Aktualitet

Sot vranët, nesër ngrohtë Sot është dita e fundit e muajit qershor e gjykuar sipas ecurive sinoptike edhe kjo ditë nuk do të dallohet shumë nga ditët tjera të kësaj jave, pra, pritet të kemi një ditë me vranësira të cilat herë pas here mund të kalojnë në rrebeshe shiu të shoqëruara me bubullima.

Temperaturat do të sillen në mes 11 e 24 gradë Celsius. E, nesër pritet që vranësirat të tërhiqen duke iu lëshuar vendin orëve me diell. Temperaturat do të sillen në mes 12 e 24 gradë Celsius.

Masat e ftohta ajrore, me origjinë nga veriu, tashmë po tërhiqen nga rajoni ynë, kështu në pjesën e parë të javës së ardhshme, pritet të kemi mot kryesisht të kthjellët.

Temperaturat do të shënojnë ngritje graduale, ato në mëngjes do të lëvizin në mes 12 e 14 gradë Celsius, kurse ato ditore do të sillën në mes 22 e 28 gradë Celsius.

Qytetarët e Vlorës janë ndjerë të befasuar pas një vendimi të Këshillit Bashkiak, i cili ka rritur ndjeshëm çmimin e ujit të pijshëm. Për këtë arsye ata kanë protestuar paqësisht kundër tarifave te reja.

Në mbledhjen e fundit Këshilli rriti çmimin e ujit të pijshëm nga 30 në 70 lekë për metër kub, rritje e cila arrin në 143 %. Për qytetarët ku vendim vjen në një moment kur qyteti nuk furnizohet rregullisht me ujë.

Sipas banorëve vendimi për rritje është marrë pa u konsultuar apo edhe pa u njoftuar më parë.

Vendimi i këshillit bashkiak do ti kalojë Entit Rregullator të Ujit i cili ka tagrin për të miratuar ose jo tarifat e propozuara nga bashkia.

Shoferi i ministrit Fatmir Xhafaj është gjendur i vrarë brenda një makine në garazhin e Gardës së Republikës në orët e para të mëngjesit. Edhe pse lajmi për krimin e rëndë është konfirmuar rreth orës 09:30, nuk ka asnjë reagim zyrtar. Ndërkohë kanë filluar edhe lëvizjet e para të zyrtarëve të lartë.

Drejtori i Përgjithshëm i Policisë së Shtetit Ardi Veliu ka shkuar menjëherë në ministrinë e Brendshme, ku  ka zhvilluar një takim “kokë më kokë” me ministrin Xhafaj.

Shkëlzen Qordja 31-vjeçi me detyrë shofer i ministrit të Brendshëm, është gjetur i pajetë nga punonjës të Gardës, ndërsa nga dyshimet e para mendohet të ketë qëlluar mbi veten. Arsyet nuk dihen ende, ndërsa burime thanë se në makinë është gjetur edhe një pistoletë.

Në vendngjarje ka shkuar grupi hetimor nën drejtimin e Prokurorisë së Rrethit Gjyqësor Tiranë, që po punon për të qartësuar rrethanat e ngjarjes së rëndë. Ndërkohë, nga policia sqarohet se viktima nuk ka qenë i pezulluar nga detyra.

Deputeti socialist Spartak Braho është shtruar ditën e sotme në spital, pasi ka kaluar një parainfarkt. Ai ka qenë i shtruar në spitalin e Durrësit, por është nisur më pas drejt Tiranës për t’iu nënshtruar vizitës nga mjekët kardiologë në një spital privat.

Ai ka patur dhembje gjoksi, shtrëngim dhe problem me frymëmarrjen, por në spitalin e Durrësit mjekët kanë thënë se ishte fat që gjendja e tij shëndetësore u kap në kohë.

Në momentin që ka patur shqetësime familjarët i kanë thënë Spartak Brahos që të nisej menjëherë në spital, por ai nuk ua ka vënë veshin dhe e ka neglizhuar një gjë të tillë.  Ka qenë ky insistim i të afërmëve që parainfarkti u kap në kohë.

“Trimi ekraneve”, frikë kanunore nga krimet që ka bërë
Për 3 ditë, Sali Berisha la Tiranën dhe shkoi për relaks maleve nëpër bjeshkët e Dukagjinit, duke shëtitur çdo fshat të asaj zone, ku siç u shpreh me nostalgji, u çmall me trojet e të parëve të tij, shoqëruar nga bashkëshortja, vajza, mbesat, nipërit dhe dhëndri.

