Aktualitet

Njohuritë e bashkive për integrimin në BE/ Prezantohet raporti i dytë i vlerësimit në Vlorë

Aktualitet, Lajmi i fundit / /

Në Vlorë u zhvilluan një sërë aktivitetesh të cilat kishin në fokus procesin e integrimit dhe punën që po bëhet nga qeverisja vendore në lidhje me këtë proces, në kuadrin e prezantimit të Raportit të dytë “Bashkitë në procesin e integrimit të Shqipërisë në BE”.

“Bashkitë për në Europë”, një projekt i financuar nga Bashkimi Evropian, në bashkëpunim me bashkinë e Vlorës, zhvilluan debatin publik mbi punën e kryer deri tani, në një takim që u zhvillua në mjediset e pallatit të kulturës “Labëria”, me pjesëmarrjen e ambasadorit të BE-së në Shqipëri, Luigi Soreca, zv/ministrit të Brendshëm, Besfort Lamallari, kryetarit të bashkisë, Dritan Leli.

“Roli i autoriteteve rajonale dhe lokale në procesin e integrimit në BE dhe zbatimi eventual i rregullave të BE-së, të cilat duhet të merren në konsideratë. Duhet të gjendet një ekuilibër i duhur midis qeverive qendrore, rajonale dhe lokale, i cili mbështet fort zbatimin e reformave dhe ofrimin e shërbimeve për qytetarët”.

Në fjalën e vet, ambasadori i BE-së në Shqipëri, Luigi Soreca, theksoi mes të tjerash se, BE-ja nuk e ka ndryshuar qëndrimin e vet përsa i përket të ardhmes së Shqipërisë për t’u bërë vend anëtar i BE-së pas atij rrugëtimi që do të duhet të vijë pas çeljes së negociatave.

Duke ju referuar Samitit të Zagrebit, ku do të diskutohet për çeljen e negociatave për anëtarësim në BE, për Shqipërinë dhe Maqedoninë e Veriut, ai tha se, Shqipëria po arrin në një moment shumë të rëndësishëm, në një moment kyç për të ardhmen, për të cilën Delegacioni i Bashkimit Evropian në Shqipëri, po bën të pamundurën që, gjithçka të jetë gati për këtë moment të rëndësishëm.

“ Ne, i bëjmë thirrje qeverisë qendrore dhe qeverisjes vendore, për të ndërmarrë hapat e nevojshme që gjithçka të jetë gati”, theksoi Soreca, duke evidentuar rolin e rëndësishëm që ka qeverisja vendore në këtë të ardhme.

Sipas tij, nëse do të merret ai vendim në Samitin e Zagrebit, do të vijnë disa momente dhe përpjekje shumë të rëndësishme për qeverisjen vendore, çka do të thotë që, të gjitha njësitë e qeverisjes vendore do të duhet të jenë të përgatitura dhe gati, për këto detyra të reja që do të ndërmarrin.

“Administrata lokale luan një rol shumë të rëndësishëm. Njësoj siç ndodh në shtetet anëtare të BE-së, zbatimi i Acquis të BE-së në Shqipëri, mbështetet tek bashkitë e vendit në një masë prej 70 përqind”, theksoi Soreca, duke nxitur të gjitha bashkitë që të përdorin këtë raport të vlefshëm në punën e tyre në vijim dhe që së bashku, autoritetet dhe qytetarët, të gjejnë mënyra për të përmirësuar nivelin e shërbimeve publike dhe më në përgjithësi performancën e tyre, sa i përket integrimit në BE.

“ Kjo në vetvete na sjell shumë mundësi dhe shanse shumë të mira. Kjo punë do të realizohet edhe me burime shtesë edhe me kapacitete të reja njerëzore. Sepse do të ketë shumë punë, do të ofrohen mundësi më shumë për të rinjtë, në të gjitha bashkitë e vendit që do të ndërmarrin këto detyra”, theksoi më tej ambasadori i BE-së në Tiranë, ndërkohë që shprehu besimin se, janë bashkitë, është qeverisja vendore ajo e cila është më pranë qytetarëve, e cila u shërben qytetarëve dita ditës me ato shërbime për të cilat ata kanë më tepër nevojë.

Ai u ndal në investimet madhore të realizuara nga BE-ja në Vlorë, duke veçuar ndërtimin e “Lungomares”, financimin e Planit të Menaxhimit të Ujrave të Zeza, ndërtimin e “By-pass”-it të qytetit etj. ndërkohë që nënvizoi se, mbështetja me projekte të tjera do të vijojë edhe në të ardhmen.

Nga ana e tij, zv/ministri i Brendshëm, Besfort Lamallari, theksoi se, Raporti i dytë i vlerësimit është pasqyra ku duhet të shohim vetveten, ku pasqyrohet puna që ka bërë qeverisja vendore në kuadrin e procesit të integrimit. Ai e vuri theksin tek angazhimi aktiv i qeverisjes vendore në zbatimin e politikave të BE-së, si një kusht për plotësimin e objektivave.

