Aktualitet

Tashmë “bashkëpunëtori x” ka një emër dhe një fytyrë: është Albert Veliu, një ish-skafist dhe trafikant, i cili është vënë në epiqendër të audiopërgjimit të vëllait të ministrit të brendshëm, Agron Xhafaj.

Shkruan Ardit Rada
Pasi bëri publike bisedën audio mes A.Xhafajt dhe “bashkëpunëtorit x”, PD vendosi një ditë më pas, pas reagimeve të kryeministrit dhe ministrit të brendshëm, që të publikojë një intervistë video me vetë personin denoncues të Agron Xhafajt.

Dalja publike e Albert Veliut prodhoi një numër të ri akuzash direkte ndaj vëllait të ministrit. Veliu u shpreh se Xhafaj vijon të merret me trafik, se ai ra dakord ta ndihmonte atë për të kaluar disa kilogramë hashash drejt Italisë dhe se “Agron Xhafaj kontrollon Vlorën”. Veliu nuk fshehu edhe një dozë të lexueshme mllefi ndaj A.Xhafajt, kur tha se ai nuk i kishte sjellë asnjë paketë cigare në burg dhe se jetonte mes të mirave, kurse ai vetë ishte pa punë.

Deri këtu versioni i akuzave të Albert Veliut ndjek linjën e bisedës së përgjuar me Agron Xhafajn. Akuzat e reja vetëm sa kërkojnë të përforcojnë ato të vjetrat, ndërkohë që intervista e gjatë që PD i kishte marrë Veliut, la pas jo pak dyshime për lapsuset e të intervistuarit, por edhe në lidhje me disa qëndrime të ndryshme të krerëve demokratë në lidhje me aspekte konkrete të përgjimit dhe intervistës.

Dhe në këtë rrëmujë duket se është përfshirë jo vetëm bashkëpunëtori Veliu, por edhe vetë PD. Sipas një skeme e cila mund të mos jetë kryekëput një keqorganizim apo amnezi e personave që janë marrë me këtë histori, por një përllogaritje diabolike me qitje të largët.

Dhe ja pse:
Së pari, Albert Veliu ishte kontradiktor në shumë momente gjatë intervistës. Ai qe i pasaktë, sipas dosjes së tij penale të botuar nga mediat, në lidhjet me vitet e burgut që ka bërë në Itali, me llojin dhe sasinë e drogës me të cilën është kapur dhe në lidhje me autorësinë e përgjimit. Në pjesë të intervistës ai mohonte kategorikisht se kishte gisht në përgjimin e Agron Xhafajt, ndërkohë që më pas pohonte se Xhafaj përgjoi vetveten, e më tutje, se ai ishte përgjuar nga të tjerët.

Së dyti, edhe më kontradiktore se Albert Veliu, ka qenë PD në orët e fundit, në lidhje me përgjimin audio të A.Xhafajt. Ka të paktën dy versione të zyrtarëve të lartë të PD, në lidhje me autorin e përgjimit ndaj vëllait të ministrit. Njëri që thotë se përgjimi është vepër e një gazetari dhe tjetri se ai është bërë nga shërbimet. Nga ana tjetër, kur pyeten se cilat janë provat që ata kanë rreth autenticitetit të përgjimit, demokratët mjaftohen vetëm me deklarimin se përgjimi është i vërtetë dhe i pakontestueshëm.

Kjo amulli rreth një afere kaq delikate dhe me impakt politik të lartë, vështirë të jetë fryti i një frenezie të momentit apo i një moskoordinimi të rastit brenda selisë blu. Kur u njoftua konferenca e shtypit për intervistën video të Albert Velitu, orari i parë u shty me rreth treçerek ore. Vetëm më pas, kreu i PD Basha dhe tre denoncuesit e skandalit u vunë përballë shtypit dhe shfaqën intervistën. Një material i cili kishte brenda jo pak kontradikta logjike e pasaktësi konkrete.

