PD dhe LSI do të nisin spt aksionin opozitar me mosbindje civile duke vllokuar katër alse kryesore pa leje nga policia.
Opozita nis sot në orën 10:00 mosbindjen civile, ku pritet të bllokojë disa akse kryesore të qarkullimit të rrugëve, në shenjë proteste për vendosjen e taksës në Rrugën e Kombit.
Nga ora 10:00-13:00 pothuajse i gjithë qarkullimi në Shqipëri do të jetë i paralizuar, kjo pasi 4 akset kryesore do të bllokohen me protestues.
Qytetarë të mbështetur edhe nga PD do të bllokojnë kryqëzimin e Milotit i cili lidh Tiranën me Shkodrën, por edhe Rrugën e Kombit me Tiranën dhe Durrësin.
Gjithashtu do të bllokohet kryqëzimi i Çermës në Lushnje që bllokon lëvizjen në jug të vendit, kryqëzimin e Vorës dhe kryqëzimi i Bradasheshit në Elbasan.
Në funksion të kësaj proteste opozita kërkoi që seanca plenare e parashikuar në orën 10:00 të shtyhet në orën 18:00.
Kryetari i PD-së i bëri thirrje dje qytetarëve të bashkohen në protestat që do të shtrihen në të gjithë vendin.
Sot nis mosbidja civile, por cfare pritet te ndodhe nderkohe qe protesta e opozites nuk eshte e ligjshme se nuk ka leje ne Polici?
Kryetari i grupit parlamentar të Lëvizjes Socialiste për Integrim, Petrit Vasili, i ftuar në “Arena” nga Dritan Hila në Ora News, i pyetur nëse do të ketë dhunë nga policia ndaj protestuesve, tha se çdo lloj marrëzie mund të ndodhë.
Hila: Juve mendoni që do të ketë dhunë nga ana e policisë?
Vasili: Çdo lloj marrëzie mund të ndodhi. Siç ndodhi në Kukës mund të ndodhë prapë. Nëse policia e ka zgjidhur që të hyjë në konflikt me të gjithë qytetarët le të hyjë. Nëse e mendon se me 8 mijë trupa t’u kundërvihet mijëra qytetarëve le t’u kundërvihet. Kjo polici ka rekorde negative. Në rast se kjo polici me këtë moral të kompromentuar rëndë hyn në konflikt me popullin, le të hyjë.
Nëndetësja turke që ka mbërritur në Shqipëri në ditën e Sulltan Novruzit ka tërhequr vëmendjen e qytetarëve që gjatë këtyre ditëve janë gjendur pranë portit të Durrësit dhe e kanë parë të lundrojë.
Një video e mbërritur në Opinion.al dhe e realizuar 2 ditë më parë, tregon nëndetësen “TCG PREVEZE S – 353”, e cila ndodhet në Shqipëri në kuadër të bashkëpunimit mes Forcës Detare të Turqisë dhe Shqipërisë
Është hera e dytë, pas vizitës 4 ditore që zhvilloi më 29 shtator 2015, që kjo nëndetëse turke vjen sërish në Durrës. Nëndetësja 353 me gjatësi 62 m, gjerësinë 5,8 m e tonazh 1400 ton është një nga nëndetëset më moderne të flotës luftarakë detare të Turqisë.
Që nga viti 2010, bashkëpunimi mes dy flotave, asaj shqiptare dhe turke ka ardhur në rritje dhe pritet të forcohet më tej dhe në të ardhmen, veçanërisht në organizimin e stërvitjeve të përbashkëta dhe arsimimin e kualifikimin e mëtejshëm të personelit detar.
Nendetesja ka 8 silure te dukshmedhe është prodhim turk i vitit 1990. Ka nje ekuipazh prej 40 ushtarakesh.
Politikanët shqiptarë kanë fshehur pasuritë gjatë vitit 2017. Reforma në drejtësi duket se nuk ka trembur vetëm gjyqtarët dhe prokurorët, pasi ministra, zv/ministra dhe deputetë kanë tentuar t’i shpëtojnë rrjetës së Inspektoratit të Lartë të Deklarimit dhe Kontrollit të Pasurive.