Raporti i Vlerësimit i vitit 2018 vlerëson një rritje të zotërimit të procesit nga ana e Qeverisë Shqiptare. Në të, përcaktohet se, Ministria e Brendshme është e përkushtuar që ky ushtrim të jetë i përvitshëm.

Kryetari i bashkisë, Dritan Leli, u ndal në disa nga çështjet dhe detyrat kryesore që dalin përpara bashkive në kuadrin e procesit të integrimit.

“Ne besojmë fuqimisht se, proceset e ndryshimit mund të jenë të qëndrueshme dhe të gjenerojnë ndikimin e dëshiruar nëse ato mbështeten nga niveli lokal, të ndihmuar nga qytetarë të angazhuar, aktivë dhe të përkushtuar në një aleancë strategjike me administratën publike dhe autoritetet që ndajnë të njëjtin vizion”, theksoi Zoti Leli ndërkohë që, shtoi se, decentralizimi, si një shtyllë e procesit të reformës demokratike është thelbësor për kohezionin shoqëror, stabilitetin dhe paqen në vendet e Ballkanit Perëndimor dhe për të ardhmen e Europës.

“Nëse Europa dëshiron të jetë sa më pranë qytetarëve të saj të ardhshëm atëherë ajo duhet të jetë më vendore”, theksoi Leli. Sipas tij, BE-ja ka të bëjë me njerëzit, për njerëzit dhe përreth njerëzve. “Bashkitë janë krijuese të politikave, por edhe ofruese të shërbimeve sipas të drejtave dhe detyrimeve, të përfshira në legjislacionin kombëtar. Programet e BE-së duhet të njohin këtë fakt, duke thjeshtuar rregullat financiare dhe krijimin e mbështetjes për stafin e nëpunësve civilë të qeverisjes vendore, përmes instrumenteve dhe lehtësive të tij”, shtoi Leli.

Në këtë arsyetim, ai sugjeroi se, është e nevojshme të implementohet një proces konstruktimi, më gjithëpërfshirës në të gjitha fazat e planifikimit, programimit, dhe vendimmarrjes për të gjitha çështjet që prekin qeverisjen vendore, duke marrë parasysh rolin specifik, kompetencat, detyrat dhe përgjegjësitë e qeverive vendore, të cilat janë të ndryshme nga aktorët e tjerë vendorë, pra sektori privat dhe ai civil.

Bashkia Vlorë është tashmë pjesë e një serie projektesh IPA, në kuadër të bashkëpunimit rajonal, ku disa prej tyre kanë si qëllim binjakëzimin, duke përmirësuar kapacitetet administrative të autoriteteve lokale, duke trajnuar stafin dhe duke mbështetur riorganizimin e strukturave të administratës.

Në këtë takim, ishin të pranishëm edhe përfaqësues të niveleve të ndryshme të qeverisjes vendore, anëtarë të këshillit bashkiak, përfaqësues të shoqërisë civile, të rinj e të reja, studentë të Universitetit “Ismail Qemali”, etj.

Më herët, në mjediset e bashkisë së qytetit u zhvillua një takim me të rinj studentë të Universitetit të Vlorës “Ismail Qemali”, ku u diskutua për vendin dhe rolin që do të kenë të rinjtë në procesin e integrimit, veçanërisht pas vendimit të pritshëm për çeljen e negociatave në Samitin e Zagrebit./atsh

Njohuritë e bashkive për integrimin në BE/ Prezantohet raporti i dytë i vlerësimit në Vlorë Read More »

Nis nesër rivlerësimi i pronës, Lame: Aplikimi online, përfitojnë edhe ata në proces legalizimi

Aktualitet, Lajmi i fundit / /

Nga dita e nesërme qytetarët mund të paraqiten pranë sporteleve të ADISA-s (atje ku ka të tilla) ose pranë sporteleve të Kadastrës, për të aplikuar për procesin e rivlerësimit të pasurive të tyre.

Nëpërmjet procesit të rivlerësimit, synohet që qytetarët të përfitojnë nga rivlerësimi i pasurive dhe përafrimi i tyre me vlerën e tregut. I shprehur në shifra, ky përfitim për qytetarët realizohet duke e çuar vlerën e tatim fitimit në rast transaksioni, nga 15% në 3%, që e parashikon ligji i rivlerësimit.

Pas miratimit të ligjit për rivlerësimin e pasurive, Kadastra Shqiptare në bashkëpunim me Ministrinë e Financave dhe Ekonomisë, hartoi dhe miratoi aktet nënligjore që e bëjnë të mundur zbatimin e tij.

Kreu i Kadastrës, Artan Lame bëri të ditur në një conference për mediet se aplikimi për rivlerësimin, mund të kryhet edhe “on line” direkt nga çdo i interesuar.

