Aktualitet

Reforma Zgjedhore/ Hajdari: Parimisht dakord me përmbajtjen e dokumentit të dakodësuar

Aktualitet, Opinione, Politike / /

Bashkëkryetarja e Komisionit të Posaçëm Parlamentar për Reformën Zgjedhore, Rudina Hajdari theksoi se ishte parimisht dakord me përmbajtjen e dokumentit të dakordësuar, që u diskutua sot në tryezën me përfaqësues të opozitës jashtëparlamentare.

“Kam kërkuar që të ketë një qartësi më të madhe sa i përket angazhimit që ky Këshill do të ketë në lidhje me diskutimin për ndryshimin e sistemit zgjedhor, siç dhe e përmban objekti i Komisionit për Reformën Zgjedhore”, tha Hajdari.

Gjithashtu, shtoi Hajdari, “duke qenë se u njoha sot me përmbajtjen e këtij dokumenti, më duhet të marr pak kohë të konsultohem dhe me kolegët e mi në Parlament në lidhje me dokumentin në fjalë”.

Si përfundim, nënvizoi Hajdari, “ajo çka është më e rëndësishme është fakti që takimi i zhvilluar bëhet në kuadër të dialogut për të garantuar një konsensus të gjerë dhe sa më transparent për procesin e Reformës Zgjedhore”.

Bashkëkryetarët e komisionit të posaçëm parlamentar për reformën zgjedhore, Damian Gjiknuri (PS) dhe deputetja e opozitës parlamentare, Rudina Hajdari u ulën sot në një tryezë me dy përfaqësuesit e mandatuar të opozitës së bashkuar, ish-deputetët, Oerd Bylykbashi (PD) dhe Petrit Vasili (LSI).

Në përfundim të këtij takimi u përcaktua kuadri i bashkëpunimit për Reformën Zgjedhore, ndërsa palët u angazhuan që reforma të përfundojë jo më vonë se 15 mars 2020./atsh

Reforma Zgjedhore/ Hajdari: Parimisht dakord me përmbajtjen e dokumentit të dakodësuar Read More »

Reforma Zgjedhore/ Bardhi: Vendimet do të merren me konsensus

Aktualitet, Politike / /

Sekretari i Përgjithshëm i Partisë Demokratike, Gazment Bardhi deklaroi sot se parlamenti është vetëm noter formal i vendimeve të tryezës politike.

“Propaganda është më e ethshme se asnjëherë për të mbuluar thelbin e asaj që u arrit me ndërmjetësimin e partnerëve ndërkombëtarë”, theksoi Bardhi.

Sipas tij, “Reforma Zgjedhore nuk do të diktohet nga qeveria e votave të blera. Vendimet për Reformën Zgjedhore do të merren me konsensus jashtë Parlamentit ilegjitim. Parlamenti është vetëm noter formal i vendimeve të tryezës politike”.

Bardhi shtoi se, “përfaqësimi në tryezën e Reformës Zgjedhore me një nga arkitektët e blerjes së votës është në turpin e PS. Në dorën tonë nuk është të zgjedhim kundërshtarin, por të bëjmë çdo gjë për zbatimin e Reformës Zgjedhore, që çon vendin drejt zgjedhjeve”.

“Në dorën e qeverisë është të heqë gjendjen e jashtëzakonshme dhe t’u hapë rrugë zgjedhjeve të lira e të ndershme”, u shpreh Bardhi, i cili publikoi edhe kuadrin e bashkëpunimit për Reformën Zgjedhore.

Bashkëkryetarët e komisionit të posaçëm parlamentar për Reformën Zgjedhore, Damian Gjiknuri (PS) dhe deputetja e opozitës parlamentare, Rudina Hajdari u ulën sot në një tryezë me dy përfaqësuesit e mandatuar të opozitës së bashkuar, ish-deputetët, Oerd Bylykbashi (PD) dhe Petrit Vasili (LSI).

