Aktualitet

Soreca takim me Lelin: Vlora qytet ndërkombëtar, potenciale të mëdha ekonomike dhe turistike

Aktualitet, Lajmi i fundit, Politike / /

“Europa është këtu” është fushata më e re e komunikimit që Delegacioni i Bashkimit Europian në Tiranë do të lançojë në vendin tonë.

Për këtë arsye, Ambasadori i Bashkim Europian, Luigi Soreca po zhvillon sot një vizitë në qytetin e Vlorës.

Ai u prit në takim nga kryebashkiaku i Vlorës, Dritan Leli, ku diskutuan mbi projektet e Bashkimit Europian në këtë qytet si dhe transformimet e mëdha që ka pësuar Vlora duke u shndërruar në një qendër të aktivitetit ekonomik dhe turistik në vend.

Duke falënderuar ambasadorin Soreca, Leli u shpreh se, “Vlora do të shndërrohet në potencialin ekonomik dhe turistik të viteve që vijnë”.

“Uroj dhe shpresoj që të gjithë së bashku do të kemi mundësi që të bëjmë në të ardhmen më shumë projekte, më shumë punë, për të konsoliduar gjithnjë e më tepër besimin e të gjithë shqiptarëve tek Europa, tek BE, tek përparimi në këtë proces”, tha kryebashkiaku Leli.

“Ndaj me ju të gjitha ato që thatë për potencialin e paimagjinueshëm që ka ky qytet. Besoj ju e mbani mend që kur kam qenë këtu herën e fundit së bashku kemi thënë që Vlora do të ishte qyteti ku ne do të organizonim aktivitetet kryesore në lidhje me Ditën e Europës, datën 9 maj. Ju e dini që kjo ishte e pamundur për shkak të COVID-19, por kjo nuk do të thotë që mbyllet me kaq. Unë jam sot këtu me ju që të lançojmë një fushatë tejet të rëndësishme të Bashkimit Europian në Shqipëri. Dhe doja që këtë gjë ta bëjmë në Vlorë për arsye të atij premtimi që ne dhamë bashkë herën e fundit. Ne do të përqëndrohemi në disa aspekte të rëndësishme të punës që BE ka bërë në Shqipëri, sa i përket përshembull transportit dhe ku më mirë sesa në Vlorë. Është në sajë të këtyre investimeve që BE ka bërë në Shqipëri që Vlora sot është një qytet ku jetohet dhe punohet në mënyrë më të mirë dhe është më miqësor ndaj mjedisit”, tha Soreca.

“Ne do të vazhdojmë që të investojmë në Vlorë në këtë destinacion kaq të rëndësishëm turistik dhe ekonomik. Jemi këtu që të lançojmë këtë fushatë të quajtur “Europa është këtu” për të treguar pikërisht se çfarë ka bërë Bashkimi Europian në Shqipëri ndër vite në fusha të ndryshme, si transporti, bujqësia, infrastruktura dhe mjedisi. Kjo fushatë do të zgjasë për 6 muaj, pra do të vazhdojë deri në datën 15 dhjetor 2020, një datë kjo e rëndësishme për Shqipërinë. Kjo për arsye se data 15 dhjetor e vitit 2010, pra 10 vite më parë ishte dita e parë kur qytetarët shqiptarë mundën të udhëtonin në Bashkimin Europian, në zonën Schengen pa viza. Unë mendoj që ky është rezultati më i prekshëm që çfarë mund të bëjë BE për Shqipërinë. Unë personalisht kam qenë në Bruksel në 2010 kur ka arritur avioni i parë me udhëtarët shqiptarë pa viza, ndërsa këtë 15 dhjetor do të jem në Tiranë për të festuar këtë përvjetor”, u shpreh Soreca.