Gazeta “Sot”, ka siguruar të dhënat e ILDKP në raportin vjetor të vitit 2017 dhe aty tregohet se janë gjobitur në total 438 persona, të cilat nuk kanë deklaruar të ardhurat. Përveç kësaj janë kallëzuar penalisht 32 persona, mes të cilëve 6 deputetë, emrat e të cilëve ende nuk dihen, pasi ndryshe nga vitet e shkuara, ILDKP ka vendosur të ruajë privatësinë për çdo zyrtarë që gjendet me shkelje.
“Për periudhën 2014-2017, 262 kallëzime penale janë referuar pranë zyrës së prokurorisë, Drejtorisë së Përgjithshme të Parandalimit të Pastrimit të Parave dhe strukturave të hetimit tatimor. 74 nga 262 kallëzime penale kanë të bëjnë me vitin 2014, për vitin 2015 janë paraqitur 84 kallëzime penale, ndërsa për vitin 2016 janë 72 kallëzime penale, ndërsa për vitin 2017 u paraqitën pranë strukturave përkatëse 32 kallëzime penale. Këto referime përfshinë një numër të konsiderueshëm zyrtarësh të lartë, si anëtarë të parlamentit, gjyqtarë dhe prokurorë, ambasadorë, kryetarë bashkish, titullarë institucionesh qendrore dhe zyrtarë të tjerë. Vlen të theksohet se gjatë 2016-2017, janë 6 referime të kryera pranë organeve ligjzbatuese për deputetë”, thuhet në dokumentin e siguruar nga gazeta.
Aplikimi i gjobave
Për periudhën 2014 deri më shtator 2017, ILDKP ka aplikuar rreth 1,700 sanksione administrative me gjobë për zyrtarët publik. Për vitin 2016, janë aplikuar 314 masa administrative me gjobë, ndërsa për periudhën janar– dhjetor 2017 ka aplikuar në total 438 gjoba. Masat administrative të aplikuara nga ILDKP përfshijnë zyrtarë të lartë si ministra, zëvendësministra, deputetë dhe drejtorë të institucioneve. Në kuadër të verifikimeve që janë bërë për vitin 2017, ILDKP ka zbuluar dhe raste të konfliktit të interesit. Përgjatë periudhës shtator 2016-dhjetor 2017 ky institucion ka trajtuar dhe parandaluar 287 raste të konfliktit të interesit për zyrtarët në ushtrim të funksioneve publike. ILDKP gjatë ushtrimit të kontrolleve të plota të deklaratave të interesave private ka identifikuar rreth 112 raste zyrtarësh që kanë ushtruar funksionet në kushtet e konfliktit të interesit, duke vendosur ndaj tyre masat administrative sanksion me gjobë.
Denoncimi i korrupsionit
Përveç kontrollit, ILDKP merret dhe me procesin e luftës ndaj korrupsionit në administratë. Ky është institucioni përgjegjës për të ashtuquajturit “bilbilfryrës” ose “sinjalizues”. Këta persona mund të denoncojnë raste korrupsioni në administratë. Inspektorati i Lartë i Deklarimit dhe Kontrollit të Pasurive dhe Konfliktit të Interesave ka marrë të gjitha masat e nevojshme për të siguruar krijimin e njësive përgjegjëse brenda autoriteteve publike qendrore dhe vendore me mbi 80 punonjës dhe raportimin e tyre pranë ILDKP, me qëllim përpilimin e Regjistrit Kombëtar të njësive përgjegjëse, së bashku me emrat dhe pozitën e personit përgjegjës për zbatimin e këtij ligji, në total janë 163 njësi përgjegjëse të ngritura në sektorin publik. Po ashtu, ILDKP ka marrë të gjitha masat për të siguruar krijimin e njësive përgjegjëse brenda sektorit privat në organizatat me mbi 100 punonjës, me qëllim përpilimin e Regjistrit Kombëtar të njësive përgjegjëse në sektorin privat, së bashku me emrat dhe pozitën e personit përgjegjës për zbatimin e këtij ligj, aktualisht janë 436 njësi përgjegjëse të ngritura në këtë sektor.