Ajo që duket prej së largu, në një situatë të tillë, është se në fakt, bashkë me akuzat dhe sherrin politik në ngarkesë të ministrit Xhafaj, PD ka përgatitur me kujdes edhe një strategji paralele, një plan B ose një taktikë shpëtimi të minutës së fundit. Nëse ish-trafikanti vlonjat nxjerr nga goja të pavërteta dhe pasaktësi që transmetohen pa u censuruar nga ekrani i PD, kjo nuk do të thotë se dikush harroi të marrë gërshërët me vete, por se në rast shpalljeje të panipuluar të audio-përgjimit ndaj Agron Xhafajt, do të ishte gjithsesi komode t’ja hidhje fajin një të panjohuri, më shumë sesa ta mbaje të gjithin mbi shpinë.

Natyrisht PD po riskon jo pak, duke marrë për të mirëqena akuzat e një personi me kredibilitet të ulët, por gjithsesi duke e ekspozuar Veliun publlikisht me të gjitha pasaktësitë dhe alogjizmat e tij, ajo e ka krijuar tashmë një alibi rezervë “për ditë të keqe”. Pamfleti/

Nëse keni plane për nesër, ju bëjmë me dije se fundjava do të jetë e shoqëruar me shi.

Sot pasdite (e premte, dt.18) priten reshje të dobëta në të gjithë vendin.

Sipas IGJEUM: Nesër (e shtunë, dt.19) pritet që në orët e paradites të ketë reshje të dobëta në të gjithë vendin.

Nesër (e shtunë, dt.19) temperaturat minimale dhe maksimale të ajrit pritet të arrijnë:

në bregdet: 15 / 26 °C;

në vendet e ulëta: 14 / 25 °C;

në vendet malore: 10 / 22 °C.

Sot pasdite (e premte, dt.18) dhe nesër (e shtunë, dt.19) era pritet të fryjë e lehtë deri mesatare në bregdet.

Ditën e djeshme policia liroi dëshmitarin X, të identifikuar si Albert Veliu. Pasi dha dëshminë e tij te Krimet e Rënda, policia e la të lirë, ish-skafistin i cili duket se tashmë ka gjetur “strehë” në selinë blu.
Babalja, siç i thërrasin të gjithë në Vlorë, është parë sot te kafja e Partisë Demokratike nën shoqërinë e avokatit Ivi Kaso.

Të dy, nën shoqërinë e njëri-tjetrit kanë konsumuar me kënaqësi kafen e mëngjesit ndërsa Veliu vazhdon të jetë në selinë blu në pritje të zhvillimeve të mëtejshme pas video-rrëfimit publikuar dje në një dalje të jashtëzakonshme të vetë kryetarit Basha.

Në konferencën e dhënë me të mbërritur nga Sofja në Rinas, kryeministri Rama nuk nguroi të deklarojë se shfaqja e djeshme e video-dëshmisë së të ashtuquajturit dëshmitari X, i cili pranonte të kishte trafikuar drogë me Agron Xhafajn, vëllain e ministrit të Brendshëm, Fatmir Xhafaj, ishte një maskaradë e motivuar nga frymëzimi malinj, për të penguar rrugën e integrimit në BE.

“Unë nuk mund t’ju ndihmoj për asgjë, përgjigjja ime është e qartë dhe e prerë. Ajo që i është servirur publikut si material autentik është një manipulim i shëmtuar. Detajet se si dhe pse janë çështje të prokurorisë dhe të debatit kur diskutojmë pse u bë kjo dhe pse u bë pikërisht në këtë moment”,- tha ai.

I pyetur nëse kishte informacione të tjera shtesë për të mos besuar në dëshminë e dëshmitarit X, Rama tha se mbi të gjitha kishte sy për të parë e veshë për të dëgjuar.

“Ka vlerë të diskutojmë për këtë? Unë nuk kam më përgjigje për këtë. Kam sy, kam dhe vesh. Kur pashë dhe dëgjova nuk iu besova syve dhe veshëve. Pastaj u detyrova. E pashë, edhe ju vetë e dini që kjo është për të qeshur dhe për të qarë. Për të qeshur me nivelin mizerabël të kësaj farse dhe për të qarë për faktin që këtë e organizon një parti politike me qëllimin e hapur për të mashtruar opinionin publik dhe vazhduar atë që ka nisur, ofensivë kundër çeljes së negociatave me BE”,- shtoi ai.