Vajza, mbesat dhe nipërit i kërkuan gjysh Saliut, t’u tregonte fshatin dhe shtëpinë ku kishte lindur e ishte rritur deri në moshën 14 vjeç, kur partia e çoi me studime në Tiranë, mbasi kishin dëgjuar prej tij, se kulla e tij në Viçidol, gjatë gjenocidit serb të Milosheviçit në Kosovë, ishte kthyer në “strehë dhe zyrë pune” e Shtabit të Përgjithshëm të UÇK dhe për këtë shkak, ajo ishte bombarduar 13 herë nga tanket, topat dhe avionët serbë, pandaj dhe Zeni e rikonstruktoi pasi mori “bonusin” nga CEZ-DIA..

Saliu, i vënë në siklet nga kjo kërkesë fëminore, iu shmag duke u justifikuar, se nuk mund t’i çonte dot në Viçidol për të parë “kullën e babës”, sepse do tronditej psikologjikisht e kardio-logjikisht, nga “malli i pashuar që e ka marrë”, pasi ka prej 50 vitesh, qysh prej vitit 1968, kur u fut kollovar në Tiranë, në familjen e Liri Rexhep-Milica Ramoviçit, ish-kolonelë të Regjimentit Special të Ndjekjes në Ushtrinë Serbe!

Qysh atëherë në moshën 24 vjeçare, Saliu ka “hedhur gurin prapa”, për të mos ia parë më as pragun “kullës së babës” dhe Viçidolit, ku u lind e u rrit dhe deri sot që është 74-vjeçar!

Në ditët e qëndrimit në bjeshkë, Saliu shkeli shumë zona e fshatra, por as në vajtje e as në kthim nuk kaloi nga “Kulla e Babës”, paçka se kishte vendosur të shkonte “tinëz”, por për shkak të informacionit të publikuar vetë, ishte njoftuar se “disa vëllezër” tropojanë , kishin planifikuar ta “prisnin për kafe ” dhe kjo e detyroi, që të ndryshonte jo vetëm planin e vizitës turistiko-nostalgjike, por dhe rrugët e lëvizjes.

Kjo ishte arsyeja, që “trimi” i ekraneve televizive Sali Berisha, nuk guxoi të shkelte as në shtëpinë ku është lindur, i detyruar nga frika kanunore e përballjes, me pasojat e krimeve që ka bërë me përçarjet, hasmëritë, nxitjet, kurthet e pabesitë nw prita dhe skenarët e vrasjeve të shumta në Tropojë, me bilanc afro 200 viktima në atë zonë!/Pamfleti

Hapet procedura e tenderimit me vlerë mbi 199 milionë lekë, për vijimin e segmentit jugor nga Fusha e Sportit deri te Tuneli

TIRANË, 29 qershor /ATSH/-Fondi Shqiptar i Zhvillimit ka hapur procedurat e tenderimit për vazhdimin e shëtitores së Vlorës, e njohur ndryshe edhe si ‘Lungomare’.

Projekti i Lungomares ka krijuar një model të ri të zhvillimit të turizmit jo vetëm për Vlorën, por për të gjithë vijën bregdetare. Ky është një ndër investimet më të mëdha në Shqipëri i mbështetur nga Bashkimi Europian.

Procedura e tenderimit për vijimin e këtij projekti do të përfshijë segmentin jugor nga Fusha e Sportit deri te Tuneli.

Fondi limit i projektit kap vlerën e mbi 199 milionë lekë, i cili do të ndahet në dy pjesë. Fondi i akorduar për vitin 2018 është 40.4 milionë lekë, ndërkohë pjesa e mbetur është parashikuar të investohet për vitin 2019.

Operatorët ekonomikë do të kenë mundësi të dorëzojnë ofertat e tyre deri më datë 30 korrik 2018. Ndërsa, sa i takon kohëzgjatjes së kontratës, ajo parashikon një kohëzgjatje prej 180 ditësh që nga nënshkrimi i saj, njofton FZHSH.

TIRANË, 29 qershor/ATSH/-Pas bërjes publike në media të rastit të çiftit të të moshuarve L.M dhe F.M nga Korça, të cilët u nxorrën jashtë shtëpisë nga fëmijët dhe mbetën në rrugë të pastrehë, Ministria e Shëndetësisë dhe Mbrojtjes Sociale ka sistemuar brenda ditës, me procedurë të përshpejtuar të moshuarit e braktisur në qendrën Polivalente në Poliçan.

Duke e konsideruar si emergjencë, nëpërmjet strukturave të shërbimit social shtetëror, u bë e mundur sistemimi I çiftit të të moshuarve në Poliçan.

Ndërkohë po kryhen procedurat për plotësimin e dokumentacionit për vendosjen përfundimtare në institucionet publike rezidenciale të dy të moshuarve. Ministrja Manastirliu shprehu angazhimin për përfundimin sa më të shpejtë të procedurave, ndërkohë që të moshuarit janë strehuar menjëherë në qendrën publike të Poliçanit.

