Aktualitet

Kryeministri i Kosovës Avdullah Hoti ka ngritur shqetësimin e tij për një valë të mundshme të re me koronavirus në kohën kur vendi ynë po përballet me një numër në rritje të rasteve të reja.

Gjatë 24 orëve të kaluara në nivel vendi janë konfirmuar gjithsej 49 raste të reja me koronavirus.

E kjo ka nxitur të parin e Ekzekutivit vendor të reagojë ndaj rrezikut të përhapjes së mëtejme të kësaj sëmundjeje që ka prekur tashmë pothuajse të gjithë botën.

“Vendi ynë mund të përfshihet nga vala e dytë e infektimeve me virusin COVID-19. Në bazë të trendit të ditëve të fundit me raste të reja të infektimeve, ky rrezik është shumë real. Mund të preken edhe më shumë jetë njerëzish, do të thellohet kriza ekonomike, ndërsa do të stërngarkohet sistemi i shëndetësisë”, tha Hoti.

Ai u bëri thirrje qytetarëve që të respektojnë rekomandimet e institucioneve shëndetësore për mbajtjen e maskave, ruajtjen e higjienës dhe mbajtjen e distancës sociale si pjesë e masave parandaluese kundër përhapjes së COVID-19.

Hoti tha se pas hartimit të manualit për mbrojtje nga përhapja e COVID-19, Ministria e Shëndetësisë në bashkëpunim me Institutin Kombëtar të Shëndetësisë Publike të Kosovës, do të angazhojë rreth 200 profesionistë shëndetësorë që do të monitorojnë zbatimin e këtyre masave./KosovaPress/

Garnizoni “Skënderbej” gumëzhiu sot nga të rinjtë e rekrutuar së fundmi në Forcat e Armatosura.

Ministrja e Mbrojtjes, Olta Xhaçka, tha se “127 djem dhe vajza, pasi u testuan për COVID-19, sipas të gjithë protokollit shëndetësor, për 3 muaj do të kenë shtëpinë e tyre të re, Shkollën e Trupës në Bunavi”.

“Stërvitja Individuale Bazë krahas vështirësive fizike e psikologjike, këtë vit do të zhvillohet nën masa të rrepta kundër përhapjes së pandemisë”, u shpreh Xhaçka.

Ministrja Xhaçka u uroi suksese të rinjve, duke i cilësuar ata “energjia e madhe e Forcave të Armatosura”./atsh

Ministri i Bujqësisë dhe Zhvillimit Rural, Bledi Çuçi, u shpreh se “ky vit është një nga vitet më të mirë të bujqësisë shqiptare”.

Gjatë një interviste televizive mbrëmjen e së hënës, Çuçi tha se, sektori i bujqësisë nuk është prekur nga pandemia COVID-19.

“Në kushtet e situatës të masave mbrojtëse ndaj COVID-19, qeveria vendosi mbylljen e aktiviteteve të biznesit në vendin tonë, por mori vendimin që të mos mbyllej për asnjë ditë, aktiviteti i biznesit bujqësor, duke garantuar paprekshmërinë e zinxhirit ushqimor në të gjithë hallkat e tij nga prodhimi, qarkullimi (transporti) dhe eksportimi”, – tha ministri.

Eksportet bujqësore në 5-mujorin e parë të këtij viti kanë shënuar rritje në vlerë dhe sasi me 10% më shumë se në të njëjtën periudhë të vitit të kaluar.

Ministri vuri në dukje se, “prodhimi bujqësor vendas po ndjek trendin e rritjes dhe standardeve më të mira, ndërsa qendrat e grumbullimit po funksionojnë me kapacitet të plotë”.

“Ky është viti më i mirë historik përsa i takon çmimeve të produkteve bujqësore në fermë që do të thotë se fermerët kanë marrë të ardhura të kënaqshme nga shitja e prodhimit në qendrat e grumbullimit”, u shpreh Çuçi.

Sipas tij, sot fermerët jo vetëm prodhojnë por edhe po e certifikojnë prodhimin sipas standardeve më të mira. “Produktet bujqësore shqiptare janë më të mirat në tregjet europiane dhe kanë besueshmëri të lartë”, – tha ai, duke e bazur këtë në rezultatet e analizave që kryen Instituti i akredituar i Sigurisë së Ushqimit dhe Veterinarisë.

