“Vëmendja jonë do mbetet ekonomia”, tha sot kryetari i PD-së Lulzim Basha në takim me bizneset në Elbasan.
“Sipërmarrësit e vegjël në Elbasan vuajnë mungesën e ndihmës, si gjatë, dhe pas pandemisë. Faturat e larta të energjisë dhe të ujit, tatimet dhe taksat lokale po i detyrojnë bizneset e vogla të ulin qepenat dhe të shtojnë radhët e të papunëve. Vëmendja jonë është dhe do të mbetet tek ekonomia, sepse për ne është jetike garantimi i një jete normale për të gjithë shqiptarët”, tha ai.
Po ashtu, Basha shtoi se “ne do t’i fitojmë zgjedhjet me shqiptarët e për shqiptarët, në mënyrë që me planin tonë të ndërtuar bashkë me shqiptarët, t’i japim zgjidhje krizës së rëndë ekonomike, të krijojmë mundësi për punë e mirëqenie e t’ua kthejmë Shqipërinë, shqiptarëve”. /atsh
Dy ditë pas largimit të masave të reciprocitetit, presidenti i Kosovës, Hashim Thaçi tha se vendi është gati për dialogun me Serbinë, me qëllim njohjen reciproke dhe përshpejtimin për anëtarësim në OKB.
Për të arritur këtë, i pari i shtetit në një konferencë për media, kërkoi unitet nga spektri politik.
Ai u shpreh se Kosova do të punojë për zbatimin e marrëveshjes së fundit të arritur me Serbinë.
Kreu i shtetit në këtë konferencë foli edhe për pandeminë COVID- 19, ku kërkoi respektim të masave preventive.
Kreu i shtetit tha se përballë Serbisë do të jenë të bashkuar me të gjithë, ndërsa tha se nuk janë në garë për të marrë primatin se kush do të kryesojë këtë dialog.
I pyetur për mundësitë e shpalljes së gjendjes jashtëzakonshme, i pari i shtetit, tha se e urren fjalën gjendje e jashtëzakonshme, por sipas tij, rrethanat ishin të tilla dhe tani është e përmbyllur kjo ide./KosovaPress/
Presidenti i Republikës, Ilir Meta vlerësoi sot kolonelin veteran Myfit Guxholli me “Dekoratën e Artë të Shqiponjës”, me motivacion: “Për veprimtarinë e shquar si luftëtar i lirisë në Luftën Antifashiste Nacionalçlirimtare, si dhe për kontributin e tij të veçantë në krijimin dhe konsolidimin e artit të luftës dhe shkencës topografike ushtarake shqiptare. Në vlerësim të mbrojtjes dhe mbajtjes gjallë të idealit atdhetar në drejtim të Organizatës së Bashkuar të Veteranëve të L.A.N.Ç.-it”.
Në ceremoninë solemne të organizuar me këtë rast, duke iu drejtuar të pranishmëve mes të cilëve ishin veteranë të LANÇ-it, drejtues dhe anëtarë të Organizatës së Bashkuar të Veteranëve dhe pjesëtarë të familjes Guxholli, Presidenti Meta u shpreh se “Kolonel Guxholli, një ish-student i Liceut të Korçës, në momentet më të vështira dhe të errëta për vendin, i shtyrë nga atdhedashuria dha një kontribut patriotik, u bashkua me armë në dorë në Luftën e lavdishme Nacionalçlirimtare duke shërbyer edhe si kuadër i forumeve më të larta të Brigadës IV Sulmuese.
“Si një ndër pedagogët më të shquar dhe Shef Katedre në Shkollën e Lartë të Bashkuar të Oficerëve Tiranë, dhe tani si kryetar i Organizatës të Bashkuar të Veteranëve të LANÇ, kontributi dhe puna e kolonel Guxhollit në shërbim të vendit është e jashtëzakonshme dhe tejet e vyer”, theksoi Meta.
“Më lejoni të shpreh konsideratën time më të lartë edhe për kontributin tuaj në modernizimin dhe konsolidimin e Ushtrisë Shqiptare. Është i njohur kontributi juaj si kryetopograf, shef seksioni dhe nënkryetar i degës së Topografisë pranë Shtabit të Përgjithshëm të Ushtrisë Shqiptare; si bashkautor, së bashku me specialistët e huaj në projektimin e zbatimin në praktikë, në terren të triangulacionit shtetëror (arshiva IGU/ 1954); si pedagog, shef cikli dhe shef i katedrës së topografisë, në Shkollën e Bashkuar të Oficerëve”, tha Meta.
