Aktualitet

Revolucion dixhital edhe në Hipotekë/ 52 shërbime online, eliminim radhëve, burokracive dhe korrupsionit

Aktualitet, Lajmi i fundit / /

Pas 30 vitesh ka nisur edhe eliminimi i radhëve për aplikim në Hipotekë falë revolucionit dixhital 2020, duke eliminuar radhët, burokracitë dhe korrupsionin.

Kryeministri Edi Rama theksoi të mërkurën se “sot Agjencia Shtetërore e Kadastrës mundëson përmes “e-albania.al” 52 aplikime për shërbime nga smartfoni apo kompjuter më i afërt”.

“280 000 aplikime në sportel gjatë një viti ose 8 vjet radhë pritjeje sot eliminohen dhe 70 % të dokumenteve të dosjes së aplikimit sot i sigurojnë punonjësit e hipotekës, për llogari të qytetarit”, – shprehet Rama.

Qytetari, pasi futet në faqen e-Albania, shkon tek e-shërbime, ku ndodhet lista e shërbimeve elektronike sipas institucioneve. Aty gjendet Agjencia Shtetërore e Kadastrës, ku renditen të gjitha shërbimet online që ofron kjo agjenci.

Nëse futesh te seksioni i aplikimeve për lëshim vërtetimi, nevojitet fillimisht të krijohet një aplikim i ri. Më pas përzgjidhet ZVRPP, tek e cila drejtohet kërkesa. Pas kësaj plotësohen të dhënat e aplikantit, më pas të dhënat e përfaqësuesit, të dhënat e pronës.

Pas kësaj zgjidhet shërbimi që kërkohet, ngarkohen dokumentet që kërkohen nga aplikanti. Përpara se ta dërgojë aplikanti ka mundësi të shohë përmbledhjen e kërkesës së tij, të cilën më pas e konfirmon dhe e dërgon./atsh

Revolucion dixhital edhe në Hipotekë/ 52 shërbime online, eliminim radhëve, burokracive dhe korrupsionit Read More »

Amnisti për 164 të dënuar/ Gjonaj në Komisionin e Sigurisë: Qëndrim strikt lidhur me kategoritë që përfitojnë

Aktualitet, Lajmi i fundit / /

164 të dënuar do të përfitojnë nga ligji për “Për dhënie amnistie”, të propozuar nga qeveria dhe që ka nisur të diskutohet në Komisionin e Sigurisë Kombëtare në Kuvend.

Ministrja e Drejtësisë, Etilda Gjonaj paraqiti sot para deputetëve të Komisionit të Sigurisë detaje nga projektligji i ri për “Dhënie Amnistie”.

“Nga ligji për dhënie amnistie përfitojnë 164 të dënuar, 141 janë meshkuj dhe 22 janë gra dhe 1 i mitur. Kjo si shifër i referohet të dhënave të marra ditën e martë”,- theksoi Gjonaj.

Ajo tha se qeveria në hartimin e projektligjit “Për Dhënie Amnistie” ka qenë e kufizuar në përcaktimin e kategorive, duke qenë strikte sa i takon kategorive të të dënuarve me rrezikshmëri të lartë.

“Rastet e fundit, ku kemi patur lirimin e disa subjekteve kriminale me rrezikshmëri të lartë, me dënime alternative siç kanë qenë lirimet me kusht për të cilat edhe unë si ministër Drejtësie kam marrë masat dhe kam reaguar, duke kërkuar nga institucionet e drejtësisë reagimin e përshtatshëm lidhur me vendime të tilla të paligjshme në konsideratat e mia dhe Ministrisë së Drejtësisë dhe për këtë arsye kemi qenë shumë të fokusuar për të kuptuar dhe për të qenë të kufizuar lidhur me kriteret dhe kategoritë të atyre që do të përfitojnë nga kjo amnisti”,- theksoi Gjonaj.

“Për hir të së vërtetës, tha Gjonaj, ka një problematikë, ku edhe nga amnistitë e mëparshme që janë dhënë apo propozuar nga ministrat e mëparshëm të drejtësisë, janë përfshirë të gjitha kategoritë pa vënë kritere ndaluese, duke i krijuar mundësinë e përftimit edhe subjekteve kriminale me rrezikshmëri të lartë”.