Në përfundim të këtij takimi u përcaktua kuadri i bashkëpunimit për reformën zgjedhore, ndërsa palët u angazhuan që reforma të përfundojë jo më vonë se 15 mars 2020. /atsh

Reforma Zgjedhore/ Bardhi: Vendimet do të merren me konsensus Read More »

Emërimet në Kushtetuese/ Komisioni i Venecias letër Ruçit: Do t’i diskutojmë në mars

Aktualitet / /

Komisioni i Venecias do të diskutojë në mars në lidhje me 5 pyetjet që Kuvendi i Shqipërisë i drejtoi lidhur me emërimin e anëtarëve të Gjykatës Kushtetuese.

Thomas Markert, sekretar i Komisionit të Venecias i ka dërguar një letër Kryetarit të Kuvendit, Gramoz Ruçi ku shkruan se Komisioni i Venecias do të diskutojë për një opinion mbi këtë çështje në sesionin e marsit.

Gjithashtu, një delegacion nga Komisioni i Venecias do të vizitojë Tiranën në fillim të shkurtit pas kërkesës së Kryetarit të Kuvendit, Gramoz Ruçi më 30 dhjetor për një opinion mbi emërimet e gjyqtarëve në Gjykatën Kushtetuese.

Në përgjigje të interesimit të Agjencisë Telegrafike Shqiptare, Komisioni i Venecias konfirmon se vizita në Tiranë do të jetë në fillim të muajit shkurt.

“Komisioni i Venecias synon të vizitojë Tiranën dhe vizita me shumë mundësi do të bëhet në fillim të shkurtit, por ende nuk janë caktuar datat”, ka deklaruar Komisioni i Venecias për ATSH.

Komisioni hetimor parlamentar i ngritur për të shqyrtuar kërkesën për shkarkimin e Metës vendosi ta përfshijë këtë rast në objektin e tij të punës dhe formuloi pyetjet me të cilat iu drejtua për opinion Komisionit të Venecias.

Pyetjet që i janë drejtuar Komisionit të Venecias

A mundet Presidenti të mos organizojë ceremoninë e betimit të gjyqtarit kushtetues kur ai/ajo në kuptimin e ligjit konsiderohen të emëruar? Në këtë rast, a konsiderohet e cenuar e drejta e një gjyqtari kushtetues të ushtrojë detyrën?

Emërimi i një gjyqtari kushtetues tej afatit prekluziv 30-ditor dhe jashtë listës së kandidatëve të miratuar me vendim të organit kompetent, KED, a e cenon parimin e gjykatës së krijuar me ligj? A ndikon kjo në legjitimitetin e vendimmarrjes së Gjykatës Kushtetuese duke venë në dyshim garancitë e shtetasve për një proces të rregullt ligjor? A bie ndesh kjo me frymën e mekanizmave zhbllokues në zgjedhjen dhe emërimin e anëtarëve të organeve kushtetuese?

A është në përputhje me standardet më të mira zbatimi i mekanizmit zhbllokues pas mosveprimit të Presidentit për të emëruar brenda 30 ditëve gjyqtarin kushtetues, si rrjedhojë e të cilit konsiderohet i emëruar ky gjyqtar?

Në rast se Presidenti nuk organizon ceremoninë e betimit të gjyqtarit kushtetues, nisur nga solemniteti i procesit të betimit si akt, çfarë mekanizmi mund të përdoret për ta zhbllokuar një situatë të tillë? A është betimi me shkrim një formë për të plotësuar kushtin e betimit për të filluar ushtrimin e detyrës në situatën kur gjyqtari konsiderohet i emëruar në detyrë për efekt të ligjit?