“BE është këtu, për t’iu përgatitur të gjithëve që të bëheni anëtarët e ardhshëm të BE. Është kënaqësi që jam këtu në Vlorë për ta lançuar këtë fushatë, sepse Vlora është vërtet një qytet ndërkombëtar. Sytë i kemi drejt së ardhmes, drejt potencialeve të mëdha për të ardhmen”, theksoi Soreca.

Ndërsa në orën 14:00, ambasadori Soreca dhe kryebashkiaku Leli do të jenë në një aktivitet në bypass-in e Vlorës, që financohet nga BE, ku do të lançojnë fushatën e re të komunikimit të Delegacionit të BE-së: “Europa është këtu”.

Fushata gjashtëmujore synon t’i informojë më mirë qytetarët shqiptarët se si Bashkimi Europian po i mbështet ata për t’u bërë qytetarë të ardhshëm të BE-së./atsh

Soreca takim me Lelin: Vlora qytet ndërkombëtar, potenciale të mëdha ekonomike dhe turistike Read More »

Shqipëria me kontingjent të ri në grup-batalionin e NATO-s në Letoni

Aktualitet, Lajmi i fundit / /

-Shqipëria nga sot do të jetë me kontingjentin e saj të ri në grup-batalionin e NATO-s në Letoni.

Ministria e Mbrojtjes, Olta Xhaçka bëri të ditur se, ceremonia e ndërrimit të trupave u zhvillua pak ditë më parë në Camp Adazi.

“Shqipëria do të ketë kontingjentin e saj të ri në grup-batalionin e NATO-s në Letoni.
Ceremonia e ndërrimit të trupave u zhvillua pak ditë më parë në Camp Adazi, ndërkohë që trupat që shërbyen për 6 muaj atje mbërritën mbrëmë në Tiranë, shëndoshë e mirë.”,- thekson Xhaçka. /atsh

Shqipëria me kontingjent të ri në grup-batalionin e NATO-s në Letoni Read More »

“Ligjet” votojnë draftin e dakordësuar në 5 qershor/Opozita kundërshton marrëveshjen për mosdepolitizimin e administratës zgjedhore

Aktualitet / /

“Shumica jonë në Komisionin e Ligjeve sapo votoi draftin e dakordësuar në 5 qershor me opozitën jashtëparlamentare”, deklaroi sot Kryeministri Edi Rama.

Rama theksoi se drafti u votua pa konsensus sepse opozita parlamentare vijon ta kundërshtojë marrëveshjen për mosdepolitizimin e administratës zgjedhore, kërkuar si kusht nga Lulzim Basha dhe PD.

Ndërkohë, Rama informoi se do të ketë një komunikim për mediet lidhur me këtë çështje në orën 13.00./atsh

“Ligjet” votojnë draftin e dakordësuar në 5 qershor/Opozita kundërshton marrëveshjen për mosdepolitizimin e administratës zgjedhore Read More »

Meta takon Bashën: Marrëveshja e 5 qershorit të zbatohet me përpikmëri dhe pa vonesa

Aktualitet, Politike / /

Presidenti i Republikës, Ilir Meta bëri thirrje sot që Marrëveshja e 5 qershorit të zbatohet me përpikmëri dhe pa vonesa, duke hapur rrugën e zbatimit të 15 kushteve për çeljen e negociatave të anëtarësimit gjatë Presidencës gjermane të Bashkimit Europian.

Presidenti i Republikës, Ilir Meta priti sot në një takim Kryetarin e Opozitës së Bashkuar, Lulzim Basha.

Presidenti Meta vlerësoi qëndrimin e opozitës për rikthimin në institucione dhe për t’i shërbyer stabilitetit dhe të ardhmes europiane të vendit.

Kreu i Shtetit vlerësoi gjithashtu sjelljen e përgjegjshme të opozitës gjatë situatës së pandemisë dhe kontributin konstruktiv që u dha gjatë mbledhjeve të Këshillit të Sigurisë Kombëtare për përballimin e situatës në vend.