Çuçi u shpreh se, qeveria po ndërmerr instrumente financiarë për nxitjen e kooperimit bujqësor por rastet më të mira, tha ai janë grumbulluesit, të cilët i angazhojnë fermerët të kultivojnë produktin që kërkon tregu sipas standardeve të kërkuara.

Ministri informoi se janë dy skema të financimit në bujqësi që mbështesin fermerin: Skema Kombëtare adreson financim direkt për fermerin mbi aktivitetin që zhvillon dhe IPARD që financon investimet në bujqësi.

Gjithashtu tha ai, Qeveria shqiptare në bashkëpunim me BERZH, ka vënë në dispozicion të kreditimit të fermerëve nga bankat dhe fondin e garancisë si instrumenti që shërben si kolateral dhe lehtëson huamarrjen për të gjithë ata që punojnë në sektorin rural. /atsh

Presidenti Ilir Meta është shprehur sot thellësisht i tronditur për ndarjen nga jeta të Moikom Zeqos, “mendimtarit të vyer, eruditit, zërit të fuqishëm, penës së fortë dhe poliedrike, intelektualit të angazhuar e të përkushtuar ndaj së mirës publike e interesit kombëtar, dhe njërit ndër shkrimtarët më prodhimtarë të letërsisë sonë”.

“Me një personalitet njerëzor dhe intelektual të jashtëzakonshëm, dishepull i mirësisë, i miqësisë dhe humanizmit, i përkushtuar me fisnikëri ndaj virtytit dhe lirisë, përmes një jete të mbushur me kontribute të shumta e të çmuara, si shkrimtar, studiues, poet, arkeolog, politikan, eseist dhe si filozof, trashëgimia tepër e vyer akademike dhe kulturore që la pas Moikomi do shërbejnë përherë si piketa të rëndësishme në kulturën dhe historinë e së ardhmes të kombit tonë”, thekson Meta.

“Ngushëllimet më të sinqerta Lidës së dashur, fëmijëve, të afërmve, miqve e bashkëpunëtorëve të panumërt, për këtë humbje të madhe që le pas shumë dhimbje. Kujtimi dhe veprat e Tij do të mbeten të paharruara!”, ka përfunduar Meta.

Kryeministri Edi Rama ka shprehur ngushëllime për ndarjen nga jeta të shkrimtarit dhe historianit Moikom Zeqo.

“LAMTUMIRË MOIKOM”, shprehet Rama.

Edhe Kryetari i Kuvendit, Gramoz Ruçi, ka shprehur ngushëllime për ndarjen nga jeta të ish-deputetit, shkrimtarit, shkencëtarit dhe publicistit të shquar Moikom Zeqo.

“Moikom Zeqo ishte një personalitet erudit i rrallë, një enciklopedi e gjallë. Shkrimtar, historian, arkeolog, studiues e kritik letrar, përkthyes dhe publicist, mbi të gjitha një intelektual i shquar dhe patriot i madh. Ai i shërbeu Shqipërisë dhe kulturës shqiptare deri në ditët e fundit të jetës, me një dashuri e përkushtim të pashoq. Moikom Zeqo luftoi me stoicizëm ndaj sëmundjes për një kohë të gjatë, duke mos e ndërprerë për asnjë çast kontributin e tij intelektual për Shqipërinë”, thekson Ruçi.

“Moikom Zeqo u zgjodh dhe shërbeu si deputet i Kuvendit të Shqipërisë në legjislaturën 1992-1996 dhe u shqua për thellësinë e mendimit, largpamësinë e vizionit, urtësinë për dialog, përkushtimin për qytetarët dhe angazhimin sipëror për kulturën dhe çështjet e mëdha të shoqërisë dhe të kombit shqiptar. Gjithë erudicionin e tij Moikomi ua kushtoi dhe ua shpërndau Shqipërisë dhe shqiptarëve. Lamtumirë Moikomi ynë i dashur!”, shkruan Kryetari i Kuvendit, Gramoz Ruçi, në mesazhin e ngushëllimit.

Edhe ministrja e Kulturës, Elva Margariti e ka cilësuar një ditë të trishtë sot për kulturën shqiptare.

“U nda nga ne eruditi Moikom Zeqo, ky shpirt i lirë, që luftoi deri në momentin e fundit për jetën, që nuk reshti së përpjekuri për kulturën; një zë opozitar, këmbëngulës, nxitës për të bërë më të mirën, që do të na mungojë të gjithëve! U prehsh në paqe!”, u shpreh Margariti./atsh