Cilat mund të ishin zgjidhjet sipas standardeve më të mira ndërkombëtare për të shmangur rastet kur organi i ngarkuar me kryerjen e betimit refuzon të thërrasë për betim zyrtarin përkatës?/atsh

Emërimet në Kushtetuese/ Komisioni i Venecias letër Ruçit: Do t’i diskutojmë në mars Read More »

Rama citon Charles de Gaulle: Patriotizmi kur dashuria për vendin vjen e para; nacionalizimi kur e para vjen urrejtja për të tjerët

Aktualitet / /

“Patriotizmi është kur dashuria për njerëzit dhe vendin tënd vjen e para; nacionalizimi është kur e para vjen urrejtja për të tjerët dhe vendin e tyre”, tha sot kryeministri Edi Rama, duke zgjedhur të tjera fjalë të çmuara për të përcjellë mesazhin e tij.

Ishin këto fjalë të ish-presidentit francez Charles de Gaulle, që Kryeministri Rama përcolli mëngjesin e sotëm përmes rubrikës “Fjalë të Çmuara”.

Duke cituar fjalë të shenjta nga librat e shenjtë, por edhe nga personalitetet botërore, Kryeministri Rama ka përcjellë këto javë apelin e solidaritetit dhe ndihmës njerëzore ndaj të prekurve nga tërmeti i 26 nëntorit./atsh

Rama citon Charles de Gaulle: Patriotizmi kur dashuria për vendin vjen e para; nacionalizimi kur e para vjen urrejtja për të tjerët Read More »

Pushimi i hetimit nga gjykata/ Braçe: Basha kërkon të fsheh imunitetin për të mos u gjykuar kurrë

Aktualitet, Opinione, Politike / /

Zëvendëskryeministri Erion Braçe ka reaguar sërish për vendimin e gjykatës që pushon çështjen e Lulzim Bashës dhe përfaqësuesve të PD-së lidhur me skandalin e 670 mijë dollarë në SHBA.

Braçe shprehet se provat janë konkrete dhe janë dokumente zyrtare të depozituara nga agjenci prestigjioze në botë.

“Nuk ka prova! Nuk ka prova! Lulzim Basha kërkon të fsheh imunitetin unik për të mos u gjykuar kurrë, kështu! Prova? Ja ku janë e ja bëjnë muuuu! Nuk janë letra bakalli, janë dokumenta zyrtare të depozituara ne agjencinë me serioze ne botë; Janë me firme të Nik Muzin e Lulzim Bashës. Prokurorët e gjykatësit në Tirane nuk kanë lejuar të hetohet e gjykohet rreth tyre! Zero! Kur nuk hetohet nuk ka prova, afërmendsh! Por në zyra amerikane ato janë, janë publike-ne dallim nga këtu, i shohin e i marrin të gjithë”, shprehet ai.

Po ashtu Braçe shton se “Prova thotë se Nik Muzin njeriu nën kontrate me PD ka deklaruar zyrtarisht, me shkrim se ka marrë për llogari të PD-së 670 mijë dollarë! Tani, ose gënjen ai nën betim dhe përgjigjet në Amerikë për këtë, ose gënjejnë këtu Lulzim Basha e zarat e tij dhe kanë imunitet e as hetohen e as gjykohen. Provat ja bëjnë muuuuu, imuniteti ndaj drejtësisë nuk i bën të padukshme! Krim i rëndë elektoral është ky apo jo?!”./atsh

Pushimi i hetimit nga gjykata/ Braçe: Basha kërkon të fsheh imunitetin për të mos u gjykuar kurrë Read More »

Rritja e numrit të turistëve/ WizzAir 5 destinacione të reja low cost

Aktualitet / /

Wizz Air”, linja më e madhe ajrore me kosto të ulët në Europën Qendrore dhe Lindore, njoftoi sot 5 linja të reja nga Tirana për në Itali duke filluar nga vera e 2020-ës.

Të gjithë pasagjerët, individë apo nga bizneset, do të përfitojnë nga lidhjet e shpeshta për të arritur dhe zbuluar pesë destinacione interesante italiane si: Milano, Bergamo, Bologna, Verona, Venecia, Treviso dhe Pisa.

