Aktualitet

Braçe publikon faqen e parë të “New York Times”: Masat në Shqipëri shpëtuan jetë

Aktualitet, Opinione, Politike, Shendetesi / /

Zëvendëskryeministri Erion Braçe deklaroi sot se “masat e qeverisë, por edhe bashkëpunimi dhe korrektësia e shumicës dërrmuese të popullit, kanë shpëtuar shumë jetë, duke këputur e penguar zinxhirin e përhapjes së koronavirusit në popullsi”.

Braçe publikoi artikullin e sotëm të New York Times, i cili njofton se shtetasit amerikanë që kanë humbur jetën nga koronavirusi në SHBA po arrijnë në 100 mijë.

“Ne, Shqipëria nuk pësuam kështu! Nuk ka mbaruar akoma, por jemi gjallë, me shëndet dhe jo në një listë gazete! Nuk është gazetë e vjetër. Është New York Times i sotmi! Njofton se shtetasit amerikanë që kanë humbur jetën nga koronavirusi në SHBA po arrijnë në 100 mijë. Emrat e një pjese të tyre janë në këtë listë, në faqen e parë historike të New York Times si homazh! Lutem, lutemi që shpirti i tyre të prehet në paqe. Familjet e tyre të gjejnë ngushëllim e solidaritet tek lutjet e gjithkujt për të afërmit e tyre, beteja e tyre por edhe miliona punëtorëve të shëndetësisë për jetën e secilit ndër ta”, tha Braçe.

Ai theksoi se “në SHBA vijojnë betejën për çdo jetë kur humbjet janë të pashembullta”.

“Pas numrit të pafund të të infektuarve e numrit të frikshëm të jetëve të humbura, më vjen të pyes çdo politikan palaço e çdo sharlatan publik: A ju duket shaka, ekzagjerim,
konspiracion kundër lirisë? Shiheni këtë faqe gazete, është më e fortë se një gotë alkool, është e vërteta. Tani kthehuni tek Shqipëria”, tha Braçe.

Sipas tij, “Shqipëria është e vogël, por ka bërë aq shumë, po bën akoma dhe do të vijoj të bëj për të kuruar, shpëtuar çdo jetë”.

“Masat e qeverisë, bashkëpunimi dhe korrektësia e shumicës dërrmuese të popullit, sakrifica e pamatë e mijëra mjekëve të familjes e në spitale, infermierëve, epidemiologëve, sanitarëve, solidariteti i BE, SHBA e partnerëve të tjerë, kanë shpëtuar shumë jetë;
në spitale duke kuruar por edhe jashtë tyre, në çdo bllok, lagje fshati, qyteti, duke këputur e penguar zinxhirin e përhapjes së koronavirusit në popullsi”, tha Braçe.

“Është pak kjo? Është shumë! Shëndeti i pari pa plaçka bëhet. Jam tallur sa herë kam patur hajdutë përpara në Kuvend, tamam SaLul-at. Por shëndeti, jeta janë të parat! E di që masat e marra dhe të zbatuara në mënyrë shembullore kanë kufizuar liri, kanë ndryshuar mënyrën e jetesës, kanë prishur planet e terezinë e gjithkujt, fëmijë, të rinj që donin shkollat, auditorët, burra e gra që donin punën, të moshuar që kane jetike ajrin e diellin.
Përulësisht ju kërkoj ndjesë! Por na besoni, e gjitha ishte jetike të bëhej kështu për të shpëtuar jetë! Jeni në jetë e vetëm jeta vlen! Thuajani këtë çdo politikani palaço që ju do të vdekur për politikën e tij”, përfundoi Braçe ./atsh

Braçe publikon faqen e parë të “New York Times”: Masat në Shqipëri shpëtuan jetë Read More »

“Shqipëria, histori suksesi në betejën ndaj COVID-19”/ Mjeku Ylli: Nga masat e marra, u shpëtuan qindra jetë njerëzore e mijëra vite jetë të shëndetshme

Aktualitet, Opinione, Shendetesi / /

“Shqipëria është qartazi një histori suksesi në mbyllje të fazës së parë të epidemisë”, deklaron Alban Ylli, Anëtar i Komisionit të Mjekësisë dhe Shëndetësisë pranë Akademisë së Shkencave, kërkues shkencor në ISHP dhe pedagog i jashtëm në Universitetin e Mjekësisë, Tiranë.

