Aktualitet

Tërmeti i 26 nëntorit na njohur me heronj të heshtur, me të cilët u prezantuam në një moment të vështirë, por që nisëm t’i donim dhe t’u ishim shumë mirënjohës.

Një prej tyre ishte edhe ‘Brandi’, qeni policor që zbuloi njerëz nën rrënojat e tërmetit.

Policia e Shtetit ka publikuat një video nga stërvitja e tij ditore, një test jo vetëm fizik dhe inteligjence. ‘Brandi’ jo vetëm që është shumë i zoti fizikisht, por ai është i shkëlqyer edhe në matematikë.

Ditën e sotme priten reshje të dobta në të gjithë vendin. Po kështu sipas IGJEUM, në të gjithë vendin do të ketë një ulje temperaturash.

Parashikimi i motit:

RESHJET

(E hënë, dt. 09) priten reshje të dobëta në të gjithë vendin (siç tregohet në tabelë, respektivisht për secilin qark).

TEMPERATURAT

Nesër (e hënë, dt. 09) temperaturat minimale dhe maksimale të ajrit pritet të arrijnë:

në bregdet: 9 / 16 °C
në vendet e ulëta: 6 / 15 °C
në vendet malore: 1/ 9 °C

ERA

Sot pasdite (e diel, dt. 08) dhe nesër (e hënë, dt. 09) era pritet të fryjë e lehtë deri mesatare në bregdet.

Një i moshuar 94 vjeç ka dhuruar 10 mijë euro për të prekurit nga tërmeti i datës 26 nëntor.

94-vjeçari mori live në emisionin “Shqiptarët për shqiptarët”, ku tha fjalën e tij me këtë rast.

I moshuari u shpreh se ka dhënë pak, kurse shtoi se uron që Zoti t’ju japë më shumë atyre që janë prekur nga tërmeti shkatërrimtar.

“Unë kam dhënë pak.

Zoti t’ju japë më shumë.

Mua kaq vite m’i ka dhënë Zoti.

Të gjithë shqiptarët, kudo që janë në Shqipëri, në Maqedoni, në Mal të Zi, në diasporë e kudo uroj të jenë bashkë, të bashkuar, sidomos në ditë të vështira”, u shpreh i moshuari.

Elvis Naçi dhe Sidrit Bejleri thanë se falënderojnë pa masë 94-vjeçarin për ndihmën e çmuar që ka dhënë për të prekurit nga tërmeti.

Kryetari i PD, Lulzim Basha dhe djemtë e vajzat e Forumit Rinor të PD, këtë 8 Dhjetor ishin në Mamurras, ku gjenden me qindra familje të prekura nga tërmeti.

“Sot është Dita e Rinisë, siç e keni parë, ne nuk kemi organizuar një festë, sepse nuk është koha për festë, por ju uroj gëzuar Ditën e Rinisë të gjithë të rinjve që kanë ndihmuar. Shumë prej djemve që janë këtu, kanë qenë që orën e parë në rrënoja, duke gërmuar me duar në operacionet e kërkim shpëtimit dhe që nga ajo ditë e deri më sot nuk kanë pushuar asnjë orë për t’i ardhur në ndihmë komunitetit. Po hyn java e tretë e fatkeqësisë, gjithçka duhet të ishte e organizuar dhe e mirëkoordinuar nga shteti, por për fat të keq, akoma janë në dorë të vullnetarëve. Për fat të mirë, ju po e bëni këtë punë si askush tjetër. Duhet të jeni krenarë, se po lehtësoni, me sa mundeni vuajtjet dhe dhimbjet e mijëra njerëzve dhe për këtë keni nderimin maksimal timin personal dhe të të gjithë shqiptarëve”, u shpreh Basha.

Të rinjtë dhe banorët dëshmuan se në Mamurras, prej gati 2 javësh, të vetmet ndihma që u janë shpërndarë familjeve të prekura nga tërmeti janë ato të vullnetarëve të rinj të opozitës.

Në ditën e 8 Dhjetorit, Basha u shprehu të rinjve mirënjohjen për kontributin e tyre të çmuar dhe të pazëvendësueshëm në këto ditë të vështira për qindra familje në nevojë.

“Po hyjmë në javën e tretë të fatkeqësisë dhe nuk kanë parë asnjë njeri me sy, jo më ndihmë. Janë familje nga më të varfrat në Shqipëri. Ju e keni bërë diferencën, nëse do të flenë me barkun plot apo me barkun bosh fëmijët e kësaj zone. Nëse do të kenë ftohtë, do të kenë një batanije më shumë, do të kenë rroba më shumë apo jo. Duhet të jeni krenarë siç jam unë krenar, në veçanti sot që është edhe dita juaj, është dita e rinisë, Gëzuar Ditën e Rinisë!”, u tha Basha të rinjve në këtë 8 Dhjetor solidariteti./atsh

Kryeministri Edi Rama është shprehur sot se refuzimi i tryezës së përbashkët nga ana e kryetarit të PD, Lulzim Basha është gabim i madh.

Duke reaguar ndaj sugjerimeve të kreut të PD në lidhje me bizneset e dëmtuara në Durrës, Rama ka theksuar se përkojnë me propozimet e hartuara nga kryetari i Komitetit Kombëtar të Rindërtimit dhe Ministrja e Financave.

“Lulzim Basha, një pjesë e sugjerimeve të publikuara lidhur me bizneset e dëmtuara në Durrës, përkojnë me propozimet e hartuara nga kryetari i Komitetit Kombëtar të Rindërtimit dhe Ministrja e Financave. Por vazhdoj të them se refuzimi i tryezës së përbashkët është gabim i madh”, është shprehur Rama.

Basha ka propozuar përjashtim nga taksa e pronës dhe nga të gjitha taksat dhe tarifat vendore gjatë periudhës së rindërtimit për të gjithë operatorët ekonomikë me aktivitet në zonat e prekura, nga tatim fitimi për të gjitha subjektet që e riinvestojnë fitimin për të rikuperuar dëmet e tërmetit, si dhe pezullimin e kontributeve të sigurimeve shoqërore dhe shëndetësore për periudhën deri në rikuperimin e dëmeve dhe pagesat e shtyra të kryhen me këste pas periudhës së rikuperimit.

Gjithashtu, Basha ka propozuar përjashtimin nga TVSH për të gjitha materialet, lëndët e para, mjetet kapitale që përdoren për rikuperimin e dëmeve dhe pezullimin dhe fshirjen e pagesave të faturave të energjisë dhe të ujit gjatë kohës së gjendjes së fatkeqësisë natyrore.

Ai i ka bërë thirrje thirrje sistemit bankar të riskedulojë këstet e kredive në periudhën e rindërtimit për operatorët ekonomikë në zonat e prekura./atsh