Vitore Tusha mban gradën doktore shkencash. Ajo është anëtare e Gjykatës Kushtetuese që prej vitit 2008 e gjithashtu anëtare e Këshillit të Emërimeve në Drejtësi.
Lindur më 26 nëntor 1960 në Tiranë, ajo u diplomua në vitin 1983 në Fakultetin e Shkencave Politike-Juridike, dega Drejtësi.
Nga viti 1983 deri në vitin 1990 ka ushtruar detyrën e Përmbarueses Gjyqësore në Gjykatën e Rrethit Tiranë dhe më pas deri në vitin 1992 ushtroi profesionin e avokatit.
Në periudhën 1992-1994 ka ushtruar detyrën e gjyqtares në Gjykatën e Rrethit Tiranë dhe në vitet 1994-2001 atë të gjyqtares në Gjykatën e Kasacionit. Në vitet 1999-2001 ka qenë kryetare e Kolegjit Civil të kësaj gjykate.
Në vitin 1997 merr gradën shkencore “Doktor i Shkencave Juridike”. Në vitin 2004 zgjidhet nënkryetare e Dhomës Kombëtare të Avokatisë. Nga viti 1986 e në vazhdim ushtron mësimdhënien si lektore e së Drejtës Civile dhe Procedurës Civile pranë Fakultetit të Drejtësisë dhe Shkollës së Magjistraturës.
Është bashkëautore në hartimin tekstit Procedura Civile. Ka marrë pjesë me cilësinë e ekspertes ligjore në hartimin e disa projektligjeve. Në mars 2008 është emëruar anëtare e Gjykatës Kushtetuese.
Tusha është mes gjyqtarëve që kanë shpallur si jokushtetuese çështje me ndjeshmëri të lartë publike, sikurse marrëveshja e detit, apo ligji i lustracionit, ndërsa u rreshtua mes gjyqtarëve kushtetues që i thanë po ligjit të vettingut.
Por, çështja më e bujshme e shqyrtuar prej saj është regjistruar gjatë kohës që mbante detyrën e gjyqtares së Kasacionit, nga viti 1994 deri në vitin 2001.
Në nëntor të vitit 1995 , Tusha rrëzoi kërkesën e ish-Kryeministrit Fatos Nano, i cili kërkoi lirim të parakohshëm nga burgu pasi ishte dënuar me 12 vite heqje lirie.
Megjithatë, Nano e la burgun para kohe, pasi ndryshimet e atëhershme në Kodin Penal e ricilësuan veprën për të cilën ai ishte shpallur fajtor, duke ulur edhe parashikimin e dënimit.
Tusha është gjyqtarja e radhës që i nënshtrohet Vettingut dhe me gjasa e para që e kalon këtë testim. Komisioni i Pavarur i Kualifikimit përmendi se ndaj gjyqtares në karrierën e saj ka patur pesë ankesa nga qytetarët për vendimmarrjet, nuk u dha asnjë konkluzion në këtë pikë.
Vendimi do të shpallet të enjten. Por nga gjetjet e evidentuara, parashikohet që Tusha të jetë e para gjyqtare ndaj të cilës do të vendoset vula pozitive, e përshtatshme për të qenë gjyqtare.(TCH)
Asnjë deputet i Kuvendit të Shqipërisë nuk do përfitojë më para publike, në mënyrë të drejtpërdrejtë apo të tërthortë, përmes kompanive të regjistruar në emër të familjarëve. Fëmijët, bashkëshorti, bashkëshortja, bashkëjetuesit dhe prindërit e deputetit, aksionerë në kompani të ndryshme, nuk mund të marrin më pjesë në tendera. Kështu parashikon drafti i rishikuar dhe i dakordësuar për Kodin e Sjelljes së Deputetëve.