Ylli thekson se “megjithëse numri i vdekjeve të raportuara është rreth 5-fish me i lartë se mesatarja e vdekjeve çdo vit nga gripi apo rreth 2 herë më i lartë se ai i vdekjeve nga gripi pandemi i 2009-s, niveli i mortalitetit ngelet shumë i ulët krahasuar me parashikimet e fillimit të marsit”.

“Niveli i vdekshmërisë në Shqipëri është dhjetëra herë më i ulët se ai i raportuar nga vendet e Europës Perëndimore si dhe ndër më të ultit në Europën Lindore. Në këtë fazë mund të vlerësohet se janë shpëtuar me qindra jetë njerëzore dhe mijëra vite jetë të shëndetshme. Një sukses për të cilin shqiptarët duhet të jenë krenarë”, deklaron mjeku Ylli.

Arsyeja kryesore e këtij rezultati që arriti Shqipëria në këtë fazë, thekson ai, është kombinim i fillimit relativisht më vonë të pandemisë dhe marrjes më të shpejtë të masave drastike të izolimit social e fizik.

“Një studim mbi këtë temë është përfunduar nga ne dhe disa kolegë të Universitetit të Hawait dhe është dërguar për publikim. Të gjitha vendet kanë përfituar nga (NBA) masat e izolimit dhe distancimit, por disa vende, si Shqipëria, ku këto masa u morën shpejt dhe nuk lejuan krijimin e një rezervuari të madh infeksioni në popullatë, përfituan më shumë. Pa dyshim se ishte edhe një çështje fati: virusi hyri më vonë, në sasi më të vogël se në disa vende perëndimore dhe u dha më shumë mundësi autoriteteve dhe gjithë shoqërisë të reagonin në kohë. Një falënderim i madh u takon gjithë qytetarëve që respektuan me ndërgjegje masat”, shprehet mjeku i njohur.

Faktorë të tjerë ndihmues, shton ai, mund të kenë qenë edhe mosha mesatare më e re, dendësia e popullatës, përqindje më e ulët e sëmundjeve kronike, faktorë të lidhur me biologjinë individuale, etj.

Ylli shton se “ndërkohë që vala e pare e pandemisë u përballua me sukses dhe stina e ngrohtë ka shumë mundësi ta frenojë qarkullimin e virusit, ngelen ende shumë të panjohura mbi sjelljen e tij në të ardhmen”.

“Evolucioni biologjik nuk e favorizon për një kohë të gjatë një virus vdekjeprurës: bashkë me vdekjet do të zhdukej edhe virusi. Për këtë arsye mutacionet që vijojnë ta shoqërojnë, mund të jenë të prirura drejt një shfaqjeje më “beninj” të virusit, të tilla që e shndërrojnë atë gradualisht në një virus endemik, më të adaptueshëm me bujtësin human. Gjithsesi, ky është vetëm një skenar, bazuar në biologjinë”.

“Një valë e dytë më e thjeshtë, nuk përjashtohet. Për këtë arsye, sistemi shëndetësor dhe gjithë shoqëria duhet të vijojnë të jenë të kujdesshëm dhe të përgatitur për skenarin më të keq”, apelon ai.

Ylli shton se “ndërkohë që pritet nga shkenca vaksina apo një trajtim i efektshëm, duhet të vijojmë të monitorojmë situatën me intensitet dhe të vijojmë të zbatojmë masat individuale te higjienës dhe distancimit. Kështu do të jemi më të sigurt dhe do të vijojmë të shpëtojmë jetë”.