Këto fluturime me tarifat e ulëta të Wizz nga Tirana në Itali do të fillojnë nga 29 marsi 2020.

Duke iu përgjigjur kërkesave të klientëve të saj dhe të angazhuar për të krijuar mundësi më të volitshme udhëtimi, “Wizz Air” dyfishoi rrjetin e saj nga Tirana, duke ofruar në vitin 2020 një total prej 10 fluturimesh për 5 vende që do të kontribuojnë më tej në rritjen e turizmit në hyrje dhe dalje dhe përmirësimin e lidhjeve të biznesit midis këtyre vendeve.

George Michalopoulos, drejtori i shitjeve i “Wizz Air” tha: “‘Wizz Air’ është angazhuar fuqimisht në krijimin e mundësive të reja për pasagjerët e saj shqiptarë dhe sot ne jemi të entuziazmuar që dyfishojmë numrin e fluturimeve që operojmë në Tiranë dhe njoftojmë pesë fluturime të reja nga kryeqyteti i Shqipërisë drejt Italisë. Ne besojmë se këto fluturime përfaqësojnë një hap tjetër të rëndësishëm përpara në zgjerimin e rrjetit tonë, ndërsa më shumë udhëtarë mund të shijojnë tarifat më të ulëta të ‘Wizz Air’ me shërbim të jashtëzakonshëm në bord. Ne mirëpresim të gjithë udhëtarët në bordin e një prej flotave më të reja dhe më të besueshme të Europës”.

“Wizz Air” është kompania më e madhe ajrore në Europën Lindore dhe Qendrore. Flota ajrore e saj përfshin 120 njësi ajrore të tipit “Airbus A320”, “Airbus A321” dhe “Airbus A321neo”. “Wizz Air” fluturon drejt 700 drejtimeve nga 25 baza ajrore.

“Wizz Air” shërben si pikë lidhëse për 154 destinacione nga 45 vende të ndryshme.

Destinacionet Ditët e fluturimeve Data e nisjes Çmimet duke filluar nga**
Tirana – Milano Bergamo Përditë 29 mars 2020 EUR 29.99**
Tirana – Bologna Monday, Wednesday, Friday, Sunday 1 maj 2020 EUR 29.99**
Tirana – Verona Monday, Wednesday, Friday, Sunday 1 maj 2020 EUR 29.99**
Tirana – Venecia (treviso) Tuesday, Thursday, Saturday 1 gusht 2020 EUR 29.99**
Tirana – Pisa (Toskana) Tuesday, Thursday, Saturday 31 mars 2020 EUR 29.99**/atsh

Rritja e numrit të turistëve/ WizzAir 5 destinacione të reja low cost Read More »

Policia shumë herë më e mirëpaguar se dje, për herë të parë në 30 vite forcat speciale nuk janë tradhtuar në operacionet e tyre

Aktualitet, Lajmi i fundit / /

Policia e Shtetit sot është shumë herë më e mirëpaguar se dje dhe për herë të parë në historinë e 30 viteve nuk është trysnuar nga urdhrat nga lart, në kundërshtim me ligjin apo nga influenca të çdo lloj natyre”, – deklaroi sot Kryeministri Edi Rama.

Në inaugurimin e repartit të ri të forcave speciale RENEA, Rama theksoi se “për herë të parë në 30 vite, forcat speciale nuk janë tradhtuar në operacionet e tyre”.

Kryeministri vlerësoi Policinë e Shtetit, përtej të gjithë vështirësisë së jashtëzakonshme në të cilën u vunë si rezultat i provokimeve nga palët demonstruese.

“Në 6 muajt marramendës të protestave të dhunshme të opozitës, u shfaq në sytë e opinionit publik vendas dhe atij të interesuar jashtë Shqipërisë, fytyra e një Policie Shteti profesionale dhe proporcionale në raport me protestën”, – deklaroi Rama.

Rama tha se “vitin e shkuar vijoi procesi i përafrimit të standardeve me policitë simotra të vendeve europiane”.