Në Kuvendin e Shqipërisë ka disa deputetë biznesmenë, të cilët për të mos djegur mandatin e deputetit, i kanë kaluar kompanitë në emër të familjarëve, ndërsa vijojnë si më parë të fitojnë tendera dhe të marrin para publike. Në këto kushte, Partia Socialiste dhe Partia Demokratike, në draftin e dakordësuar, kanë vendosur ndalimin e deputetit për të aplikuar në tendera publikë, me anë të shoqërisë tregtare, edhe nëse ai është larguar për shkak të fillimit të mandatit të deputetit.
Palët kanë ndryshuar nenin 7 të draftit të parë. Konkretisht, neni 17 i dakordësuar, i cili më parë ishte neni 7, në pikën dy parashikon që kufizimi përfshin edhe ndalimin për të aplikuar dhe/ose fituar të ardhura direkte ose indirekte nga procedurat e tenderimit të autoriteteve prokuruese publike nga shoqëria tregtare, e zotëruar në mënyrë aktive nga deputeti qoftë edhe pjesërisht, dhe prej të cilës ai është larguar për shkak të fillimit të mandatit të deputetit. Për ta bërë edhe më të qartë kufizimin dhe ndalimin e ligjvënësit për të përfituar para publike, palët kanë shtuar një pikë tjetër.
Pika 6 e nenit 17 parashikon që nëse aksionet ose pjesët e kapitalit regjistrohen në emër të një të afërmi, që do të thotë bashkëshortit/bashkëjetuesit, fëmijët e rritur, prindërit e deputetit, ato konsiderohen të njëjtë sikur të ishin të regjistruar në emër të vetë deputetit dhe, të drejtat për pronën e të afërmve kufizohen në të njëjtën masë dhe mënyrë si në rastin e vetë deputetit. Varianti i parë ishte më i përgjithshëm dhe nuk mundësonte ndalimin e parashikon në variantin e fundit. Ky variant i Kodit të Sjelljes është parashikuar për t’u miratuar në seancën e sotme plenare.
Dhuratat
Drafti i dakordësuar ka ndryshuar edhe parashikimet sa i takon dhuratave. Neni 23 i draftit parashikon që deputeti nuk mund të kërkojë ose të marrë, në mënyrë të drejtpërdrejtë a të tërthortë dhurata me vlerë mbi 10 mijë lekë, favore, premtime ose trajtime preferenciale, të cilat i jepen për shkak të pozicionit të tij, nga një individ, person fizik ose juridik privat.
Deputeti, të cilit i janë ofruar dhurata, favore, premtime ose trajtime preferenciale, duhet t’i refuzojë ato dhe, në rast se ofrimi është kryer pa dijeninë e tij ose paraprakisht, t’ia kthejë mbrapsht ofruesit ose, në pamundësi, t’i dorëzojë zyrtarisht pranë shërbimit përgjegjës në Kuvend për administrimin e objekteve me vlerë, të cilat më pas përdoren për qëllime të veprimtarisë së institucionit; b) në rast se ofrimi ose dhënia e të mirave të sipërpërmendura lidhen me kryerjen e një vepre penale, deputeti bën kallëzim pranë organit të ndjekjes penale. Dhuratat, që kanë vlera artistike, muzeale ose historike administrohen në institucion dhe ekspozohen. Dhuratat dhe përfitimet e ngjashme sipas këtij neni, të refuzuara ose të pranuara nga deputeti, deklarohen brenda 5 ditëve dhe regjistrohen në një regjistër të posaçëm të Kuvendit.
Ndalimi
Fëmijët, bashkëshorti, bashkëshortja, bashkëjetuesit dhe prindërit e deputetit, aksionerë në kompani të ndryshme, nuk mund të marrin më pjesë në tendera.
Parashikimi
Ndalohet aplikimi në tendera nga shoqëria tregtare, e zotëruar në mënyrë aktive nga deputeti qoftë edhe pjesërisht, dhe prej të cilës ai është larguar deputeti për shkak të fillimit të mandatit të deputetit.