TIRANË, 29 qershor/ATSH/ – Përfaqësuesja e Lartë për Punët e Jashtme dhe Politikën e Sigurisë, Federica Mogherini dhe Komisioneri për Politikat Europiane të Fqinjësisë dhe Negociatat e Zgjerimit, Johannes Hahn në një artikull të publikuar sot në të përditshmen “Panorama” theksojnë se Shqipëria është në një rrugë të pakthyeshme drejt Bashkimit Europian.

“Këtë javë, vizioni ynë për një Europë vërtet të bashkuar vjen një hap më pranë. Shtetet anëtare të BE-së përcaktuan një udhë të qartë drejt hapjes së negociatave të anëtarësimit me Shqipërinë në qershor 2019. Kjo është në sajë të përparimit mbresëlënës që Shqipëria arriti gjatë vitit të kaluar, jo vetëm në rrugën e saj drejt Bashkimit Europian, por edhe për të përmirësuar jetën e përditshme të popullit të saj”, shkruajnë dy zyrtarët e lartë europianë.

“Ne dëshirojmë të përgëzojmë popullin shqiptar dhe institucionet shqiptare për rezultatet e arritura. Një kapitull i ri i punës sonë të përbashkët fillon sot: Komisioni Europian nisi menjëherë përgatitjet dhe ne kemi besim se ju do të ruani gjithashtu të njëjtën vendosmëri mbresëlënëse dhe punë të madhe.

Progresi në fushën e Reformës në Drejtësi është i dukshëm dhe tashmë ka bërë një ndryshim të prekshëm dhe pozitiv. Sistemi i Vetingut, i cili është në thelb të Reformës në Drejtësi dhe përfshin rivlerësimin e gjyqtarëve dhe prokurorëve, po prodhon rezultatet e para. Kjo kërkonte guxim politik dhe unitet në vend. Ndryshimet kushtetuese u miratuan njëzëri për të mundësuar një paketë reformash gjyqësore në vitin 2016.

Ky nuk është thjesht një transformim ligjor, por edhe shoqëror. Ju keni mjete të reja për ta bërë udhëheqjen tuaj të përgjegjshme në fushën e drejtësisë, por edhe në fusha të tjera. Sa më shumë që Shqipëria të bëjë për nevojat e kërkesat e popullit të saj, aq më shumë do të përparojë drejt anëtarësimit në BE.

Ju keni bërë një zgjedhje të ndërgjegjshme: më shumë se 80 përqind e shqiptarëve e mbështesin projektin evropian. Dhe ne kemi vërtet nevojë për entuziazmin dhe përkushtimin tuaj ndaj projektit europian. Tani është koha që Shqipëria të mbështetet në progresin e bërë dhe të vazhdojë të punojë me të njëjtën vendosmëri, veçanërisht për reformën gjyqësore dhe luftën kundër korrupsionit dhe krimit të organizuar. Puna gjatë vitit që vjen është një investim në integrimin tuaj në BE.

Çdo hap ka rëndësi. Ecja në këtë rrugë jo vetëm që ju lejon të hapni negociatat, por edhe ta bëni këtë në mënyrën më efektive të mundshme. Në çastin kur negociatat të hapen zyrtarisht, ju do të jeni tashmë duke vrapuar. Ky do të jetë një vit pune për BE-në gjithashtu. Komisioni tashmë ka filluar punën e nevojshme përgatitore drejt qershorit 2019, duke përfshirë, ndër të tjera, kuadrin e ardhshëm negociues. Gjithkush ka një rol për të luajtur në këtë proces historik.

Të gjitha grupet politike dhe partitë, autoritetet vendore dhe shoqëria civile duhet të punojnë së bashku më shumë se kurrë për t’u përgatitur për hapjen e negociatave të anëtarësimit dhe për të marrë përgjegjësinë e plotë të këtij procesi. Dyert e Bashkimit tonë janë të hapura. Rruga juaj drejt Bashkimit Europian është bërë e pakthyeshme.

Tani varet nga ju që të ecni përpara në këtë rrugë drejt një të ardhmeje të prosperitetit dhe sigurisë së përbashkët. Është vendimi i lirë dhe sovran i popullit tuaj, i askujt tjetër. Ëndrra jonë e përbashkët për një kontinent europian të bashkuar është në duart tuaja”, theksojnë në shkrimin e tyre Përfaqësuesja e Lartë për Punët e Jashtme dhe Politikën e Sigurisë, Federica Mogherini dhe Komisioneri për Politikat Europiane të Fqinjësisë dhe Negociatat e Zgjerimit, Johannes Hahn./atsh