Aktualitet

Shkarkimi i Besim Hajdarmatajt nga posti i Kryeprokurorit të Krimeve të Rënda në Tiranë me sa duket është marrë lehtë.

Duke e lidhur politikisht me çështjen “Tahiri” apo me çështje të tjera jashtë kontekstit të vërtetë të arsyes së largimit të tij nga kjo prokurori e rëndësishme.

Jo se Hajdarmataj nuk është një “zar” politik i Sali Berishës por dhe Ilir Metës përmes ish kryeprokurorit Adriatik Llalla.

Këtë e ka provuar sa herë i është dhënë rasti dhe Besimi ka qënë vërtetë i besueshëm dhe shumë radikal për të gjitha detyrat e ngarkuara nga Berisha e Meta, për t’ju shërbyer politikisht atyre.

E vërteta e kulluar është se Besim Hajdarmataj është shkarkuar nga posti i Kreut të Prokurorisë së Krimeve të Rënda për shkak të aferës së kokainës së Arbër Kuliçit-Çekajt.

I njohur ndryshe si personi më i besuar i ish-kryeprokurorit Adriatik Llalla, ai largohet fill pas zbardhjes së skandalit ku u akuzua drejtpërdrejt për mbyllje në mënyrë misterioze të dosjes së bosit të drogës Arbër Kuliçi-Çekaj.

Pas zbulimit të 613 kg kokaine që vinte nga Kolumbia, doli se pritësi i drogës kishte edhe një dosje tjetër të mbyllur më herët nga kreu i Prokurorisë për Krimet e Rënda.

Pasi më 22 dhjetor 2015 pranë kryesekretarisë së prokurorisë për krime të rënda policia e shtetit vjen një material referues për shtetasin Arbër Kuliçin-Çekajn, pronar i kompanisë që importonte nga vendet e Amerikes Latine banane!

Në material ndër të tjera thuhej “se në port është kapur një kontenier me banane brenda të cilit po me dysheme të modifikuar u gjetën 90 kg kokainë dhe se kontenieri po vinte në Shqipëri për llogari të kompanise se Arbër Çekajt! Ky material u regjistrua në prokurori me nr.protokolli 12041 dhe 12041/1 për rastin në fjalë!

Në atë kohe prokuroria per Krime te Renda kishte zv/drejtues të emëruar nga Adriatik Llalla prokurorin Besim Hajdarmataj që deri sot në mëngjes ishte drejtues. Për llogari të kësaj çeshtjeje Çekaj u thirr në prokurori ku pretendoi në atë kohë që kishte porositur banane dhe jo kokainë!

Pak kohë pas “këtij rrëfimi” në krye te Krimeve te Renda u emërua si drejtues Besim Hajdarmataj dhe po me firmen e tij dosja e A.Çekajt u pezullua dhe kaloi ne arkive me arsyetimin se kolumbianet nuk kishin sjell materialet, dhe se Kuliçi i vogël kishte porositur banane!

Besim Hajdarmataj duke qenë se na doli që kishte njohje me Çekajn, me të cilin thonë se janë takuar edhe në prokurori, për shkak të zonës nga vinte Tropojë dhe njohjeve të tjera me familjaret e tij kjo dosje u pezullua në vitin 2016 dhe biznesmeni Arbër Kuliçi-Çekaj vazhdoi aktivitetin e “bananeve”!

Aktivitet që nxori kokën përseri në 2018 me 613 kg kokaine!

Pikërisht njeriu që Hajdarmataj kishte liruar dhe mbylluir dosjen dhe që tashmë është arrestuar në Dyseldorf të Gjermanisë për trafik kokaine, Arbër Kuliçi-Çekaj sërish përmes bananeve solli drogë.

Këtë radhë shtatëfish më shumë se sa në vitin 2015, dhe ku Hajdarmataj me gjithë përpjekjet nuk kishte çfarë i bënte më. Madje tashmë pritet që të shkojë në burg për këto 90 kile drogë që mbylli tre vite më parë por që hapi rrugën për ardhjen e 613 kilogramëve të tjera bashkë me “bananet”, të cilat u kapën në Durrës.

Pikërisht kjo drogë e shkarkoi Hajdarmatajn nga drejtimi i Prokurorisë së Krimeve të Rënda dhe shumë shpejt do të jetë në burg për të dhënë llogari për ciklin e mbyllur të kësaj droge.