Varianti i dakordësuar mes PD-PS-LSI
Neni 17, ishte neni 7
Kufizime gjatë ushtrimit të mandatit
Gjatë ushtrimit të mandatit, deputetit nuk i lejohet:
a) të ushtrojë detyrë tjetër shtetërore, përveç asaj të anëtarit të Këshillit të Ministrave;
b) të kryejë veprimtari fitimprurëse që buron nga pasuria e shtetit ose e pushtetit vendor dhe as të fitojë pasuri të këtyre;
c) të jetë drejtues ose anëtar i organeve drejtuese të organizatave fitimprurëse;
ç) të ushtrojë veprimtari private, që krijon të ardhura në formën e personit fizik tregtar, ortakëri personash fizikë tregtarë të çdo forme, profesione të lira të avokatisë, të noterisë, ekspertit të licencuar, si dhe të konsulentit, agjentit a përfaqësuesit të organizatave të përcaktuara në shkronjën “a” të këtij neni dhe nuk mund të jetë i punësuar, me kohë të plotë, në një detyrë tjetër;
d) të zotërojë, në mënyrë aktive, asnjë aksion ose pjesë në kapital të një shoqërie tregtare, nëse ajo rezulton me pozitë dominuese në treg.
Kufizimi i përcaktuar në pikën 1 shkronja “b” përfshin edhe ndalimin për të aplikuar dhe/ose fituar të ardhura direkte ose indirekte nga procedurat e tenderimit të autoriteteve prokuruese publike nga shoqëria tregtare, e zotëruar në mënyrë aktive nga deputeti qoftë edhe pjesërisht, dhe prej të cilës ai është larguar për shkak të fillimit të mandatit të deputetit.
Pronësia aktive nënkupton ushtrimin e plotë të të gjitha të drejtave që rrjedhin nga pronësia, aksionet ose pjesë të kapitalit.
Pozita dominuese në treg vlerësohet nga autoriteti përgjegjës për konkurrencën sipas legjislacionit për mbrojtjen e konkurrencës.
Kuvendi mund të kërkojë nga autoriteti përgjegjës për konkurrencën të kryejë vlerësime për një kompani në të cilën një deputet ka aksione ose kapital për të vlerësuar nëse ka pozitë dominuese në treg.
Nëse aksionet ose pjesët e kapitalit regjistrohen në emër të një të afërmi, që do të thotë bashkëshortit/bashkëjetuesit, fëmijët e rritur, prindërit e deputetit, ato konsiderohen të njëjtë sikur të ishin të regjistruar në emër të vetë deputetit dhe, të drejtat për pronën e të afërmve kufizohen në të njëjtën masë dhe mënyrë si në rastin e vetë deputetit.
Neni 7 i draftit të parë
Kufizime gjatë ushtrimit të mandatit
Gjatë ushtrimit të mandatit, deputetit nuk i lejohet:
a) të jetë drejtues ose anëtar i organeve drejtuese të organizatave fitimprurëse;
b) të ushtrojë veprimtari private, që krijon të ardhura në formën e personit fizik tregtar, ortakëri personash fizikë tregtarë të çdo forme, profesione të lira të avokatisë, të noterisë, ekspertit të licencuar, si dhe të konsulentit, agjentit a përfaqësuesit të organizatave të përcaktuara në shkronjën “a” të këtij neni dhe nuk mund të jetë i punësuar, me kohë të plotë, në një detyrë tjetër;
c) të zotërojë, në mënyrë aktive, asnjë aksion ose pjesë në kapital të një shoqërie tregtare, nëse ajo rezulton me pozitë dominuese në treg./Shqiptarja.com
Trafikimi i lëndëve narkotike është burimi kryesor i gjenerimit të parave të pista në Shqipëri gjatë vitit 2017. Drejtoria e Parandalimit të Pastrimit të Parave ka publikuar raportin për vitin 2017, në të cilin konstaton rastet, ku është identifikuar aktiviteti kryesor që gjeneron këto lloj të ardhurash. Për vitin 2017, trafikimi lëndëve narkotike, evazioni fiskal dhe mashtrimet vlerësohen si 3 burimet kryesore, pasuar nga shpërdorimi i detyrës dhe korrupsioni.