“Nëse sot apo më përpara në gjykata ka njohje të amnistisë edhe për subjekte kriminale që janë dërguar me burgim të përjetshëm apo dënime të larta, ato kanë përfituar edhe nga amnistitë e mëparshme. Kjo është vërtetuar edhe nga një studim që Ministria e Drejtësisë i ka bërë të gjitha amnistive që nga viti 2012 deri në vitin 2016, ku kategori të caktuara që lidhen me rrezikshmërinë e lartë shoqërore, kanë përfituar amnisti duke i’u ulur dënimi me 1 apo 1.5 dhe 2 vite”,-tha Gjonaj

“E vendosa këtë në prezantim të amnistisë për të patur një pararendje dhe për të kuptuar pse ne, në këtë amnisti kemi qenë shumë striktë lidhur me kategoritë dhe subjektet kriminale që përfitojnë nga amnistia. Pra, për të shmangur dhe ngjarje të ngjashme që kemi jetuar dhe gjatë kësaj periudhe dhe të mos jetë amnistia që t’i japi mundësi subjekteve me me rrezikshmëri të lartë përfitojnë ulje të dënimit”,- sqaroi Gjonaj.

“Në këtë amnisti ka dhe një risi, që ka të bëjë me politikat kundër kriminalitetit që qeveria ka ndjekur dhe një nga këto ka qenë vënia e një kriteri ndalues që është përfshirë, dhe lidhet me futjen dhe mbajtjen e sendeve të ndaluara në IEPV”,-tha Gjonaj.

“Në asnjë prej amnistive të mëparshme nuk është trajtuar kjo. Amnistia përcjell dhe respekton politikat e qeverisë dhe për këtë, ne kemi qenë shumë të kujdesshëm për të mbajtur në konsideratë të gjitha elementët që ne u kemi shpallur luftë”,- garantoi ministrja Gjonaj.

“Nga amnistia përfitojnë të gjithë ato të dënuar, që brenda datës 31/12/19, kanë marrë një vendim të formës së prerë dhe pavarësisht sa kohë u ka mbetur dënimi, janë dënuar me dy vite vuajtje dënimi për burrat dhe tre vite për gratë dhe për të miturit dhe gjithashtu përfitojnë amnisti të dënuarit që kanë marrë çdo lloj dënimi alternativ”,- tha Gjonaj.

“Kategoria tjetër që përfiton, janë të dënuarit me burgim, por që i ka mbetur për të vuajtur 2 vite burg për meshkuj dhe 3 vite femra e të mitur. Amnistohen gjithashtu femrat që janë në moshën baras ose mbi 50 vjeç në kohën kur hynë në fuqi ky ligj dhe të gjithë meshkujt që janë në moshë 60 vjeç ose më sipër nga momenti hyrjes së këtij ligji. Po ashtu, përfitojnë edhe ato të dënuar që kanë qenë baraz ose nën moshën 18 vjeç”,- tha Gjonaj.

“Duke u bazuar në këto kritere, rezulton se janë 164 të dënuar që përfitojnë nga Amnistia. Nga këto 141 janë meshkuj dhe 22 janë gra dhe 1 i mitur. Kjo si shifër i referohet të dhënave të marra ditën e martë”,- tha Gjonaj para deputetëve të Komisionit të Sigurisë.

Ministrja e Drejtësisë garantoi gjithashtu se në projektligjin “Për dhënie amnistie”, ka dhe disa kritere shtrënguese, që vijnë në zbatimi të politikave të sigurisë dhe gjithashtu për të mënjanuar që individë me rrezikshmëri të lartë kriminale të përfitojnë ulje dënimi”. /atsh

Amnisti për 164 të dënuar/ Gjonaj në Komisionin e Sigurisë: Qëndrim strikt lidhur me kategoritë që përfitojnë Read More »

Ministri Çuçi thirrje fermerëve: Mbillni vetëm fidanë të certifikuar nga Enti Shtetëror i Farave

Aktualitet / /

Ministri i Bujqësisë dhe Zhvillimit Rural, Bledi Çuçi, u bëri thirrje fermerëve që të përdorin vetëm fidanë të certifikuar nga Enti Shtetëror i Farave dhe Fidanëve sepse vetëm në këtë mënyrë mund të garantohet sasia e prodhimit, por edhe cilësia. Ministri vizitoi në Berat një prej fidanishteve më të mëdha të zonës, ku përgatiten fidanë të hardhisë, ullirit dhe pemëve frutore.

