Aktualitet

Kryeministri Edi Rama tha sot në studion e emisionit “Porta a porta” në Raiuno se është mirënjohës për të gjithë ata që ndihmuan Shqipërinë që në momentet e para të goditjes nga tërmeti i fuqishëm i 26 nëntorit në Shqipëri.

Kryeministri Rama tregoi sesi pak para orës 4 të mëngjesit të së martës së 26 nëntorit, kur goditi tërmeti, ai kishte dërguar mesazhe të gjithëve. “Solidariteti që në çastin e parë u aktivizua nga Italia dhe u jam mirënjohës trë gjithëve”, theksoi Rama.

“Grupi i parë erdhi nga Italia. Një falënderim të veçantë për trupën e mbrojtjes civile, ata janë heronj të vërtetë, rrezikuan jetët e tyre për të shpëtuar jetën e të tjerëve”, theksoi kryeministri Rama.

Drejtuesi i emisionit “Porta a porta”, Bruno Vespa prezantoi faqen e internetit e-Albania në të cilën kush dëshiron mund të kryejë dhurime për lehtësimin e pasojave të tërmetit në Shqipëri.

Vespa prezantoi edhe një insert me pamje nga pasojat e tërmetit dhe dëshmi të të mbijetuarve.

Një prej të mbijetuarve tregoi për Raiuno sesi e kishin nxjerrë nga gërmadhat, sikundër edhe një fëmijë tregoi sesi i kishte rënë një copë betoni në këmbë.

Tërmeti i 26 nëntorit shkaktoi 51 viktima, 5 mijë të plagosur, 5 mijë ndërtesa të dëmtuara e janë me mijëra personat që kanë mbetur pa shtëpi.

Ndërhyrja e trupës kombëtare italiane të zjarrfikësve ishte e menjëhershme. 175 njerëz erdhën në Shqipëri që në mëngjesin e së martës, nisën operacionet e kërkim-shpëtimit.

Inserti përcolli edhe mirënjohjen e shqiptarëve ndaj ndihmës italiane për pasojat e tërmetit.

Ndërkohë, Vespa e pyeti kryeministrin në lidhje me humbjen nën rrënoja të së fejuarës së të birit, Kristi Reçit.

“Është e vërtetë, por më lejoni të them që duke u gjendur në këtë situatë me këtë detyrim shumë të lartë për të qenë kryeministër i një vendi që po kalon këtë tragjedi, nuk kam dashur të flas për këtë pasi nuk ka të bëjë me mua apo me familjen tonë, por me të gjithë. Kjo thjesht e shtoi detyrimin tim të brendshëm për të bërë gjithçka. Nuk bëj dallim mes gjithë atyre që kanë humbur jetën”, theksoi Rama.

Kryeministri Rama solli përjetimet e dy fëmijëve që kishin fluturuar nga katet e larta të pallateve ku jetonin dhe i kanë mbijetuar tërmetit.

“Ai fëmijë ka zgjedhur të fluturonte nga kati i pestë. U hodh dhe jetoi. Ai është heroi i këtij tërmeti bashkë me një mikun e tij që u hodh nga kati i tretë. Janë dy djem të mrekullueshëm. Kur e pyeta si ndodhi që u hodh nga kati i pestë, më tha: Idhulli im është Kristiano Ronaldo. Përbën një çast frymëzimi bashkë me frikën e gjithçka tjetër që solli tërmeti. Qe një çast i dhimbshëm por edhe moment shprese e jete në këto ditë mjaft të errëta për Shqipërinë”, tha Rama. /atsh

Kryeministri Edi Rama shprehu sot besimin se Europa nuk do ta lërë vetëm Shqipërinë, pas tërmetit tragjik të 26 nëntorit.

Në studion e emisionit “Porta a porta” në Raiuno për panelin e organizuar nga gazetari Bruno Vespa, për informimin dhe sensibilizimin e publikut italian mbi pasojat e fatkeqësisë natyrore të 26 nëntorit, Kryeministri Rama theksoi se “shpresoj që Europa nuk do të na lërë vetëm, bota nuk do të na lërë vetëm. Besoj që edhe politikanët, qeveritë, të kenë të njëjtin frymë, shpirt të zjarrfikësve tuaj, do ishte bukur sikur zemra, fuqia mendore e politikanëve të ishte e barabartë me atë të zjarrfikësve”.

