Aktualitet

Drejtori Ekzekutiv i kompanisë italiane ENI, Claudio Descalzi deklaroi sot në Tiranë se Shqipëria ka një rol të rëndësishëm, jo vetëm për burimet hidrokarbure, por është një nyje energjetike midis Italisë, Europës, vendeve ballkanike dhe gjithë gazit që vjen nga Lindja.

“Është një lojë që nëse do të shfrytëzohet mirë do t’i japë avantazhe të mëdha”, – deklaroi Claudio Descalzi.

Në këtë pikë, kreu i kompanisë ENI theksoi se Shqipëria duhet të jetë e përgatitur sa i takon dijeve, njohurive, kompetencave, gjeopolitikës dhe vizionit.

Mesdheu,- tha ai,- po zhvillohet shumë dhe ne kemi përvojë të madhe për sa i përket llojeve të naftës e strukturave në Shqipëri, pasi ne jemi duke zhvilluar një shore italian .

Sa i takon kostos së kërkimit, – Descalzi u shpreh se,- kompania ka kostot më të ulëta në botë.

Po ashtu, ai premtoi se kompania do të jape kontributin e saj në formimin profesional por do të sjellë edhe eksperiencën e saj edhe për sa i përket shpimeve, pasi puset që ato do të zhvillojnë janë shumë të thellë.
“Angazhimi im është bashkë ndarja nga momenti operativ në momentin teknik. Është një pike themelore e rëndësishme që të rritemi së bashku”, – theksoi ai.

Duke folur për situatën në të cilën ndodhet vendi ynë pas tërmetit të fortë të 26 nëntorit që la pas përveçse 51 të vdekur gati 1 mijë të plagosur edhe shumë dëme materiale, CEO i kompanisë ENI vlerësoi angazhimin e qeverisë për përballimin e emergjencës.

Ai përgëzoi qeverinë edhe për faktin që në kushte të një situate të tillë arriti të përfundojë negociata që janë komplekse.

“Në kushte të vështira qeveria ka arritur të përfundojë këto negociata që janë gjithmonë komplekse, pasi përcaktohen kosto, fitime dhe kohët janë të ngushta. Është një punë e vështirë dhe ne kemi një vlerësim të madh që ju shprehim. Kjo na bën të kuptojmë sa të motivuar e fokusuar jeni t’ja dilni mbanë”,- tha Descalzi./atsh

Sot një vit pas krijimit të KLGJ dhe KLP, SPAK dhe Gjykata e Posaçme nisën punën.

Ministrja e Drejtësisë, Etilda Gjonaj thekson se “kjo shënon një tjetër datë të rëndësishme në rrugëtimin tonë drejt forcimit të shtetit ligjor”.

“Në këto ditë, teksa shënohet 1 vit kalendarik nga ngritja e Këshillit të Lartë Gjyqësor dhe Këshillit të Lartë të Prokurorisë, duket se ka kaluar më shumë kohë duke pasur parasysh sfidat dhe rezultatet domethënëse gjatë këtij harku kohor për konsolidimin dhe fuqizimin e të gjithë mekanizmave që po çojnë përpara reformën në drejtësi”, shprehet Gjonaj.

“Inkurajoj jo vetëm titullarët dhe anëtarët e institucioneve te reja, por të gjithë ata që punojnë dhe kontribuojnë mbi përmbushjen e objektivave për zbatimin e reformës në drejtësi”, thekson Gjonaj.

Gjonaj shpreh mirënjohje partnerëve ndërkombëtarë, të cilët thekson ajo, “na kanë mbështetur hap pas hapi në të gjitha fazat implementuese të reformës në drejtësi”.

“Puna vazhdon, për Drejtësinë që duam. Shqipërinë që duam”, përfundon ministrja Gjonaj.atsh

Ministrja e Financave, Anila Denaj mori pjesë sot në konferencën e përbashkët me OCED-në dhe UCCIAL mbi potencialin e rritjes së vendeve të Ballkanit Perëndimor, ku ajo ka njohur kolegët nga rajoni për hapat që ka bërë Shqipëria në funksion të tërheqjes së investimeve të huaja.

“Për 9 mujorin e 2019 në Shqipëri ka hyrje 810 mln Euro, 7.3% më shumë se e njëjta periudhe në 2018”, theksoi Denaj.

“Qeveria është e angazhuar që përmes ligjit të ri të investimeve, lehtësive fiskale, reformës së derregullimit dhe investimit në burimet njerëzore të tërheqë më tej vëmendjen e investitorëve të huaj”, nënvizoi ajo.

“Njëkohësisht nëse flasim me gjuhën e përbashkët të tregut rajonal, Ballkani Perëndimor mund të shikohet jo më si një treg i fragmentarizuar por si një hapësirë e përbashkët ekonomike me një potencial shfrytëzimi konsumi për 18 milionë banorë”, theksoi ministrja e Financave, Anila Denaj. /atsh

Kryeministri Edi Rama deklaroi sot se i ka dërguar një mesazh personal në telefon kryetarit të Partisë Demokratike, Lulzim Basha menjëherë pas tërmetit të 26 nëntorit, por nuk ka marrë përgjigje.

Duke folur në një intervistë televizive në sallën e Hartave në Kryeministri, të dëmtuar nga tërmeti i 26 nëntorit, Rama tha se, “i kam shkruar Lulzim Bashës një mesazh jo publik në telefonin e tij dhe i kam thënë pak a shumë që mendoj se është e mençur që bashkë të shkojmë aty ku është dhimbja. Se në fund të fundit çfarë rëndësie kanë të gjitha të tjerat. Njerëzit kanë humbur njerëz, kanë nevojë për ngushëllim dhe nga kush e presin këtë ngushëllim, e presin nga ne. Njerëzit kanë humbur shtëpitë. Njerëzit kanë humbur gjithçka. Mbi të gjitha nuk duhet të humbin sensin e përkatësisë në një vend ku nuk janë vetëm”.

“Nuk kam marrë përgjigje. i kam bërë edhe dy thirrje publike opozita ka qenë korrekt. Ok dakord. Domethënë është e vërtetë Lulzim Basha është përpjekur që të mos dalë tepër, kaq ka bërë. Po mund të bënte shumë më tepër dhe duhet të bënte. Ishte një rast jo për të bërë marrëveshje nëse s’do të bëjë marrëveshje, as për të bërë politikë, por për të ardhur bashkë me mua dhe për të thënë kjo gjë është përtej politikës”, u shpreh Rama.

“Unë kam parë dhe një mesazh që ka bërë. E kam pëlqyer e kam bërë retweet. Dhe do të ishte në të mirën e të gjithëve dhe në të mirën e tij dhe në të mirën e partisë së tij. Ndërkohë që Lulzim Basha përpiqet të mos bëhet i tepërt janë të tjerët që gjuajnë në të katër anët”, tha Kryeministri Rama.

“Nuk e kam pasur mendjen as tek sondazhet as tek popullariteti. E kam pasur vetëm tek një gjë që siç unë u ndjeva vetëm në momentin e parë dhe thashë o Zot këtu ka ndodhur diçka që nuk do ta kapërcej dot dhe kërkova ndihmë, ashtu nuk prita që të më kërkonin ndihmë njerëzit që kishin nevojë për mua”, tha Rama. /atsh