Presidenti Meta theksoi veçanërisht faktin që opozita u vetëpërmbajt duke mos rënë në kurthin e prishjes së Teatrit Kombëtar, si dhe faktin që nuk vendosi si kusht qeverinë tranzitore duke bërë të mundur arritjen e Marrëveshjes së 5 Qershorit, që u përshëndet nga të gjithë partnerët strategjikë të vendit.

Kreu i Shtetit u shpreh se përveç gjuhës, flamurit dhe Heroit Kombëtar Gjergj Kastrioti Skënderbeu, shqiptarët janë të gjithë të bashkuar edhe përreth Kushtetutës dhe të ardhmes europiane të vendit.

Presidenti i Republikës i kërkoi Kryetarit Basha që të vazhdojnë t’i qëndrojnë Marrëveshjes së 5 Qershorit, pavarësisht përpjekjeve të pashpresa për të cënuar Kushtetutën, duke paralajmëruar se çdokush që punon kundër të ardhmes europiane të vendit do të mbajë përgjegjësi individuale dhe të drejtpërdrejtë.

Presidenti Meta bëri edhe një herë thirrje që marrëveshja e 5 qershorit të zbatohet me përpikmëri dhe pa vonesa, duke hapur rrugën e zbatimit të 15 kushteve për çeljen e negociatave të anëtarësimit gjatë Presidencës gjermane të Bashkimit Europian.

Kreu i Shtetit kërkoi braktisjen e menjëhershme të çdo përpjekjeje që minon këtë proces dhe që do të prapësonte për herë të parë në historinë e Shqipërisë një marrëveshje të dakordësuar me ndërmjetësimin më të lartë ndërkombëtar./atsh

Meta takon Bashën: Marrëveshja e 5 qershorit të zbatohet me përpikmëri dhe pa vonesa Read More »

“Punë gjigande në sistemin shëndetësor”/ Manastirliu: Testimi ka vlerë thelbësore, po të njëjtën vlerë ka dhe ndërgjegjja individuale

Aktualitet, Shendetesi / /

/ “Shqipëria është më mirë në raport me vendet e tjera, por të krahasohesh për numrin e fataliteteve është e dhimbshme. Kjo sepse është diçka e rëndë në radhë të parë për viktimën, pastaj për familjarët dhe të afërmit”.

Kështu deklaroi sot në një intervistë televizive ministrja e Shëndetësisë dhe Mbrojtjes Sociale, Ogerta Manastirliu.

“Prisnim më shumë bashkëpunim nga ana e qytetarëve dhe prisnim numra më të vegjël tanimë. Me relaksimin e masave, pësuam edhe relaksim të sjelljes, duke shmangur masat për COVID-19. Kemi pasur madje edhe grumbullime, që mund të kenë pasur efekte negative. Sot kemi rreth 90 mijë teste në pozicion”, tha Manastirliu duke shtuar se po punojmë për të shpëtuar sa më shumë jetë.

Sipas ministres, pandemia ka ardhur në një fazë të re, ka më shumë vatra dhe kjo duhet pasuar me rregulla nga shoqëria.

Ministrja Manastirliu u shpreh se “po bëhet një punë gjigande në sistemin shëndetësor. Janë 130 ditë që mjekët infermierët, epidemiologët, Shërbimi i Urgjencës Kombëtare, të gjithë mjekët në sistemin shëndetësor dhe infermierët janë duke punuar natën dhe ditën”.

Lidhur me dyfishimin e testimeve Manastirliu tha se “e para duhet të rivlerësojmë testimet e shtuara, por testimi nuk bëhet thjesht për të testuar, ai bëhet për të gjurmuar dhe izoluar. Gjurmimi është super i mundshëm dhe në momentin që teston ti gjurmon, heton. Lidhesh me mjekun e familjes i raporton rastin. Mjeku i familjes ndjek, udhëzon. Është një punë kapilare, nuk është se përfundon me testimin”.