“Një mesazh shumë i rëndësishëm për të gjithë fermerët që të marrin fidanë të certifikuar nga Enti Shtetëror i Farave sepse tek fidani fillon çdo gjë, është baza për suksesin e prodhimit. Kjo gjë është shumë e rëndësishme për t’u kuptuar nga fermerët, jo vetëm për ullirin dhe hardhitë, por për të gjitha pemët. Nëse nuk merren fidanë të certifikuar ndodh pastaj që në shumë zona duke marrë fidanë në vende të ndryshme si Greqia e Spanja, i kanë sjell këtu dhe më pas kanë dalë pa produktivitet ngaqë nuk përshtaten dot me klimën. Këto fidanishte kanë rëndësi shumë të madhe sepse këto në një farë mënyrë orientojnë drejt fermerët se çfarë duhet të mbjellin për karakteristikat e tokave që kanë”, tha ministri Çuçi.

Ai shoqërohej në këtë vizitë nga zv.ministri Dhimo Kote dhe kryebashkiaku i Beratit Ervin Demo. Fidanishte “Pupa” në Berat ka nisur aktivitetin që në vitin 1997. Fidanët e ullirit dhe hardhisë që prodhohen nga kjo fidanishte në 80% të tyre janë autoktonë. Krahas fidanishtes 3.5 Ha, pjesë e kësaj sipërmarrje janë edhe rreth 10 Ha vresht, me varietete autoktone rrushi si Pulsi Beratit, Serina, Debina etj./atsh

Ministri Çuçi thirrje fermerëve: Mbillni vetëm fidanë të certifikuar nga Enti Shtetëror i Farave Read More »

Emetohet pulla postare me tematikë “100 vjet parlamentarizëm shqiptar”

Aktualitet, Lajmi i fundit / /

Posta Shqiptare emeton emisionin e pullave postare me tematikë “100 vjet parlamentarizëm shqiptar”.

Posta Shqiptare, në bashkëpunim me Kuvendin e Republikës së Shqipërisë, me rastin e 100-vjetorit të parlamentarizmit shqiptar, ka hedhur sot në treg emisionin e pullave postare me tematikë “100 vjet parlamentarizëm shqiptar”.

Emisioni i pullave përbëhet nga 1 seri me 5 pulla, vlerat e të cilave janë 20 lekë, 30 lekë, 40 lekë, 60 lekë dhe 200 lekë.

Tirazhi i pullave postare është 3.000 pulla (20-lekëshe), 3.000 pulla (30-lekëshe), 3.000 pulla (40-lekëshe), 3.000 pulla (60-lekëshe), 13.000 pulla (200-lekëshe), ndërsa tirazhi i zarfeve të ditës së parë me seri është 400 copë./atsh

Emetohet pulla postare me tematikë “100 vjet parlamentarizëm shqiptar” Read More »

Meta: Opozita gaboi me dorëzimin e mandateve dhe mos pjesëmarrjen në zgjedhje

Aktualitet, Politike / /

“Opozita ka bërë veprime të mëparshme të gabuara siç është dorëzimi i mandateve apo mospjesëmarrja në zgjedhje vendore. Rruga që opozita ndoqi nuk ishte një rrugë që i shërbeu vendit”, tha sot Presidenti Meta në një intervistë televizive.

