Aktualitet

“BE gati të hapë negociatat me Shqipërinë”/ Varhelyi: “Korsitë e gjelbra” për lëvizjen e lirë të mallrave në rajon, sinjal pozitiv shumë premtues

Aktualitet, Politike / /

Komisioneri për Zgjerimin Oliver Varhelyi deklaron se “në samitin virtual të BE me gjashtë vendet e Ballkanit Perëndimor do duhet të dërgohet një sinjal i qartë: BE kërkon të investojë në mënyrë strategjike me gjithë krizën e Coronës”.

Në një intervistë për DW, Varhelyi tha se “samiti trajton të gjithë rajonin e Ballkanit Perëndimor. Ju e dini, që Ballkani është një rajon me diversitet. Kemi dy shtete, me të cilat ne negociojmë për anëtarësimin. Po ashtu kemi dy shtete, me të cilat kemi vendosur të fillojmë negociatat. Kemi edhe dy shtete të tjera, që as nuk janë kandidatë. Zgjerimi pra është vetëm një element. Natyrisht që do të jetë temë. Bëhet fjalë për perspektivën europiane, që është një fjalë tjetër për zgjerimin. Por edhe për vendime strategjike, që duhet të marrim për Ballkanin Perëndimor”.

I pyetur mbi hapjen e negociatave me Shqipërinë dhe Maqedoninë e Veriut, Varhelyi tha se, “BE është gati. Në mars pati një përkushtim të qartë, kur të gjithë miratuan fillimin e negociatave. Jam shumë optimist, se do ta bëjmë këtë. Mendoj, se këto gjëra janë pjesë e kulturës europiane të negociimit, që herë pas here ka si hapa mbrapa edhe progres. Por në fund vlen rezultati. Nëse i shikoni arritjet e këtij Komisioni Europian, atëherë do të dalloni, që ne e kemi vënë Ballkanin Perëndimor dhe zgjerimin sërish në axhendën e ditës. Krerët në BE do të merren me këtë, madje në mesin e krizës së Coronës. Mendoj, se ky është një konfirmim i qartë nga ana e BE”.

I pyetur nëse ka një datë konkrete për fillimin e negociatave me Shqipërinë e Maqedoninë e Veriut, Komisioneri për Zgjerimin tha se, “më kuptoni, me krizën e Coronës në rend të ditës është shumë e vështirë që t‘ju japim tani një datë. Por mund t’ju siguroj, se ne nga ana jonë punojmë fort, shumë fort që të përgatisim raportin vjetor të zgjerimit. Aty ne do të bëjmë një propozim për kuadër konkret të negociatave. Ky është hapi i parë drejt negociatave të vërteta. Komisioni Europian nuk humbet kohë, për të çuar përpara sa më shpejt të jetë e mundur procesin”.

I pyetur sesi po e ndryshon pandemia e Coronës strategjinë dhe politikën në drejtim të Ballkanit, Varhelyi tha se, “besoj, se pandemia e ka përforcuar angazhimin tonë për Ballkanin Perëndimor. Nëse shikoni, se çfarë po bëjmë aty, e kuptoni që kemi nisur ndihmë konkrete në të gjashtë shtetet. Kemi kërkuar që nga dita e parë kontakt për të ndihmuar në këtë krizë. Elementi i dytë i rëndësishëm është natyrisht nevoja që të investojmë në rajon në mënyrë strategjike. Kjo vlen si për politikën edhe për ekonominë. Nga ana ekonomike ne mundemi e duhet të bëjmë më shumë. Shpresoj, që në këtë drejtim nga samiti mundësisht të vijnë mesazhe të qarta të krerëve të shteteve e qeverive”.

I pyetur se kur do të marrë një zgjidhje konflikti mes Kosovës dhe Serbisë për kufijtë dhe shtetin, Varhelyi tha se, “besoj, se do të kemi një mundësi pas zgjedhjeve në Serbi. Shpresoj që pastaj të fillojmë shumë shpejt të punojmë për një zgjidhje. Kam parë sinjale shumë pozitive në lidhje me virusin Corona. “Korsitë e gjelbra” që u ngritën në të gjithë unionin për lëvizjen e lirë të mallrave dhe kamionëve të transportit janë ngritur po ashtu edhe në të gjithë Ballkanin Perëndimor. Ky është një sinjal pozitiv shumë premtues, kur të bëhet fjalë që të zgjidhim edhe problemet e fundit mes Kosovës dhe Serbisë”.