Ministrja Manastirlu tha se “po vijojmë të shtojmë kapacitetet tona. Testi është një gjë, nuk e garanton 100%, pasi ti mund të testohesh sot dhe të dalësh negativ dhe pas 3 ditësh mund të rezultosh i infektuar. Jemi në një epidemi dhe testimi ka vlerën thelbësore po të njëjtën vlerë ka dhe ndërgjegjja individuale. Nëse merr 127 dhe thotë se duhet të rrish i izoluar në banesë duhet të rrish në banesë dhe nuk mund të dalësh. Jemi në një moment të transmetimit komunitar në qytete të caktuara”.

Sipas saj, kush ka simptoma duhet patjetër të vetëizolohet.

Lidhur me zbatimin e masave, Manastirliu tha se “ne ndërtuam 4 skenarë dhe ndërkohë që ishim në izolim, punuam. Në fund të majit, ndërkohë që disa mendonin se virusi nuk ekzistonte, ne rregulluam spitalin në aksin Tiranë-Durrës. Adaptuam spitalin e Kirurgjive të vjetra. I kemi marrë dhe po punojmë për të ndërtuar kapacitetet e nevojshme. Thelbi është se përveç masave që po marrim, duke ndjekur strategjinë duhet të respektojmë masat, distancimin fizik, ndërsa maskat janë të detyrueshme brenda ambienteve publike”.

“Solidariteti është një nder elementet kyç në gjithë këtë krizë shëndetësore. Jam e bindur se të gjitha vendet do të gjenden në rastet e tilla. Për të mos vajtur në atë pozite, si Italia, ne kemi marrë masa për mjekë dhe infermierë rezervë”, – tha Manastirliu./atsh

“Punë gjigande në sistemin shëndetësor”/ Manastirliu: Testimi ka vlerë thelbësore, po të njëjtën vlerë ka dhe ndërgjegjja individuale Read More »

Parashikimi i motit, e mërkurë 15 korrik 2020

Aktualitet / /

Shërbimi Meteorologjik Ushtarak bën me dije se moti sot parashikohet me alternime kthjellimesh dhe vranësira në zhvillim.

Në mesditë vranësirat do të pasohen nga reshje shiu të karakterit lokal përgjatë relieveve malore në jug e juglindje të vendit. Lokalisht reshje në formën e shtrëngatave. Era do të fryjë me drejtim Veriperëndim – Jugperëndim me shpejtësi 1-10m/s.

Deti parashikohet i forcës 1-2 ballë.

Temperaturat parashikohen:

QYTETET Temperaturat në °C Sigla
Shkodër 19/31 diell re
Kukës 16/30 diell re
Lezhë 19/32 diell re
Dibër 15/29 diell re
Durrës 19/31 diell re
Tiranë 19/34 diell re
Elbasan 18/34 diell re
Berat 16/34 diell re
Vlorë 18/30 diell re
Korçë 15/27 diell shi
Gjirokastër 15/34 diell shi
Sarandë 16/30 diell shi/atsh

Parashikimi i motit, e mërkurë 15 korrik 2020 Read More »

Thaçi sërish para prokurorëve në Hagë, dita e tretë e intervistimit

Aktualitet, Lajmi i fundit / /

Presidenti i Kosovës, Hashim Thaçi do të vijojë sërish sot, për të tretën ditë me radhë t’u përgjigjet pyetjeve të prokurorëve specialë në Hagë.

Seanca e sotme pritet të nisë rreth orës 13.00.

Dy seancat, të hënën dhe të martën ku Thaçi u intervistua nga prokurorët në Hagë zgjatën për rreth gjashtë orë.

Pas daljes nga Gjykata, presidenti nuk u prononcua për mediat, ndryshe nga ç’kishte ndodhur pas seancës së ditës së hënë.

Para nisjes së seancave, presidenti Thaçi shprehu bindjen se nga kjo sfidë do të dalë i suksesshëm, ndërsa aktakuzën për krime lufte e cilësoi si “çmim për lirinë”.

