Aktualitet

Më datë 7 qershor gjyqtari Besnik Hoxha do të vendosë nëse do të rihapet dosja “Hajdari”.  I ekstraduar pak ditë më parë nga Turqia për llogari të drejtësisë shqiptare sepse konsiderohet si një nga bashkëpunëtorët në vrasjen e Hajdarit, Izet Haxhia ka kërkuar rigjykim të kësaj çështjeje sepse është dënuar në mungesë.

KËRKESA E PLOTË

Për rivendosjen në afat të apelit kundër vendimit të Gjykatës së Rrethit Gjyqësor Tiranë, nr. 316, datë 29.04.2002, në ngarkim të të pandehurit Izet Haxhia, lënë në fuqi nga Gjykata e Apelit Tiranë, me vendimin nr. 351, datë 09.07.2002.

Gjykata e Rrethit Gjyqësor Tiranë, pasi ka gjykuar çështjen penale në ngarkim të të pandehurit Izet Haxhia, në përfundim ka vendosur: Të deklarojë fajtorë të pandehurin Izet Haxhia, për veprën penale të “vrasjes me paramendim”, e kryer në bashkëpunim të Azem Hajdarit, të parashikuar nga neni 78 dhe 25 i Kodit Penal:

Të deklarojë të pafajshëm të pandehurin Izet Haxhia për veprën penale të “vrasjes me paramendim”, e kryer në bashkëpunim, mbetur në tentativë të Zenel Nezës, parashikuar nga nenet 78, 25, 22 të Kodit Penal; Përfundimisht, Gjykata e dënon të pandehurin Izet Haxhia me 25 vjet burgim.

Ky vendim i Gjykatës për të pandehurin Izet Haxhia është i pabazuar në dispozitat e Kodit të Procedurës Penale, në Dispozitat Kushtetuese dhe në Aktet Ndërkombëtare. Më konkretisht: Vërtetohet se gjykimi i kësaj çështjeje në të gjitha shkallët e gjykimit është zhvilluar në mungesë të të pandehurit Izet Haxhia dhe pa dijeninë e tij. Ai nuk ka lëshuar asnjë lloj prokure për avokatin që e ka përfaqësuar në gjykimin e Gjykatës së Shkallës së Parë. Ai nuk ka pasur dijeni për ankimimin që i është bërë vendimit në Gjykatën e Apelit Tiranë, e cila e ka lënë në fuqi vendimin e Shkallës së Parë.

Vetë Izet Haxhia provohet se nuk ka bërë deklarime përpara organeve proceduese. I pandehuri Izet Haxhia, në vazhdimësi, deri më datën 08.05.2018 kur u ekstradua, ka qëndruar në Turqi, nën mbikëqyrjen e vazhdueshme të autoriteteve shtetërore të këtij vendi. Vërtetohet që drejtues të Ministrisë së Drejtësisë së Republikës së Shqipërisë i kanë komunikuar Ministrisë së Drejtësisë së Turqisë, më datën 06.04.2007, garancitë e Shtetit Shqiptar për rigjykimin e Izet Haxhisë, në zbatim të Dispozitave Kushtetuese të Kodit të Procedurës Penale – 147, 148, 449, 450, 453.

Gjithashtu, drejtuesit e Ministrisë së Drejtësisë kanë garantuar respektimin e Konventës Europiane për Mbrojtjen e të Drejtave dhe Lirive Themelore të Njeriut, si edhe të Paktit Ndërkombëtar të 16 dhjetorit 1966 në lidhje me të Drejtat Civile dhe Politike. Duke u bazuar në këto garanci, i pandehuri Izet Haxhia u paraqit pranë autoriteteve të Policisë turke me qëllim realizimin e ekstradimit më datën 08.05.2018 në Rinas, Shqipëri, duke qenë i bindur se ai do të dëgjohet nga gjykatat shqiptare, sepse çështja penale në ngarkim të tij do të rigjykohej, meqenëse ai është gjykuar dhe dënuar në mungesë.

Për t’u realizuar premtimi i Qeverisë Shqiptare, se me ekstradimin e Izet Haxhisë nga Turqia në Shqipëri, çështja penale do të rigjykohej, meqenëse ishte gjykuar në mungesë, i pandehuri pranoi ekstradimin dhe paraqet kërkesën për rivendosjen në afat të ankimimit për në Gjykatën e Apelit. Në bazë të nenit 450, pika 1, germa e, “Kur personi është gjykuar në mungesë, sipas nenit 352 të këtij Kodi dhe kërkon rigjykim të çështjes, kërkesa nuk mund të refuzohet.

