Aktualitet

Kryeministri Edi Rama vizitoi sot banorët e sistemuar në Manëz, ku janë vendosur edhe 15 njësitë e parë të lëvizshme për banim.

I shoqëruar nga zv.ministrja e Mjedisit, Ornela Çuçi, kryeministri Rama pa nga afër gjendjen e banorëve të sistemuar në Manëz, ku përveç strehimit sigurohet edhe asistencë psikologjike dhe aktivitete të ndryshme sociale për fëmijët.

Çuçi informoi se në Manëz janë montuar 15 njësitë e para të lëvizshme të banimit, ku janë akomoduar deri tani 81 persona, ose afërsisht 27 familje, që ishin më parë në çadra.

Njësitë e banimit, sipas Çuçit, janë të kompletuara me kanalizime të ujërave të zeza, të ujërave të bardha, me elektricitet dhe kondicionerë në çdo shtëpi.

Ndërkohë sipas saj, pritet edhe montimi i 10 njësive të tjera lëvizëse të banimit pranë qendrës shëndetësore.

Çuçi informoi po ashtu se janë shpërndarë mbi 40 çadra dimërore për familjet në zonat e largëta rurale. Sipas saj, çadrat kanë ardhur nga Izraeli.

Kryeministri pa nga afër kushtet e banimit në këto njësi të lëvizshme, ku janë akomoduar familje me foshnja të vogla e fëmijë, si dhe me të moshuar.

Në bashkëbisedim me një të moshuar, Rama tha se “secili ka detyrat e veta në këtë botë, ca të shkatërrojnë ca të ndërtojnë, ca të prishin ca të rregullojnë, ca t’ia fusin kot, ca ta bëjnë tamam, por siç thotë ajo shprehja ‘bylmezi e gjen vetë rrugën e humbjes”.

Kryeministri vizitoi po ashtu edhe ambientet e shkollës së Manzës, e cila është kthyer në një qendër për fëmijët, që përveç aktiviteteve marrin edhe 3 vaktet e ushqimit.

Përveç stafit arsimor, aty janë angazhuar edhe dhjetra vullnetarë nga “Save the Children”, UNICEF etj për të bërë të mundur tejkalimin e kësaj situate. /atsh

Kryeministri Edi Rama solli sërish sot përmes fjalëve të shenjta, një mesazh solidariteti për përballimin e situatës së shkaktuar nga tërmeti i 26 nëntorit.

“Zotat do t’iu dhurojnë çka dëshironi. Por kush ngjitet nga dhuratat e tyre dhe nuk u dhuron të tjerëve nuk është veçse një kusar”.

Kryeministri Rama zgjodhi fjalët e Bhagavad -Gita, III:12 për të dhënë një mesazh solidariteti për të ndihmuar njerëzit në kapërcimin e situatës së shkaktuar nga tërmeti i 26 nëntorit./atsh

922 nga 1 mijë familje me banesa të dëmtuara nga tërmeti në Tiranë, kanë përfituar deri tani bonusin e qirasë për një periudhë deri në 1 vit.

Kryeministri Edi Rama i shoqëruar nga kryetari i bashkisë së Tiranës, Erion Veliaj, vizitoi sot një familje në Sauk, e cila është sistemuar në një banesë me qira që paguhet nga shteti.

Kryetari i bashkisë së Tiranës, Erjon Veliaj u shpreh se “këto familje ishin në çadra fillimisht, por pas vendimit të qeverisë janë sistemuar në shtëpi me qira, duke mbyllur kështu pjesën e emergjencës”. “Kryesisht kemi rreth 180 familje nga konviktet e Qytetit Studenti dhe shtëpitë e vjetra të Saukut që janë dëmtuar”, – tha ai.

Veliaj tha se “janë 922 familje nga 1 mijë të tilla që janë paraqitur, ose 92,2%. Pjesa tjetër rreth 8%, sipas tij, “ndoshta mund të jenë jashtë Tirane meqë edhe shkolla nuk ka nisur, pasi është një pakicë e vogël që e kemi identifikuar te rastet e dëmtuara dhe nuk janë paraqitur”.

