Aktualitet

Fermerët shqiptarë i shohin panairet ndërkombëtare si mundësi për gjetjen e tregjeve të reja për eksport të produkteve tona.

Prodhuesit shqiptarë të fruta-perimeve, kanë rritur interesin në promovimin e prodhimeve bujqësore “Made in Albania” në Panairi Ndërkombëtar “FRESKON Trade Show”, që zhvillohet nga data 2 deri 4 prill 2020, në Selanik, Greqi.

Ky është edicioni i 6-të i panairit “FRESKON Trade Show”, event që ka si fokus parësor promovimin e produkteve të frutave dhe perimeve të freskëta, ku kompanitë pjesëmarrëse do të ekspozojnë produktet e tyre në panair. Në të njëjtën kohë, panairi do të presë ekspozues ndërkombëtarë që paraqesin teknologjinë më të fundit të frutave, perimeve, logjistikës, makinerive dhe materialeve të paketimit.

FRESKON është një mjet kryesor për rritjen e tregtisë së ndërmarrjeve të frutave dhe perimeve të freskëta, në rajon e më gjerë, drejt tregut global.

Gjatë ngjarjes, ekspozuesit do të takohen me përfaqësues të rëndësishëm ndërkombëtarë, bizneset tregtare dhe rrjetet e kompanive shpërndarëse. Pjesëmarrësit në panair do të kenë mundësi jo vetëm të promovojnë produktet e tyre, por dhe të zgjerojnë kontaktet, vendosin partneritete të reja, diversifikojnë tregjet dhe shkëmbejnë përvojat./atsh

Marrja e Presidencës së OSBE nga vendi ynë është një ngjarje historike që konfirmon se Shqipëria i ka kapacitetet për ta realizuar një mision të tillë.

Agron Tare, zv.ministër për Europën dhe Punët e Jashtme tha se në fokus të Shqipërisë si drejtuese e OSBE do të jetë dialogu. “Shqipëria si kryetare e radhës e OSBE do të synojë dialogun dhe gjithëpërfshirjen e 56 vendeve pjesëtare të OSBE. Siç e tha dhe Kryeministri, fokusi ynë do të jetë për zbatimin e angazhimeve të gjithë bashkë”, – tha Tare.

“Në fokus do të jetë dhe axhenda e OSBE, së pari, dimensioni politiko-ushtarak, ku siç tha dhe vetë Kryeministri, vizita e parë do të jetë në Ukrainë, pasi atje është dhe konflikti më i nxehtë sot në Europë”, – vijoi ai.

Sipas Tares, vendi ynë do ketë një rol të rëndësishëm për të drejtat e grave. “Duke qenë se edhe vetë Shqipëria dhe qeveria shqiptare kanë bërë hapa para dhe do forcojmë rolin e gruas në këtë dimension. Këtë vit zgjidhen dhe katër figurat kryesore të Sekretariatit dhe 8 nga 16 misionet për Europën në këtë organizatë, dhe Shqipëria do gjejë konsensusin për këto emërime dhe sot Kryeministri ka bërë thirrje për të paraqitur kandidatura femra”, – tha Tare.

“Marrja e Presidencës është historike dhe i jep Kryeministrit në funksionin e Ministrit të Jashtëm dhe funksionin e drejtuesit të OSBE, duke i dhënë një karakter dydimensional. Besimi që iu dha vendit tonë konfirmon se Shqipëria i ka kapacitetet për të drejtuar këtë organizatë. Paralelizmit mes politikës së brendshme dhe presidencës së Shqipërisë janë dy çështje të ndara, pasi Kryeministri në rolin e kryetarit të radhës së OSBE do ketë deklarata sipas axhendës politike që ndjek OSBE dhe që është në vijimësi”, – tha Tare.

“Takimi me Presidentin Putin? Edhe këtu ribiem në kuadrin dydimensional të aktivitetit të Kryeministrit Rama si kryetar i OSBE, dhe vizita në Rusi do të jetë në këtë prizëm dhe kjo normalisht forcon edhe marrëdhëniet bilaterale mes të tjerash”, – tha Tare.

“Shqipëria si kryetare e radhës së OSBE do të përfitojë një përvojë të madhe për dialogun, bashkëpunimin dhe gjithëpërfshirjen. Këtë përvojë do ta ketë dhe në aspektin e Shengenit Rajonal, por këto janë dy axhenda që nuk kanë pika të përbashkëta”, – përfundoi zv.ministri i Jashtëm, Agron Tare. /atsh

Aplikimi për vlerësimin e ndikimit në mjedis për lejet e ndërtimit tashmë do të kryhet online nëpërmjet portalit e-Albania.

Ministria e Turizmit dhe Mjedisit informoi sot se janë pesë lloje të lejeve për vlerësimin e ndikimit në mjedis që do të merren online: vnm e thelluar – njoftim; vnm e thelluar për deklaratë mjedisore; vnm paraprake; transferimi i vendimit për vnm paraprake pranë AKM si dhe transferimi i deklaratës mjedisore pranë MTM-së.

Ministria për t’u ardhur në ndihmë qytetarëve bëri të ditur edhe hapat e procedurës së aplikimit online në e-Albania;
– Identifikohuni si qytetar ose biznes në portalin e-Albania;
– Zgjidhni shërbimin “Aplikim për vlerësimin e ndikimit në mjedis “;
– Klikoni butonin “Përdor” dhe plotësoni formularin elektronik me të dhënat e nevojshme;
– Klikoni butonin “Dërgo” në fund të formularit;
– Specialistët e autorizuar bëjnë shqyrtimin e kërkesës;
– Aplikanti lajmërohet për refuzimin apo miratimin e aplikimit. Në rastin e miratimit, aplikanti pajiset me Vendimin/Deklaratën përkatëse.