I pyetur nëse është SHBA konkurrencë në zgjidhjen e çështjes së Kosovës, Varhelyi tha se, “shikoni këtu nuk bëhet fjalë për një garë. Ky problem është shumë më i rëndësishëm, se pyetja, se kush do të marrë kurorën e dafinave në fund me suksesin e negociimit. E rëndësishme është që të kemi një zgjidhje. Ne jemi partnerët strategjikë të SHBA në këtë rajon dhe duhet të punojmë së bashku. Për sa i përket kontributit tim, jam më se i gatshëm që të luaj një rol këtu. Do të angazhohem sa më shumë të jetë e mundur”.

I pyetur se çfarë perspektive shikon për Bosnje-Hercegovinën sa i përket zgjerimit, Varhelyi tha se, “qeveria e re ka marrë vendime serioze, që me ardhjen e saj. Para disa ditësh qeveria ia ka dalë, të bjerë në ujdi për 14 detyra prioritare, që duhet të përmbushen, para se Bosnja të jetë një vend kandidat. Ne kishim ofruar një listë me 14 kërkesa, që duhen plotësuar në rrugën e anëtarësimit, kemi miratuar edhe një plan kohor. Kjo më jep shpresë, që po ecet përpara dhe se me qeverinë ne Bosnje-Hercegovinë shpejt do të futem në bisedime”.

I pyetur nëse do të përsëritet Samiti i Zagrebit në një takim të vërtetë, Varhelyi tha se, “e rëndësishme tani është që krerët e shteteve dhe qeverive kanë vendosur të mbajnë takimin, me gjithë situatën, edhe pse është një takim virtual. Ky është një sinjal për të gjithë, jo vetëm për rajonin, që ne e kemi vërtet seriozisht, kur bëhet fjalë për Ballkanin Perëndimor. Ne e shohim atë si një prioritet europian. Natyrisht, do të ishte shumë e rëndësishme të ulemi në një tavolinë, nëse flasim për planin për investime ekonomike pas krizës. Shpresoj që këtë ta bëjmë së shpejti”./atsh

“BE gati të hapë negociatat me Shqipërinë”/ Varhelyi: “Korsitë e gjelbra” për lëvizjen e lirë të mallrave në rajon, sinjal pozitiv shumë premtues Read More »

Shqipëria me shkallën më të ulët të përhapjes së pandemisë dhe me ritmin më pozitiv të ecurisë për daljen prej saj

Aktualitet, Shendetesi / /

Shqipëria dhe fqinjët e saj të drejtpërdrejtë përbëjnë rajon model në Europë, me shkallën më të ulët të përhapjes së pandemisë dhe me ritmin më të lartë të procesit të daljes prej saj.

Në buletinin e Akademisë së Shkencave për pandeminë jepen disa fakte lidhur me këtë konstatim.

“Në shumicën e vendeve të Europës Perëndimore zhvillimet e djeshme përforcuan kursin e daljes nga pandemia. Me një ritëm shërimesh më të ulët se vendet e Ballkanit, vendet nordike përforcojnë trendin zbritës të numrit të të sëmurëve në ditë. Në shkallë globale, në Europë dhe në SHBA, u vërtetua ulje e treguesve të rritjes ditore të të sëmurëve: më të ulëtit deri më tani. Sot në botë një në çdo tre të prekur nga sëmundja rezulton i shëruar. Kurba e rritjes ditore në SHBA prej dy javësh është identike me atë të Europës më herët, me një zhvendosje prej 11 ditësh. Sëmundja po arrin pikun në shkallë botërore dhe në SHBA, sipas treguesve kryesorë”, cilëson Akademia e Shkencave.