Duke folur për 100 vjetorin e Kongresit të Lushnjës, Meta tha se “21 janari është një datë shumë e rëndësishme, sepse është dita e Kongresit të Lushnjës. Ne sot kemi 100-vjetorin e kësaj ngjarjeje, më e rëndësishmja pas shpalljes së Pavarësisë së Shqipërisë në Vlorë, pasi në vetvete është një rivendosje e pavarësisë dhe e organizimit të shtetit shqiptar dhe e të gjitha institucioneve, por edhe një fillim i parlamentarizmit në Shqipëri. Në këtë drejtim është një nga ditët më të rëndësishme të shtetformimit tonë dhe që na kujton se sa e rëndësishme është që të forcojmë institucionet”.

Duke folur për vrasjen e 4 qytetarëve të pafajshëm në bulevard, Meta tha se duhet hequr përgjithmonë dorë nga dhuna.

“Sa i takon 21 janarit tjetër, sigurisht që nuk kemi asnjë arsye për t’u krenuar. Është një ngjarje që na kujton se sa tragjike është kur opozita përdor dhunën për të arritur objektiva politike të pandershme. Dhe se sa e rëndë është kur instrumentalizohen qytetarët për qëllime të tilla, sidomos kur nxiten në rrugën e dhunës. Kjo ngjarje na kujton se duhet të heqim dorë një herë e përgjithmonë nga dhuna si një mjet i arritjes së qëllimeve politike”-tha ai.

Për sa i përket procedurës së shkarkimit, Meta tha se “është një absurditet vazhdimi në mënyrë të paligjshme dhe antikushtetuese i këtij komisioni hetimor. Por për mua nuk përbën një shqetësim. E kam thënë edhe më parë që e mira është ta zgjasin afatin deri në 24 korrik të vitit 2022. Presidenti mund të shkarkohet apo të hetohet vetëm për shkelje të rënda kushtetuese, të cilat janë të atij karakteri që mund të cenojnë sovranitetin apo integritetin e Republikës së Shqipërisë”,.

Në vijim Meta shtoi se “Presidenti nuk mundet të hetohet kurrsesi apo të shkarkohet për shkak të akteve që ai nxjerr dhe të dekreteve të tij, sepse Presidenti vepron përmes dekreteve ashtu si parlamenti vepron përmes ligjeve. Sa ligje dhe sa vendime qeverie, Gjykata Kushtetuese, përpara se të paralizohej, i ka rrëzuar parlamentit apo qeverisë së Ramës?! Me dhjetëra! Nuk kemi parë që parlamenti të jetë rrëzuar apo qeveria të jetë shkarkuar.Kjo është një lojë politike që tregon shqetësimin e madh që ka mazhoranca aktuale për qëndrimet mjaft të qarta, kushtetuese, parimore dhe transparente të Presidentit të Republikës. Në këtë drejtim kjo gjë mua më bën nder”.

Në lidhje me dialogun e palëve për reformën zgjedhore, Meta tha se “jemi në kuadër të përpjekje të palëve për t’u shfajësuar përpara dështimeve të mundshme përsëri në të ardhmen në raport me integrimin evropian, se se një reflektim për të marrë përgjegjësi dhe për të vendosur një dialog të besueshëm dhe të mirë strukturuar në interes të heshtjeve më të mëdha që ka vendi dhe për të cilat të dy palët duhet të bashkëpunonin prej vitesh”.

“Megjithatë është një hap pozitiv sepse përfundimi i reformës zgjedhore dhe miratimi me konsensus është nga rekomandimet e Bundestagut për hapjen mundshme e negociatave. Le të shpresojmë të mos ketë ndonjë surprizë rrugës, por sidoqoftë edhe sikur ky jap të jetë pozitiv është fare pak dhe tepër vonë dhe kërkohet një tryezë tjetër shumë e thellë dhe më e përgjegjshme për të plotësuar ato detyrime që tashmë janë të qarta në rezolutën e Bundestagut. Reforma nuk do të zgjidh ndonjë gjë të jashtëzakonshëm, por mund të jetë mënyra me e thjeshtë”, tha ai./atsh

Meta: Opozita gaboi me dorëzimin e mandateve dhe mos pjesëmarrjen në zgjedhje Read More »

Përkujtohet presidenti i parë i Kosovës, Ibrahim Rugova në 14-vjetorin e ndarjes nga jeta

Aktualitet, Politike / /

Përkujtohet sot në 14-vjetorin e ndarjes nga jeta presidenti i parë i Republikës së Kosovës Ibrahim Rugova (1944-2006)

Ibrahim Rugova është presidenti i parë i Republikës së Kosovës, kryetar i Lidhjes Demokratike të Kosovës dhe studiues.

