Aktualitet

Hapet “diga” e abuzimeve
Ndërsa ka nisur e po vazhdon vetingu për gjyqtarë e prokurorë, në administratë dhe shërbimet publike, po bëhet batërdi abuzimesh me tenderët, që janë të ardhura nga çmimet, shërbimet, taksat, gjobat dhe detyrimet e tjera që paguan populli në shtet!

Një batërdi e tillë, zbulohet në letrat zyrtare të një tenderi “çmendarak”, të shpallur prej Operatorit të Shpërndarjes së Energjisë Elektrike (OSHEE). Me këtë tender, drejtuesit e OSHEE po tregojnë se i ka kapur “Treafazori” i korrupsionit, për shkak të vlerës financiare të madhe, për një shërbim që dihet se sa kushton për 1 njësi dhe me shumicë si në rastin konkret që po e porosit OSHEE!
Tenderi që ka përlllogaritur komisioni i OSHEE dhe që është shpallur me firmë e vulë të drejtorit të “shtyllës” së këtij shërbimi shtetëror, kap vlerën 714 milionë lekë pa 20%-shin TVSH, ose 890 milionë lekë me gjithë TVSH!
Kjo vlerë e madhe financiare, do të jepet për blerje të shërbimit të internetit për OSHEE. Sipas njoftimit të shpallur, tenderi do të zhvillohet në datën 13 qershor 2018, ora 14.00, me qëllim që ajo ditë pune e drejtorit dhe komisionit, të mbyllet me këtë tender që kushton sa ndërtimi i një shkolle për 500 nxënës.

Ekspertë të institucioneve të tjera shtetërore, që merren me “punët” e tenderave në blerje shërbimi interneti, thonë se kjo është një pagesë financiare tepër e madhe, që të krijon bindjen e plotë, se “agallarët” që na shesin energjinë elektrike 2-3 herë më shtrenjtë se në vendet e BE, kanë hapur “digën” e abuzimit jo “për të pikuar”, por “për të rrjedhur” zhvatja!

Kjo batërdi bëhet prej tyre me lekët e shitjes me çmim të lartë dhe kamatvonesave po të larta, kur akoma janë në burg e ndjekje penale 457 kryefamiljarë familjesh në ekstrem varfërie. Në OSHEE bëhen tendera babëzie, kur 53 mijë familjeve invalidësh, jetimësh e të sëmurësh mendorë, u zhvatet kamatvonesa sipas përqindjes së vlerës së shtuar në çdo muaj vonesë, për shkak të mos pagimit të faturave.

Në OSHEE “lëshon fijet” e tenderëve korruptivë, ndërsa 91 mijë familjeve në varfëri ekstreme, u është ndërprerë energjia elektike në banesat dhe kasollet ku jetojnë!

Ja njoftimi i OSHEE për tenderin

1. Emri dhe adresa e autoritetit kontraktor: OSHEE sh.a, Adresa Bulevardi “Gjergj Fishta”, Ndërtesa Nr. 88, H.1, Njësia Administrative Nr.7, 1023, Tiranë., Tel/Fax 042274185

2. Lloji i procedurës se prokurimit: “E hapur-sherbime” me mjete elektronike.

3. Objekti i kontratës: “Sherbimi i Internetit”

4. Numri i referencës së procedurës: REF-69903-05-18-2018

5. Fondi limit: 74,040,000 (shtatedhjete e kater milion e dyzet mije) leke pa tvsh.

6. Kohëzgjatja e kontratës ose afati kohor për ekzekutimin: me afat 3-vjecar.

7. Afati kohor për dorëzimin e ofertave, ose kërkesave për pjesëmarrje: Data 13. 06. 2018, ora 14:00./Pamfleti/

Në disko “Havana” në Dhërmi ku mesnatën e së dielës pati një përplasje me armë, ishin dhe dy ministra të qeverisë “Rama”. Përveç tyre në disko ishte dhe një numër i madh peshuesish që mbetën të terrorizuar pas të shtënave si dhe disa personazhe të njohura në Shqipëri të medias dhe kulturës.