“Nëse është e vërtetë ajo thënia ‘ajo çka nuk të vret të bën më të fortë’, atëherë ne duhet ta kthejmë këtë në një fakt të prekshëm, të dukshëm në vend. Ne jemi duke punuar në rrafshin e rindërtimit që të jetë ky një rifillim dhe i bukur, sepse bukuria mund të shërojë traumat dhe plagët shumë të thella”, – nënvizoi Rama.

Kreu i qeverisë u shpreh se “sot unë vij drejtpërdrejt nga samiti i NATO-s, nga Londra ku i bëra thirrje të gjitha vendeve që të japin një kontribut së bashku përmes një konference të madhe të donatorëve dhe ka një përgjigje mjaft inkurajuese zemërdhënëse, sepse me fondet tona njerëzisht është e pamundur ta bëjmë të gjithë këtë”.

“Ju keni përvojën tuaj në Itali, jeni një vend i G7 keni jetuar përvoja, ka raste ku sot njerëzit akoma nuk kanë hyrë në një shtëpi. Pra duhen bërë shumë gjëra njëkohësisht, shpresoj që Europa nuk do të na lërë vetëm, bota nuk do të na lërë vetëm. Besoj që edhe politikanët, qeveritë, të kenë të njëjtin frymë, shpirt të zjarrfikësve tuaj, do ishte bukur sikur zemra, fuqia mendore e politikanëve të ishte e barabartë me atë të zjarrfikësve”, tha Rama.

Duke iu përgjigjur këshillës së Bruno Vespës, sipas të cilit, kryeministri “duhet t’i shtyjë pak, t’i japë një detyrë secilit vend dhe pastaj të kontrollojë që ato të respektojnë vendimin, Rama tha: “Unë nuk e di se çfarë do të bëjnë nesër por për momentin nuk doja të mëkatoja, sepse nga ana e qeverisë italiane, te kryeministri Konte, gjeta një person, të cilin si politikan mund ta kem gjykuar, por si njeri është një njeri me zemër të stërmadhe”.

Drejtuesi i emisionit “Porta a porta”, Bruno Vespa, tha se është dëshmitar i Rilindjes së Friulit pas tërmetit. “Këtë duhet të bëni edhe ju të përfitoni nga tërmeti e të bëni gjëra të bukura. Friuli, nga një rajon i varfër u bë një rajon i pasur. Shpresoj që edhe Shqipëria rindërtimin ta bëjë shpejt, më shpejt se ne që na u desh të bëjmë Akuilën për 10 vjet. Jepini fuqi, forcë njerëzve sepse pikërisht nga ato rrënoja duhet ndërtoni një Shqipëri më të fortë, më moderne”, tha ai.

Vespa tha gjithashtu se “shpresoj që solidariteti ndërkombëtar për ju do të jetë më i mirë, sepse për Akuilën pak vende bënë shumë, të tjera vende shumë të rëndësishme nuk bënë asgjë. Ju duhet që t’u qëndroni mbrapa se në këtë çast premtimet janë të shumta”.

Kryeministri Rama tha se janë 38 mijë sipërmarrësit shqiptarë në Itali, të cilët paguajnë kontribute si sipërmarrës të vegjël e të mesëm”. “Unë jam shumë krenar dhe Vittorio e di që studentët e huaj më të mirë në Itali janë shqiptarët. Ne jemi shumë krenarë për faktin që jemi një popull që kemi shumë të meta në fund të fundit unë them gjithmonë që italianët janë shqiptarë të veshur me Versace”, – theksoi Rama.

Kryeministri Rama u shpreh se “unë besoj se kemi një të mirë të madhe që është e shkruar edhe në Kushtetutën tonë të parë në kanunin shqiptar të mesjetës ku fjalia e parë thotë se “Shtëpia e shqiptarit i përket Perëndisë, Hyjit dhe Mikut”. Jemi i vetmi vend që kemi pasur më shumë hebrenj pas Luftës së Dytë Botërore sesa para saj, sepse asnjë hebre nuk është përzënë, nuk është denoncuar”.