“Por sot, unë dua të vlerësoj edhe aktivitetin tuaj të pasur shkencor e pedagogjik, si autor i tekstit mësimor ‘Gjeodezia’ të përshtatur për studentët e specialitetit ‘topograf’ në Akademinë ‘Skënderbej’, por dhe për studentë të tjerë të specialiteteve të ndryshme që studiojnë gjeodezinë në këtë Akademi. Këto janë një trashëgimi e çmuar që zënë vend nderi në analet e historikut të Forcave tona të Armatosura”, nënvizoi Presidenti Meta.
Duke e falenderuar Presidentin Meta për vlerësimin, Kolonel Myfit Guxholli në fjalën e tij përshëndese theksoi ndër të tjera se, “kjo Dekoratë e lartë i takon të gjithë atij brezi që e nisi jetën nga lufta për të kontribuar për çlirimin e Atdheut dhe përparimin e tij”./atsh
Të gjithë të rinjtë shqiptarë që duan të studiojnë në Shtetet e Bashkuara të Amerikës kanë mundësi të takohen me përfaqësues nga 23 universitete dhe kolegje amerikane në panairin virtual EducationUSA Albania në 10 qershor.
“Këshilltarja e Qendrës EducationUSA, Aida Hudhri, ishte e folësja e ftuar në serinë më të fundit Youth Talk të Këshillit Rinor të Ambasadës Amerikane, mbi “Hapat për të Studiuar në Shtetet e Bashkuara”, njoftoi sot Ambasada e Steteve të Bashkuara në Tiranë.
“Aida ndau me nxënës të shkollave të mesme dhe studentë universiteti informacion të saktë dhe gjithëpërfshirës rreth institucioneve arsimore në Shtetet e Bashkuara dhe ofroi udhëzime si mund të shfrytëzohen mundësitë e shumta të arsimit që universitetet amerikane ofrojnë për studentët ndërkombëtarë. Ata biseduan gjithashtu edhe mbi hapat që duhen ndjekur për të studiuar në një institucion arsimor amerikan dhe këshillat për të qenë një aplikues i suksesshëm”, theksoi ambasada./atsh
Opozita parlamentare i është drejtuar sot me një letër Kryeparlamentarit Gramoz Ruçi dhe Kryeministrit Edi Rama duke i kërkuar ndryshimin e sistemit zgjedhor.
Përmes një letre publike, ata thonë se nuk do të votojnë asnjë ndryshim për Rreformën Zgjedhore, nëse nuk plotësohen tri kërkesat e tyre: listat e hapura, rekomandimet e OSBE-ODIHR për administratën zgjedhore jopolitike dhe vota e emigrantëve.
“Shumica në Kuvendin e Shqipërisë duhet të na krijojë kushtet dhe garanci për një dialog serioz, transparent dhe të hapur për kalimin nga listat e mbyllura tek listat e hapura. Ne ju kërkojmë që brenda 48 orësh, ju të thërrisni një tryezë dialogu mes nesh dhe përfaqësuesve të mazhorancës, ku vetëm prania e kryeministrit Edi Rama do të ishte prova e seriozitetit të tryezës”, thuhet në letër.
“Ne jemi të vendosur për të mos votuar asnjë pazar të Këshillit Politik që nuk ka lidhje me Reformën Zgjedhore, por është noterizim i pazarit të 21 prillit 2008 dhe që lë në fuqi këtë ligj që kemi prej 12 vitesh. Hipokrizia që kërkon t’u paraqitet shqiptarëve si “marrëveshje” apo “dakordësi” mes atyre që kanë mbi 20 vjet që bëjnë pazar së bashku në kurriz të shqiptarëve nuk do të votohet nga deputetët e opozitës në Kuvend. Listat e hapura, rekomandimet e OSBE/ODIHR për administratë zgjedhore jopolitike, vota e emigrantëve, janë kërkesat tona të prera”, thuhet në letrën e opozitës parlamentare. /atsh
Kryetari i PD-së Lulzim Basha ka uruar sot nga Elbasani maturantët.
Në urimin e tij Basha shprehet se sfida juaj është të dilni sa më mirë, sfida jonë është t’ju sigurojmë një të ardhme sa më të sigurt.
