Aktualitet

Ministrja e Drejtësisë, znj. Etilda Gjonaj, në kuadër të turit të llogaridhënies “Puna për Shqipërinë që duam”, ka zhvilluar bashkëbisedime me banorët e njësive administrative Katund i Ri dhe Sukth në qarkun e Durrësit.

Ministrja së bashku me deputetët e zonës Milva Ikonomi dhe Rolant Xhelilaj ka dhënë llogari për çfarë është bërë në drejtim të urbanizimit të këtyre zonave me shumë problematika të trashëguara për 25 vjet rresht, duke investuar në infrastrukturën rrugore, në shkollat dhe qendrat shëndetësore. Përfaqësuesit e qeverisë u dhanë banorëve lajmin e mirë të miratimit të projektit dhe financimit për rikonstruksionin e rrjetit të ujësjellësit për fshatrat Jubë, Katund i Ri, Qerret, Erzen, Bisht Kamëz dhe Rinia.

Reforma në Drejtësi, Vettingu i gjyqtarëve dhe i prokurorëve ishte gjithashtu pjesë e informimit të qytetarëve, reformë e cila na dha Rekomandimin pozitiv për çeljen e negociatave me BE-në.

Diskutim i rëndësishëm ishte edhe ai për çështjet e pronësisë, që në këto dy njësi administrative janë nga problemet më të mprehta. Ministrja Gjonaj i siguroi banorët se çështja e pronave është çështje prioritare dhe me reformën që Qeveria ka ndërmarrë do t’i gjendet zgjidhje ligjore problemeve të titujve të pronësisë, pasi është një problem i mbartur kompleks për gjatë 25 viteve.

“Objektivi i Qeverisë deri në mesin e vitit 2019 është regjistrimi i titujve të pronësisë që kanë të bëjnë pikërisht me tokën bujqësore si dhe trajtimi në mënyrë të integruar i titujve të pronësisë nëpërmjet agjencisë së re”, është shprehur ministrja e Drejtësisë.

Së bashku me deputetët e zonës, ministrja Gjonaj i ka inkurajuar banorët e Katundit të Ri dhe Sukthit të bëhen pjesë e bashkëqeverisjes duke ju drejtuar platformës  Shqiperiaqeduam.al dhe i ka siguruar se takimet me ta do të vijojnë edhe në të ardhmen si pjesë e devizës së qeverisë për të bashkëqeverisur me njerëzit e zakonshëm dhe për të qenë pranë problemeve e shqetësimeve të tyre.

Ministrja i ka garantuar banorët se ankesat e tyre mundësojnë, jo vetëm zgjidhjen e ankesave të tyre, por njëkohësisht dhe largimin nga administrata të atyre punonjësve, të cilët abuzojnë me ligjin, me detyrën dhe që kërkojnë ryshfet në këmbim të shërbimit që duhet t’i ofrohet qytetarit.

Ministri i Infrastrukturës dhe Energjisë Damian Gjiknuri inspektoi disa prej investimeve në rrjetin energjetik në zonën e Bashkisë Vlorë. Në fillim ai u ndal në kantierin e hapur në Orikum ku tanimë është drejt përfundimit nënstacioni i ri elektrik që lidh rrjetin 110 kV me rrjetet 35 dhe 20 kV, investim i Operatorit të Sistemit të Transmetimit (OST).

“Jemi drejt përfundimit të një prej veprave të rëndësishme energjetike këtu në Qarkun e Vlorës që është nënstacioni elektrik i Orikumit. Nënstacioni do bëjë të mundur përmirësimin e furnizimit me energji të të gjithë zonës së Orikumit ku efekti do të jetë i menjëhershëm me lidhjen që do të ketë rrjeti 35 kV. Janë investime të nevojshme për këtë zonë turistike. Ka patur dhe shqetësime nga banorët për furnizimin por e rëndësishme është mesazhi që po jepet se investimet janë të mëdha dhe po vazhdojnë. Kjo është një nga veprat më të mëdha pas linjës 110 Kv që ne tashmë e kemi përfunduar dhe besoj se në kuadrin e një viti situate do ketë ndryshuar radikalisht në gjithë zonën e Orikumit”, theksoi Gjiknuri.

Ndërkaq, i shoqëruar nga administratori Adrian Çela dhe drejtori rajonal Erion Osmanaj, ministri Gjiknuri pa nga afër edhe investimet që po kryen Operatori i Shpërndarjes së Energjisë Elektrike (OSHEE) në qytetin e Vlorës.

“Qyteti i Vlorës jo vetëm që ka përfituar këto 800 milion lekë të reja dhe ka në proces edhe 1.2 miliard lekë të reja investime që janë duke u zbatuar por ne kemi edhe një projekt tjetër agresiv investimi në Bashkinë e Vlorës. Ky projekt i ri ka të bëjë me sistemimin e rrjetit elektrik nga tuneli i Ujit të Ftohtë deri në zonën e Radhimës që shkon rreth 2.2 miliard lek të reja. Gjithë këto rezultate dhe gjithë këto investime arrihen edhe në saj të performancës së kompanisë dhe bashkëpunimit të qytetarëve”, u shpreh administratori i OSHEE Adrian Çela.

Ministri Gjiknuri vuri theksin tek nevoja për të mirëadministruar këto investime tanimë të kryera dhe ato në proces.