Vlen të theksohet se në një shkresë që Ministria e Punëve të Jashtme të Shqipërisë, që mban datën 15.07.2008, nr. 10102, drejtuar Gjykatës Europiane për të Drejtat e Njeriut, Seksioni i Katërt, Strasburg, firmosur nga agjente qeveritare Suela Mëneri, thuhet: Në përgjigje të letrës suaj të datës 20 mars 2008, lidhur me ankimimin nr.34783/06 “Izet Haxhia Kundër Shqipërisë, po ju informoj sa vijon:

Shtetasi Izet Haxhia është gjykuar dhe dënuar në mungesë. Në përgjigje të pyetjes suaj të parë të Gjykatës, sa i takon të drejtës së ankuesit për të kërkuar rihapje të proceseve gjyqësore, që përfunduan me dënimin e tij, në kushtet kur procesi për ekstradimin e ankuesit nga Turqia është ende pezull, sqarojmë se Shteti Shqiptar, ndër të tjera i ka ofruar Shtetit Turk garanci për respektimin e së drejtës së ankuesit për t’u rigjykuar konform Kushtetutës së Shqipërisë dhe neneve 147, 148, 449, 450, 453 të Kodit të Procedurës Penale.

Në këto rrethana, në bazë të dispozitave që cituam më lart, kërkojmë pranimin e kërkesës për rivendosjen në afat të së drejtës së ankimimit për në Gjykatën e Apelit Tiranë.

Prej vitesh, Haxhia ka jetuar në Turqi dhe së fundmi, Gjykata Supreme e Turqisë i tha “po” ekstradimit të Izet Haxhisë. Procedurat kishin nisur që në vitin 2007, ku në krye të qeverisë ishte Berisha. Ministria e Drejtësisë shqiptare i ka siguruar palës turke se do ta rigjykojë Haxhinë në rast se ekstradohet.

Zonjat në kabinetin qeveritar rezultojnë me më pak të ardhura krahasuar me ministrat. Kryeministri Edi Rama kur mori qeverinë vendosi që të bënte një ndarje të barabartë duke emëruar 7 femra dhe 7 meshkuj.

Në deklaratat e pasurisë të dorëzuara për vitin 2017 pranë Inspektoratit të Lartë të Deklarimit dhe Kontrollit të Pasurive, zonjat rezultojnë me pasuri disi më të ulët se kolegët e tyre.
Ministrja e Brendshme, Olta Xhaçka është ajo që ka deklaruar pagën e saj, pagën e bashkëshortit dhe të ardhura nga qeratë.

“Paga si ministre e MMSR, 259.300 lekë; Paga si Ministre e Mbrojtjes, 437.994 lekë; Të ardhura si deputetë, 575.436 lekë Honorare nga komisionet, 20.910 lekë; Kredi 1824.07 euro; Bashkëshorti të ardhura nga qeraja e dyqanit, 1.601.320 lekë; Bashkëshorti vijon pagesën e kredisë me vlerë 2301.56 euro për blerje automjeti”, është pasuria e deklaruar nga Xhaçka. Krahasuar me vitin 2016 ajo ka një rritje. Xhaçka ka deklaruar në 2016: Të ardhura nga paga dhe dieta si deputete, 2 528 836 lekë;
Në proces marrje kredie për shlyerjen e detyrimeve sipas kontratës së blerjes së një apartament banimi 2+1 në Tiranë, për të cilën ka parapaguar 19 000 euro në vitin 2012.

Pasuria e Nikollës

Një tjetër ministre që nuk renditet mes më të pasurve është ajo e Arsimit, Lindita Nikolla. Gjatë vitit 2017 ajo ka deklaruar: Të ardhura nga paga, 1.015.567 lekë; Të ardhura nga dietat, 22.500 lekë; Të ardhura kalimtare pas largimit nga funksioni, 524.280 lekë; Bashkëshorti nga paga si dekan, 109.000 lekë; Bashkëshorti honorare anëtar Senati UPT, 215.825 lekë dhe paga e vajzës në BSH, 85.314 lekë. Nëse bëjmë një krahasim me vitin 2016 situata është në të njëjtat nivele, pasi dhe një vit më parë të ardhurat e vetme të Nikollës ishin paga e saj, e bashkëshortit dhe e vajzës.