Ministrat që ndodheshin në “Havana” gjatë të shtënave mësohet se ishin Blendi Klosi dhe Niko Peleshi. Dy ministrat që ndodheshin në Dhërmi për një aktivitet qeveritar, pasi kanë konsumuar pije në ambientet e diskos, janë larguar rreth dy orë para se të ndodhnin të shtënat, për t’u akomoduar në pjesën e restorantit që ndodhet afër diskos.

Nga ana tjetër, përveç dy ministrave, në ambientet e diskos “Havana” kanë qenë dhe shumë persona të tjetër të njohur, por edhe çifte me fëmijë të vegjël, të cilët kanë përjetuar tmerr nga ajo që kanë parë me sy në atë që konsiderohet si një prej vendeve që frekuentohet nga të pasurit e kryeqytetit.

Disa orë pas ngjarjes, Policia ka bërë të ditur se ka arrestuar Emiljano Ninën, 23 vjeç, banues në Tiranë, si autorin e të shtënave, duke saktësuar se ka qëlluar në ajër me pistoletë, katër herë. 23-vjeçari u kap nga efektivët e Komisariatit të Himarës, ndërsa lidhur me shkakun e konfliktit, sipas Policisë ka nisur për shkak të një konflikti të hershëm mes tij dhe një personi tjetër në momentin e përballjes në disko “Havana”. Zyrtarisht, nga ana tjetër nuk bëhet i ditur identiteti dhe as inicialet e personit, me të cilin është konfliktuar i arrestuari.

Nga hetimet e policisë konfirmohet se Nina ka qëlluar katër herë në ajër me një armë tip “pistoletë”, të cilën e mbante me vete edhe në momentin kur ka hyrë në ambietet e lokalit. Sipas asaj që konfirmohet nga blutë, mësohet se autori Nina dhe një tjetër person kishin pasur një konflikt të hershëm mes tyre dhe grindja nuk ka lindur në ambientet e diskos.

Autori dhe personi tjetër kishin njohje me njëritjetrin. Personi i paidentifikuar i ka kërkuar llogari Emiljano Ninës për shikimet e shpeshta që i hidhte të dashurës së tij. Kaq ka mjaftuar që mes dy grupeve, që ishin ndarë në dy tavolina, të niste një përleshje fizike, ku nuk munguan as goditje me karrige në drejtim të njëri-tjetrit apo edhe shishe.

Sipas Policisë, Nina e kishte ngacmuar edhe kohë më parë vajzën, ndërsa në ambientet e lokalit është përplasur me të dashurin e saj, duke nisur edhe grindjen e përgjakshme. Pikërisht pas debateve, sipas Policisë, Nina ka qëlluar katër herë në ajër me pistoletë dhe më pas është larguar nga lokali.

I riu u kap vetëm pak minuta pas ngjarjes, pasi nuk ishte larguar nga lokali ku ka ndodhur përleshja dhe të shtënat me armë. Në momentin e ndalimit, atij iu sekuestrua dhe arma me të cilën dyshohet se ka qëlluar në ajër. Emiljano Nina akuzohet tashmë për veprën penale të “Mbajtja pa leje dhe prodhimi i armëve dhe municioneve” dhe “Prishja e qetësisë publike”. /korrieri/

Prokuroria e Krimeve të Rënda ka dërguar letërporosi në 3 shtete, në lidhje me të arrestuarit për çështjen e gjetjes së 3.4 milionë eurove në dy mjete Toyota Yaris.

Mësohet se letërporosia është dërguar në Gjermani, Belgjikë dhe Angli, nga ku pritet të merret informacion i detajuar, në lidhje me aktivitetin e katër shtetasve që mbahen të arrestuar për këtë çështje.

Burimet raportojnë për TCH se letërporosia në Angli është dërguar për Edi Likën, pasi dyshohet se ka të dhëna se është marrë me trafik kokaine.