“Gjatë vitit 2017, për 33% të rasteve të dërguara në Prokurori/Polici është arritur identifikimi i lidhjes së mundshme me veprimtarinë kriminale të origjinës, e cila dyshohet se ka prodhuar fondet e qarkulluara apo të investuara. Numrin më të lartë të rasteve ku ka qenë e mundur të identifikohet vepra mëmë e zënë trafikimi lëndëve narkotike, evazioni fiskal dhe mashtrimet. Vërehet rritje e rasteve të dyshuara për shpërdorim detyre ose korrupsion, të cilat shënuan numrin më të lartë të paktën në 5 vitet e fundit”, theksohet në raport.
Paratë “e pista”, gjatë 2017 u sekuestruan vetëm 9 milionë euro
Për të parandaluar tjetërsimin e produkteve kriminale apo përdorimin e tyre për financim të terrorizmit, në ato raste kur ka fakte e të dhëna të mjaftueshme se një gjë e tillë po ndodh apo mund të ndodhë, Drejtoria e Parandalimit të Pastrimit të Parave shpjegon në raport se ushtron të drejtën për bllokimin e përkohshëm prej 72 orësh të transaksioneve dhe pasurive. Gjatë 2017, janë nxjerrë 52 urdhra bllokimi të përkohshëm kryesisht për llogari bankare, në një vlerë totale prej rreth 11.2 milionë euro, nga të cilat janë sekuestruar me vendim Prokurorie/Gjykate rreth 9 milionë euro.
Të dhënat tregojnë se ka një rritje të ndjeshme të vlerës së sekuestrimeve në raport me vlerat e bllokuara nga DPPPP. Për vitin 2017 rezulton të jenë sekuestruar 80.8% të vlerave të bllokuara nga Drejtoria e Parandalimit të Pastrimit të parave, që përbën nivelin më të lartë të 5 viteve të fundit.
Skemat sesi pastrohen paratë në Shqipëri
Po cilat janë skemat nëpërmjet të cilave pastrohen paratë në Shqipëri? Drejtoria e Parandalimit të Pastrimit të Parave ka identifikuar në raportin e vitit 2017 mekanizmat e përdorur për kryerjen e pastrimit të produkteve të veprës penale apo financimit të terrorizmit, të cilat janë:
TIPOLOGJIA 1: Transferta nga shoqëri të regjistruara në vende parajsa fiskale, në favor të shoqërive ‘call center’ dhe tërheqja e menjëhershme e fondeve.
Si funksionon kjo skemë? Shoqëria A me objekt veprimtarie ‘call center’, në llogarinë e saj në një nga bankat që operojnë në vend që në fillimet e aktivitetit kishte përfituar disa transferta të dërguara nga vendet e BE, nga shoqëri të regjistruara në vende të parajsës fiskale (i ndryshëm nga vendi i dërgimit të transfertave).
Nga verifikimet e kryera rezultoi se: Në të njëjtën adresë që ushtronte aktivitetin kompania A, kishin regjistruar selinë edhe disa biznese të vogla të tipit Person Fizik (rreth 11 PF) me të njëjtin objekt veprimtarie si të shoqërisë A dhe të regjistruara në të njëjtën datë në QKB. Këto biznese ishin regjistruar në emër të punonjësve të shoqërisë dhe kishin moshë tepër të re.Nga analizimi i llogarive të bizneseve PF është vënë re se ka patur transferta në hyrje që në momentin e regjistrimit të tyre nga të njëjtat shoqëri që më parë i kishin dërguar transferta edhe shoqërisë A.
Fondet e mbërritura në llogaritë e bizneseve PF ishin pothuajse në të njëjtat vlera (10,000-15, 000 EUR për transfertë) dhe të gjitha këto fonde tërhiqeshin menjëherë nga shtetasi Z, i cili ishte person i autorizuar për kryerje transaksionesh në bizneset PF si dhe njëkohësisht i punësuar menaxher në shoqërinë A.
Gjatë analizimit të mëtejshëm të rastit është konstatuar se shoqëritë dërguese, jashtë vendit kanë qenë të lidhura me shoqëri të tjera në Shqipëri me veprimtari ‘call center’ të sapo krijuara dhe me ortak shtetas me moshë të re, raste për të cilat është dërguar informacion kohë më parë në organet ligj zbatuese për dyshime lidhur me aktivitetin që ato ushtrojnë.
