Aktualitet

Nisja drejt Italisë, një nga vendet më të prekura në botë nga pandemia e koronavirusit, e 30 mjekëve dhe infermierëve shqiptarë, ka tërhequr sot vëmendjen e medias ndërkombëtare.

AFP

Shqipëria dërgoi të shtunën 30 mjekë dhe infermierë në Itali, vendi europian më i prekur nga epidemia Covid-19, ku jeton një komunitet i madh shqiptar.

Ekipi mjekësor u shoqërua në aeroportin e Tiranës nga kryeministri shqiptar Edi Rama.

Ata do të udhëtojnë “për në rajonin e Lombardisë për të ndihmuar kolegët e tyre italianë”, tha Edi Rama në një video të transmetuar drejtpërdrejt nga aeroporti, tha agjencia franceze e lajmeve, AFP.

REUTERS

Shqipëria, një nga vendet më të varfra në Europë, dërgoi një ekip mjekësh dhe infermierësh në Italinë fqinje për ta ndihmuar për pandeminë e koronavirusit, pasi rastet e veta ende nuk e kanë rrezikuar atë.

Italia e ka ndihmuar Shqipërinë pasi u përball me një numër krizash, pasi rrëzoi komunizmin në fund të viteve 1980, duke përfshirë rrezikun e urisë në fillim të viteve 1990 dhe anarkisë në 1997. Tirana e sheh ndihmën mjekësore si një shans për të shlyer favoret nga ana e Italisë.

Rreth 400 000 shqiptarë jetojnë dhe punojnë në Itali, duke dërguar para për familjet e tyre, si dhe duke investuar kursime dhe ekspertizë të fituar atje për të ndërtuar biznese, shkruan agjencia britanike e lajmeve, Reuters.

”New York Times”

Ka pasur 197 raste të konfirmuara dhe 10 vdekje në Shqipëri. Në Itali, rajoni i Bergamos është ai që është prekur më shumë nga koronavirusi.

Shqipëria, një nga vendet më të varfra të Evropës, ka dërguar sot një ekip mjekësh dhe infermierësh në Italinë fqinje për të ndihmuar në trajtimin e pandemisë së re të koronavirusit.

Qeveria e kryeministrit Edi Rama do të paguajë 11 milionë lekë (rreth 90 000 euro) për të paguar 30 vullnetarët që do të punojnë për një muaj në zonën e Bergamos.

Ambasada italiane në Tiranë tha se “falënderojmë qeverinë shqiptare për këtë akt solidariteti dhe dashurie. Përgjithmonë të bashkuar”.

Roma ka ndihmuar Shqipërinë në krizat me të cilat është përballur që nga rënia e regjimit komunist në fund të viteve 1980, dhe Tirana i sheh ndihmat tani si një mundësi për të “shlyer” këtë borxh, edhe pse kontributi i tyre është i vogël.

IBTIMES

Veprimi i Shqipërisë është një gjest miqësor dhe një mënyrë për të shlyer fqinjin e saj gjatë kësaj kohe krize.

Vetë Shqipëria ka raportuar 197 raste të koronavirusit me 10 vdekje. Megjithatë, pavarësisht se është shumë afër Italisë nga rruga ajrore dhe detare, Shqipëria ende nuk është prekur shumë nga shpërthimi i koronavirusit, shkruan agjencia IBTIMES.

Globalnewshut

Mjekët shqiptarë mjekë do të punojnë së bashku me mjekët italianë gjatë disa javëve pasuese, sepse sistemi i kujdesit shëndetësor i Italisë po përballet me rritjen e numrit të vdekjeve që vijnë nga koronavirusi.

Agenzianova

Një avion u ul në Fiumicino me një ekip prej rreth 30 mjekësh dhe infermierësh nga Shqipëria për të mbështetur sistemin shëndetësor italian për t’u marrë me emergjencën e koronavirusit. Për t’i mirëpritur ishte ministri i Punëve të Jashtme dhe Bashkëpunimit Ndërkombëtar, Luigi Di Maio, i cili falënderoi kryeministrin Edi Rama dhe gjithë qeverinë dhe popullin shqiptar për “solidaritetin e madh” të treguar, njoftoi agjencia italiane e lajmeve, Agenzianova.

Kathimerini

Roma ka ndihmuar Shqipërinë në krizat me të cilat është përballur që nga rënia e regjimit komunist në fund të viteve 1980, dhe Tirana i sheh ndihmat tani si një mundësi për të “shlyer” këtë borxh, edhe nëse kontributi i tyre është i vogël.

Rreth 400 000 shqiptarë jetojnë dhe punojnë në Itali, shkruan mes tjerash gazeta më e madhe greke ”Kathimerini”.

Il Messaggero

“Ne nuk jemi të pasur dhe aq më pak të privuar nga kujtesa dhe nuk mund të lejojmë të mos i tregojmë Italisë se shqiptarët dhe Shqipëria nuk e braktisin kurrë mikun e tyre në vështirësi”.