Shqipëria dhe fqinjët e saj të drejtpërdrejtë, si dhe rajoni i Ballkanit në tërësi, rezultojnë me shkallën më të ulët të përhapjes së pandemisë dhe me ritmin më pozitiv të ecurisë për daljen prej saj. Mbi 80 për qind e numrit të të sëmurëve në Mal të Zi regjistrohen tashmë të shëruar. Ky tregues në Shqipëri u ngjit në 71,5 për qind, në Maqedoninë Veriore në 68,6 për qind, në Kosovë në 58 për qind dhe në Greqi në 52 për qind. Në të gjitha vendet e rajonit, përveç Greqisë, nga fillimi i muajit maj deri më sot, ky tregues në tërësi është rritur me 9-10 pikë. Edhe Kroacia e Turqia e kanë përmirësuar ndjeshëm këtë tregues, duke përforcuar trendin zbritës të kurbës së të sëmurëve faktikë. Ndërsa Bosnje-Hercegovina shenjoi sërish ecje me lëkundje në fazën dalëse, Bullgaria po shkon drejt rrafshimit të kurbës, megjithëse një rritje ditore mbi të tjerët, me rreth 3 për qind.
Ndërkaq, vendet e Europës Perëndimore, duke përfshirë shtetet e mëdha (Francë, Gjermani, Itali, Spanjë), si dhe Çekinë e Sllovakinë, shenjuan rritje minimale të numrit të të sëmurëve, në kufirin nën 1 për qind. Në shumicën e këtyre vendeve u përforcua kursi i daljes nga pandemia. Vendet më të avancuara janë Austria, Zvicra, Gjermania dhe Luksemburgu, ku mbi 80 e të sëmurëve janë shëruar tashmë. Ndërsa Belgjika dhe Holanda, me rritjet minimale të ditëve të fundme, vlerësohet se tashmë e kanë rrafshuar kurbën e pandemisë. Vendet e Europës Qendrore (Poloni, Rumani, Hungari) gjithashtu kanë hyrë në fazën e rrafshimit të kurbës.

Më tej, në shpjegimin që jep Akademia e Shkencave thuhet se “vendet nordike, duke përfshirë republikat priballtike (Letoni, Lituani, Estoni), me një ritëm të shëruarish më të ulët se rajoni ynë, gjenden në fazën e zbritjes së numrit të të sëmurëve në ditë. Edhe Suedia, e njohur për politikën e saj më liberale ndaj kufizimit të kontakteve sociale, po shkon drejt pikut të pandemisë dhe më tej drejt zbutjes së ritmit të përhapjes së saj.
Sipas ASH, Në shkallë globale, në Europë dhe në SHBA, dje është vërtetuar ulje e treguesit të rritjes së numrit të të prekurve rishtas nga “Corona-virus-i” i ri. Ky tregues ishte gjegjësisht në nivelet rekord prej 2.23 për qind, 1.6 për qind dhe 2 për qind. Vlen të theksohet se prej dy javësh, ritmi i rritjes së numrit të të sëmurëve në SHBA është identik me atë të Europës më herët, me një zhvendosje prej 11 ditësh. Kjo do të thotë se, pas tri javëve rritjeje eksponenciale me koeficient me të lartë se ai i Europës në javët e para të pandemisë, SHBA kanë hyrë në të njëjtin ritëm”.

Që prej një jave kurba e të sëmurëve në terapi intensive është në rënie në nivel botëror. Sot në Botë një në çdo tre të prekur nga sëmundja rezulton i shëruar. Vetëm gjatë ditës së djeshme numri i të shëruarve u shtua me 46 mijë vetë. Treguesit kryesorë të pandemisë dëshmojnë se sëmundja në shkallë botërore po arrin pikun, ndërsa SHBA po shkojnë drejt rrafshimit të kurbës së të sëmurëve faktikë.