“Sot dua t’u uroj të gjithë maturantëve suksese në provimet që kanë nisur pak minuta më parë nga qyteti i Normales, nga zemra e Shqipërisë, nga Elbasani, qytet në të cilin kam patur nderin t’i përfaqësoj për disa vite në parlamentin e Shqipërisë. Sot ndodhem prapë në mesin e elbasanllinjve, këtij qyteti me tradita të jashtëzakonshme të qytetarisë. Por mbi të gjitha me një vend të veçantë në historinë e arsimit shqiptar, Elbasani i Pedagogjikes, Elbasani i Normales, Elbasani i intelektualëve që kanë dhënë kaq shumë për arsimin dhe për breza të tërë mësuesish anembanë vendit. Ndaj është edhe vendi më i përshtatshëm për t’iu uruar dhjetëra mijëra maturantëve suksese në provimet e maturës! Sfida juaj është të dilni sa më mirë në këtë provime”, shprehet ai.
Po ashtu Basha shtoin se “sfida jonë është t’ju sigurojmë një të ardhme sa më të sigurt në karrierën tuaj të mëtejshme si studentë në universitete dhe t’ju sigurojmë një ekonomi që të punojë për ju dhe që t’ju japë vende pune e sa më shumë kënaqësi dhe shanse për të ardhmen për ju dhe sa më pak stres dhe mundime për prindërit tuaj.Ju përshëndes dhe ju uroj shumë suksese nga Elbasani i Normales, sot ditën e provimeve të Maturës, të gjithë maturantëve shqiptarë”. /atsh
Presidenti i Republikës, Ilir Meta dekretoi sot shpalljen e ligjit nr. 61/2020 “Për disa ndryshime dhe shtesa në ligjin nr. 43/2015, “Për sektorin e energjisë elektrike”, të ndryshuar”.
Ky ligj ka reflektuar rekomandimet e dhëna nga Sekretariati i Komunitetit të Energjisë, për realizimin e plotë të autonomisë së OST-së, thekson Presidenca./atsh
Kryeministri i ri i Kosovës, Avdullah Hoti konfirmoi sot se në mbledhjen e qeverisë u vendos që të lejohet lëvizja e lirë për në Shqipëri dhe vende të tjera të rajonit duke nisur nga nesër (8 Qershor 2020).
Ky vendim erdhi pas disa ditësh që protestohej për bllokimin e kufijve pasi lejoheshin të kalonin vetëm personat që kishin bërë testin e koronavirusit në katër ditët e fundit ose duhet ti nënshtroheshin karantinës një javore.
Qendra Kombëtare për Menaxhim Kufitar në faqen zyrtare në Facebook, ka dhënë detaje në lidhje me rregullat që duhet ti nënshtohen qytetarët në Pikat e Kalimit Kufitar.
Ky është vendimi:
Qeveria e Republikës së Kosovës shfuqizon pikën 6.1, 6.2 dhe 6.4 të Vendimit të Qeveris Nr.02/38 të datës 31 maj 2020 në të cilin është përcaktuar që:
6.1. Të gjithë personat që hyjnë në territorin e Republikës së Kosovës dhe posedojnë rezultate negative për testin #COVID19 RT PCR (𝐣𝐨 𝐦𝐞̈ 𝐢 𝐯𝐣𝐞𝐭𝐞̈𝐫 𝐬𝐞 𝟒 𝐝𝐢𝐭𝐞̈) nuk i nënshtrohen procedurave të vetë-izolimit;
6.2. Ata që nuk kanë testin sipas pikës 6.1. detyrohen të vetë-izolohen për 7 ditë.
6.3. Qytetarët që manifestojnë shenja klinike udhëzohen nga profesionistët shëndetësor në Pikat e Kalimit Kufitar;
6.4. Deri me datë, 20 qershor 2020 do të bëhet vlerësimi i situatës epidemiologjike dhe me këtë do reflektohen masat e reja lidhur me Pikat Kufitare dhe hyrjen e qytetarëve në Republikën së Kosovës.
Pika 6. e Vendimit të Qeverisë Nr.02/38 te datës 31 maj 2020 me të cilën është caktuar që “Të gjithë personat që hyjnë në territorin e Republikës së Kosovës, obligohen t’i nënshtrohen kontrolleve të ekipeve mjekësore të #QKMF-ve (𝐐𝐞𝐧𝐝𝐫𝐚𝐯𝐞 𝐊𝐫𝐲𝐞𝐬𝐨𝐫𝐞 𝐭𝐞̈ 𝐌𝐣𝐞𝐤𝐞̈𝐬𝐢𝐬𝐞̈ 𝐅𝐚𝐦𝐢𝐥𝐣𝐚𝐫𝐞) në Pikat e Kalimeve Kufitare dhe t’i zbatojnë masat e mbrojtjes kundër COVID-19 mbetet e njëjtë./faxweb