Pasuria e Sonila Qatos

Krahasuar me Nikollën dhe Xhaçkën, Sonila Qato është një ministre me shumë të ardhura. Ministrja për Mbrojtjen e Sipërmarrjes rezulton me 6 llogari bankare. Po ashtu ka të ardhura nga qeraja e një apartamenti në Tiranë. Ajo që bie në sy është se gjatë vitit 2017 bashkëshorti i saj është marrë me tregti automjetesh. Ai ka blerë makina në Gjermani dhe më pas i ka shitur në Shqipëri.

Ministrja e Drejtësisë Etilda Gjonaj ka një numër të madh të ardhurash. Përveç pagës si ministre, ajo ka deklaruar dhe të ardhura të tjera nga pozicioni i zv/ministres së Drejtësisë që mbante më parë. Po ashtu dhe shumë të ardhura si komisionere pranë Avokatit të Popullit. Ndërsa bashkëshorti i saj ka pasur të ardhura nga shitja e aksioneve në një biznes që ai ka pasur.

“Bashkëshorti të ardhura nga shitja e kuotave të shoqërisë “23 Option” shpk, 10,000 Euro. Bashkëshorti të ardhura si i punësua në “23 Option” shpk, 387.907 lekë”, thuhet në deklaratë.

Një tjetër ministre me të ardhura të larta është ajo e Kulturës, Mirela Kumbaro. Ajo që bie në sy është se krahasuar me një vit më parë, Kumbaro ka hapur llogari bankare në Francë. “Llogari në La Banque Postale Paris, shtuar me 1.857 euro; Interesa depozite në La Banque Postale Paris, +113 euro; Pakësuar depozita në La Banque Postale Paris, 9.261 euro”, thuhet në deklaratën e ministres së Kulturës. Ajo që bie në sy është se të ardhurat më të larta i ka bashkëshorti i saj, gazetari i njohur Aleksandër Furrxhi, i cili në vitin 2017 ka përfituar rreth 35 milionë lekë të vjetra nga puna si gazetar.

Parashikimet në ligj

Në ligjin për deklarimin e pasurisë janë përcaktuar dhe kategoritë e të ardhurave dhe shpenzimeve që duhen deklaruar. Sipas ligjit, çdo zyrtar deri më 31 mars duhet të deklarojë për vitin që la pas: pasuritë e paluajtshme dhe të drejtat reale mbi to; pasuritë e luajtshme, të regjistrueshme në regjistrat publikë, dhe të drejtat reale; sendet me vlerë të veçantë mbi 300 000 lekë; vlerën e aksioneve, të letrave me vlerë dhe pjesët e kapitalit në zotërim; vlerën e likuiditeteve, gjendje në cash jashtë sistemit bankar, në llogari rrjedhëse, në depozitë, në bono thesari dhe në huadhënie, në lekë ose në valutë të huaj; detyrimet financiare ndaj personave juridikë dhe fizikë, të shprehura në lekë ose në valutë të huaj; të ardhurat personale për vitin, nga paga ose pjesëmarrja në borde, komisione ose çdo veprimtari tjetër që sjell të ardhura personale; licencat dhe patentat që sjellin të ardhura. dhuratat dhe trajtimet preferenciale, përfshirë identitetin e personit fizik ose juridik, prej nga vijnë apo krijohen dhuratat a trajtimet preferenciale; angazhime në veprimtari private me qëllim fitimi dhe çdo shpenzim i deklarueshëm, me vlerë mbi 300 000 lekë, i kryer gjatë vitit të deklarimit/ Sot

Ndalohet dhe më pas hetohet e lirë një shqiptare 63 vjecare në Itali, e cila u bë protagoniste e një ngjarje të shëmtuar në mes të tregut.

Ajo u akuzua se vodhi të brendshme në një nga tezgat e tregut javor në Romano, e më pas, iu lëshua duke dhunuar pronaren, e këputi një shpullë fytyrës dhe më pas e gërvishti me thonj.

Pronarja e ka denoncuar dhe në vend ka ndërhyrë policia, e cila bëri ndalimin e gruas shqiptare.

E dëmtuara u dërgua në spital, ku u mjekua, kurse shqiptarja po hetohet e lirë.

“Burri kur jep fjalën therr djalën”, “Shqiptari kryet e pren dhe besën s’e then”. Prej shekujsh besa e shqiptarëve ka qenë një nga karakteristikat kryesore, që ka kushtëzuar dhe zhvillime të rëndësishme historike. Por, tashmë karakteristika e besës është kthyer në një mit.