“Gjej rastin që të ftoj qytetarët që masivisht t’i drejtohen kësaj mënyre shërbimi, duke aplikuar vetë direkt nga kompjuterët apo telefonat celularë personalë”, tha ai.

Lame theksoi se e gjithë procedura e përpunimit të të dhënave nga ana e punonjësve tanë, zgjat 5 ditë pune.

Procesi i rivlerësimit kësaj radhë do të ketë dy risi.

Do të realizohet nëpërmjet aplikimeve online, duke shkurtuar burokracitë për qytetarët dhe do të aplikohet edhe për pasuritë e legalizuara që janë në proces regjistrimi në Kadastër.

Kjo risi e dytë, është rezultat direkt i reformës institucionale të shkrirjes në një të vetme të institucioneve të pronësisë, ish-Aluizni-t dhe ish-ZRPP-së.

Me qëllim që të shmanget ngarkesa e madhe, nga ana e Kadastrës është ndërtuar një kalendar për shpërndarjen e këtij procesi përgjatë muajve në vijim.

Kështu, përgjatë muajve shkurt dhe mars do të kryhet procesi i rivlerësimit për ata qytetarë që ju shërben në kuadër të ndjekjes së procedurave të tjera emergjente, si vendosja e pronës në bankë si kolateral apo me qëllim shitjen e pronës së tyre.

Në vijim deri në muajin shtator, kur mbyllet ky proces, do të vijojë shërbimi për pjesën tjetër të qytetarëve të interesuar.

Tatimi i parashikuar është për individët 3% e diferencës midis vlerës së dalë nga rivlerësimi me çmimet e referencës, me çmimet minimale fiskale në fuqi dhe vlerës së pasurisë të aktit të regjistruar (kur rivlerësimi bëhet nga ASHK) dhe 3% e diferencës ndërmjet vlerës së pasqyruar në akt ekspertimi dhe vlerës së pasurisë së aktit të regjistruar ose vlerës së rivlerësuar (kur rivlerësimi bëhet nga një ekspert privat i licencuar).

Për personat juridik është 5% e diferencës ndërmjet vlerës së rivlerësimit dhe vlerës kontabël të regjistruar për pasuritë e paluajtshme.

Nisur nga eksperienca në vite e aplikimit të këtij procesi nëpërmjet tij synohet që qytetaret të përfitojnë nga rivlerësimi i pasurive me vlerën e tregut dhe të ardhurat në buxhetin e shtetit të rriten si rezultat i aplikimit të këtij procesi. Në momentin e transaksionit per tjetërsim pasurie, që kryhet pas rivlerësimit kosto për qytetaret në momentin e pagimit të tatimit për kalimin e të drejtës së pronësisë (15%) zvogëlohet si pasojë e rivlerësimit.

Gjithashtu, nëpërmjet aplikimit të këtij procesi rriten transaksionet per pasuritë e paluajtshme në qarkullimin civil, që ndikon drejtpërdrejt në nxitjen e tregut të pasurive të paluajtshme./atsh

Nis nesër rivlerësimi i pronës, Lame: Aplikimi online, përfitojnë edhe ata në proces legalizimi Read More »

Paketa Anti KÇK/ Balla: Operacioni Forca e Ligjit do të ketë sukses me SPAK, garanci që hetimet do t’i bëjë drejtësia e re

Aktualitet / /

Paketa Anti KÇK u bë tani, pikërisht sepse është garancia që hetimet do t’i bëjë drejtësia e re.

Kreu i grupit parlamentar të Partisë Socialiste, Taulant Balla deklaroi sot në një intervistë televizive se, “unë besoj që bashkëndaj me shumicën e qytetarëve që kjo është një goditje e rëndësishme e krimit dhe korrupsionit në Shqipëri, po të kemi parasysh që objektivi është identifikimi, vlerësimi, konfiskimi i pasurive të krijuara nga veprimtaria kriminale dhe grupe kriminale”.

“Reagimi i njerëzve është kuptimplotë dhe e mbështesim. Ajo që më bën përshtypje është edhe ajo para disa kohësh për Reformën në Drejtësi, opozita dhe komentues apo opinionistë që kundërshtojnë pa asnjë argument që bazohet në ligj dhe jo një model i shpikur nga Shqipëria, por është një model i suksesshëm i implementuar në vende të tjera me problematika të ngjashme në kohë të caktuara dhe që ka dhënë rezultate”, tha ai.

“Ligji i miratuar nëpërmjet aktit normativ i referohet, legjislacionit ekzistues organigramës së re të strukturës në drejtësi, ku bashkëpunimi i Policisë së Shtetit me SPAK dhe gjykatën është zinxhiri i suksesit të këtij procesi. Brenda 48 orësh, çdo individ që është vendosur në lupën e Policisë ka të drejtën, por dhe detyrimin të plotësojë një formular me të gjitha pasuritë që disponon, të regjistruara ose jo në organet e Kadastrës, apo dhe llogari bankare, gjithçka tjetër dhe më pas Policia e Shtetit pasi bën verifikimet paraprake ka mundësinë që të garantojë një sekuestro preventive, kjo për synimin e thjeshtë që askush përgjatë kohës që ndiqet procedura në organet e drejtësisë në prokurori apo gjykatë të mos fshehë ndonjë pasuri”, theksoi Balla.