Më 24 qershor, Zyra e Prokurorit të Specializuar njoftoi se më 24 prill ka bërë një propozim-aktakuzë për krime të supozuara lufte dhe krime kundër njerëzimit kundër presidentit Thaçi, kryetarit të Partisë Demokratike të Kosovës, Kadri Veseli, dhe disa të tjerëve, emrat e të cilëve nuk janë bërë publikë./atsh

Thaçi sërish para prokurorëve në Hagë, dita e tretë e intervistimit Read More »

Vetingu në polici/ Komisioni i Sigurisë rrëzon dekretin e Metës, Lleshaj: Shqetësuese që ai shquan nuanca elektorale

Aktualitet / /

Komisioni i Sigurisë Kombëtare rrëzoi sot dekretin e Presidentit Ilir Meta, që ktheu për rishqyrtim ndryshimet në ligjin për Vetingun në Polici, Gardë e SHÇBA.

Gjatë shqyrtimit të dekretit në Komision, ministri i Brendshëm, Sandër Lleshaj, u shpreh se “Presidenti ka goditur thelbin dhe frymën e ligjit për arsye se ai e konsideron Vetingun si instrument presioni”.

Lleshaj tha se “Vetingu në Policinë e Shtetit nuk është ndonjë gjë e re”. “Është një instrument presioni pozitiv ndaj kujtdo që merr përsipër të shërbejë në strukturat ligjzbatuese. Çdokush që shërben në këto struktura e ka pranuar vetë do t’i nënshtrohet një verifikimi të përhershëm. Do të jetë përherë në një proces verifikimi, për arsye se risku i kompromentimit të një personi të caktuar gjatë karrierës është prezent”, shtoi ai.

Edhe ligji i vitit 2018, sipas ministrit, “e ka këtë frymë dhe flet për vlerësim periodik”.

“Nëse flasim për një vlerësim periodik atëherë automatikisht duhet të heqim dorë nga konkluzioni shumë i nxituar, për ta konsideruar këtë instrument si një instrument presioni. Meqenëse Policia dhe sistemi i drejtësisë, Prokuroria punojnë së bashku në hetimin penal dhe në luftën ndaj krimit, do të plotësojnë të njëjtat standarde sa i përket kritereve të integritetit të personelit që përfshihet në këto struktura”, shtoi ministri.

Ai u shpreh se “është për të ardhur keq që Presidenti ka shquar edhe disa nuanca elektorale tek ligji i miratuar”.

Duke u ndalur te ndryshimet që sjell ky ligj, Lleshaj tha se “ligji rifut në funksion Komisionin e Jashtëm të Vlerësimit (KJV), i cili ka mbyllur aktivitetin për shkak se ligji i ka vënë një afat qershorin e këtij viti”. “Aktualisht KJV është pezulluar, i ngrirë, për arsye se i ka ikur afati ligjor për të ushtruar mandatin. Çfarë kërkojmë? Parlamenti tashmë ka kërkuar që ky Komision të vazhdojë ta mbyllë misionin e tij. Nuk i kemi vënë një afat pikërisht për të shmangur një nevojë për të ardhur prapë në Kuvend”, shtoi ai.

Lleshaj tha se “është shqetësuese që Presidenti shquan nuanca elektorale”. “Këtu duhet vërtet fantazi e tepruar, e jashtëzakonshme për të parë ndonjë lidhje midis zgjatjes së afatit ose vënies në funksion të procesit të Vetingut në Polici me zgjedhjet elektorale. Kjo është diçka që del jashtë fuqive përfytyruese tona dhe i mbetet Presidentit, që të thotë se ku i sheh ai rreziqet elektorale nga Vetingu në polici. Ne, përkundrazi, besojmë që sa më e pastër të bëhet Policia, Garda dhe SHÇBA, aq më të mira bëhen kushtet që këto institucione të kryejnë me integritet dhe përgjegjësi ligjore punën e tyre”, shtoi ai.