Ai lindi në 9 dhjetor 1944 në Cerrë të Istogut. Shkollën e mesme e kreu në Pejë (1967) dhe studimet e larta i kreu për gjuhë dhe letërsi shqipe në Universitetin e Prishtinës.

Në vitet 1976-1977 studioi në Ecole Pratique des Hautes Etudes (Shkolla praktike e studimeve të larta), në Paris.

Më 1984 mbrojti doktoraturën për letërsi në Universitetin e Prishtinës. Gjatë viteve 1988-1990 shërbeu si sekretar shkencor, në Institucionin Albanalogjik të Prishtinës.

Ai botoi disa libra, ku më kryesorët janë: “Vepra e Bogdanit 1675-1685” (Prishtinë 1982), “Kahe dhe premisa të kritikës letrare shqiptare 1504-1983” (Prishtinë 1986), “Refuzim estetik” (Prishtinë 1987) dhe një varg studimesh në fushën e teorisë së letërsisë, të kritikës dhe kulturës shqiptare. Në vitin 1988 u zgjodh kryetar i Shoqatës së Shkrimtarëve të Kosovës.

Me formimin e Lidhjes Demokratike të Kosovës u zgjodh kryetar i saj (23.12.1989) dhe qëndroi në këtë detyrë deri në vitin 2005. Me formimin e partive të tjera politike shqiptare ai u zgjodh kryetar i Këshillit Koordinues të Partive Politike të Shqiptarëve të Kosovës (22.07.1991). Gjatë zgjedhjeve të drejtpërdrejta parlamentare dhe presidenciale të majit 1992 dhe qershorit 1998, të organizuara nga partitë politike dhe institucionet shqiptare të Kosovës, Ibrahim Rugova u zgjodh kryetar i Republikës së Kosovës.

Ai u rizgjodh president i Republikës së Kosovës, në mars 2002 dhe në dhjetor të vitit 2004. Ibrahim Rugova është laureat i shumë çmimeve dhe dekoratave ndërkombëtare, ndërmjet të cilave: çmimi për Paqen i Fondacionit Paul Litzer, në Danimarkë (1995); çmimi për paqen i Unionit Demokratik të Katalonisë “Manuel Carrosco i Farmiguera”.

Pas vdekjes ai u dekorua me “Urdhrin e Famurit Kombëtar”, nga presidenti i Republikës së Shqipërisë Alfred Moisiu. Ibrahim Rugova vdiq në Prishtinë më 21 janar 2006. /atsh

Përkujtohet presidenti i parë i Kosovës, Ibrahim Rugova në 14-vjetorin e ndarjes nga jeta Read More »

“Refuzova urdhrin politik për të hapur zjarr mbi protestuesit e pafajshëm”/Agron Malaj për 21 janarin: Përgjegjësit e atij krimi shtetëror të dalin para drejtësisë

Aktualitet / /

Kryetari i bashkisë së Matit, Agron Malaj, deklaroi sot se “nuk do të rresht së kërkuari që tragjedia e 21 janarit 2011, ai krim shtetëror të zbardhet duke nxjerrë përpara përgjegjësisë autorët e tij të vërtetë, sado lart qofshin ata në jetën politike të vendit”.

Në një deklaratë, Malaj, i cili në 21 janar 2011, ka qenë gardist dhe kryente detyrën pranë Kryeministrisë, thekson se “21 janari është një tragjedi me të cilën mua më është dashur të jetoj çdo ditë gjatë 9 viteve të fundit. Unë nuk humba në atë tragjedi asnjë pjesëtar të familjes time. Por ka megjithatë diçka që më bashkon mua, ish “gardistin e 21 Janarit” me familjet e 4 qytetarëve të pafajshëm që humbën jetën në atë ditë të tmerrshme. Na bashkon dëshira që ajo ngjarje të zbardhet e drejtësia të shkojë në vend”.