“Synimi është që nisur nga pasuritë të shkohet tek identifikimi i këtyre personave që kanë vendosur këto pasuri përmes veprimtarive kriminale. Ligji është shumë i qartë, veprimtaria shtrihet gjatë gjithë viti 2020, për të garantuar që gjatë gjithë këtij procesi të jetë bërë një skanim, një veting do ta quaja unë i të gjithë pasurive të grupeve kriminale dhe pse jo me fazën tjetër të goditjes anti KÇK për të shkuar më pas tek ata gjyqtarë dhe prokurorë që i kanë asistuar këta persona”, u shpreh Balla.

“Ky operacion është efikas për vlerësimin tim, sepse organi i akuzës që administron provat e mbledhura nga Policia e Shtetit është një organ që qytetarët kanë besimin, por dhe pritshmëritë më të mëdha, që është SPAK. Unë kam vlerësim se ata prokurorë e prokurore që kanë bërë betimin për të qenë në atë institucion janë prokurorë që e kanë kaluar Vetingun. Kanë kaluar një proces skrutinimi (kontrolli të kujdesshëm) shumë të detajuar që lidhet me pastërtinë e figurës, që lidhet me aspektin profesional, atë të pasurisë, por që kanë dhënë dhe dakordësinë paraprake për të qenë në monitorim ata dhe familjarë të tyre. Shpresa dhe besimi është që SPAK nuk do të veprojë më sikundër kanë vepruar prokurorët pararendës për skrutinimin e pasurive të këtyre grupeve kriminale dhe provat e reja, por qofshin dhe ky aspekt profesional i SPAK do të garantojë që ky proces të jetë i suksesshëm. Sikundër dhe gjyqtarët, do të veprojnë me një përgjegjësi maksimale. Kjo ka të bëjë jo vetëm me respektimin e ligjit, por dhe me kontrollin ndaj vendimmarrjeve jo ligjore që shpesh herë në këtë vend kanë dhënë gjyqtarët”, u shpreh Balla.

“Edhe Inspektori i Lartë i Drejtësisë ka vlerën e vet për të kufizuar çdo lloj forme abuzimi që gjyqtarë dhe prokurorë mund të bëjnë në procesin penal kundër tyre”, tha Balla.

I pyetur nëse kjo paketë mbingarkon punën e SPAK, Balla tha se, “po të nisesh vetëm nga emrat e individëve të vendosur në lupën e OFL këto ditë e kupton qartë që ky është një detyrim i SPAK për sa kohë kolegët e tyre pararendës në këto dosje nuk kanë bërë detyrën siç duhet. Përtej lodhjes që ju flisni është shërbimi ndaj Shqipërisë që këto prokurorë duhet t’ia bëjnë Shqipërisë”.

I pyetur se pse kjo paketë vjen në këtë kohë, Balla theksoi, “sepse tani janë ngritur këto organe drejtësie. Më 18 dhjetor prokurorët e SPAK bënë betimin dhe ne kemi njoftuar në 25 nëntor të vitit të shkuar këtë paketë me një emërtesë kuptimplotë sikundër është anti KÇK. Garancia e këtij procesi që kemi nisur është pikërisht drejtësia e re që ka marrë detyrën vetëm pak javë më parë. Nëse nuk do ishte ngritur SPAK, nuk do kishim garanci tek suksesi. Nëse nuk do kishim garanci që dosjet dhe informacionet që ka mbledhur OFL nuk do shqyrtoheshin nga SPAK, padyshim që ky aksion do ishte i dështuar sikurse ka dështuar historikisht në këto 30 vite. Sepse edhe më herët në këto vite Policia e Shtetit në shumë raste ka bërë një punë shumë të mirë për dokumentimin e pasurive të grupeve të caktuara kriminale, por më pas prokuroria ka hapur pazarin bashkë me gjykatën. Por nuk është më Prokuroria ajo që ka qenë më parë. Është kjo njësi e ngritur dhe unë kam besim për shkak se shumë vite më pare në një vend tjetër të ngjashëm me Shqipërinë e kam parë diferencën mes drejtësisë vjetër dhe drejtësisë së re”. /atsh

Paketa Anti KÇK/ Balla: Operacioni Forca e Ligjit do të ketë sukses me SPAK, garanci që hetimet do t’i bëjë drejtësia e re Read More »

Shqipëri-Kosovë/ Rama: Po pres të punojmë me qeverinë e re, kufiri mes dy vendeve të bëhet tërësisht fluid

Aktualitet, Opinione, Politike / /

Kryeministri Edi Rama deklaroi në Uashington se “Kosova ka tashmë qeverinë e re dhe mezi pres të punoj së bashku me ta dhe është një temë që ka qenë ëndrra ime dhe çdo shqiptari të Kosovës kufiri, të bëhet tërësisht fluid”.