“Ne gjatë luftës së Kosovës kemi pritur 500 mijë vetë dhe me një popullsi prej 3 milionë banorë dhe me Italinë lidhja ka qenë shumë e fortë”. Në studion e emisionit “Porta a Porta” ishte i ftuar edhe gazetari italian Vittorio Sgarbi me vajzën e tij, Alba, nëna e së cilës është shqiptare.

“Shqipëria është një vend i madh, babai im ka qenë në Shqipqri dhe më ka treguar për udhëtimet e tij në Tiranë dhe Durrës. Edhe unë e kam vizituar Shqipërinë në vitet e demokracisë”, tha Sgarbi. Vajza e tij, Alba, u shpreh se “prej 50 vitesh nuk kishte tërmete të tilla në Shqipëri. Kur të mbaroj provimet do shkoj në Shqipëri të ndihmoj dhe fizikisht”./atsh

Mbi vendin tonë do të qarkullojnë masa ajrore relativisht të qëndrueshme.

Shërbimi Meteorologjik Ushtarak bën me dije se moti sot do të jetë me kthjellime dhe alternime vranësirash kalimtare të cilat do të bëhen më tepër prezente prej orëve të mesditës por pa praninë e reshjeve. Mjegull e dendur në mëngjes përgjatë luginave dhe kryesisht në juglindje e jug. Ngrica në orët e mëngjesit në zonat malore si shkak i temperaturave negative. Era do të fryjë me drejtim Verilindje – Juglindje 1-10 m/sek. Në bregdet hera herës e vrullshme deri ne 18 m/sek.

Valëzimi në dete parashikohet i forcës 1-3 ballë.

Temperaturat parashikohen:

QYTETET Temperaturat në °C Sigla
Shkodër 2/13 Diell re
Kukës -3/8 Diell re
Lezhë 2/15 Diell re
Dibër -5/6 Diell re
Durrës 4/16 Diell re
Tiranë 3/17 Diell re
Elbasan 3/15 Diell re
Berat 1/18 Diell re
Vlorë 5/18 Diell re
Korçë -1/6 Diell re
Gjirokastër 0/12 Diell re
Sarandë 6/17 Diell re/atsh

Kryeministri Edi Rama do të jetë sot i ftuar në emisionin “Porta a Porta” në RAIUNO, në panelin e organizuar nga gazetari Bruno Vespa, për informimin dhe sensibilizimin e publikut italian mbi pasojat e fatkeqësisë natyrore të 26 nëntorit.

“Tani jemi tek Bruno Vespa ku do të bëjmë një thirrje për mbështetje dhe sensibilizim, pasi na duhet mbështetja e të gjithëve. Ne do ta bëjmë tonën, nuk do presim thjesht çfarë do të bëjnë të tjerët, këto janë gjëra që kalohen bashkërisht”, – theksoi Rama.

Kreu i qeverisë tha se “zhvilloi një bisedë telefonike me Komisionerin e caktuar për Menaxhimin e Krizave, Janez Lenarçiç, i cili do të mbërrijë sot në Shqipëri. Komisioni Europian dha 15 milionë euro, që është një fond që është nxjerrë me urgjencë nga portofoli i Komisionerit që ka zëvendësuar Hahn, por gjëja më e rëndësishme është që konfirmoi konferencën e donatorëve, e cila do të bëjë që të jetë mundësia për të bërë një kontribut përtej kontributit të BE-së, ndërkohë që më kanë thënë se po punojnë edhe për atë kërkesën tonë që fondet IPA të Shqipërisë të mblidhen në një paketë”.