“Prej 9 vitesh tashmë emri im është lidhur me atë ngjarje tragjike. Emri i një njeriu, i një ish-gardisti në krye të detyrës, që refuzoi të zbatojë urdhrin për të hapur zjarr mbi protestuesit e pafajshëm, është lidhur në mënyrën më perverse me vrasjen e Ziverit, Aleksit, Faikut dhe Hekuranit, jo nga familjet, jo nga organet e ligjit, por pikërisht nga ata që dhanë urdhër për të qëlluar e më pas shkelën çdo ligj e çdo normë, për të mos lejuar zbardhjen e të vërtetës”, – nënvizoi Malaj duke shtuar se sot vijoj punën time me kokën lart me ndërgjegjen e pastër.

Malaj shprehet se “mbi mua nuk rëndon asnjë akuzë. As për 21 janarin e as për asgjë tjetër. Kush ka ende dyshime për këtë mund të hapë vendimin e KQZ, bazuar në vendimin e Prokurorisë, ku certifikohet pastërtia e figurës time dhe më njihet e drejta për të marrë pjesë në zgjedhje. A mund ta thonë të njëjtën gjë ata që sot drejtojnë sulmin kundër meje? A nuk do duhej që të paktën sot, në 21 janar, së paku të mbyllnin gojën e të ulnin kokën nga turpi për jetët e pafajshme që kanë marrë në Bulevardin Dëshmorët e Kombit, nën urdhrat e ish-kryeministrit dhe të atij që asokohe ishte Ministër i Brendshëm dhe që në çdo vend normal do ishin dënuar jo një, por disa herë, për krime që shkojnë nga vjedhja e korrupsioni e deri tek pastrimi i parave e financimi nga Rusia dhe vrasja?”.

“Por mbi mua rëndon nevoja që kjo ngjarje të zbardhet e fajtorët të shkojnë atje ku meritojnë, të shkojnë ata që duke shkelur ligjin kanë marrë jetë njerëzish. Prandaj, sot dua së pari, t’ju shpreh familjarëve ngushëllimet e mia. E së dyti, t’ju them atyre që as unë nuk do të rresht së kërkuari që ajo tragjedi e ai krim shtetëror të zbardhet duke nxjerrë përpara përgjegjësisë autorët e tij të vërtetë, sado lart qofshin ata në jetën politike të vendit”, – tha Malaj./atsh

“Refuzova urdhrin politik për të hapur zjarr mbi protestuesit e pafajshëm”/Agron Malaj për 21 janarin: Përgjegjësit e atij krimi shtetëror të dalin para drejtësisë Read More »

Braçe: 6 vite në pushtet jam torturuar kokëulur çdo 21 janar, asnjë prokuror nuk hetoi Berishën

Aktualitet, Opinione, Politike, Problematika / /

Zëvendëskryeministri Erion Braçe duke përkujtuar 21 janarin e 2011, theksoi se “sistemi kriminal gjyqësor i emëruar e nën sundimin e Sali Berishës edhe sot bëri që pushkatimet e Ziver Veizit, Hekuran Dedes, Faik Myrtajt, t’i cilësojë “vrasje nga pakujdesia”, ndërsa pushkatimin e Aleks Nikës, ta shpallë edhe pas 9 vitesh “vrasje pa autor”.

Në një reagim, Braçe shprehet se “Sali Berisha i ka dalë për zot pushkatimeve me zë e me figurë, fill pas dëshmisë televizive të pushkatimeve në mes të ditës e në mes të bulevardit, ai tha troç se i kishte urdhëruar vetë. Asnjë prokuror nuk e hetoi në cilësinë e kryeministrit që ka urdhëruar pushkatimet; Katër prokurorë të përgjithshëm janë ndërruar ne 9 vite, Sali Berisha vijon të marrë përsipër pushkatimet dhe asnjë nuk guxoi dhe nuk guxon as tani, ta vërë nën hetim për krimin e rëndë”.