“Gjatë analizimit të mëtejshëm të rastit është konstatuar se shoqëritë dërguese, jashtë vendit kanë qenë të lidhura me shoqëri të tjera në Shqipëri me veprimtari ‘call center’ të sapo krijuara dhe me ortak shtetas me moshë të re, raste për të cilat kemi dërguar informacion kohë më parë në organet ligj zbatuese për dyshime lidhur me aktivitetin që ato ushtrojnë”, theksohet në raportin e Drejtorisë së Parandalimit dhe Pastrimit të Parave.
TIPOLOGJIA 2: Transferta të kryera me vende të Amerikës Latine nga shtetas me lidhje familjare me persona të dënuar për trafikim lëndësh narkotike.
Si funksionon kjo skemë? Për një periudhe 2-vjeçare shtetasi A kishte përfituar transferta të shumta nga shtetas të ndryshëm nga një vend në Amerikën Latine, shteti N, por ajo që binte në sy ishte se për një periudhë 6 mujore (në 2014) shtetasi A kishte dërguar edhe rreth 20 transferta në vlerë totale 82,000 EUR drejt shtetasve të ndryshëm në këtë shtet. Lidhjet ndërmjet shtetasit A dhe shtetasve dërgues/përfitues ishin të paqarta, transfertat ishin me vende me risk lidhur me trafikimin e lëndëve narkotike, për rrjedhojë rasti u dërgua për verifikime të mëtejshme në organet ligj zbatuese.
Vëllai i shtetasit A si dhe bashkëshortja e shtetasit A (shtetasja B) kishin dërguar një numër të konsiderueshëm transfertash drejt vendit N për një periudhë rreth 2- vjeçare. Transfertat ishin kryesisht në vlerat 200-1,000 EUR, por kishte edhe transferta në vlera të ulëta deri në 20 EUR/ transferta. Dërgesat ishin të shpeshta 18-20 transferta në muaj dhe në favor të shtetasve të ndryshëm. Nga verifikime të tjera të kryera në lidhje me të afërm të ngushtë të bashkëshortes së shtetasit A, për vëllain dhe të atin e saj rezultoi:
Shtetasi X, (babai i shtetases B) kishte përfituar në shtetin N disa transferta të dërguara nga Shqipëria. Shtetasi X nga burime të hapura rezultonte të ishte i arrestuar më parë për trafikim lëndësh narkotike.
Shtetasi Y (vëllai i shtetases B). Rezultonte të ishte arratisur nga ambientet e paraburgimit, pasi ishte dënuar me 25 vjet për vrasje të një punonjësi policie; ishte arrestuar në një shtet jo Evropian për vjedhje dhe trafikim lëndësh narkotike; ishte arrestuar në shtetin N, pjesë e një grupi trafikimi lëndësh narkotike.
TIPOLOGJIA 3: Qarkullimi i shumave të dyshimta në sistemin bankar.
Si funksionon kjo skemë? Shtetasi A zotëron llogari personale në një bankë të nivelit të dytë që prej 2015 dhe në vitin 2017 i ka mbërritur një transfertë nga shoqëria X nga një vend i BE në vlerë 310,000 USD, për të cilën ka kërkuar tërheqjen e shumës pa dhënë asnjë informacion lidhur me burimin e fondeve, dërguesin e tyre apo qëllimin e dërgimit.
Nga verifikimet e kryera ka rezultuar se: shoqëria X që ka dërguar transfertën e mësipërme është një nga aksionerët e shoqërisë Y, e regjistruar në Shqipëri, me të cilën shtetasi A ka marrëdhënie biznesi pasi e furnizon me karburant, dhe për shkak të kësaj marrëdhënie, ka kërkuar një hua në vlerë 310,000 USD për investim në biznes; nga të dhënat e QKB, shtetasi A është aksioner në katër shoqëri, të cilat operojnë në të njëjtën fushë veprimtarie; gjatë periudhës që shtetasi A është përfshirë në këto subjekte (2011-2017) ka qarkulluar një numër të konsiderueshëm transaksionesh bankare në vlera të larta, veprime të cilat kanë kryesisht natyrë biznesi; nga një informacion në burimet hapura, ky shtetas është arrestuar me akuzën e mashtrimit.