Në Këshillin e Atlantikut në një bashkëbisedim të hapur mbi vizitën në Uashington, Kryeministri Rama tha se “pse nuk ka qenë e mundur kjo sepse menjëherë sapo ta përmendja jo në Beograd, por këtu në Uashington dhe në Bruksel, njerëzit do më thonin mos je çmendur kjo është Shqipëria e Madhe”.

“Po kështu edhe në Beograd do ta thonin një gjë të tillë. Tashmë kemi një marrëveshje, në të cilën kufijtë mund të jenë tërësisht të hapur, ka njerëz që thonë mos duhet t’u kërkojmë leje serbëve për kufirin tonë. Çfarë është kjo? Kjo është të tallesh me njerëzit, kjo është ti marrësh njerëzit për budallenj, natyrisht duhet një marrëveshje e përbashkët dhe më pas mund ta bësh këtë gjë me gjithkënd”, – nënvizoi Rama.

Kreu i qeverisë sqaroi se “pasi binda serbët dhe Presidentin e Serbisë që të mos ta linin jashtë lëvizjen e njerëzve, sepse ata donin vetëm të përfshinin kapitalin, mallrat , lëvizjen e transaksioneve, por ndërkohë që nuk donin lëvizjen e njerëzve sepse kishin frikë nëse do të hapeshin kufijtë shqiptarët do të lëviznin dhe do të bëhej kjo Shqipëria e madhe” .
“Por kjo nuk është e vërtetë, do të kemi dy shtete, siç do të jenë 6 shtete në Ballkanin Perëndimor, por do të kemi komunikim normal ashtu si në Bashkimin Europian. Kjo do të bënte që shqiptarët të lëvizin mes njëri- tjetrit të lirë. Kjo është diçka që mund ta zgjidhim, se kur je ne qeveri është shumë ndryshe. Tashmë mund të punojmë së bashku dhe sa më shpejt të qartësojmë këtë shtrembërim lidhur me Shengenin Rajonal dhe të bëjmë përpara me kufijtë tanë”, – tha Rama.

Kryeministri theksoi se “ka edhe diçka tjetër, nuk është një BE e vogël, që të gjashtët të kenë një konsensus, të gjithë duhet të bëjnë të njëjtën gjë, jo, nuk ka veto, nuk ka paragjykim, nuk ka kushtëzim, gjithsecili mund të bëjë pjesë apo të zbatojë pjesë të saj siç do. Pra ideja është që nuk është e thënë që Kosova të bëjë me ne apo me Serbinë të njëjtën gjë. Mali i Zi është pjesë e iniciativës na pëlqen pjesa më e madhe e saj, ka gjëra që nuk na intereson, por vetëm për faktin që është shumë elastike, nuk ka nevojë të bësh çdo gjë me të njëjtin ritëm” .

“Së dyti është mjaft interesante që ambasadori Grenell nxiti marrjen e vendimit për të rivendosur fluturimet mes Prishtinës dhe Beogradit, të gjithë në Prishtinë e përgëzuan edhe unë e përgëzova, por po ta kisha thënë unë, vetëm ta kisha thënë jo ta kisha bërë ndoshta nuk do të isha këtu sot, do të më kishin prerë kokën”, – tha Rama.

“Kjo nuk ka të bëjë aspak me mendimin apo qëndrimin tim për këtë, pasi qysh prej ditës së parë e gjithë kohës kam thënë që Serbia duhet ta njohë sa më shpejt të jetë e mundur Kosovën. Për Serbinë është një makth, nga i cili Serbia duhet të çlirohet, Kosova është një realitet që nuk mund të ndryshojë. Në të njëjtën kohë na duhet të punojmë së bashku, na duhet të gjejmë se çfarë dhe ku mund të punojmë së bashku. Për këtë mund të mos biem dakord, por kjo nuk është arsye që të ngrimë gjithçka dhe t’i kthejmë shpinën njëri -tjetrit sepse nuk ndihmon askënd”, – tha Rama.

Kryeministri Rama u shpreh se “aktualisht kemi një konflikt të madh në Ukrainë dhe Presidenti i Ukrainës dhe i Rusisë ulen dhe flasin se si të hedhin hapa përpara, ata janë në luftë aty në këto zona, si mund të shmangësh të flasësh”./atsh

Shqipëri-Kosovë/ Rama: Po pres të punojmë me qeverinë e re, kufiri mes dy vendeve të bëhet tërësisht fluid Read More »

”The Guardian”: Njeriu që projektoi qytetin nëntokësor stalinist të Shqipërisë

Aktualitet / /

Për rreth dy dekada, Feti Gjici punoi në një projekt aq sekret, sa çdo mbrëmje para se të largohej nga zyra ishte i detyruar të mbyllte dokumentet në një kasafortë. Ai kurrë nuk foli për këtë projekt me miqtë ose familjen e tij, shkruan Shaun Walker në një reportazh për gazetën e njohur britanike ”The Guardian”.