Lidhur me shqetësimin e Presidentit për kontrollin politik ndaj SHÇBA-së, Lleshaj tha se “është e vërtetë që Policia, SHÇBA, Garda, përgjithësisht institucionet ligjzbatuese në vend, i gjithë aparati ekzekutiv shtetëror, është në varësi politike, është në varësi të qeverisë, por kjo është gjëja më normale në një sistem demokratik, ky qytetarët zgjedhin parlamentin dhe parlamenti zgjedh një qeveri”.

“Qeveria në fakt ushtron mandat politik në emër të qytetarëve. Dhe institucionet duhet të jenë dhe janë në varësi të qeverive. Ky është thelbi i demokracisë. Unë nuk kuptoj se në varësi të kujt duhet të ishin, në qoftë se nuk do të jenë në varësi të Ministrit, apo në varësi të qeverisë?! Nuk ka ndonjë zgjidhje tjetër, kështu që shqetësime të kësaj natyre duken vërtet të pakuptueshme dhe të papranueshme. Sepse edhe krijimi apo tentativa për të krijuar një ide që varësia e institucioneve ligjzbatuese te qeveria qenka problemi është shumë e rrezikshme, sepse kjo është A-ja e shtetit”, tha ai.

Lleshaj tha se “nëse ekzistojnë dyshime për një ministër të caktuar, apo një qeveri të caktuar, dyshimi nuk kthehet kundër sistemit”. “Nëse paska rrezik që një ministër i caktuar mund t’i përdorë politikisht, ose keqpërdori politikisht kompetencat që i janë dhënë, çështja shtrohet ndaj individit, por jo ndaj sistemit. Nuk mund të pretendojmë ne dhe s’mund të guxojmë të mendojmë që të ndërtojmë një sistem ku institucionet nuk janë në varësi të qeverisë, e cila jep llogari te qytetarët. Nuk mund të mendojmë të krijojmë një sistem burokratik me institucione, të cilat janë jashtë kontrollit demokratik, i cili ushtrohet nga parlamenti dhe nga qeveria në emër të qytetarëve”, tha ai.

Sipas Lleshaj, “tentativa për të krijuar imazhe pavarësie jashtë institucioneve është një tentativë, e cila i bën dëm të madh vetë demokracisë”. “Është e rëndësishme të kuptojmë gjithmonë që pavarësia e institucioneve është pavarësia e vendimmarrjes së tyre, e cila duhet bazuar në ligj, dhe jo shkëputje e tyre nga sistemi. Nuk mund t’i bëjmë institucionet e pavarura duke i shkëputur nga sistemi. Por, institucionet bëhen të pavarura kur atyre u jepet mbrojtje ligjore në ushtrimin e detyrës së tyre dhe ju kërkohet që ta ushtrojnë detyrën dhe përgjegjësinë të bazuar në ligj, kjo është pavarësia. Jo kur vendosen strukturalisht, ku i marrin pagat, dhe ku japin llogari për realizimin e objektivave dhe prioriteteve të tyre”, tha ai.

Lleshaj tha se “nëse ne do ta pranonim kthimin e ligjit mbrapsht, ky do të kishte vetëm një pasojë, do të ndërpriste përfundimisht procesin e Vetingut në PSH, duke i dhënë goditje të madhe gjithë përpjekjes për të kryer një proces verifikimi të integritetit të gjithë sistemit të drejtësisë dhe sistemit të agjencive ligjzbatuese që e mbështesin atë, që është kryesisht Policinë e Shtetit”.

Lleshaj kërkoi që të rrëzohet dekreti i Presidentit, sepse përmes këtij vendimi ne i japim udhë vijimit të procesit të Vetingut në Policinë e Shtetit, proces, i cili duhet të bëhet për shumë arsye./atsh

Vetingu në polici/ Komisioni i Sigurisë rrëzon dekretin e Metës, Lleshaj: Shqetësuese që ai shquan nuanca elektorale Read More »