“Çfarë do të thotë investim dhe mirëadministrim? Përpara katër vitesh humbjet e energjisë në Vlorë ishin mbi 50%, sot që flasim janë nën 20%. Pra kemi një kapërcim galopant duke kursyer, duke administruar më mirë mallin e përbashkët të qytetarëve. Akoma ka punë dhe ka nevojë për administrim më të mirë por rezultatet janë impresionuese dhe kjo ka ardhur si rrjedhojë e mirëmenaxhimit të kompanisë dhe strukturave në terren”, nënvizoi Gjiknuri.

Bekime Rexha ishte një nga personazhet e 21 Janarit ku pas protestës së opozitës në Bulevard, mbetën të vrarë katër protestues.

Në atë kohë adoleshente, asaj iu kushtua një kronikë televizive, pasi kamerat e filmuan teksa një protestues e qëlloi me çadër në kokë kur ajo po i ironizonte në Rrugën e Durrësit.

Pas protestës, ish kryeministri Berisha i shkoi për vizitë në familje për ta uruar për ditëlindjen.

Por, sipas kryeredaktorit të gazetës Dita, Adrian Thano, Bekime Rexha pasi mbushi 18 vjeç i kërkoi Berishës ta punësonte si gardiane burgu dhe ish kreu i qeverisë ia pranoi kërkesën.

“Bekimja sapo mbushi 18 vjeç dhe mbaroi gjimnazin u punësua si … police burgu. Dhe besojeni ose jo, është ende sot police burgu. Madje nga më të përkedhelurat. E kanë lëvizur nga njëri burg në tjetrin në vendet që kërkon vetë, gjithmonë nën kujdesin e drejtuesve, paçka se ikën “ata të Saliut” pastaj edhe “ata të LSI” dhe erdhën “këta të Rilindjes”. Së fundmi thonë se për Bekimen ka treguar sensibilitet të lartë vetë drejtori i ri i sapoemëruar i policisë së burgjeve”, shkruan Thano nw gazetwn Dita.

Si për ironi të fatit ajo është gardiane pikërisht në burgun 302, ku është akomoduar së fundmi edhe Izet Haxhia, i cili është dënuar në mungesë si autor i vrasjes së Azem Hajdarit.

Kryeprokurorja Arta Marku ka vendosur sot pezullimin e dy prokurorevë, burrë e grua, Dritan Gina dhe Rovena Gashi të njohur si bashëpunëtorë të Adriatik Llallës. Me një njoftim për mediat, Prokuroria e Përgjithshme njofton vendimin për pezullimin e tyre, së bashku me akuzat që argumentojnë vendimin në fjalë.

Pezullimi i Rovena Gashit

Prokurori i Përgjithshëm znj.Arta Marku me vendimin nr.140, dt. 11-05-2018, bazuar në nenet 148/d pika 4, gërma “b” dhe 179 pika 7 të Kushtetutës së Republikës së Shqipërisë; në nenet 151, pika 1, gërma “b” dhe pika 2 gërma “b”; 155 dhe 160, pika 2, gërma “c”, të ligjit nr. 96/2016, “Për statusin e gjyqtarëve dhe prokurorëve në Republikën e Shqipërisë”, vendosi:

Pezullimin nga detyra të prokurores pranë Prokurorisë së Përgjithshme Tiranë, znj. Rovena Gashi.

Pezullimi i znj.Gashi u vendos pasi Kryeprokurorja u njoh me informacionin e Prokurorisë pranë Gjykatës së Shkallës Parë Durrës në lidhje me ngritjen e akuzës dhe marrjen në cilësinë e të pandehurit të shtetases Rovena Gashi për veprën penale:

“Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, në formën e deklarimit të rremë, parashikuar nga neni 257/a-2 i Kodit Penal.

Prokurorja Gashi do të jetë e pezulluar deri në përfundim të hetimeve ose gjykimit të procedimit penal të regjistruar pranë Prokurorisë pranë Gjykatës së Shkallës Parë Durrës.

Pezullimi i Dritan Gines

Prokurori i Përgjithshëm znj.Arta Marku me vendimin nr.141, dt. 11-05-2018, bazuar në nenet 148/d pika 4, gërma “b” dhe 179 pika 7 të Kushtetutës së Republikës së Shqipërisë; në nenet 151, pika 1, gërma “b” dhe pika 2 gërma “b”; 155 dhe 160, pika 2, gërma “c”, të ligjit nr. 96/2016, “Për statusin e gjyqtarëve dhe prokurorëve në Republikën e Shqipërisë”, vendosi:

Pezullimin nga detyra të prokurorit në Prokurorinë pranë Gjykatës së Shkallës së Parë Tiranë, z.Dritan Gina.

Pezullimi i z.Gina u vendos pasi Kryeprokurorja u njoh me informacionin e Prokurorisë pranë Gjykatës së Shkallës Parë Durrës në lidhje me ngritjen e akuzës dhe marrjen në cilësinë e të pandehurit të shtetasit Dritan Gina për veprën penale:

“Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, në formën e deklarimit të rremë, parashikuar nga neni 257/a-2 i Kodit Penal.

Prokurori Gina do të jetë i pezulluar deri në përfundim të hetimeve ose gjykimit të procedimit penal të regjistruar pranë Prokurorisë pranë Gjykatës së Shkallës Parë Durrës.