“Nuk di ta them datën, por unë thashë që duhet patjetër të bëhet në janar konferenca e donatorëve. Tani të shkojmë edhe tek Bruno Vespa, që të motivohen njerëzit”, – tha Rama.
Gjatë qëndrimit në bar, Kryeministri Rama takoi edhe një shqiptar, që punonte si kamerier, i cili tha se “jetoj që nga 2003 në Itali, jam nga Elbasani. Më erdhi keq shumë për tërmetin që ndodhi në Shqipëri, më bëhet qejfi që Italia po ndihmon dhe shumë shtete të tjera”.
Kryeministri u shpreh se “Italia ka ndihmuar jashtëzakonisht. Shikohemi më vonë te Bruno Vespa, në 11:30 i vjen radha panelit tonë, do të jetë edhe i madhi Vittorio Sgarbi”./atsh

Presidenti Meta vizitoi pasditen e sotme në Prizren qytetarët nga Shqipëria që janë strehuar në Kampin e Inovacionit, banesat e të cilëve iu shkatërruan banesat nga tërmeti i 26 nëntorit.

Presidenti Meta u interesua në bashkëbisedim me ta për kushtet e personave që qëndrojnë në kamp të larguar nga pasojat e tërmetit që goditi Shqipërinë.

Ai bashkëbisedoi me ta për tejkalimin e situatës emergjente dhe rikthimin në normalitet.

Presidenti Meta falënderoi Komunën e Prizrenit dhe kryetarin e saj Haskuka për përkujdesjen e ngrohtë dhe vëllazërore. Po ashtu, Presidenti Meta falënderoi vullnetarët që po shërbejnë në Kampin e Inovacionit në Prizren. /atsh

Kryetari i Komisionit të Ekonomisë, Arben Ahmetaj u shpreh sot se “qeveria po bën çdo gjë për të prekurit nga tërmeti dhe asnjë qytetar a familje nuk do të mbetet jashtë pa strehim. Qeveria do të ndërtojë qyteza në Tiranë, në Durrës, Thumanë dhe në Lezhë”.

Në një intervistë televizive, Ahmetaj tha se “Brenda krishtlindjeve do të pastrojmë qytete si Durrësi, Kavaja etj. Do të bëjmë vlerësimin me ekspertë dhe specialistë. Ne mendojmë se janë rreth 5000 familje që nuk do munden të kthehen më në shtëpinë e tyre, por vlerësimi do e tregojë. Mund të ketë shumë më shumë, sepse lëvizja është gjithmonë e në rritje. Ne kemi riformatuar paketën e rindërtimit. Do ketë qyteza urbane në Durrës. Nuk do lihet asnjë qytetar, asnjë familje jashtë. Po do ndërtohen qyteza urbane në Durrrës, në Tiranë, te ish-zona e Auto-traktorit dhe Kombinat, Thumanë dhe në Lezhë”, deklaroi Ahmetaj.

“Që në datë 27 nëntor janë strehuar njerëzit në hotele. Në këtë situatë, të të them se jemi optimist është e tepërt. Unë dua të ndaj gjithë përpjekjen e qeverisë dhe të gjithë qytetarët që janë gjendur pranë të prekurve në këto ditë të rënda, apo gazetarë që kanë kontribuuar në ringritjen e shoqërisë. Kjo shoqëri me kontribut nga të gjitha palët ringrihet për të kapur ritmin e jetës. Të gjitha familjet me viktima janë pajisur me një shtëpi. Mendohet se dëmi shkon edhe 500- 600 milionë euro dëme. Ne kemi menduar për strehimin për qytetarët. Sigurisht që qeveria mund të kritikohet”, tha ai.

Ahmetaj theksoi se për të prekurit nga tërmeti do të ngrihen qyteza, sipas standardeve më të mira ndërkombëtare.

“Është një grup që drejtohet nga Blendi Çuçi dhe po bën vlerësimin. Vlerësimi po bëhet. Qytezat do të ndërtohet me standarde. Do të ndërtohet shtëpi në qyteza urbane me standarde. Do jenë verifikuar familjet që nuk kthehen dot më, do jetë lista e saktë, pas verifikimeve serioze dhe do të strehohen në këto qyteza. Do të kemi program më vete që do të quhet programi i rindërtimit. Nesër e prezanton Rama. Nuk do ketë asnjë rritje taksash. Skema e financimit është e kombinuar me të gjitha, që nga kursimet, nga donatorët, nga ndihmat, nga kredi me interesa minimale. Do të jenë të përfshirë të gjithë elementet. Buxheti nuk do të preket aspak”, tha Ahmetaj./atsh