Aktualitet

“Nënstacioni i ri elektrik 110/35/20 kV në Himarë është një nga investimet më serioze që janë bërë vitet e fundit në energjetike në gjithë zonën e bregut”, deklaroi ministri i Infrastrukturës dhe Energjisë, Damian Gjiknuri.

Gjatë inspektimit të punimeve në këtë nënstacion elektrik nga Operatori i Sistemit të Transmetimit, Gjiknuri theksoi se “ndryshimi këtu është thelbësor, pasi mjafton që qytetarët të kujtojnë disa vite para, furnizimi me energji në këtë zonë ka qenë problematik. Këto probleme nuk ekzistojnë më, por ne po i paraprijmë zhvillimeve të pritshme turistike për gjithë zonën e bregut”.

Administratori i Operatorit të Sistemit të Transmetimit Klodian Gradeci tha se “investimi është pjesë e bashkëpunimit shqiptaro-gjerman, falë mbështetjes me kredi të butë nga banka KFW”.

Duke sqaruar se financimi ka nisur që me ndërtimin e Unazës së Jugut 110 kv, Gradeci sqaroi se “faza e fundit ishin dy nënstacionet, ai i Orikumit dhe Himarës me vlerën 6.3 milion euro. Investimi garanton sigurinë e furnizimit dhe cilësinë e tensionit për të gjithë këtë zonë”.

Ndërsa administratori i OSHEE-së Adrian Çela njoftoi se pas këtij investimi nga OST, kompania e shpërndarjes nis në Shtator ndërhyrjen për rrjetin e ri 20 kV që prek gjithë vijën bregdetare.

“Kemi arritur të garantojmë një sezon turistik normal për të gjithë pushuesit. Ky është viti i tretë që kemi aplikuar dhe njësitë e gatishmërisë. Pra, skuadra speciale nga qytete të tjera të Shqipërisë alokohen gjatë 3 muajve të sezonit nga Velipoja, përgjatë gjithë vijës bregdetare, Durrës, Shëngjin, Golem, Vlorë deri në Sarandë”, nënvizoi Çela.

Çela theksoi se ky investim i paraprin një investimi tjetër të madh që do të nisë Operatori i Shpërndarjes për të cilin puna do të nisë në muajin shtator.

“Është një investim në shifrën rreth 16 milion euro vetëm për zonën e bregdetit ku është Himara, Dhërmiu, Qeparoi, Vunoi, Livadhja, Jala e Palasa do bëhen 7 fidera të rinj”, tha Çela./k.s/a.g//ATSH

Pas revolucionit të gjelbër me mbjelljen e mbi 120 mijë pemëve, Tirana është gati të bëhet qyteti i parë në Ballkan që sjell sistemin e biçikletave pa stacion “Smart Bike Share”.

Gjiganti “Mobike”, kompania që zbaton me sukses në shumë qytete të mëdha të botës, si Parisi apo Firence, sistemin e biçikletave pa stacion, një mënyrë ekologjike dhe inovative për të lëvizur në qytet, këtë javë do të nisë zyrtarisht edhe në Tiranë.

Në Ditën Botërore të Biçikletave, kryetari i Bashkisë së Tiranës, Erion Veliaj dhe drejtori i “Mobike”, Massimiliano Rubin, nënshkruan marrëveshjen e bashkëpunimit që sjell në Tiranë 4 mijë biçikleta “Mobike”.

Bashkë me aktivistët e EcoVolis, ata testuan mënyrën e funksionimit të biçikletave të para të ardhura në kryeqytet, ndërsa Veliaj lajmëroi se nga java tjetër në rrugët e Tiranës do të shohim me qindra biçikleta ngjyrë portokalli “Mobike”.

“Mobike është një kompani e cila në Shqipëri do të operojë si një bashkëpunim kinezo-italian. E pamë herën e fundit që ishim në Bashkinë e Firences, ndaj pa humbur kohë, duke parë se edhe shumë bashki të tjera në Holandë kanë futur konceptin e Mobike, jemi gati që javën tjetër të sjellim qindra biçikleta në Tiranë, për ta bërë masive përdorimin e biçikletës në qytetin tonë”, tha Veliaj.

Kryebashkiaku tha se ardhja e biçikletave do të sjellë një ndryshim të vërtetë në Tiranë. Kjo e rendit Tiranën si qyteti i parë në Ballkan që fut një koncept të tillë të lëvizjes së qytetarëve.