“U hap rruga për herë të parë në Policinë e Shtetit për studentët ekselentë dhe u forcua më tutje struktura e bazuar në meritokracinë në provesin e rritjes në detyrë në Policinë e Shtetit. U zbatuan për herë të parë metoda të reja kundër krimit, përfshi edhe krimin kibernetik, siç vërteton edhe progresraporti i 2019. U rrit niveli i respektimit të të drejtave të njeriut”, – tha Rama.

Duke u ndalur te investimet në Policinë e Shtetit, Rama tha se “vazhdoi rinovimi i flotës së automjeteve dhe sot nuk ka pikë diskutimi që në çdo aspekt Policia e Shtetit është në ditën e saj më të mirë krahasuar me çdo ditë të djeshme”. “Por nuk ka pikë diskutimi se krahasuar me të nesërmen nuk mjafton”, – tha Rama.

Kryeministri theksoi se “Policia e Shtetit po kryen dhe një proces pastrimi, përmes një vetingu që po ecën me të gjithë kujdesin dhe domosdoshmërinë e nevojshme”.

“Nuk kemi bërë sa kemi dashur për shpërblimin e Policisë së Shtetit, por kemi bërë sa kemi mundur sot. Sot, Policia e Shtetit është shumë herë më e mirëpaguar se dje. Kemi respektuar maksimalisht autoritetin e Policisë së Shtetit, autoritetet drejtuese të saj që për herë të parë në historinë e 30 viteve nuk janë të trysnuar nga urdhrat nga lart, në kundërshtim me ligjin, apo nga influenca të çdolloj natyre. Apo forcave speciale, që nuk janë tradhtuar në operacionet e tyre, për herë të parë në 30 vite”, – tha Rama./atsh

Policia shumë herë më e mirëpaguar se dje, për herë të parë në 30 vite forcat speciale nuk janë tradhtuar në operacionet e tyre Read More »

Rritje e forcës goditëse ndaj krimit në 2019, u sekuestruan mbi 60 milionë euro asete kriminale

Aktualitet, Lajmi i fundit / /

“Vitin e kaluar u shpërbënë më shumë se dyfishi i grupeve kriminale krahasuar me 2018, u shumëfishuan asetet e sekuestruara dhe kishim mbi 60 milionë euro vetëm në 2019”, – deklaroi sot Kryeministri Edi Rama.

I pranishëm në inaugurimin e ambienteve të reja të repartit RENEA, Rama tha se u rrit ndjeshëm forca goditëse ndaj të gjitha veprave të rënda apo më pak të rënda penale.

“Lamë pas një vit domethënës për Policinë e Shtetit, tejet i komplikuar dhe në njëfarë mënyre i pakrahasueshëm me asnjë vit tjetër, gjatë së cilit të gjithë treguesit kryesorë të kriminalitetit dhe veprave të tjera penale njohën rënie. Është për të ardhur keq që në atmosferën e rënduar artificialisht nga disa drejtime dhe në kushtet e një xhungle informacioni krijohet hera-herës përshtypja tejet e gabuar mbi situatën e kriminalitetit në Shqipëri”, – tha Rama.

Ndërkohë, sipas tij, “faktet flasin më së miri për rënien e vazhdueshme të treguesve kryesorë të kriminalitetit”.

“Nga ana tjetër, faktet flasin për një rritje domethënëse të zbulueshmërisë së krimeve nga Policia e Shtetit. Jemi të vetëdijshëm se lufta me krimin nuk mbaron asnjëherë dhe matet thjesht dhe vetëm me raportin e forcës përmes fakteve dhe shifrave mes shtetit dhe krimit. Ky raport në gjithë këto vite ka ardhur duke rritur forcën e shtetit dhe duke ulur forcën e krimit”, – tha Rama./atsh

Rritje e forcës goditëse ndaj krimit në 2019, u sekuestruan mbi 60 milionë euro asete kriminale Read More »