoteliere me muaj të tërë në dispozicion pa pasur asnjë mbështetje financiare”.

“Nga ana tjetër ne nuk mund te pranojmë që familje, të moshuar, fëmijë, gra të kalojnë dimrin në tenda është e pakonceptueshme, apo t’ua lëmë si barrë familjeve të tjera, që kanë shprehur solidaritet mund ta bëjnë këtë gjë nuk mund të kalojnë një periudhë, relativisht të gjatë me një barrë të tillë”, – nënvizoi Rama.

Kryeministri Rama u shpreh se “këtë herë dua të them shumë qartë nuk do të lëmë asnjë familje që do të kërkojë të qëndrojë në infrastrukturën e rrezikshme dhe teoria që unë nuk lë shtëpinë nuk dal nga oborri nuk do funksionojë”.

“Është një fakt që të gjitha shtëpitë, për shembull që në qarkun e Tiranës kanë rezultuar të dëmtuara por të riparueshme nga tërmeti i parë sot janë jashtë funksionit nuk janë më të riparueshme, por duhen rindërtuar. Që do të thotë që numri i familjeve që kanë nevojë për strehë nuk është i vogël. Natyrisht kjo do të kërkojë një angazhim ekstra për të cilin kemi filluar punë me ministren e Infrastrukturës dhe me Drejtorinë e Përgjithshme të Transportit Rrugor që të kemi një organizim të transportit për fëmijët që duhet të shkojnë në shkollë dhe nga ana tjetër me Ministren e Arsimit për të ofruar një asistencë për këta fëmijë në periudhën jashtë shkollës apo për të krijuar klasat në vijën akomoduese të bregdetit të Durrësit, Kavajës duke iu dhënë mundësi këtyre familjeve që të jetojnë në kushte optimale, të shërbehen në kushte optimale dhe ti kalojën festat e fundvitit në kushte më optimale”, – nënvizioi Rama.

Kreu i qeverisë u shpreh se mos harrojmë që pjesa më e madhe e këtyre familjeve janë familje të varfra.

“Kjo fatkeqësi, e kemi parë në terren gjerë e gjatë sepse çdo minutë ka qenë një orë, ka goditur pjesën më të dobët , hallkën më të dobët familjet më të varfra shtëpitë e vjetra apo të ndërtuara thjesht për të futur kokën pa standarde sigurie të mjaftueshme”, – tha Rama./atsh

Vazhdon solidariteti vëllazëror i qytetarëve nga Kosova.

Të angazhuar që në orët e para pas rënies së tërmetit për mbledhjen e ndihmave në ushqime e veshmbathje dhe kontribute në shuma financiare, ka filluar edhe marrja e banorëve nga zonat e dëmtuara për t’u akomoduar në Kosovë.

Në orët e para të mëngjesit të sotëm 30 banorë të Durrësit kanë arritur në Prishtinë, njofton KosovaPress.

Kështu kanë bërë të ditur përfaqësues të Plisave, të cilët kanë njoftuar se edhe gjatë ditës së sotme do të mbledhin ndihma në sheshin “Zahir Pajaziti”.

“Para pak minutash ekipi ynë ka arritur nga Durrësi në Prishtinë. Për momentin jemi te Hotel ‘Ora’ dhe të gjithë janë sistemuar shëndoshë e mirë. Shihemi sot prej orës 10:00 tek sheshi ‘Zahir Pajaziti’”, thuhet në njoftimin e tyre.

Kushtrim Ramadani, përfaqësues i “Plisave”, tha për KosovaPress se aksioni për mbledhjen e ndihmave do të vazhdojë edhe gjatë ditës së sotme.

“Lusim të gjithë ata që duan të ndihmojnë, të sjellin më shumë gjëra ushqimore sesa veshmbathje. Gjatë ditës do të shkojmë tri-katër herë në Shqipëri t’i dërgojmë këto ndihma. Për sot nuk kemi ende ndonjë çmim sesa mjete financiare janë mbledhur, mbrëmë kanë qenë 4 mijë euro”, tha ai.

Po kështu edhe në komunën e Pejës kanë mbërritur mëngjesin e sotëm familjet e para, me rreth 60 persona të cilat janë strehuar në familje të kësaj komune.

Ndërkohë vazhdojnë operacionet e kërkim-shpëtimit për personat të cilët ndodhen ende nën gërmadha, si pasojë e tërmetit që ndodhi një ditë më parë. /KosovaPress//

Institucionet e qeverisjes vendore, janë angazhuar dhe kanë nisur të mbledhin ndihma në ushqime, veshmbathje dhe pajisje të ndryshme për t’i ardhur në ndihmë zonave më të prekura nga tërmeti, që goditi të martën Shqipërinë.

Bashkia e Korçës ka nisur drejt zonave të prekura nga tërmeti mjete, grupe të emergjencave për t’u ardhur në ndihmë të gjithë të dëmtuarve. Ndërsa punonjës të Shërbimit Zjarrfikës dhe Shpëtimit nga Zjarri, pranë Bashkisë Maliq, janë nisur mëngjesin e së martës drejt qytetit të Durrësit, për të ndihmuar banorët e prekur nga fatkeqësia natyrore që goditi më rëndë Durrësin dhe Tiranën.

Solidaritetit me të prekurit nga tërmeti i janë bashkuar edhe Bashkitë Tiranë, Ura Vajgurore, Vlorë, Fier, Lezhë etj.

Përveç ndihmës me mjete dhe forca në njerëz të dërguara në zonat e prekura në operacionet e shpëtimit në terren, Bashkia Tiranë ka miratuar një fond ndihme financiare prej 100 milionë lekësh për Bashkinë e Krujës dhe në mënyrë të posaçme për Thumanën.

Ndërsa në Bashkitë Ura Vajgurore, Fier qindra qytetarë i janë përgjigjur thirrjes së bashkive, për t’i ardhur në ndihmë banorëve të prekur nga tërmeti. Ndihmat kanë qenë të shumta, në ushqime, veshmbathje dhe vlera monetare dhe fluksi i qytetarëve vijon të shtohet.

Ndërkohë që janë aktivizuar disa llogari bankare në bankat e nivelit të dytë, për mbledhjen e fondeve për të ndihmuar popullin e prekur nga tërmeti./atsh