“Siç Tirana sjell gjithmonë risi dhe ka qenë e para në nisma të tilla, me ardhjen e Mobike bëhemi qyteti i parë në Ballkan që fusim sistemin e biçikletave pa stacion. Pra, secili me celularin e vet, shkarkon aplikacionin dhe duke skanuar barkodin e biçikletës, mund ta përdorë atë. Gjatë kësaj jave do të bëjmë disa testime, kurse nisjen zyrtare e kemi në datën 8 Qershor. Për të gjithë ata që kanë pritur që teknologjia dhe mobiliteti të transfomojnë Tiranën, ka ardhur dita. Ky është momenti ynë për të transformuar Tiranën me një celular dhe një biçikletë”, theksoi Veliaj.

Aktivisti Ened Mato do të ndjekë ecurinë e sistemit “Bike Share” në Tiranë, tashmë si kryebashkiak i Biçikletave. Gjithashtu, do të mbikëqyrë edhe zgjerimin e rrjetit të korsive të dedikuara për çiklistët, si dhe promovimin e biçikletës tek të rinjtë, si mjeti më i mirë për të lëvizur në një qytet si Tirana.

“Lajmi tjetër i mirë është se Tirana do të ketë një kryetar bashkie vetëm për biçikletat dhe ky është Ened Mato: një aktivist, i cili gjithsesi e bën këtë punë, por tani besoj se ka ardhur koha të kemi dikë me kohë të plotë që të kujdeset jo vetëm për përdorimin e biçikletave, por edhe për korsitë, për mësimin e biçikletave në shkolla, kopshte, e mbi të gjitha të promovojë kulturën e biçikletës. Qyteti ynë ka vetëm një shpëtim: duhet të përqafojmë biçikletën, nuk mund të jemi robër të makinës. Ndaj, dua t’i uroj Enedit mirë se erdhe në skuadër dhe shumë suksese në këtë sfidë të jashtëzakonshme, të cilën mund ta fitojmë të gjithë bashkë”, tha Veliaj.

Përfaqësuesi i Mobike, Massimiliano Rubin, u shpreh i lumtur për përfundimin me sukses të këtij projekti, i cili e rendit Tiranën krah qyteteve me zhvillim më të madh dhe në thelb ka ruajtjen e natyrës. “Është gëzim i madh për ne që ia dolëm të sillnim biçikletat “Mobike” këtu. Faleminderit kryetarit, stafit të tij që kanë punuar për të mbështetur projektin që synon të “gjelbërtën”, që e prezanton Tiranën si një qytet që po zhvillohet gjithnjë e më shumë, si një qytet inovativ dhe ‘green’”, tha Rubin.

Aktivisti Ened Mato përshëndeti nismat e bashkisë që nxisin përdorimin e biçikletave dhe ftoi të rinjtë që të pedalojnë, si një mënyrë e mirë jo vetëm për të mbajtur trupin në formë, por edhe për të kontribuar për një qytet të pastër.

Për të përdorur biçikletat pa stacion duhet të shkarkoni aplikacionin “Mobike” në celularin tuaj. Regjistrohuni me numrin tuaj të telefonit dhe zgjidhni në hartë biçikletën më të afërt. Më pas, me anë të telefonit, bëni skanimin e “barcode” të biçikletës dhe nga ky moment mund ta përdorni atë në qytetin e Tiranës./k.s/ /a.g/ATSH

540 fermerë nga qarku i Elbasanit janë përfitues të skemës kombëtare të qeverisë për mbështetjen e bujqësisë.

Zëvendësministri i Bujqësisë, Dhimitër Kote gjatë turit për prezantimin e projekteve zhvilluese për qarkun e Elbasanit ku ishte i pranishëm edhe Kryeministri Edi Rama, bëri të ditur se skema kombëtare e qeverisë parashikon mbështetje për fermerët në vlerën e 20 milionë eurove.

Sipas Kotes, nga kjo skemë kanë përfituar 540 fermerë të qarkut Elbasan, nga të cilët 100 janë blegtorë.

“Përmes mbështetjes me skemën direkte u bë e mundur mbjellja e 300 ha në këtë qark”, – tha Kote, ndërsa ftoi fermerët të zgjerojnë investimet e tyre duke i siguruar ata për fonde dhe mbështetje teknike.

Por, mbështetje për fermerët shqiptarë, sipas numrit 2 të Ministrisë së Bujqësisë, po vjen edhe nga institucionet ndërkombëtare financiare.