Realiteti qëndron ndryshe, teksa nga anketa për Cilësinë e Jetës së Europës, ku përfshihen vendet e BE-së dhe Ballkanit Perëndimor, rezulton se shqiptarët të jenë populli më mosbesues i Europës. Në anketën e zhvilluar për Cilësinë e Jetës nga Komisioni Europian një seksion të veçantë e zinin edhe çështjet e besimit dhe tensionet sociale. Duke filluar që nga marrëdhëniet ndërpersonale dhe deri tek ato institucionale si qeveria, parlamenti, sistemi ligjor apo media, shqiptarët janë shprehur mosbesues (besim i ulët).

Për pyetjen “A mund të thoni se pjesa më e madhe e njerëzve mund të besohen apo se nuk mund të jesh shumë i kujdesshëm në marrëveshje me njerëzit?”, Shqipëria shënoi pikët më të ulëta në të gjithë Europën, vetëm 2.4. Mesatarja e Bashkimit Europian është 5.2 pikë, ku rekordin për besimin ndaj njërit tjetrit e kanë Danimarka dhe Finlanda. Në rajon, pas nesh, më pak besim tek njërit tjetri e kanë maqedonasit, me 3 pikë dhe më të lartë turiqit, serbët e malazezët. Interesante është që në rastin e Shqipërisë, besimin më të ulët e shfaqin ata që janë në punë (2.3), ndërsa të papunët priren të besojnë më shumë tek njëri-tjetri (2.5).

Problemet me besimin shkojnë përtej marrëdhënieve ndërpersonale. Mosbesimi është i lartë edhe te institucionet. Edhe për sa i përket besimit te parlamenti, Shqipëria ka shënuar gjithashtu pikët më të ulëta në të gjithë Europën, vetëm 2.6 pikë.

Sistemi ligjor gjithashtu ka reflektuar mungesë besimi. Në të gjithë Europën, shqiptarët kanë treguar se kanë besimin më të ulët, me 2.7 pikë.

Ndryshe nga sa më sipër, për sa i përket besimit në media, edhe pse më i ulët se mesatarja europiane, ai është më i lartë se në vendet fqinje si Maqedonia dhe Greqia, ku janë shënuar pikët më të ulëta në Europë. Besimi në media në Shqipëri shënoi 4.6 pikë, ndërsa mesatarja europiane shënoi 4.8 pikë.

Besimi në polici ka shënuar 5.6 pikë, më ulët se mesatarja e europiane prej 6.4 pikësh. Vendet si Finlanda, Danimarka apo Austria reflektojnë besimin më të lartë në polici, ndërsa më të ulëtin Maqedonia, Bullgaria dhe Sllovakia.

Ndër vendet kandidate për anëtarësim në Bashkimin Europian, Maqedonia dhe Shqipëria kanë reflektuar besimin më të ulët ndaj qeverisë. Në Maqedoni besimi në qeveri shënoi 3.5 pikë, ndërsa në vendin tonë 3.8 pikë. Besimi është shumë më i lartë në vendet e tjera të rajonit, madje më lart se mesatarja e Bashkimit Europian. Në Serbi, besimi te qeveria shënoi 5.1 pikë, në Malin e Zi 5.3 pikë, ndërsa në Turqi besimi te qeveria shënoi 6.2 pikë. I ulët ka qenë besimi edhe tek qeverisja lokale, ku në Shqipëri shënoi 3.9 pikë nga 5.6 që është mesatarja e BE-së.

Për sa i përket besimit në sistemin bankar, Shqipëria ka të njëjtin nivel si mesatarja e Bashkimit Europian me 4.9 pikë. Vendet kandidate kanë reflektuar besim të lartë tek bankat krahasuar me vendet anëtare të BE-së që u prekën më së shumti nga kriza financiare e vitit 2009 si Italia, Greqia, Spanja, Kroacia.

Kënaqësia me gjendjen aktuale të ekonomisë është e dyta më e ulët në Europë, me 3.1 pikë. Më e ulëta është në Greqi, shteti që ka kaluar një krizë të thellë ekonomike dhe borxhesh, me 2.4 pikë. Në Shqipëri, besimin më të ulët e kanë të papunët, me 2.9 pikë.