Disa vende të Lindjes, si Ukraina, Bjellorusia e Rusia, ndonëse me një përhapje të kufizuar të pandemisë, kanë ende tregues sëmundshmërie në ngjitje. Veçanërisht i lartë është shtimi ditor i të infektuarve të rinj në Rusi, me 6-7 për qind, vend që ndërkohë ka dhe numrin më të lartë të testeve për një të infektuar të detektuar dhe indeksin e vdekshmërisë nën 1 për qind, ndër më të ulëtit në gjithë Botën./atsh

Shqipëria me shkallën më të ulët të përhapjes së pandemisë dhe me ritmin më pozitiv të ecurisë për daljen prej saj Read More »

Hapje e kufijve tokësorë për turistët nga vendet fqinje, në fund të majit fluturimet e para charter

Aktualitet, Turizem / /

Shqipëria synon të jetë vendi i parë në rajon, por edhe më gjerë, që pritet të hapë turizmin.

Ministri i Turizmit, Blendi Klosi deklaroi sot në një intervistë në media se vendi ynë në krahasim me Kroacinë, Greqinë dhe Turqinë favorizohet nga strukturat e vogla hoteliere të cilat menaxhohen më lehtë.

Sipas tij, parashikohet që fluturimet e para charter me turistë të huaj të mbërrijnë në fund të këtij muaji, ndërkohë që do të synohet që kufiri tokësor të hapet përpara kësaj date për të pasur më shpejt turistë nga vendet e rajonit.

“Nuk do të kemi shifrat e vitit 2019, por do të kemi turistë të huaj këtë sezon. Bashkë me ministrin Ahmetaj që menaxhojmë situatën e krizës së pandemisë, do t’i propozojmë qeverisë hapjen e kufijve tanë tokësorë për të pasur mundësinë e lëvizjes së turistëve nga vendet fqinje dhe do të synojmë që në fund të muajit maj të kemi çarterat e parë me turistë të huaj. Janë disa vende me të cilat ne kemi komunikim të shpeshtë si Çekia, Polonia, vendet Skandinave, Ukraina, Bjellorusia, që janë të gatshme të dërgojnë çartera nëse ne si struktura shtetërore e hoteliere i garantojmë standarde të higjienës.

“Po synojmë hapjen e parë në rajon”, deklaroi ministri i Turizmit.

Klosi tha se do të synohet së pari një turizëm rajonal për të shpëtuar sektorin nga kriza. Jemi qeveria e parë në rajon, nënvizoi ministri Klosi që kemi ofruar një paketë mbështetëse për industrinë e turizmit. Lidhur me ligjin që do të përcaktojë rregullat për funksionimin e plazheve, ai tha se pritet të jetë gati brenda kësaj jave.

Ministri Klosi vuri në dukje se protokolli i paraqitur për rregullat e pushimeve është pranuar nga 95% e operatorëve turistikë, ndërsa shtoi se ka disa elementë që pritet të ndryshohen.

“Është një proces që ministria e ndjek shpesh, pra materiali është shpërndarë për mendim. E gjithë ideja e këtij manuali, është që turizmin ta kemi jo vetëm një mjet kënaqësie, por ta kemi edhe industri. Është një industri që mban me mijëra njerëz në punë, që mban rrjete të tjera industrish me punë dhe kemi mundësitë, falë investimeve që janë kryer në këtë industri, që të dalim të parët në treg”, u shpreh Klosi.

Ai theksoi se ky draft dhe ky protokoll masash është hartuar për kushtet në të cilat jemi, por nëse situata do të ndryshojë, Klosi tha se masat do të lehtësohen./atsh

Hapje e kufijve tokësorë për turistët nga vendet fqinje, në fund të majit fluturimet e para charter Read More »

“Askush nuk pengohet të thotë çfarë të dojë”/Shqipëria ka lirinë më të madhe të shpifjes në planet

Aktualitet / /

“Besoj që Shqipëria ka lirinë më të madhe të shpifjes në planet”, deklaroi sot Kryeministri Edi Rama.

Gjatë një interviste televizive, i pyetur lidhur me raportin e publikuar të Freedom House ku sipas analistit kërkimor Michael Smelzer udhëheqësit në vendet në rajon po heqin dorë dhe nga fasada e demokracisë, Rama tha se “zotëria ka arritur në përfundimin e gabuar. Këtu s’bëhet fjalë për fasadë të demokracisë. Këtu bëhet fjalë për një demokraci në zhvillim dhe me të gjithë problematikat që ka zhvillimi”.