Përmes IPARD II, projekt i Bashkimit Europian po mbështetet ndjeshëm zhvillimi i bujqësisë shqiptare.

Kote u bëri thirrje të gjithë emigrantëve shqiptarë të kthehen e të investojnë kapitalet e tyre në agroturizëm, i vetmi sektor, siç u shpreh ai, fitimprurës.

“E keni mbështetjen financiare. Modelet kanë dhënë rezultate të jashtëzakonshme. Nevojitet orientimi i fermerëve dhe një strategji afatgjatë që t’i rezistojë kohës dhe produkti të shkojë për eksport e agroturizëm”, – deklaroi ai.

Kjo javë e re që po vjen, pritet të sjelli disa zhvillime mjaft interesante rreth proceseve të rëndësishme që lidhin me fije të forta, drejtësinë dhe politikën në Shqipëri.

E para lidhet me ardhjen e përgjigjes nga laboratori shkencor i Romës në lidhje me autenticitetin e audiopërgjimit të Dëshmitarit “X” ose Albert Veliut, i njohur me nofkën “Babalja”. Prej saj varet besueshmëria e kauzës së opozitës ose fati politik i ministrit të Brendshëm Fatmir Xhafaj dhe mazhorancës.

E dyta lidhet me vendimin juridik për kalimin ose jo në procesin e “vettingut” të ish Kryeprokurorit të Përgjithshëm Adriatik Llalla, i cili është strehuar sëfundi në Turqi.

Dhe e fundit, kemi seancat e proceseve administrative të vettingut për dy prokurorë dhe një gjyqtar, numri më i madh i të filtruarve brenda një jave nga sistemi i drejtësisë, qëshkurse ka nisur ky proces pas reformës në drejtësi.

VJEN PERGJIGJA NGA ITALIA PER AUDIOPERGJIMIN e “BABALES”
Ndërkohë që Albert Veliu është në pritje të përgjigjes nëse mund të përfitojë azil apo jo në shtetin Kosovar, prokuroria pritet të marrë javën tjetër ekspertizën audio të përgjimit. Pas nisjes së hetimeve për materialin e transmetuar nga Partia Demokratike prokuroria e dërgoi atë në një laborator të specializuar në Itali.

Burime nga organi i akuzës konfirmuan se përgjigja e letërporosisë nëpërmjet ministrisë së drejtësisë pritet të vijë javën e ardhshme ku do të mësohet mbi vërtetësinë e materialit. Pak kohë më parë vëllai i ministrit të brendshëm pretendoi se audio përgjimi nuk është i vërtetë dhe se zëri nuk është i tiji duke ngritur dyshime se regjistrimi ishte manipuluar në mënyrë të qëllimshme dhe ishte përdorur politikisht, raporton Alpenews. Tashmë prokuroria pret vetëm përgjigjen e laboratorit për të vazhduar të njëjtën linjë hetimi si ne atë të kallëzimit të rremë si në rastin Doshi-Bami.

Albert Veliu, ka thënë në Prokurori se audio-regjistrimi është i vërtetë dhe ishte kryer prej tij, pasi kishte disa inate dhe xhelozi të vjetra me vëllain e ministrit të Brendshëm Fatmir Xhafaj. Pas këtyre deklarimeve oficerë të prokurorisë shkuan në Vlorë në lokalin ku pretendohet se është realizuar përgjimi ndërsa sekuestruan kamerat e sigurisë edhe të bizneseve të tjera në zonë. Për çështjen u regjistruan dy procedime penale njëri në prokurorinë e Tiranës dhe një tjetër tek krimet e rënda por që më pas u bashkuan në një të vetëm.

ME 6 QERSHOR, VENDOSET FATI I ADRIATIK LLALLES
Ish-Kryeprokurori Adriatik Llalla do të përballet me Kolegjin e Posaçëm të Apelimit, këtë javë. Me 6 qershor do të vendoset nëse Llalla, do t’i nënshtrohet procesit të Vettingut apo jo. Kolegji i Posaçëm i Apelimit rinisi, javën që po lëmë pas, shqyrtimin e ankimimit të Komisionerit Publik. Ky i fundit e kishte quajtur të padrejtë vendimin e marrë nga KPK për ndërprerjen e vettingut ndaj ish-kryeprokurorit Adriatik Llalla.