Me këto fjalë kryeministri shqiptar Edi Rama shoqëroi largimin e ekipit prej 30 mjekësh dhe infermierësh për në Itali, shkruan gazeta e njohur italiane ”Il Messaggero”.

time24.news

Shqipëria, e cila ka një mungesë mjekësh, 1,2 mjekë për 1 000 banorë, kundër 4,1 mjekëve në Itali, sipas të dhënave të Organizatës Botërore të Shëndetësisë (OBSH) – kohët e fundit u bëri thirrje rreth 2 000 mjekëve në pension të rihynin në shërbimin aktiv dhe të ndihmojnë në ndalimin e përhapjes së koronavirusit të ri.

“Sot ne jemi të gjithë italianë (…) Italia do ta fitojë këtë betejë”, tha Edi Rama, në një ceremoni të shkurtër në aeroport./ /atsh

30 mjekë dhe infermierë shqiptarë u nisën sot drejt Italisë, ku do të luftojnë në vijën e zjarrit me COVID-19.

“Italia është shtëpia jonë dhe sot jemi të gjithë italianë”, tha sot Kryeministri Edi Rama nga aeroporti ndërkombëtar i Rinasit, ndërsa përcolli ekipin e bluzave të bardha drejt Italisë.

“Së pari, ju shpreh të gjithëve mirënjohjen e thellë për gatishmërinë e menjëhershme për të bërë gjënë e duhur në këtë moment kaq të jashtëzakonshëm. E di që disave këtu në Shqipëri do t’u dukej e çuditshme që 30 mjekë dhe infermierë të armatës sonë të vogël të bluzave të bardha nisen sot për në vijën e zjarrit të Italisë”, tha Rama.

Kryeministri u shpreh i vetëdijshëm edhe për faktin se “30 mjekë dhe infermierë nuk e përmbysin raportin mes forcës vrastare të armikut të padukshëm dhe forcave të bluzave të bardha që po luftojnë me të në vijën e zjarrit matanë detit”.

Por di, vijoi ai, “që edhe andej është shtëpia jonë tanimë që kur Italia, motrat dhe vëllezërit italianë, na shpëtuan dhe na mikpritën dhe adoptuan në shtëpinë e tyre kur Shqipëria digjej nga ato dhimbje të papërshkrueshme”.

“Ne po luftojmë me të njëjtin armik të padukshëm dhe mjetet e njerëzit e luftës tonë nuk janë pa kufi, por sot ne nuk mund t’i mbajmë forcat në rezervë në pritje të hyjnë në luftë këtu, kur sot në Itali edhe shqiptarë të plagosur nga armiku po kurohen në spitalet e luftës dhe kanë nevojë për ndihmë”, shtoi Rama.

Kryeministri theksoi se është e vërtetë që të gjithë janë mbyllur në kufijtë e tyre dhe edhe vende shumë të pasura u kanë kthyer kurrizin të tjerëve, por mbase pikërisht se nuk jemi të pasur dhe nuk na ka lënë kujtesa akoma, ne nuk mund t’ia lejojmë vetes të mos i tregojmë Italisë se shqiptarët dhe Shqipëria nuk e braktisin kurrë mikun në vështirësi.

“Kjo është një luftë ku askush nuk fiton dot i vetëm dhe ju të dashur anëtarë e anëtare të këtij misioni kurajoz për jetën po niseni për një luftë që është edhe e jona. Sot ne jemi të gjithë italianë dhe Italia duhet dhe do ta fitojë luftën edhe për ne dhe gjithë Europën dhe botën. Zoti ju bekoftë të gjithëve!” – tha Rama./atsh

https://www.facebook.com/edirama.al/videos/227847448575281/?t=0

“Përdor teknologjinë, ruaj veten dhe të tjerët”. Ky është mesazhi që ka dhënë sot drejtoresha e Agjencisë Kombëtare të Shoqërisë së Informacionit (AKSHI), Linda Karcanaj.

“Duke nisur nga dita e hënë, përmes e-Albania do disiplinohen daljet nga shtëpia, për të mbrojtur jetët e secilit prej nesh”, ka thënë ajo.

Ajo shpjeguar se si mund të aplikosh për lejedalje. “Konkretisht, qytetari apo biznesi hap faqen e-Albania dhe klikon në shërbimin “Leje për dalje”. Pasi vendos emrin, një person i vetëm i familjes, orën e lëvizjes (1 orë në fashën 05:00-13:00) dërgon kërkesën e cila miratohet menjëherë. Në e-mail do merrni konfirmimin”, ka shtuar ajo.

Për bizneset, Kacanaj ka shpjeguar se, “aplikimi bëhet me numrin e NIPT-it. Administratori përcakton emrat e punonjësve dhe numrat e tyre të telefonit, të cilët do të njoftohen me SMS për lejen e daljes”.

“Shumë më pyesin: po unë që s’kam internet apo smartphone? Qytetarët që nuk aksesojnë dot internetin, mund të bëjnë kërkesën 24 orë para me SMS përmes numrit FALAS 55155. Në mesazh dërgohet numri i kartës së identitetit dhe ora e lëvizjes (p.sh IxxxxxxxxB 10:00) dhe po me SMS, qytetari merr miratimin e lëvizjes”, ka thënë ajo.