”Gjici ishte shefi ekzekutiv për ndërtimet në qytetin e Kukësit, që ndodhet në veri të Shqipërisë, i cili punoi gjatë viteve të regjimit komunist, i udhëhequr nga diktatori stalinist Enver Hoxha. Udhëheqësi paranojak u tmerrua nga lufta që po afrohej dhe ndërtoi qindra mijëra bunkerë betoni për të mbrojtur popullsinë e tij kundër një kërcënimi për pushtim.

Në Kukës, jo larg kufirit me Jugosllavinë socialiste, gjërat ishin një hap më përpara. Detyra e Gjicit, që nisi në fillim të viteve 1970 dhe mbaroi vetëm me rrëzimin e regjimit në 1991, ishte të ndërtonte një kopje nëntokësore të qytetit të Kukësit, por këtë herë 30 metra nën të.

Planet e para, në fillim të viteve ’70, ishin për një sërë strehimesh kundër bombardimeve. Ndërsa gjatë viteve ’80, me urdhër të shefave të ushtrisë, Gjici shtoi gjithnjë e më shumë tunele dhe dhoma në projektin nëntokësor duke përfshirë hapësirën për një shtypshkronjë, një spital dhe një furrë buke. Më pas, u instaluan rrjetet e energjisë elektrike dhe ujit. Aty duhej të kishte një qendër komande të ushtrisë, një pikë policie dhe një sallë gjyqi. Ideja ishte që të jetonin 10 000 persona për një periudhë deri në gjashtë muaj.

“Sigurisht, në kohë lufte, gjërat mund të kalonin në kapacitet më të vogël, por ideja ishte të përsërisnim gjithë qytetin nën tokë”, kujtoi Gjici, tashmë 72 vjeç.

Në fillim të viteve ’70, autoritetet komuniste përmbytën të gjithë qytetin e vjetër të Kukësit me një liqen artificial për ndërtimin e një hidrocentrali. Planifikuesit duhej të krijonin një qytet të ri përkrah tij dhe të rivendosnin të gjithë popullsinë atje. Gjici po ndihmonte në planifikim e Kukësit të dytë mbi tokë, kur shefat e ushtrisë dhe policisë sekrete e thirrën.

“Meqë po bëja një punë të mirë, ata më besuan planet për qytetin nëntokësor”, thotë ai.

I pyetur se çfarë do të thoshte nëse kolegët do e pyesnin për çfarë po punonte, ai qesh.

“Nuk ishte në kulturën e njerëzve të pyesnin se çfarë po bëje”, thotë ai.

Bashkëshortja e tij e dinte se Gjici po punonte prej kohësh për një projekt nëntokësor, por kurrë nuk i kërkoi detaje. Ajo e dinte mirë se nuk duhej të bënte pyetje.

Për shkak se strehimi ishte tepër i fshehtë, Gjici kishte një ekip prej vetëm 30 punëtorësh për ta ndërtuar, pasi secili nga ata duhej të kontrollohej plotësisht nga shërbimet e sigurisë për besueshmërinë politike.

“Sa më pak njerëz ta dinin, aq më mirë do të ishte”, thotë ai.

Ky ekip i vogël u nda më tej në çifte, që u dërguan për të punuar në pjesë të ndryshme të strehimoreve duke mos e kuptuar asnjëherë se ekzistonte një rrjet i madh i ndërlidhur.

Gjatë viteve ’80, autoritetet zhvilluan stërvitje të rregullta, dhe kur binte alarmi, e gjithë popullsia e Kukësit mund të zbriste nëntokë për shtatë minuta, përmes 30 hyrjeve.

Por, kur ndodheshe nëntokë ishte e ndaluar të lëvizje dhe bashkimi i rrjetit me tunele që shtiheshin me kilometra, ishte informacion sekret.

Ndërtimi i rrjetit nëntokësor përfundoi në vitin 1989, u instalua energjia elektrike dhe uji. Por, përpara se secila prej zonave të pajisej ashtu siç duhej, regjimi u rrëzua.

Sot, hyrja në këto tunele nuk është për personat me zemër të dobët.

Gjici tregon rrugën poshtë një shkalle që të çon thellë e më thellë në tokë. Hyrja në pjesën më të madhe të rrjetit të tuneleve dhe dhomave është bllokuar nga grumbuj të mëdhenj rëre dhe balte.

Por, pas 30 viteve neglizhencë, kryebashkiaku i ri i Kukësit, Safet Gjici, kushëriri i Fetiut, kërkon të përfundojë ato që nisën komunistët si dhe të përfundojë punën në Kukësin e nëndheshëm, përpara se të hapet për publikun.