Më tej, Ylli vlerëson E-grupin e ngritur pranë Akademisë së Shkencave ndërsa foli edhe për realizimin e një projekti.

“Në grup merrnin pjesë ekspertë të fushave të ndryshme që postonin në kohë reale si faktet më të fundit mbi pandeminë, ashtu edhe opinionet dhe përvojën e tyre mbi situatën. Grupi lejoi shkëmbimin e shpejtë të informacionit dhe pikëpamjeve. Ai shërbeu si një forum për debat dhe konsulta shkencore duke zëvendësuar vështirësitë e krijuara për takime fizike. Së fundi, theksoj se ky grup, mbeti profesional e pothuaj i paprekur nga “infodemia” e lajmeve te rreme, apo gjysmë të vërtetave që, deri diku, infektuan disa E-grupe të tjera”, u shpreh ai.

Nëse i referoheni projektit të studimit serologjik të propozuar, Ulli thekson se është një kontribut i rëndësishëm dhe i drejtpërdrejtë për vendin në fazën e dytë të pandemisë. “Në këtë fazë, kur masat drastike të izolimit fizik po zëvendësohen dora-dorës me një qasje tjetër, më afatgjatë, është thelbësore njohja e nivelit të imunitetit të grupeve të ndryshme të popullatës përmes studimeve të sero-prevalencës, përmes aplikimit në kampione sistematike të testeve serologjike. Si pjesë paraprake e projektit, për herë të parë, planifikohet të verifikohet validiteti i një testi të ri serologjik për COVID -19, përmes aplikimit të tij edhe në një kampion serumesh të periudhës para pandemisë. Studimi planifikohet të kryhet si një nismë e Akademisë, në bashkëpunim me Qendrën Spitalore Universitare dhe Institutin e Shëndetit Publik. Është përcaktuar metodologjia dhe është siguruar mbështetje për teknologjinë për të. Per momentin pritet vetëm zgjidhja e disa detajeve teknike dhe burokratike”, shprehet Ylli.

Akademia e Shkencave, menjëherë pas shfaqjes së COVID-19 në Shqipëri, organizoi grupin “Në ndjekje të pandemisë” me mjekë, gjenetistë, ekonomistë, biologë, matematikanë e fizikanë brenda dhe jashtë vendit, anëtarë të Akademisë, dhe përmes komunikimit arriti që të identifikojë disa nga problemet më të rëndësishme të kësaj pandemie. U mundësua, gjithashtu edhe hartimi i Buletinit Ditor të shfaqjes së pandemisë në botë dhe në vendin tonë. Këta buletine së bashku me grafikët e hartuar sidomos nga prof. Niko Kaçiroti në SHBA apo Erida Gjini në Portugali, mundësuan edhe ndjekjen e përhapjes, infektimit, vdekshmërisë dhe riaftësimit nga ky virus në shifra të përafërta me ato që u vërtetuan në praktikë. /atsh

“Shqipëria, histori suksesi në betejën ndaj COVID-19”/ Mjeku Ylli: Nga masat e marra, u shpëtuan qindra jetë njerëzore e mijëra vite jetë të shëndetshme Read More »

Horoskopi ditor, e hënë 25 maj 2020

Aktualitet / /

Dashi
Dashuria: zbutni disa anë të karakterit tuaj dhe lini hapësirë ​​për kërkesat e dikujt që dëshiron të hyjë në jetën tuaj. Një gjendje e mirë fizike dhe psikologjike për beqarët që do të japin shfaqje të shkëlqyera në çdo rast.

Puna: Dëgjoni këshillat e një eksperti që dëshiron t’ju drejtojë në rrugën e duhur. Qëndroni të vendosur.

Demi

Dashuria: Kaloni më shumë kohë në dashuri në përgjithësi, dhe për të dashurit tuaj që mendojnë se janë lënë mënjanë. Ndoshta puna po ju merr shumë kohë. Beqarët mund të shkojnë në pazar dhe të kalojnë një mbrëmje të këndshme në shoqërinë e miqve.