Braçe shprehet se “as atë tjetrin, ish ministrin e Brendshëm Lulzim Basha, i cili kishte nën komande pushkatarët e Gardës së qeverisë. Këta që emëronin prokurorët e gjykatësit e kishin në xhep imunitetin, por kriminalisht i dhanë imunitet, shpëtuan, nxorën nga burgu dhe sot janë të lirë, dy pushkatarët plumbat e të cilëve, qitur nga armët e qeverisë, u gjetën në trupat e pa jetë të Hekuran Dedës, Ziver Veizit, Faik Myrtajt. Edhe Aleks Nika nga ata është pushkatuar. Padrejtësi më të madhe se kjo, në këtë vend nuk ka! Kjo padrejtësi rrënon, themelet e shtetit, bën të pavlerë çdo akt rutinë drejtësie. Në 9 vite e gjysmë, kjo padrejtësi është tortura më e rëndë për familjarët e tyre. Në 6 vite e gjysmë në pushtet, torturë është edhe për mua”.

“Çdo 21 janar, me turp e kokë ulur shkruaj radhë si këto, një akt pafuqie që nuk shtyn për drejtësi, nuk bën drejtësi. Reforma në Drejtësi, ka nxjerrë jashtë nga sistemi 8 gjyqtarë të vegjël e të lartë, të cilët dhanë vendimet kriminale e shfajësuan pushkatarët e 21 janarit. Por kjo nuk është drejtësi! Drejtësi është hetimi i plotë, gjithëpërfshirës i gjithë zinxhirit të krimit, nga urdhri e urdhërdhënësi deri tek pushkatarët e pushkatimi”, – nënvizon Braçe.

Zv/kryeministri Braçe u shpreh se “gjykimi i drejtë dhe i shpejtë gjithashtu. E di, e kam dëgjuar edhe unë atë kërcënimin e përjetshëm që na përplasin në fytyrë se nëse hetohet e gjykohet urdhri e pushkatimi, urdhërdhënësi e pushkatarët, këtij vendi do i vënë zjarrin”.
“Por kjo është edhe një herë më shumë padrejtësi! Ekuilibri politik dhe stabiliteti social, ekonomik, politik, i vendosur prej dhunës së padrejtësisë është zjarr edhe më i madh se ai i katër muajve të vitit që shkoi, është zjarr mbi liritë kushtetuese, atë bazë-të drejtën për të jetuar, mbi ligj e çdo rregull është zjarr mbi drejtësinë e barazinë, mbi shtetin e bashkëjetesën në të. Dhjetë ditë më parë, presidenti i SHBA i bëri veç një thirrje regjimit të pushkatarëve të Gardës së qeverisë në Teheran/Iran: Mos i vrisni protestuesit! Në Tiranë protestuesit u vranë njësoj, me pushkë, të njëjtat si atje. Në Teheran, drejtësinë e bëjnë po ata, me pushkë, këtu jo më, asnjëherë më; është e padurueshme, ta shpif bashkëjetesa me dhunën sfiduese të një krimi të zbardhur e të pandëshkuar, si pafuqi, si stabilitet apo standard drejtësie, por që nuk arrin tek pushkatarët e udhëheqësit e tyre. Jo sepse unë e dua kundërshtarin në burg, siç Sali Berisha donte dhe e çoi në burg, mbajti kyçur atje politikisht kundërshtarin e tij; Jo! por si akt i pastër, moral, ligjor drejtësie”, – theksoi Braçe duke shtuar se atë që nuk duhet e nuk e bën partia, por ligjërisht drejtësia.

“Provat janë aty, në dritë të diellit! Duhet veç kurajo! Katër burra, një jetë, pushkatimi dhe padrejtësia që rrënon themelet e shtetit. Në 21 janar 2011, katër qytetarë të zakonshëm, pjesëmarrës në një demonstratë të opozitës së kohës, të pa armatosur e paqësore u pushkatuan në mes të bulevardit Dëshmorët e Kombit. Mbi 12 të tjerë u plagosën me të njëjtat armë zjarri, për fat edhe sot në jetë”, – tha Braçe./atsh

Braçe: 6 vite në pushtet jam torturuar kokëulur çdo 21 janar, asnjë prokuror nuk hetoi Berishën Read More »