Në vitet ’90 ai ishte kurioz pasi dëgjoi tregimet e kushëririt të tij dhe zbriti në rrjetin e braktisur me disa miq.

“Dua të tregohem i sinqertë, nuk mund të besoj sa thellë ishte”, thotë ai në një intervistë.

“Ne hymë në një farë mënyre, por unë u tmerrova dhe u ktheva pas. Kishte thashetheme për njerëz që kishin hyrë atje dhe nuk ishin kthyer më”, shton Gjici.

Më vonë ai e vizitoi përsëri, këtë herë me kushëririn e tij dhe me ndriçimin e duhur dhe nuk i besohej sa i madh ishte. Nisi të formësohej një vizion gjigant. Pas disa muajsh, ai u zgjodh kryetar bashkie dhe vendosi se ishte koha për të vepruar.

“Duam ta shndërrojmë atë në një qytet nëntokësor për vendasit dhe turistët”, shton ai.

Safet Gjici pranoi se idetë e tij ishin ende të paqarta, por parashikonte restorante, atraksione dhe dyqane. Njerëzit do të mund të udhëtonin nëpër tunele për të dalë në liqenin artificial dhe më pas të vozisnin për kënaqësinë e tyre.

Ai shpreson se në mars do të arrijë një marrëveshje për 2,6 milionë euro nga fondi i BE-së për të filluar rinovimet. Por, pa aq shumë para’, planet e tij ambicioze mund të jenë po aq të diskutueshme sa ato në kohën e Shqipërisë komuniste.

Ka edhe nga ata që vënë në dyshim transformimin e trashëgimisë komuniste të vendit në parqe atraksioni. Kompleksi i gjerë i bunkerëve, i ndërtuar në periferi të kryeqytetit të Tiranës, tashmë është shndërruar në një muze. Ekzistojnë plane për të hapur shtëpinë e Enver Hoxhës për publikun, shtëpi e lënë ashtu si ishte kur vdiq diktatori në vitin 1985.

“Në pjesën tjetër të Europës komuniste, represioni përfundoi në vitet ’60, por këtu ata shkuan deri në fund. Njerëzit ishin të uritur dhe ata ende po ndërtonin bunkerë. Pse na duhen muzetë e bunkerëve tani, kur nuk ka muze për viktimat e komunizmit?”, thotë Enriketa Papa, një historiane në Universitetin e Tiranës.

Safet Gjici është i bindur se asnjë muze nëntokësor nuk mund ta tregojë plotësisht anën e errët të viteve komuniste.

“Ishte një kohë e tmerrshme. Gjysma e popullit ishin informatorë dhe kishte kufizime për gjithçka. Nuk duam t’i shohim ato kohë përsëri, as për veten tonë dhe as për të tjerë”, thotë ai.

Kushëriri i tij ishte shumë më ekuivok duke reflektuar një nostalgji për regjimin e Enver Hoxhës në mesin e një pjese të popullatës së Shqipërisë, veçanërisht atyre që zunë pozita të privilegjuara.

“Unë kam qenë nga një familje fermerësh në fshat dhe kam pasur mundësi të studioj inxhinieri në kryeqytet së bashku me dhëndrin e Hoxhës. Në atë kohë, nuk kishte diskriminim”, shton ai duke shmangur bisedat rreth ekzekutimeve, kampeve të punës dhe të burgosurve politikë.

Për sa i përket qytetit nëntokësor, ai hedh poshtë idenë se ndërtimi i tij pasqyronte një mentalitet paranojak dhe pretendon se ishte minimumi absolut që çdo qeveri e arsyeshme do të siguronte për qytetarët e saj. Ai shtoi se kjo gjë duhej bërë për t’u mësuar brezave të rinj se rreziku i luftës është gjithmonë aty”, përfundon reportazhi i ”The Guardian”./atsh

”The Guardian”: Njeriu që projektoi qytetin nëntokësor stalinist të Shqipërisë Read More »

“Zoti bekoftë SHBA dhe Shqipërinë”/ Rama takon në Uashington policin shqiptar që jeton prej 22 vitesh atje

Aktualitet / /

Kryeministri Edi Rama ndodhet në Shtetet e Bashkuara të Amerikës për një vizitë zyrtare.

Nga Uashingtoni Rama ka publikuar një video me një polic shqiptar, i quajtur Erion, i cili jeton prej 22 vitesh në SHBA dhe që është i ngarkuar me sigurimin e Kryeministrit Rama gjatë vizitës në SHBA.

“Në Uashington DC me Erionin nga Tirana, jo Lali, por është një Erion tjetër që ka 22 vjet dhe shikojeni ky më mbron mua këtu. Përshëndeti ata në Tiranë”, thotë Rama në video.

“Patjetër, përshëndetje, përshëndetje! Mirë se erdhët në Amerikë!” – thotë Erioni.