Ndërkohë që një arësye tjetër e lëvizjeve në prokurori është dhe dosja e Adriatik Llallës.

Ashtu sikurse dihet, Donika Prela e sapoemëruar në krye të Krimeve të Rënda është prokurorja e dosjes “Llalla” gjatë kohës që dosja ishte në kompetencat e Prokurorisë së Durrës. Por më 28 prill dosja nga Prokuroria e Durrësit i kaloi për moskopetencë Prokurorisë së Krimeve të Rënda për hetime të mëtejshme.

Pas kalimit të dosjes në Tiranë, edhe prokurorja e çështjes, pra Donika Prela, ka kaluar në Tiranë. Lëvizja e komanduar e Prelës nga Prokuroria e Durrësit në Tiranë ka qenë e mirëmenduar.

“Kemi besim se ky ndryshim në drejtim do të sjellë si rezultat ndjekje penale më të shpejtë dhe më të efektshme të çështjeve me përparësi të lartë. Ndjekja penale e krimit dhe korrupsionit mbetet prioriteti më i lartë për Kryeprokuroren Marku”, thuhej në reagimin zyrtar të Prokurorisë për shkarkimin e Hajdarmatajt.

Kujtojmë se ndërkohë në vend të prokurores Donika Prela në Durrës është emëruar Anita Jella.

Pritet me interes se çfarë do ndodhë pas emërimeve të reja, kur ndërkohë është paralajmëruar dhe arrestimi i Adriatik Llallës por dhe Besim Hajdarmatajt. Arrestime që do të ndodhin shumë shpejt. Pasi gjithçka po bëhet dhe me “bekimin” e partnerëve tanë më të fortë ndërkombëtarë, SHBA dhe BE. Eshtë çështje kohe që “peshqit e mëdhenj” të përfundojnë në burg./Pamfleti.com

Prokuroria e Krimeve të Rënda ka regjistruar procedim penal me akuzat e falsifikimit të dokumentave dhe korrupsionit për deputetin socialist, Alket Hyseni, ndërkohë që ky i fundit hedh poshtë akuzat dhe shprehet i hapur për t’u hetuar.

Prokuroria e Krimeve të Rënda ka regjistruar një procedim penal ndaj deputetit të Partisë Socialiste, Alket Hyseni, thuajse pesë muaj pas dorëzimit të një kallëzimi kundër tij për përvetësimin e 11 mijë metra katrorëve tokë në Dhërmi. Procedimi penal nisi mbi bazën e kallëzimit të dorëzuar në dhjetor 2017 në Prokurori nga shtetasja Irini Bua, e cila e akuzon deputetin Hyseni për përvetësimin e pronës së saj.

Një zyrtar i Prokurorisë së Krimeve të Rënda i tha BIRN se procedimi penal kundër Hysenit është regjistruar për tre vepra penale: falsifikimi i dokumenteve, korrupsioni i zyrtarëve të lartë dhe shpërdorimi i detyrës.

I pyetur nga BIRN, deputeti Alket Hyseni tha se nuk ishte në dijeni të regjistrimit të procedimit penal nga Prokuroria, ndërsa u shpreh i hapur për t’u hetuar ndaj çdo akuze që ngrihet në emër të tij.
“Natyrisht kur ka kallëzim, organi ku ushtrohet kallëzimi kryen veprime hetimore për të vërtetuar nëse qëndron apo jo kallëzimi. Nuk kam asnjë dijeni për procedim ndaj emrit tim,” tha Alket Hyseni për BIRN.

“Unë kam qenë dhe jam i gatshëm të jap çdo sqarim dhe kam ftuar Prokurorinë të hetojë plotësisht çdo akuzë ndaj meje, edhe kur janë të pavërteta apo me ngarkesë politike. Ligji është i barabartë për të gjithë, edhe kur disa individë abuzojnë me të drejtën duke shpifur apo duke u instrumentalizuar politikisht,” shtoi deputeti, duke iu referuar kallëzimit të zonjës Bua.

Pronësia e deputetit Hyseni mbi 11 mijë metra katrorë tokë në Dhërmi u vendos në pikëpyetje pas akuzave publike të shtetases Irini Bua se kjo tokë ishte përfituar përmes shpërdorimit të detyrës. Në vitet 2014-2016, Hyseni udhëhoqi task-forcën e ngritur nga kryeministri Edi Rama për të verifikuar tjetërsimit e paligjshëm të pronave shtetërore.