Kryeministri Rama tha se “shteti mbulon 100% qiranë deri në 1 vit dhe njerëzit të zgjedhin vetë se ku do të rrinë”. “Është bërë përcaktimi i familjeve që të mos ketë spekulime e mashtrime. Kështu në zonat urbane kjo çështje mbyllet komplet, ndërsa në zonën rurale është pak më e ngatërruar, pasi njerëzit duan të rrinë pranë banesave të tyre sepse e kanë jetën të lidhur e tokën dhe gjënë e gjallë”, – tha Rama.

Banorët që përfitojnë nga pagesa e qerasë e marrin atë përmes postës, por Kryeministri kërkoi që bashkia të dalë garant, dhe për këta banorë të lidhet kontratë qiraje. “Duhet garantuar që të bëhet kontrata e qirasë. Mos të vijnë nesër e të thonë është rritur qiraja. Bashkia duhet të jetë garanti i kontratës që këta të mos fillojnë dhe të thonë nesër që ka shumë kërkesa dhe dil jashtë. Kontrata është 1-vjeçare, ose 6 muaj me të drejtë rinovimi deri në 1 vit”, – tha Rama.

Kryeministri theksoi se “nuk ka qeveri në botë që të jetë e pakritikueshme, por situata ishte kaq e rëndë në raport me popullsinë dhe territorin sa që me një gjë të tillë tundet Amerika, jo Shqipëria”.

Por, Kryeministri Rama vlerësoi se “në pjesën më të madhe gjërat janë bërë mirë”. “Ka pasur edhe probleme, por nuk është kollaj, është gjithë kjo ndërhyrje. Të gjithë kanë qenë ditë-natë dhe janë akoma në terren. I kanë harruar fëmijët e tyre, por kuptohet që televizionet nuk e kanë mendjen tek ana pozitive, por duan vetëm të kapin një gjë dhe ta bëjnë qimen tra”, – tha Rama. /atsh

Kryeministri Edi Rama solli sot përmes fjalëve të shenjta, një tjetër mesazh për përballimin e situatës së shkaktuar nga tërmeti i 26 nëntorit.

“Fjalët e shenjta . Të vërtetën nga e pavërteta e ndajnë vetëm 4 gishta. E pyetën për kuptimin e kësaj shprehje. Imam Aliu bashkoi gishtat e dorës, i vuri midis syrit e veshit të tij dhe tha: “Është e pavërtetë kur ju thoni “Unë kam dëgjuar për këtë”: dhe është e vërtetë kur ju thoni “Unë e kam parë këtë”.

Kryeministri Rama zgjodhi shprehjen e Imam Aliut, Ligjërata 141 për të dhënë një tjetër mesazh kurajoje për kapërcimin e situatës së shkaktuar nga tërmeti i 26 nëntorit. /atsh

Shqipëria merr sot zyrtarisht Kryesinë e OSBE-së në Ministerialin e OSBE-së në Bratislavë

Pak përpara fjalës së marrjes së kryesisë së OSBE për vitin 2020 Kryeministri Edi Rama, i cili ndodhet në Bratislavë ka publikuar një video ku tregon momente pune përpara Ministerialit.

Rama deklaron se është “nder dhe përgjegjësi e madhe drejtimi i kësaj organizate ndërkombëtare të dorës së parë, si edhe mundësi e jashtëzakonshme për ta bërë Shqipërisë të shkëlqejë në krye të punëve të mëdha e të sfidave të posaçme të OSBE”.

Rama thekson se gjatë fjalës së tij është e rëndësishme që në hyrje të flasë për tërmetin e 26 nëntorit që goditi Shqipërinë.

Gjithashtu Rama shton se, i duhet vënë theksi bashkëjetesës fetare në Shqipëri dhe mikpritjes si dy prej vlerave më të mëdha të Shqipërisë. Gjithashtu Kryeministri shtoi se si element të mikpritjes është pritja që populli shqiptar bëri për hebrenjtë gjatë Luftës së Dytë Botërore apo dhe pritjen e popullit të Kosovës në vitin 1999.

Sa i përket vlerës së barazisë gjinore, kryeministri Rama evidentoi faktin që Shqipëria është në 5 vendet e para në botë për numrin e grave në kabinetin qeveritar./atsh