“Kujtoj, që vetëm një person në familje mund të aplikojë për “Leje për dalje”. Pensionistët dhe moshat e thyera nuk do pajisen me leje, pasi është jetike që ata të qëndrojnë brenda”, ka shtuar Karcanaj.

“Në telefonat tuaj, ruani e-mail-in apo SMS miratuese e cila duhet t’i tregohet policisë në rast ndalimi. Mungesa e lejës ju penalizon me gjobë”, ka theksuar ajo/atsh

Rreth 664 mijë pensionistë do të përfitojnë një indeksim me rreth 2.4% të pensionit të tyre nga data 1 prill.

Vijimi i kësaj reforme është konfirmuar nga ministrja e Financave dhe Ekonomisë, Anila Denaj e cila deklaroi në një intervistë se indeksimi i pensioneve për gati 664 mijë pensionistë do të niste nga muaji prill.

“Indeksimi i pensioneve ka qenë i parashikuar në buxhetin e miratuar në fund të vitit të kaluar dhe buxheti i miratuar është në vlerën 2.5 miliardë lekë. Masa e indeksimit shkon në varësi të informacionit që marrim nga INSTAT dhe po shikojmë mundësinë të jetë në masën e rreth 2.4%. Do të jetë efektiv për pensionin e muajit prill”, deklaroi Denaj.

Në bazë të reformës së pensioneve të miratuar në vitin 2015, tashmë është detyrim i përvitshëm indeksimi i pensioneve me indeksin e çmimeve të shportës./atsh

Kryeministri Edi Rama deklaroi sot se “javën që vjen do të nisim misionet e fluturimit për riatdhesimin e njerëzve tanë të mbetur rrugëve të Europës”.

Në një komunikim me qytetarët, Rama tha se ka marrë mesazhe të shumta nga bashkëqytetarët tanë që kanë ngecur prej ditësh e javësh në pika të ndryshme të kontinentit pas mbylljes së kufijve nga lufta.

“Kam marrë jo pak mesazhe nga studentë, nga prindër, nga familjarë të ndarë nga kufiri i mbyllur dhe me Ministrinë për Europën dhe Punët e Jashtme dhe ambasadat tona kemi punuar realisht ditë natë, duke kontaktuar dhe duke listuar. Kemi zgjidhur disa raste sipas mundësive shumë të kufizuara që kemi pasur, por e dime shumë mirë, jemi plotësisht të vetëdijshëm për çfarë stresi e peripecish rriten përditë për njerëzit tanë që kanë mbetur rrugëve të Europës”, tha Rama.

Ai theksoi se grupi më i madh është në Itali ku janë 650 persona, në Britaninë e Madhe janë 114 persona, në Kroaci 341 persona, në Zvicër 77, në Greqi 45, në Gjermani 45, në Francë 37, në Suedi 21, Austri 19 dhe pastaj një sërë vendesh të tjera ku ka 1-2 deri në 11-12 persona.

Rama ndau lajmin e mirë se “ditën e hënë do të nisin fluturimet për t’i sjellë në atdhe”.

“Nesër do të publikojmë kalendarin e misioneve të riatdhesimit dhe pikat përkatëse ku do të bëjmë imbarkimin e personave të listuar tanimë”, tha Rama.

Ai theksoi se “këto misione do t’i kryejmë pa pagesë nga ana e individëve”. “I takon ‘Lasgushit’ t’i sjellë njerëzit tanë në shtëpi. ‘Air Albania’ është kompania e flamurit kuqezi dhe në këtë hall të madh kombëtar unë i kam kërkuar kompanisë të marrë përsipër barrën e të qenit shtëpia e shqiptarëve në qiejt e Europës dhe të mos kërkojë lekë për të kryer këto misione humanitare. Jam i lumtur se gatishmëria e kompanisë ka qenë e menjëhershme”, tha Rama.

Ai tha se ndërkohë Ministrja e Infrastrukturës dhe Energjisë ka punuar dhe po punon për lejet speciale të këtyre fluturimeve çarter.

“Shpresoj miq që ky mesazh përcjell te ju edhe një të vërtetë tjetër. Unë nuk jap premtime pa u siguruar mirë që do të realizohen. Ndërkohë që ju ankoheni e ankoheni ne punojmë për ta adresuar gjithë tërësinë e ankesave. Ne nuk jemi një shtet i madh, as një shtet me fuqi të pakufijshme, por ju siguroj se përkushtimin e kemi të madh dhe fuqinë për të luftuar për Shqipërinë dhe shqiptarët e kemi të pakufijshme”, tha Rama.

Ai tha se “do të luftojmë kështu përditë, përnatë deri në fund duke besuar se do të bëni të gjithë luftën tuaj dhe do të na i bëni hallall vuajtjet e kësaj lufte që nuk e e solla unë, por nuk kemi rrugë tjetër”./atsh

https://www.facebook.com/Agjencia.Telegrafike.Shqiptare/videos/779056915951722/?t=0