Aktualitet

Vrasja e Ariela Muratit ka ndodhur ne nje rruge dhe ne nje orar qe ne zone ka pasur levizje dhe deshmitare te shumte.

Keta te fundit tregojne se e reja qe humbi jeten ne spital pas plumbit ne koke, u përlesh me Aldison Belulajn para se ai të nxirrte nga brezi një pistoletë pa leje dhe ta qëllonte.

Në pak sekonda, ai qëlloi edhe veten, para shumë dëshmitarëve, njëri prej të cilëve e rrëfen kështu ngjarjen para kameras së Televizionit Klan.

“Ai e goditi njëherë këtu, ishin duke u kacafytur. Ishin edhe dy vajza të tjera, njëra e mbante kështu në gjoks vajzën kur u vra. Debatonin që këtej ata rrugës. Dëgjova që u shti dy herë me pistoletë, pashë vajzë që ra atje, pashe dhe vajzën që ra në drejtim këtej.

21-vjeçarja, studente e Juridikut, ishte me të motrën dhe një vajzë tjetër dhe po shkonte në shtëpinë që kishte me qira pranë Universitetit të Mjekësisë, kur Belulaj, studenti i Infermierisë, u doli përpara. Por dy vajzat e tjera nuk mundën ta shpëtonin.

Një dëshmitar tjetër i tha Televizionit Klan se një shofer që kishte parë vajzën duke u konfliktuar me Aldison Belulajn kishte tentuar të ndërhynte, por kur kishte parë armën, ishte tërhequr.

Sipas hetuesve autori i krimit dhe viktima kanë përshkuar një distancë prej rreth 40-50 metra së bashku duke u konfliktuar dhe debatuar.

Sapo ka mbërritur pranë hyrjes së Universitetit të Mjekësisë, 23-vjeçari Belulaj ka nxjerrë armën. Ai vazhdon të jetë në gjendje të rëndë.

Mjeku i Spitalit të Traumës Jorgo Margo, që ka nën vëzhgim 23-vjeçarin Aldison Beluli që vrau Ariela Muaratin dhe më pas qëlloi veten ka pohuar se gjendja e tij është e rëndë dhe se rrezikon vdekjen nëse truri vazhdon ënjtjen.

Mjeku tha se pacienti ka 2 plagë në kokë që kanë shkaktuar jo pak dëme, duke folur për dëmtime të kockave të fytyrës dhe edemë të trurit.

“Pacienti ka dy plagë të cilat kanë shkaktuar jo pak dëme tek i sëmuri. Kemi thyerje të kockave të fyturës, kemi dëmtime të bazës së kraniumit, të rrënjës së hundës dhe dëmtime intrakraniale ose të trurit. Është një zonë e madhe hemorragjike nga ana e djathtë por më e dëmshme është edema e gjithë trurit.
Nuk është problemi se i ka kaluar plumbi por është në rrezik sepse procesi i ënjtjes ose edema i merr jetën. Nëse kjo vazhdon truri mbyt veten dhe këtu është edhe vdekja”, tha shefi i reanimacionit, në Spitalin e Traumës.

Ai nuk ka saktësuar nëse bëhet fjalë për dy plagë hyrëse me plumb, ndërsa tha se nga mjekët po bëhet gjithçka që është e mundur.
“Ne pamë që ka dy vrima, dy plagë me dy plumba, por janë probleme më tepër balistike, që ka kush i interpreton ne na takon të flasim për ato dëmtime që janë të rënda. Flasim për një prognozë jo të mirë. Është trajtuar që në ardhje, ka qëndruar në urgjencë deri në mëngjes. Është i intubuar me frymëmarrje të drejtuar. Sot në mëngjes ka shkuar në reanimacion, të shpresojmë që të mos progresojë enjtja e trurit. Është në koma, nuk ka lëvizje. Është vendosur menjëherë në komë me ilaçe. Këtu nuk mungon asgjë, nuk besoj se transferimi jashtë do të sillte përmirësim.”, tha Margo.

Erlis Hereni ishte Pedagogu i Ariela Muratit, studentes 21 vjeçare te vrare dje ne Tirane ne nje krim pasioni qe ka tronditur mbare opinionin publik.

Ai shprehet se është një këmbanë alarmi për shoqërinë shqiptare ajo që ndodhi ditën e djeshme dhe duhet ndërhyrë menjëherë.

“Në momentin që bëmë intervistën, Ariela duhet të  ishte në mësim, në sallën 307 duke bërë leksion, lëndën e Procedurës Civile, e cila është lënda që thotë se mosmarrëveshja midis njerëzve, nuk zgjidhen në asnjë vend tjetër përveçse në gjykatë” shprehet Hereni për “Report tv”.

Pedagogu pranon se është një ironi e hidhur kjo që ka ndodhur dhe një kambanë alarmi për shoqërinë shqiptare.
“Ka nevojë për ndërhyrje emergjente  që nga arsimi fillor deri në atë para universitar”

Pedagogu thotë gjithashtu se është edhe një problem tjetër që duhet zgjidhur, denoncimi dhe turpi për të denoncuar.

[youtube https://www.youtube.com/watch?v=DRXWwa6xG88?version=3&rel=1&fs=1&autohide=2&showsearch=0&showinfo=1&iv_load_policy=1&wmode=transparent]