Përsa i përket lirisë së medias, Rama tha se “Shqipëria ka lirinë më të madhe të shpifjes në planet. Flas për median në tërësi nuk flas për gazetarët në veçanti. Është një hapësirë e madhe, ku siç ka gjëra padiskutim me vlerë ka edhe një shumicë shpifjesh përditë, përditë, që janë jo thjesht produkt i gazetarëve, por edhe produkt në tërësi i mjedisit të debatit publik dhe që kalojnë pa asnjë filtër, pa asnjë faktim, pa asnjë argumentim thjesht kalojnë dhe njerëzit dynden me shpifje dhe pasaktësi. Ky është fakt”.

“Fakti është që në Shqipëri askush nuk pengohet të thotë çfarë të dojë dhe shumëkush thotë atë që i vjen për mbarë dhe shpesh ato që thuhen janë të pavërteta, të pasakta, janë gjysmë të vërteta, që janë dhe gënjeshtrat më të mëdha siç dihet. Dhe shpifje sigurisht sa të duash”, theksoi Kreu i Ekzekutivit.

“Sasia e të pavërtetave dhe gjysëm të vërtetave, që janë dhe gënjeshtrat më të mëdha dhe e shpifjeve pa i hyrë në gjemb në këmbë askujt është në nivelet më të larta të planetit”, u shpreh Rama.

I pyetur nëse do heqë dorë nga ligji i antishpifjes, Kryeministri Rama tha se, “absolutisht. Edhe ky është një rast konkret për të thënë sesa pak në media mund të gjesh të vërtetën dhe sa shumë gjen deformim. Sepse faktikisht ai ligj ka lidhje shumë pak ose aspak me shumëçka që është thënë mbi atë ligj në media”.

Rama u shpreh se patjetër që do të vazhdojë me ligjin e antishpifjes. /atsh

“Askush nuk pengohet të thotë çfarë të dojë”/Shqipëria ka lirinë më të madhe të shpifjes në planet Read More »

Qeveria nuk ka marrë asnjë vendim për të dhënë me koncesion asgjë në Porto Romano

Aktualitet / /

Kryeministri Edi Rama deklaroi sot se nuk ka koncesion në Porto Romano, por shtesë të një kontrate ekzistuese.

Gjatë një interviste televizive, Rama deklaroi se qeveria nuk ka marrë asnjë vendim për të dhënë me koncesion asgjë në Porto Romano.

“Është 100% e pavërtetë. Kjo është një nga ato pasaktësitë që pastaj kthehen në shpifje. S’është e vërtetë. Nuk ka marrë qeveria asnjë vendim për të dhënë me koncesion asgjë në Porto Romano. Është e gjitha e pavërtetë. Ju ngatërroni mbledhjen e qeverisë me mbledhjen e parlamentit ku është bërë thjesht një shtesë e një kontrate ekzistuese”, u shpreh Rama.

Kryeministri tha se “qeveria e ka dërguar atë me kohë, por nuk e ka bërë në mbledhjen e javës së kaluar. Prapë një pasaktësi tjetër që faktikisht konfuzion opinionin publik”./atsh

Qeveria nuk ka marrë asnjë vendim për të dhënë me koncesion asgjë në Porto Romano Read More »

Ministria e Shëndetësisë: 12 raste të reja, shkon në 832 numri i të prekurve

Aktualitet, Lajmi i fundit, Shendetesi / /

Gjatë 24 orëve të fundit janë regjistruar 12 raste të reja me COVID-19, duke e çuar në total numrin e të prekurve në 832.

Në informimin e sotëm në lidhje me situatën e COVID-19 zv.ministrja e Shëndetësisë dhe Mbrojtjes Sociale, Mira Rakacolli tha se, ” gjatë 24 orëve të fundit janë evidentuar 12 raste të reja pozitive nga testimi i 255 personave të dyshuar si bartës të këtij infeksioni ose të semurë. Pjesa më e madhe e tyre janë kontakte të rasteve të konfirmuara më parë dhe të gjetura nga hetimi epidemiologjik”.