Në Anketën e Cilësisë së Jetës 2016 janë mbledhur të dhëna të krahasueshme dhe të besueshme në të gjithë Europën, dhe për herë të parë janë përfshirë vendet kandidate si Shqipëria, Maqedonia, Mali i Zi, Serbia dhe Turqia. Anketa në këto vende është zhvilluar në periudhën nëntor 2016- mars 2017, me një kampion të zgjedhura rastësisht prej 1,000 banorësh për shtetet e vogla dhe 1300 banorësh për shtetet më të mëdha. Në të gjithë Europën janë zhvilluar në total 36,900 intervista./Monitor

Bashkia e Vlorës po përgatitet për shfrytëzimin e burimeve alternative për ndriçimin e mjediseve publike në qytet, për shkak të rritjes së ndjeshme të sasisë së energjisë elektrike që nevojitet për këtë qëllim.

Kryetari i Bashkisë, Dritan Leli, thotë për ATSH-në se, përmes një projekti që do të financohet nga BE-ja, do të mundësohet shfrytëzimi i energjisë diellore, çka do të kërkojë instalimin e një sistemi panalesh të standardit bashkëkohor. Në bashkëpunim me Delegacionin e BE-së në Tiranë, është në fazën e finalizimit procesi për të realizuar këtë projekt, që tashmë është gati dhe që mundëson aplikimin e një forme tepër efiçente për nevojat e ndriçimit në qytet. Aktualisht, Bashkia e Vlorës planifikon një fond mujor prej 13 milionë lekësh, ose rreth 100 mijë euro, për nevojat e ndriçimit të mjediseve publike, një shifër kjo rreth 5 herë më e madhe krahasuar me vitin 2015, kur për ndriçimin e qytetit konsumohej çdo muaj një sasi energjie elektrike e konvertuar në 3 milionë lekë, ose 20 mijë euro. Transformimi dhe modernizimi i hapësirave publike, rrjedhojë e investimeve të shumta në infrastrukturë, që janë realizuar gjatë këtyre 3 viteve, shtuan edhe nevojat për energji elektrike. Në qytetin e Vlorës është instaluar një sistem bashkëkohor ndriçimi, që shoqëron projektet e përfunduara apo që janë në proces zbatimi në këtë qytet. Projekti i “Lungomares”, Sheshi i ri i emërtuar “Tre Racat”, unaza e re e qytetit nga godina e Poliklinikës deri në Ujin e Ftohtë, ajo nga godina e spitalit deri tek Bashkia dhe në hyrje të qytetit, si edhe një sërë projektesh të rehabilitimit apo rikonstruksionit të plotë të rrugëve dhe hapësirave mes blloqeve të banimit, janë shoqëruar edhe me instalimin e sistemeve përkatëse bashkëkohore të ndriçimit. Po kështu edhe projekti i aksit të rëndësishëm “Transballkanikja”, së bashku me segmentin e hyrjes së re të qytetit, janë plotësuar me sistemin e munguar të ndriçimit,çka ka ndryshuar plotësisht atmosferën e Vlorës, veçanërisht gjatë orëve të mbrëmjes dhe të natës Dikur e zhytur në errësirë, sot Vlora ka një standard bashkëkohor ndriçimi të krahasueshëm me qytete të zhvilluara në vende të tjera, çka vlerësohet edhe nga turistë të huaj që vijnë këtu. Ky shtim i dukshëm i nevojave për ndriçim, ka nxitur Bashkinë për t’ju drejtuar mënyrave formave të tjera të burimeve alternative dhe konkretisht asaj të energjisë diellore, çka përputhet edhe me profilin klimatik të qytetit. Në këtë këndvështrim, kryebashkiaku Leli, thotë se, projekti në fjalë vlerësohet mjaft efektiv në pikëpamjen ekonomike por edhe në funksion të pritshmërive të zhvillimit të qytetit. Kjo formë bashkëkohore, u shtohet investimeve të realizuara në funksion të asaj që emërtohet profili “smart city”, në kuadër të të cilit janë implementuar projekte intriguese, sikundër është “SmartCity Lungomare”, i vlerësuar me Çmim Kombëtar nga Shoqëria Civile, apo të tjera që janë në synimet e Bashkisë për muajit dhe vitet në vazhdim. Qyteti i Vlorës, po përjeton aktualisht një periudhë transformimi të plotë. Mes investimeve të shumta në proces, përfshihet edhe projekti i rikonstruksionit dhe rikonceptimit të bulevardit Vlorë-Skelë, ku punimet në segmentin e parë, janë në një fazë intensive./atsh