Puna: Perspektiva të shkëlqyera për të arritur disa momente të rëndësishme. Propozime të reja vijnë së shpejti.

Binjakët

Dashuria: Sot melankolia do të marrë përsipër dhe mezi do keni mundësinë të përqendroheni. Nëse ndjenjat tuaja janë të drejtuara drejt një marrëdhënie shtesë, sikletet mund t’ju bëjnë të ndiheni keq. Ditë e këndshme për beqarët që do të gjejnë dashurinë.

Puna: Do të jeni kokë më kokë me një koleg të mërzitshëm dhe ndërhyrës, i cili do të përpiqet t’ju marrë ju në drejtim.

Gaforrja

Dashuria: Do të keni mundësinë të jetoni një ditë romantike me partnerin tuaj. Relaksohuni dhe mos mendoni për gjëra të trishtuara ose melankolike. Beqarët do frymëzohen nga qëllime të mira dhe do kenë takime të reja intriguese dhe shumë interesante.

Puna: Sot është një ditë e shkëlqyeshme për punë, krijimtaria juaj do të admirohet nga njerëz të rëndësishëm.

Luani

Dashuria: Me Saturnin e favorshëm mbrojtja ndaj dashurisë do të jetë totale dhe ju do të shkelni zemrën e partnerit. Mundësi të shkëlqyera për të forcuar marrëdhëniet në krizë! Beqarët në mbrëmje mund të kalojnë orë të pakujdesshme në shoqërinë e miqve të tyre të zakonshëm.

Puna: Do të rimerrni besimin në aftësitë tuaja, është koha të konsolidoni një rol që keni pushtuar.

Virgjëresha

Dashuria: Mos u mbizotëroni nga pakënaqësia për ndryshkjet e vjetra, përkundrazi përpiquni të rikuperoni paqen e brendshme. Ju jeni duke kaluar një kohë të mirë, gjithashtu kujdesuni për dashurinë. Beqarët do bëjnë miq të rinj, por kini kujdes nga njerëz jo të vërtetë.

Puna: Ofertat e reja të punës do të vijnë, vlerësoni me kujdes ato që ju ofrojnë.

Peshorja

Dashuria: Ju jeni xheloz për të dashurin tuaj dhe shihni atë që dëshironi të shihni. Shqyrtoni situatat në mënyrë objektive para se të merrni vendime të rëndësishme. Beqarët sot do përjetojnë emocione të reja dhe për shumë njerëz mund të ketë dashuri me shikim të parë.

Punë: Punoni shumë për të marrë hapësirën që ju meritoni në një ekip. Mos u dekurajoni nga ndonjë pengesë e vogël.

Akrepi

Dashuria: Do të përballeni me një sqarim që keni shmangur për ca kohë. Do të jetë shumë e dobishme të kuptoni më mirë të dashurin tuaj dhe të kuptoni motivimet e tij. Për beqarët po vjen një miqësi e re që premton një ndjenjë të veçantë.

Puna: Mos hezitoni të kërkoni një promovim ose njohje që ju takon, keni punuar mirë dhe prandaj e meritoni.

Shigjetari

Dashuria: Në frontin sentimental do të përjetoni momente vërtet emocionuese. E meta e vetme do të jetë mbrëmja, kur hëna në kundërshtim do ju bëjë pak nervoz. Për zemrat e vetmuara një ditë me të vërtetë të jashtëzakonshme premton, edhe Venusi dhe Mërkuri janë në anën tuaj.

Puna: Në punë do të ketë surpriza të këndshme, do të rrethoheni nga admirimi.

Bricjapi

Dashuria: Dita ka të ngjarë të jetë mjaft e keqe, me hënën në kundërshtim dhe disavantazhin e Mërkurit rrezikoni të bëheni shumë të diskutueshëm. Tensione në çift. Nëse jeni beqarë, shijoni një ditë relaksimi dhe argëtimi.