Sa i përket vlefshmërisë, MTM bën të ditur se “nëse veprimtaria nuk fillon zbatimin në terren brenda 2 vjetëve nga data e miratimit të vendimit për vnm në, atëherë këto dokumente konsiderohen të pavlefshme dhe procesi i VNM-së fillon nga e para”.

Po ashtu, Ministria publikoi edhe kostot që duhet të paguajë qytetari për marrjen e këtyre shërbimeve.

“Për procedurën e vnm paraprake: 30 000 lekë; për procedurën e thelluar të vnm: 50 000 lekë. njoftimi për vnm të thelluar, transferimi i vendimit për vnm paraprake, transferimi i deklaratës mjedisore, nuk kanë tarifë aplikimi”, thuhet në njoftimin e MTM./atsh

Kryeministri Edi Rama, e ka nisur sot ditën duke cituar Profetin Muhamet.

“Fol mirë ose mos fol fare”, është nga Profeti Muhamet (paqja qoftë mbi të) fraza të cilën përcolli mëngjesin e sotëm përmes rubrikës “Fjalë të Shenjta”, Kryeministri Rama.

Duke cituar fjalë të shenjta nga librat e shenjtë, por edhe nga personalitetet botërore, Kryeministri Rama ka përcjellë këto javë apelin e solidaritetit dhe ndihmës njerëzore ndaj të prekurve nga tërmeti i 26 nëntorit./atsh

Shqipëria për herë të parë merr nesër zyrtarisht kryesimin e OSBE-së dhe do ta drejtojë atë përgjatë vitit 2020. Kryeministri Edi Rama gjatë konference për shtyp sot në Vjenë, e cilësoi këtë angazhim historik për Shqipërisë.

“Kryesimi i OSBE-së nga Shqipëria është një arritje fantastike e Shqipërisë. Kjo organizatë është krijuar 45 vite më parë dhe Shqipëria ka qenë jo vetëm vendi i vetëm europian që e refuzoi, por edhe e goditi pamëshirë që në krijim dhe sot ne jemi me gjithë këtë përgjegjësi për të drejtuar OSBE-në”, tha Rama.

Natyrisht, tha ai, që nuk jemi të thirrur që të rishpikim OSBE-në apo të rishpikim mekanizmat e OSBE-së, por të çojmë përpara një përpjekje që nuk fillon me ne, nuk mbaron me ne, që bazohet mbi konsensusin në çdo hap, konsensusi i 57 vendeve, më shumë se mbi 1 miliard njerëzve, që kuptohet është një proces mjaft i komplikuar, sepse kuptohet se duhet të bien dakord që të gjithë, ndërkohë që për vendet dhe zonat ku ka konflikte dhe çështje për të trajtuar, përgjithësisht janë edhe vetë anëtarë, kështu që edhe interesat divergjente janë pjesë.

“Megjithatë ne kemi bërë shumë punë për t’u përgatitur, edhe Ministri në Detyrë, edhe Ambasadori kanë bërë një volum të madh pune dhe skuadra që është ngritur enkas për këtë mision special të një viti, ka përballuar një volum të madh pune, edhe do të bëjmë më të mirën tonë. Nuk pretendojmë të zgjidhim nyje që nuk janë zgjidhur me vite të tëra, por të ndihmojmë në progresin për zgjidhjen e tyre”, – deklaroi Rama.

Kryeministri tha se shumë shpejt do të zhvillojë vizita në Ukrainë, Rusi dhe SHBA, si pjesë e detyrimeve të drejtuesit të OSBE-së.

“Vizita në Rusi është pjesë e axhendës së drejtuesit të OSBE dhe është pjesë e angazhimeve që unë kam marrë, ndërkohë që gjatë gjithë vitit kemi bërë dhe harmonizimin e angazhimeve me Ministrin në Detyrë për të balancuar obligimet e OSBE-së, me obligimet e brendshme. Janë disa vizita që do të bëhen shumë shpejt, praktikisht më të shpejtat janë vizitat në Ukrainë, në SHBA dhe Rusi. Për datat presim konfirmime nga të gjitha palët”, – tha Rama.

I pyetur se çfarë do të bëjë Shqipëria gjatë këtij viti për Kosovën, si kryetare e OSBE-së, Kryeministri Rama tha se “do t’i bëjmë të gjitha ato që kemi planifikuar dhe ju thashë nuk e marrim drejtimin e OSBE-së për të rishpikur OSBE-në, as për të rishpikur mekanizmat, qasjen tradicionale, sepse, faktikisht, vërtet jemi drejtues të organizatës për një vit, por është një drejtim që është shumëkoordinim me të tjerë dhe vendimmarrje që duhet patjetër miratuar nga të tjerët. Pra, nuk është një drejtim i një qeverie në një vend. Në këtë aspekt, sigurisht që ne kemi disa ambicie. Kemi vendosur disa prioritete. Kemi qenë të vëmendshëm që tek vendosja e prioriteteve të mos vendosim prioritete që janë dëshira, por të parealizueshme dhe mendoj që e kemi kapacitetin e duhur që të bëjmë diçka dhe për Kosovën, aq më tepër tani që unë në Prishtinën zyrtare jam “tradhtar”, në Beogradin zyrtar jam “nacionalisti më i rrezikshëm shqiptar”. Kështu që, në këtë aspekt, besoj që kam një pozicion që mund të më shërbejë si ‘chairman in office’ i OSBE-së”./atsh