BIRN zbuloi në një investigim të mëparshëm se mbi dy parcelat me sipërfaqe 11 mijë metra katrorë po ndërtohet aktualisht resorti turistik “Ionian Olea”. Kjo pronë është pjesë e një sipërfaqeje më të madhe të fituar nëpërmjet ligjit 7501 nga familja Bua, e cila është transferuar përmes një serie transaksionesh financiare fillimisht te shtetasit Ilia Taka dhe Arjan Hasani dhe më vonë është shkëmbyer me deputetin Alket Hyseni për 2 apartamente dhe 3 garazhe. Pasi është bërë pronar i tokës, Hyseni ia ka shitur atë firmës ligjore të regjistruar në pronësi të të atit me një çmim prej 30 milionë lekësh.

Dokumentet e siguruara nga BIRN tregojnë se origjina e tokës me sipërfaqe totale 11 mijë metra katrorë, për të cilën ‘Hyseni & Associates’ ka lidhur një kontratë sipërmarrje me zhvilluesit e resortit ‘Ionian Olea’ dhe pritet të përfitojë sipërfaqe ndërtimi me vlerë miliona euro është e dyshimtë, ndërkohë që verifikimi i mënyrës së tjetërsimit të saj ka qenë detyrë e task-forcës së drejtuar nga Hyseni.

Nga kontrata e sipërmarrjes me zhvilluesit e resortit ‘Ionian Olea’, firma ligjore “Hyseni & Associates” pritet të përfitojë minimalisht 1100 metra katrorë sipërfaqe ndërtimi në resortin turistik, e cila ka një vlerë tregu prej 1.1 milionë euro. Në varësi të koeficentit të ndërtimit dhe vlerës së shitjes së pronave, përfitimet mund të shkojnë në disa milionë euro.

Në një intervistë të mëparshme për BIRN, deputeti Hyseni i hodhi poshtë akuzat, duke nënvizuar se prona që ai ka blerë nuk është ajo që i referohet Znj.Bua, e cila sipas tij është nën sekuestro. Deputeti socialist pretendon se nuk kishte qenë në dijeni të problemeve që toka kishte, pasi nuk e kishte blerë atë direkt nga familja Bua.

Tjetërsime të tilla me tokën bujqësore kanë qenë dhe arsyeja pse në korrik të vitit 2014, qeveria e kryeministrit Edi Rama krijoi një task-forcë për verifikimin e titujve të pronësisë, e cila udhëhoq për dy vite nga deputeti Alket Hyseni.

Vijojnë punimet e projektit “Rikualifikimi i zonës urbane pranë qendrës së qytetit të Vlorës”, nën mbikqyrjen e përditshme të specialistëve të Drejtorisë Rajonale të Kulturës Kombëtare Vlorë dhe Institutit të Monumenteve të Kulturës.

Ky projekt restaurimi zhvillohet në zemër të Vlorës, aty ku qyteti ende ruan identitetin, gjurmë të ndërtimeve të fundit të shekullit të 19‐të dhe fillimit të shekullit të 20‐të, ku pjese e ketij restaurimi janë: Rruga “Justin Godar”, ish-pazari, “lagjja e hebrenjve”, klubi “Labëria”, ish-Sinagoga, etj. Punimet e këtij projekti janë fokusuar në disa objekte ku po kryhen punime restauruese në fasada dhe brendësi të tyre, ndërkohë që vazhdojnë punimet edhe për përmirësimin e rrjeteve nëntokësorë.

Inagurohet nesër Kinemaja Verore në qytet

Në kuadër të javës së Evropës 2018, Delegacioni i Bashkimit Evropian nē Shqipëri në bashkëpunim me Bashkinë Vlorë organizon natën e kinemasë evropiane në Vlorë.

Nata e kinemasë do të mbahet në shetitoren e qytetit ku do të shfaqet filmi gjerman “Eltern” (Prindërit).

Përfaqësues nga Bashkimi Evropian në Shqipëri dhe nga Bashkia Vlorë do të jenë të pranishëm.

Nata e Kinemasë Evropiane në Vlorë më datë 10 Maj , ora 20.30 në Kinemanë Verore, në fillim të Lungomares