Report tv sjell kronologjinë e lëvizjes së familjes së dëshmitarit ‘X’, Albert Veliu që pas publikimit të audio-përgjimit nga ana e Partisë demokratike. Fqinjët e Albert Veliut i cili banon në një shtëpi dy katëshe në lagjen ‘Topana’ të Vlorës, tregojnë se dy dite pasi është transmetuar audio- përgjimi, familja e tij është larguar nga shtëpia.

Pikërisht ky largim ka ndodhur ditën e mërkurë 16 maj rreth orë 20:30 minuta. Fqinjët dëshmojnë se kanë parë dy persona me një makinë të zezë që kishin shkuar poshtë shtëpisë së dëshmitarit ‘X’. Pas pak minutash gruaja dhe dy djemtë e Albert Veliut, kanë zbritur nga kati i trete i shtëpisë ku banonin dhe më pas kanë hipur në makinë për t’u larguar.

Nuk dihet se cilët janë personat që bënë lëvizjen e familjes së Veliut por komshinjtë pohojnë se ata janë disa shokë të Albert Veliu. Ndërkohë vet Albert Veliu është larguar nga shtëpia nje dite me pare, pra të martën me datë 15 Maj, 24 ore pas publikimit të audio-përgjimit (qe eshte bere publik te hene 14 maj) dhe besohet se gjatë këtyre ditëve ka qëndruar në Tiranë.

Pas largimit të tij nga shtëpia familjarët kanë qenë në ankth në lidhje me atë se çfarë po ndodhte, madje bashkëshortja e Albert Veliu ka komunikuar me fqinjët e saj ku ka shprehur edhe shqetësimin në lidhje me ngjarjen. Një nga fqinjët deklaron se bashkëshortja e Albertit i ka thënë se “çfarë i duhet atij (Albertit ) të përzihet sërish më gjëra të tilla, mi mori në qafë djemtë’.

Por që prej të mërkurës kur familja e dëshmitarit ‘X’ nuk është dukur në shtëpi. Për familjen Veliu, po ashtu nuk dihet nëse ajo edhe mund të jetë larguar jashtë Shqipërisë sikur edhe tentoi të bënte kryefamiljari Albert Veliu i cili ishte nisur në një udhëtim drejt Kosovës.

Partia Demokratike nuk e bëri të ditur emrin e gazetarit që ka bërë përgjimin, por ai që intervistoi Albert Veliun dhe intervista e publikua nga PD, është Jetmir Olldashi, shkruan Top Channel që i ka kërkuar edhe një intervistë, por ai ka refuzuar të flasë.

Po kush është gazetari Jetmir Olldashi?
Ai ka një eksperiencë të gjatë si gazetar, mes gazetarisë dhe zëdhënësit në zyrat e shtypit të Aluiznit para vitit 2013.

Jetmir Olldashi, aktualisht administron portalin online “Boldneës”, si dhe është pjesë stafit të emisionit “Ajsberg” që drejtohet nga gazetari Artur Çani.
Ndërsa më herët ka qenë pjesë e stafit të emisionit “Të Paekzpozuarit” të Ylli Rakipit gjatë kohës kur emisioni transmetohej në “Ora News” dhe “News 24”.
Olldashi, ka punuar edhe pranë Autoritetit të Mediave Audiovizuale si dhe në ndërmarrjen e Ujësjellës Kanalizime, kur kryetar bashkie ka qenë Lulzim Basha.

Partia Demokratike u kujdes ta shmangte emrin dhe fytyrën e tij gjatë transmetimit të intervistës me Albert Veliun, por kolegët që e njohin e identifikuan nga zëri dhe ai vetë nëpërmjet telefonit e konfirmoi se është autori i kësaj interviste, por ende mbetet mister kush është gazetari që sipas Enkelejd Alibeajt, realizoi përgjimin.