Rastet pozitive të ditës së sotme janë të shpërndara si vijon: Në Fier 3 të prekur, 3 në Krujë, 3 në Kamëz, 2 në Shkodër dhe 1 rast në Tiranë.

“Me shtimin e rasteve të sotme, numri i të prekurve nga COVID-19 shkon në 832.
Prej tyre janë tashmë të shëruar 595 persona dhe vazhdojnë të jenë aktivë aktivë 206 persona”, tha Rakacolli.

“Në dy spitalet COVID, në spitalin infektiv dhe spitalin “Shefqet Ndroqi”, aktualisht janë të shtruar 36 pacientë dhe vetëm 8 prej tyre janë në terapi intensive. Pjesa tjetër po ndiqen nga mjeku i familjes ose janë asimptomatikë”, u shpreh Rakacolli.

Rakacolli tha se, “situata epidemiologjike e infeksionit Sars Cov 2 dhe sëmundjen Covid 19 në Shqipëri, po monitorohet me shumë kujdes nga të gjitha strukturat shëndetësore. Veçanërisht në këtë situatë të lehtësimit të masave, është rritur vigjilenca për gjurmimin, testimin dhe identifikimin në kohë të rasteve të dyshuara me COVID-19 si dhe kontakteve të tyre, në mënyrë që situata të vazhdojë të mbahet në kontroll”.

Ministria e Shëndetësisë dhe Mbrojtjes Sociale apelon për qytetarët që të vazhdojnë të respektojnë masat e rekomanduara nga autoritetet shëndetësore sidomos distancimi fizik si një nga mjetet më efikase të parandalimit të infeksionit. Po ashtu bizneset e hapura duhet të respektojnë me rigorozitet protokollet e sigurisë, në mbrojtje të shëndetit publik dhe të parandalimit të shtimit të infeksionit.

Ftojmë qytetarët të mos neglizhojnë shenjat e COVID-19 dhe të telefonojnë menjëherë urgjencën kombëtare 127 në rast se kanë dyshime se janë të prekur nga ky virus.
Për të kontaktuar mjekun e familjes, për pyetje në lidhje me COVID-19, për këshillim psikologjik në rast të shfaqjes së shenjave të ankthit apo shqetësime të tjera, ju lutemi, telefononi në linjën e gjelbër 0800 40-40.

COVID-19 – Statistika (6 Maj 2020)

Teste të kryera 9531
Raste pozitive 832
Raste të shëruara 595
Raste Aktive 206
Humbje jete 31 (Qarku Tiranë 18, Durrës 6, Fier 3, Vlorë 1, Shkodër 2, Kukës 1)

Shpërndarja gjeografike e rasteve aktive është si vijon:
Tiranë 98
Krujë 69
Shkodër 16
Kamëz 6
Kurbin 4
Elbasan 3
Fier 3
Mirditë 2
Berat 2
Durrës 1
Korçë 1
Lezhë 1/atsh

Ministria e Shëndetësisë: 12 raste të reja, shkon në 832 numri i të prekurve Read More »

Rama: Rezultat fantastik në sistem si pasojë e masave të marra

Aktualitet, Shendetesi / /

“Ne kemi një rezultat fantastik, fal masave. Nëse nuk do të kishim marrë masat e duhura sot do ishim duke numëruar të vdekurit”, tha sot Kryeministri Rama, i ftuar në një intervistë televizive.

Në lidhje me deklarimet se virusi ka qarkulluar ne muajin dhjetor, Kryeministri Edi Rama tha se ne nuk jemi epimidiolog, këto janë debate për shkencëtarët për ata që kur flasin dinë çfarë flasin. Ajo që ne mund të diskutojmë se çfarë lidhet me punë dhe detyrën time. Unë nuk jam epimidiolog dhe nuk marre përsipër këtë gjë.

“Ne kemi një rezultat fantastik në sistem. Ky rezultat vjen si pasojë e masave që kemi marrë. Nëse ne nuk do merrnim masa dhe do bënim këto që kemi bërë mund të kishim më shumë se 7 mijë ose mijëra të vdekur jo ata që ishin në spital”, tha Rama.