Puna: Në punë mund të hasni pengesa të papritura dhe, në përgjithësi, do të keni disa vështirësi të pohoni arsyet tuaja.

Ujori

Dashuria: Ndiqni instinktet tuaja dhe ngjyrosni me entuziazëm historinë tuaj të dashurisë. Sikurse të jesh simpatik, partneri yt nuk mund të të ndihmojë por nuk të vë re! Sot do të mbizotërojë spontaniteti dhe beqarët do duhet të tregohen natyrshëm.

Puna: Shfaqni sa më mirë aftësitë tuaja dhe do të shihni që do të shkëlqeni. Mos i lini asgjë rastësisë.

Peshqit

Dashuria: Sot do të duhet të jeni shumë të durueshëm, sepse për fat të keq gjërat negative nuk do të dështojnë. Venera në kundërshtim e bën jetën e dashurisë të komplikuar dhe do të jetë e lehtë që grindjet e furishme të shpërthejnë me partnerin tuaj. Beqarët do duhet të përpiqen të qëndrojnë të qetë nëse janë në krizë.

Puna: Mundësi të reja për për ta shndërruar një realitet pune në diçka më të madhe.

Horoskopi ditor, e hënë 25 maj 2020 Read More »

Fundjava rrezik shumë më të madh ekspozimi nëse lejohet qarkullimi i lirë i makinave

Aktualitet, Problematika / /

Kryeministri Edi Rama shpjegoi sot se pse në fundjavë ka një rrezik shumë më të madh ekspozimi nëse lejohet qarkullimi i lirë i makinave.

Rama tha se “e gjithë dinamika e kësaj lufte, e cila do të jetë gjithnjë e më shumë betejë e përditshme e secilit me veten në radhë të parë, varet qysh prej ditës 1 nga niveli i ekspozimit të popullatës ndaj virusit”.

“Ja pse nuk është e vështirë të kuptohet pse në fazën 1 orët e lëvizjes ishin shumë të kufizuara për punë apo për pazar. Faza dy nisi me lehtësime me zona dhe fasha të ndryshme, ashtu sikundër s’besoj të jetë më e vështirë për t’u kuptuar se me fashën tanimë të hequr fare në “zonat e gjelbra” apo të zgjeruar deri në 9 të darkës në “zonat e kuqe”, dita e shtunë dhe e diel kanë një rrezik shumë më të madh ekspozimi nëse lejohet qarkullimi i lirë i makinave dhe derdhja në rrugë e të gjithëve pa përjashtim në këtë mot kaq të bukur dhe joshës”, tha Rama.

Kryeministri theksoi se “nuk është virusi që na lufton me orare dhe as që del më i armatosur të shtunën a të dielën në “zonat e kuqe”, por jemi ne që përpiqemi të mbrohemi ndërkohë që hapemi me kujdes dhe zgjerohet hapësira jonë e lëvizjes”.

“Unë e kam ditur dhe ua kam thënë qysh ditën e parë dhe në vijim se çfarë lufte nervash dhe sprove ekstreme durimi do të ishte e tërë kjo dreq historie. Dhe nëse sot shumëkush e hedh ujët përpjetë duke bërë të zgjuarin dhe duke përqeshur gjithçka kemi bërë deri këtu sepse i duket krejt gabimisht sikur e tëra ishte kot përderisa nuk numëruam mijëra apo qoftë edhe qindra të vdekur, e vërteta që e di çdo mendje e kthjellët është se pikërisht pse ne bëmë ato që bëmë dhe po bëjmë ato që po bëjmë nuk patëm vuajtjet e tmerrshme të shumë vendeve e shumë popujve të tjerë”, tha Rama.