Informacioni i analizuar është dërguar për investigim të mëtejshëm në organet e zbatimit të ligjit, nga të cilët na është konfirmuar se shtetasi A figuron i evidentuar me precedent kriminal për veprën penale “Mashtrim” dhe është caktuar masa e sigurisë “Arrest në burg”. Bazuar në këto indicie DPPPP ka nxjerrë urdhër bllokimi. Në vijim është regjistruar një procedim penal ndaj këtij shtetasi si dhe është vendosur sekuestrimi i shumës 310,000 USD.
TIPOLOGJIA 4: Të ardhura të siguruara nga aktiviteti i jashtëligjshëm
Si funksionon kjo skemë? Shtetasja A ka depozituar në një bankë të nivelit të dytë shumën 80, 000 EUR duke deklaruar të ardhura nga emigracioni. Ndërkohë në të njëjtën periudhë dhe në të njëjtën bankë, shtetasi X (dhëndri i shtetases A) ka hapur llogari të përbashkët me bashkëshorten e tij shtetasen B, ku ka depozituar shumën 65,000 EUR si kursime familjare dhe puna në emigracion në një vend të BE. Në lidhje me këto depozitime nuk është paraqitur asnjë dokument justifikues. Nga verifikimet e kryera, ka rezultuar se: shtetasja B ka investuar në pasuri të paluajtshme në vlerën prej 150,000 EUR; nuk kanë biznes të regjistruar në QKB.
Në lidhje me shtetasin X kemi kërkuar informacion në organet e zbatimit të ligjit dhe në vijim jemi informuar se shtetasit X dhe B janë të dyshuar nga autoritete e një vendi të BE, vendi M si persona të përfshirë në trafikimin e lëndëve narkotike. Nga informacioni i marrë nga banka rezulton që më pas shtetasi X i përfaqësuar me prokurë nga shtetasja A ka kryer një transfertë prej 70,000 EUR në shtetin M për blerje shtëpie. Pas këtij informacioni materialet janë referuar në organet e zbatimit të ligjit, është nxjerrë urdhër bllokimi për rastin dhe më pas jemi informuar se është nxjerrë edhe urdhër sekuestrimi./Shqiptarja.com
Nuk ka asgjë më të ëmbël në botë sesa ndjenja e rritjes së fëmijës brenda trupit të një gruaje gjatë shtatëzanisë. Sapo fetusi fillon e rritet nëna ndjen shkelmimet dhe lëvizjet e para, madje dhe zhurmën e lemzës së bebit të palindur
Por a e dini se foshnjet gjithashtu fillojnë të praktikohen se si do qajnë kur të vijnë në jetë? Sipas hulumtimeve të reja nga Universitetet Durham dhe Lancaster, të sapolindurit fillojnë të zhvillojnë mënyrat me të cilat ata do të komunikojnë, në mënyrë që ata të jenë të gatshëm të na tregojnë se çfarë ndjejnë kur të vijnë në këtë jetë. Hulumtuesit përdorën ultratingujt për të zbuluar fytyrat “grindavece” të fetusëve dhe përmes ekove mjekët zbuluan se fëmija qesh edhe qan duke ngrysyr vetullat në barkun e nënës.
Dr. Reissland, një lektor i lartë në Universitetin e Durhamit, tha: “Është jetësore që foshnjat të jenë në gjendje të tregojnë dhimbje sapo të lindin, në mënyrë që të “komunikojnë” çdo shqetësim që mund të ndjejnë. Nëse ato nuk do të qanin ne nuk do të kuptonim asgjë. Pavarësisht kësaj, kërkime të mëtejshme duhet të kryhen për të përcaktuar nëse “fytyrat e mërzitura” janë thjeshtë ushtrime të bebeve apo shkaktohen nga dhimbjet që ata mund të ndjejnë.