Kryeministri u shpreh se “unë kam folur për shifra të tjera dhe kam folur duke u nisur nga një projeksion i bërë nga ekspertët nëse këtu do të kishte ndodhur ajo që ndodhi në Lombardi dhe s’kishte sepse të mos ndodhte nëse ne nuk do merrnim masat, kur dihet se çfarë lidhjesh të pazgjidhshme kemi ne me Italinë. Kështu po të merrnim shifrat e Lombardisë dhe nëse do ishin zhvilluar ngjarjet si në Lombardi në mungesë të masave ne sot do ishim duke numëruar më shumë se 1000 të vdekur”.

Rama theksoi se shifrat dalin nga projeksionet që bëjnë ekspertët.

“Unë nuk parashikoj shifër. Unë për gjithçka që them për gjera që nuk janë të fushës sime të përgjegjësisë, e marr,dhe pastaj e them. Nuk e bëj siç e bëni shpesh në media pa e ditur fare se çfarë thoni, e merrni dhe e transformoni pa dashje me qëllimin e mirë që të impresiononi publikun. Unë shifrat i marr nga projeksionet që bëjnë ekspertët”, deklaroi Kryeministri Rama. /atsh

Rama: Rezultat fantastik në sistem si pasojë e masave të marra Read More »

Turizmi/ Instrumenti i garancisë mundësi për operatorët që të fuqizojnë kapitalin e tyre

Aktualitet, Turizem / /

Kryeministri Edi Rama u shpreh se në kushtet e situatës së masave ndaj COVID-19, sektori i turizmit është në vështirësi por jo në pamundësi të plotë sepse po vazhdojnë aktivitetin.

Gjatë një interviste televizive, Kryeministri tha se, “po të shohin eksportet bujqësore, ato nuk kanë pësuar goditje të ndjeshme puna ka vazhduar, ajo që ne po bëjmë për të gjetur zgjidhje për turizmin ka disa lloj dilemash sepse vërtetë nuk kemi një shans të rëndësishëm këtë herë ndonëse duke qenë se jemi një vend që jemi prekur shumë pak nga COVID-19, pra nuk jemi një vend që trembim, por nga ana tjetër dilema është a duhet apo nuk duhet të hapemi aq fort sa ta shikojmë këtë si një mundësi, apo të ruhemi maksimalisht”.

Ne, vijoi Rama, do të bëjmë gjithë çka kanë bërë vendet e tjera, jemi në kontakt të vazhdueshëm me ta dhe do të shikojmë në javët që vijnë dhe do të veprojmë patjetër, për qasjen sa i hapur do të jetë sezoni dhe si do të marrë formë zhvillimi ai.

“Për sa i përket likujditetit në sektorin e turizmit, Kryeministri tha se, ne kemi vënë në dispozicion të turizmit një instrument shumë të fuqishëm garancie i cili i mundëson operatorëve të fuqizojnë kapitalin e tyre qarkullues përmes këtij instrumenti”.

Gjithashtu, deklaroi Rama, për sa i përket taksave, turizmi në Shqipëri, ka taksat më të ulëta sesa në vendet që kanë hequr taksat.

“Turizmi në Shqipëri ka TVSH 6% dhe e ka më të ultën në Rajon dhe nuk është çështje e taksave dhe e TVSH-së, por çështja është se sa ne do ta hapim sezonin dhe këtë do ta bëjmë duke parë të tjerët, që akoma nuk kanë marrë vendime përfundimtare”- tha Rama.

Kryeministri tha se, nuk ka as një gjasë që ne të jetojmë si përpara shfaqjes së COVID-19 deri kur të dali vaksina.

“Se deri kur të dali vaksina ne do ta kemi këtë armik të padukshëm mes nesh, që do të thotë që duhet të mësohemi me praninë e tij dhe duhet të adaptojmë një sjellje ndryshe nga ajo e përparme”- tha Rama. /atsh

Turizmi/ Instrumenti i garancisë mundësi për operatorët që të fuqizojnë kapitalin e tyre Read More »