Kryeministri solli shembullin e shtetit të Masaçusets në Amerikë që dihet botërisht si shteti me sistemin më fantastik shëndetësor të SHBA-së. “Ka dyfishin e popullsisë së Shqipërisë dhe sot është ende i mbyllur teksa ka numëruar deri më tash mbi 6 mijë të vdekur. Pse? Pikërisht sepse nuk bëri këto që plot ndjekës së kësaj faqeje i quajnë budallaqet e mia dhe më tregojnë Suedinë, komplotin e Bill Gates për t’i futur laçjanëve dhe myzeqarëve mikroçipin në trup përmes vaksinës që t’u kontroll pastaj mendimet, komplotin e madh global për të vrarë pleqtë që kapitalizmi të mos harxhojë lekë për pensione dhe lloj-lloj fantazish e absurditetesh të kësaj natyre në botën akademike të rrjeteve sociale”, tha Rama.

Rama tha se Suedia sot ka numrin më të madh të vdekjeve për milionë banorë në planet, ndërsa Shqipëria ndër më të ulëtin. “Suedia nuk është vendi i ‘qepalla vëlla’ dhe as vendi ku bëhen dasma me nga 500 vetë pa llogaritur faktin se ata s’kanë nevojë as për policë as për ushtri në rrugë kur qeveria u thotë ruani distancat. Tani kanë filluar pretendimet se bota qenka hapur dhe vetëm Shqipëria rri mbyllur. Ndërkohë që na doli së fundi se tërë tumat e zhurmave me molotov e flakëhedhës dhe me bllokime rrugësh e bojkotime zgjedhjesh e paskan pasur hallin tek teatri, Shekspiri dhe Molieri. Cila botë është hapur më shumë se Shqipëria sot në fazën 2. Shkoni në Greqi dhe Itali dhe lëvizni me makinë jashtë prefekturave ose shkoni në Spanjë e ikni me makinë në plazh e me radhë dhe shiheni si është”, tha Rama. /atsh

Fundjava rrezik shumë më të madh ekspozimi nëse lejohet qarkullimi i lirë i makinave Read More »

Në 1 qershor plazhet hapen për hotelet, pas datës 10 për të gjithë/ Autoritet i përkohshëm licencues për plazhet private

Aktualitet, Turizem / /

Kryeministri Edi Rama deklaroi sot se “ne do t’i hapim plazhet nga 1 qershori vetëm për hotelet dhe më pas nga 10 qershori për të gjithë pa përjashtim”.

“Në 1 qershor do të hapen kufijtë, por ende jo plazhet. Kam marrë të shara nga plazhistë në Dhërmi që i kishte ngritur e përzënë Policia e Shtetit. Nuk kam ndërmend të bëj të mirin për t’i hapur rrugë të keqes. Askush sot në Europë nuk i ka hapur plazhet. Nuk ka asnjë vend që i ka hapur plazhet. Pse kur ne bëjmë të njëjtën gjë hidhen përpjetë më shpejt dhe më lart ata që kur janë jashtë shtetit nuk bëjnë as gëk as mëk”, tha Rama.

Kryeministri theksoi se “këtë javë ne mbyllim edhe sistemin e administrimit të plazheve, ku për shkak se jemi në këtë situatë parimin e ‘ranës së xanun’ me çadra dhe shezlongë do ta ndëshkojmë pa asnjë kompromis. Greqia ka vendosur t’i hap plazhet në korrik, të tjerë nuk kanë vendosur ende”, tha Rama.

Kryeministri informoi po ashtu se “këtë javë do të ngrihet një autoritet i përkohshëm licencues i plazheve për subjektet private”.

“Ndërkohë që të gjitha të ardhurat do t’i kalojnë bashkive si gjithmonë. Asnjë kontratë e mëparshme nuk do të njihet nëse nuk konfirmohet nga ky autoritet licencues dhe asnjë kontratë e re nuk do të lidhet nga bashkitë pa miratimin paraprakisht të këtij autoriteti licencues”, tha Rama.

Kryeministri tha se “ne duam që hoteleria shqiptare të punojë me fuqi të plota dhe të mos konkurrohet në mënyrë të pandershme dhe të paligjshme, padrejtësisht me ofertën e shërbimit për plazh”.