“Mirë se erdhët në Amerikë! E sheh? Hajde, God bless United States, God bless Albania (Zoti bekoftë SHBA dhe Shqipërinë)”, thotë Rama.

“God bless Albania! God bless You sir!” (Zoti bekoftë Shqipërinë! Zoti ju bekoftë Ju zotëri!” – shprehet Erioni./atsh

https://www.facebook.com/edirama.al/videos/2546748488873419/?t=0

“Zoti bekoftë SHBA dhe Shqipërinë”/ Rama takon në Uashington policin shqiptar që jeton prej 22 vitesh atje Read More »

Marrëdhënie të shkëlqyera mes Policisë së Shtetit dhe Interpolit

Aktualitet / /

Drejtori i Përgjithshëm i Policisë së Shtetit Ardi Veliu priti në takim zv.presidenten e Interpolit, Sarka Havrankova, njëkohësisht edhe Drejtoreshë e Departamentit të Marrëdhënieve Ndërkombëtare të Policisë Çeke.

Në fokus të këtij takimi ishte diskutimi rreth çështjeve me interes të përbashkët, forcimi i bashkëpunimit dhe identifikimi i fushave në të cilat mund të bashkëpunohet në të ardhmen.

Drejtor Veliu vlerësoi marrëdhëniet e shkëlqyera mes Policisë së Shtetit dhe Interpolit, duke theksuar se Policia e Shtetit ka kontribuar dhe vazhdon të kontribuojë në përmbushjen e detyrimeve të përcaktuara nga Interpoli, që nga momenti që është bërë pjesë e kësaj agjencie.

Po ashtu, Drejtori i Përgjithshëm i Policisë së Shtetit Ardi Veliu vlerësoi bashkëpunimin e shkëlqyer me Policinë çeke, në kuadër të luftës së përbashkët kundër krimit të çdo forme, duke theksuar punën e mirë të oficerit të kontaktit të Republikës çeke, i atashuar në Ambasadën çeke në Tiranë, Adriatik Shino, i cili është i angazhuar në rritjen e bashkëpunimit mes dy policive.

Veliu falënderoi zj. Sarka Havrankova që zgjodhi për të vizituar Shqipërinë të parën nga lista e vendeve që ka në angazhim dhe siguroi se Policia e Shtetit do të jetë gjithnjë e gatshme për të bashkëpunuar me partnerët për të arritur suksese të mëtejshme në betejë me krimin.

Zv.presidentja e Interpolit shprehu vlerësimin e saj për bashkëpunimin e deritanishëm dhe gatishmërinë për t’i ardhur në ndihmë Policisë së Shtetit në të ardhmen, për nevojat që do të ketë për mbështetje në këtë drejtim.

Havrankova informoi drejtor Veliun se Interpoli po planifikon të realizojë 2 trajnime për bazën e të dhënave RELIEV dhe në këtë kuadër sugjeroi që edhe Policia shqiptare të dërgonte oficerët e saj.

Lidhur me memorandumin e përbashkët që është në plan për t’u nënshkruar në kuadër të sezonit turistik mes policisë çeke dhe asaj shqiptare, Havrankova theksoi se kjo është një nismë e rëndësishme, e cila do të rrisë marrëdhëniet mes dy agjencive./atsh

Marrëdhënie të shkëlqyera mes Policisë së Shtetit dhe Interpolit Read More »

Sulmet kundër paketës Anti KÇK/ Rama: Po bëjnë avokatin e krimit përballë ofensivës shembullore të qeverisë

Aktualitet / /

Kryeministri Edi Rama ka reaguar sot ndaj akuzave në lidhje me paketën anti KÇK.

“A janë njerëz këta a ça janë?”,më shkruan një qytetar i tronditur nga komentet e studiove televizive kundër paketës antiKÇK!”, shprehet kryeministri Rama.

“Eh,kanë kaq kohë që shajnë, akuzojnë, shpifin për lidhjet e qeverisë me krimin dhe mblidhen në sallonet tv sa herë ndodh një vrasje, duke sulmuar qeverinë”, thekson ai.

“Sot që qeveria është angazhuar në ofensivën më shembullore kundër krimit në historinë e vendit, mblidhen në sallonet tv për të mbrojtur krimin nga qeveria që po shkel të drejtat e atyre, të cilët deri dje pa pikën e turpit, i lidhnin me mua, me PS e me çdo fitore elektorale të PS”, shton Rama.

“Njerëz janë njerëz, po janë armiqësuar me të vërtetën, me faktet e me vetë profesionin e tyre për inat të qeverisë! Dhe janë kaq qorrazi kundër qeverisë, sa tani janë kthyer befas në avokatë gjynahqarë të krimit, që po lënë kokrrën e namit me dokrrat e dembelizmit të tyre mendor”, thekson kreu i qeverisë, Edi Rama./atsh

Sulmet kundër paketës Anti KÇK/ Rama: Po bëjnë avokatin e krimit përballë ofensivës shembullore të qeverisë Read More »