Ish kreu i akuzës nuk ishte i pranishëm në seancë por ai kishte paraqitur një prokurë te lëshuar në 28 maj nga Turqia. Në seancën e KPA –së, komisionieri Florian Ballhysa tha se ish kryeprokurori nuk kishte ndjekur rrugën e duhur ligjore për t’u tërhequr nga sistemi. Ballhysa e ka argumentuar këtë pretendim me arsyetimin se Llalla ende mban statusin e magjistratit dhe të prokurorit, pasi nuk ka paraqitur kerkesë për dorëheqje KLD-së ose dhe Prokurorisë së Përgjithshme. Sipas kësaj logjike të shtruar nga Ballhysa, Vettingu për Llallën duhet të vijojë.

Avokati i ish kryeprokurorit Sokol Hazizaj e ka kundërshtuar këtë pretendim të shtruar nga komisioneri Ballhysa. Sipas Hazizajt, Llalla ka ndjekur rrugën e duhur ligjore dhe ka njoftuar për dorëhqje Presidentin e Republikës me anë të një shkrese që ishte nisur në rrugë postare. Sipas avokatit, dorëheqja është një e drejtë njerëzore dhe kushtetuese.

Kujtojmë se ish kryeprokurori Llalla është nën hetim nga Prokuroria për Krime të Rënda. Madje drejtuesja e re e këtij isntitucioni Donika Prela, u tha se u emërua për të prangosur Llallën. Prokuroria Durrësit pati regjistruar procedimin penal në ngarkim të ish-Kryeprokurorit Llalla më 15 mars të këtij viti.

Veprat penale, për të cilat po hetohet Llalla përfshijnë “refuzimin për deklarim, mosdeklarim, fshehjes ose deklarimit të rremë të pasurisë”, mosdeklarim të shumave të të hollave në kufi”, “pastrim të produkteve të veprës penale” dhe “shpërdorim detyre”.

Ndaj Llallës ka nisur verifikimi pasuror për shitjen e disa pronave pasi ka mospërputhje sa u përket shumave të deklaruara. Ai ka blerë toka me çmime shumë të ulëta kur ushtronte detyrën e Kryeprokurorit dhe pas rivlerësimit, vlerat e pronave janë rritur me dhjetëra herë.

DY PROKURORE DHE NJE GJYQRAR NE VETTING
Komisioni i Pavarur i Kualifikimit parashikon tre seanca dëgjimore për javën e ardhshme ku dy prokurorë dhe një gjyqtar do të dëgjojnë nga trupa gjykuese përfundimet e kontrollit të pasurisë, integritetit dhe profesionalizmit të tyre. Njëri prej tyre është edhe Dritan Prençi, prokuror i Krimeve të Rënda angazhuar me dosjen “Tahiri”.

Komisioni i Pavarur i Kualifikimit ka parashikuar seancën dëgjimore me Prokurorin e Krimeve të Rënda, Dritan Peçi, për datën 5 qershor në orën 11:30 minuta. Ky i fundit është një ndër prokurorët që po heton ish-ministrin e Brendshëm, Saimir Tahiri, por Prençi ka në dorë edhe dosje si ajo e Orest Sotës si dhe financierit të Habilajve, Nazer Seiti për ekstradimin e të cilit është në hetim disiplinor nga prokuroria e Durrësit, sëbashku me kolegun e tij Vladimir Mara.

Sipas të dhënave të deklaruara deri në vitin 2015 të publikuara në Open Spending Data, Prençi ka deklaruar në vitin 2008 pronësinë e një apartamenti me sipërfaqe 78 m2 dhe vlerë thuajse 32 mijë euro, të blerë me kredi bankare për shlyerje në 10 vjet. Por në 2011-n, prokurori ka deklaruar një tjetër kredi bankare me afat shlyerje 8 vjet, nëpërmjet së cilës ka shlyer në total edhe kredinë e marrë për blerjen e apartamentit.

Në pronësi të tij ka edhe një makinë tip Volswagen me vlerë 2000 euro. Burim të të ardhurave, prokurori deklaron pagën e tij dhe të bashkëshortes, të cilat do të kalojnë në sitën e trupës gjykuese të Vettingut të përbërë nga Genta Tafa (Bungo), Pamela Qirko, Suela Zhegu.

Përveç Ditan Prençit po në 5 Qershor në orën 10 të mëngjesit përballë Komisionit të Pavarur të Kualifikimit do të jetë edhe gjyqtari i Gjykatës së Lartë, Edmond Islamaj, ndërsa një ditë më parë, në 4 qershor KPK do të zhvillojë seancën dëgjimore me prokuroren e Prokurorisë së Përgjithshme, Anila Leka.