“Ne duam që shqiptarët që duan të shkojnë në plazhe publike ta kenë këtë mundësi dhe askush të mos u vër taksën e të fortit apo të faktit të kryer. Duam që ky sezon të mos jetë i pamundur për sektorin, por njëkohësisht të mos na e bëjë të pamundur përballimin e armikut të padukshëm”, tha Rama. /atsh

Në 1 qershor plazhet hapen për hotelet, pas datës 10 për të gjithë/ Autoritet i përkohshëm licencues për plazhet private Read More »

Kjo java e fundit e kufizimeve dhe orareve, në fuqi edhe dy fundjava pa makina për t’u rikthyer në tetor

Aktualitet / /

Kryeministri Edi Rama deklaroi sot se “kjo do të jetë java e fundit e kufizimeve dhe orareve në Tiranë dhe në qytetet tona”.

Gjatë një komunikim, Kryeministri theksoi se “fundjava pa makina mbetet në fuqi edhe dy të shtuna e të diela”.

“Për t’u rikthyer pas sezonit të verës çdo të diel minimalisht, nga tetori deri në marsin e ardhshëm si një moment i përjavshëm kushtuar ajrit pa tym makinash, familjeve, të moshuarve, fëmijëve dhe mjedisit tonë”, tha Rama.

Kryeministri ftoi qytetarët që “të vazhdojmë të ecim së bashku duke kuruar plagën e hapur të ekonomisë nga kjo pandemi pa lejuar që shëndeti ynë të preket”./atsh

Kjo java e fundit e kufizimeve dhe orareve, në fuqi edhe dy fundjava pa makina për t’u rikthyer në tetor Read More »

Festa e Fitër Bajramit/ Ambasadorja Kim: Urojmë shëndet të mirë dhe gëzim në familjet e të gjithëve

Aktualitet / /

-Ambasadorja e SHBA-së në Tiranë Yuri Kim ka uruar besimtarët myslimanë me rastin e festës së Fitër Bajramit.

“Gëzuar Fitër Bajramin! Ndërsa bota përballet me sfida të reja, ne shpresojmë dhe urojmë që ky vit të sjellë shëndet të mirë dhe gëzim në familjet e të gjithëve!”, u shpreh ambasadorja Kim.

“Në emër të Ambasadës së Shteteve të Bashkuara, ju shprehim urimet më të mira të gjithë atyre që festojnë Fitër Bajramin. Sot, më shumë se kurrë, kjo ditë ofron një mundësi për të reflektuar mbi angazhimin tonë të përbashkët për ndërtimin e komuniteteve paqësore dhe të begata. Ndërsa bota përballet me sfida të reja, ne shpresojmë dhe urojmë që ky vit të sjellë shëndet të mirë dhe gëzim në familjet e të gjithëve! Gëzuar Bajramin!”, shprehet ambasadorja.

Besimtarët myslimanë festojnë sot Fitër Bajramin në të gjitha xhamitë e vendit./atsh

Festa e Fitër Bajramit/ Ambasadorja Kim: Urojmë shëndet të mirë dhe gëzim në familjet e të gjithëve Read More »

Kryeministri Rama uron besimtarët myslimanë për Fitër Bajramin

Aktualitet, Politike / /

Sot besimtarët myslimanë festojnë Fitër Bajramin.

Kryeministri Edi Rama u ka uruar festën të gjithë besimtarëve myslimanë me anë të pamjeve nga xhamitë e Shqipërisë.

Urimi përcillet me pamje të xhamive kryesore të vendit: ajo e Namazgjasë, e Plumbit, Et’hem Beut, Xhamia në Elbasan, në Golem e Qerret të Kavajës, e Mançurishtit në Devoll, e Maqellarës në Dibër, xhamia e Petrelës, xhamia në Sauk, ajo në Kullaj të Shkodrës, e xhamia e Delvinës./atsh

Kryeministri Rama uron besimtarët myslimanë për Fitër Bajramin Read More »