Para disa ditësh u gjetën plot 3.4 milionë euro në dy mjete Toyota, që futeshin për herë të parë në Shqipëri.

E dyshohet se këto para burojnë nga trafikimi i lëndëve narkotike dhe po futeshin në të zezë në Shqipëri, ndërsa përveç 4 të arrestuarve, janë shpallur në kërkim edhe dy shtetas të tjerë, që mund të jenë pronarët e vërtetë të parave./korrieri

“E gjithë infrastruktura e transformuar nuk i thotë të gjitha dhe është e paplotë në impaktin e madh ekonomik dhe social mbi Vlorën nëse nuk llogarisim edhe aeroportin e Vlorës”.

Kryeministri Edi Rama e konsideroi sot ndërtimin e aeroportit “një investim masiv në funksion të zhvillimit të ekonomisë përmes turizmit dhe jo vetëm”.

“Studimet dhe shifrat e lëvizjeve të njerëzve e tregojnë këtë impakt, dhe këtu kam parasysh shqiptarët që udhëtojnë për në Greqi dhe Itali”, tha Rama.

Ai do të jetë aeroporti i jugut të vendit, tha Kryeministri. Sipas Ramës, ai do të garantojë një fluks të madh qytetarësh dhe lëvizje nga Vlora me çmime të arsyeshme dhe në kohë më të shpejtë.

“Aeroporti do të jetë vlerë e shtuar nga pikëpamja sociale por edhe e fluksit të turistëve që do të sjellë. Po ashtu do të sjellë një fluks të ri investimesh sa i përket hoteleve, biznesit dhe gjithë zhvillimeve që hap perspektiva e një aeroporti të ri”, shtoi Rama./atsh

Kryebashkiaku Dritan Leli dhe ambasadorja Romana Vlahuitin kanë përuruar veprën e artistit Gentjan Tabaku në Lungomare, e cila është shpallur fituese në konkursin e BE, për shëtitoren bregdetare.

“Jam e lumtur që jam sot këtu në këtë shëtitore, për të cilën u desh shumë punë, ndërsa një vit më parë, këtu nuk ishte kështu.” Ambasadorja Romana Vlahutin

Vepra e artit quhet “Porta”, të cilën amabsadorja Vlahutin e ka konsideruar si “Porta” për në BE. Kryebashkiaku i Vlorës vlerësoi angazhimin e ambasadores Vlahutin në realizimin e investimit në Lungomare. Ndërsa artisti Gentjan Tabaku, e ka quajtur vetën pjesë të Lungomares, duke u ndalur në dy simbolikat që vepra e tij përcjell: Portën drejt një realiteti tjetër dhe shpendët si simbol i lirisë dhe lëvizjes së lirë.

Shëtitorja e Lungomares i ka dhënë një frymëmarrje të re qytetit të Vlorës, duke u shndërruar në një atraksion turistik, për pushues vendas e të huaj që kanë zgjedhur Vlorën për të pushuar./shqiptarja

Paketa e lehtësive fiskale për agroturizmin prek 90% të territorit të vendit dhe mbi 50% të popullsisë që jeton në fshat.

Ministri i Bujqësisë Niko Peleshi, u shpreh sot në seancën plenare të Kuvendit se, politikat në mbështetje të agroturizmit synojnë të ngrenë një treg të ri, hapësirë të re biznesi për sipërmarrësit e rinj apo të vjetër, duke e kthyer agroturizmin në koncept të ekonomisë shqiptare dhe nënsektor me standarde dhe zhvillim bashkëkohor.

“Kjo paketë vjen pas konsultimeve me vende që kanë bërë sukses në agroturizëm dhe padyshin Italia është një shembull konkret i këtij zhvillimi”, tha Pelelshi, ndësa nënvizoi faktin se, Italia miratoi një pakete të tillë vite më parë dhe sot shënon mbi 7 milionë prenotime në strukturat e agroturizmit.

Gjatë diskutimit në Kuvend të projektligjit për taksat, ministri Peleshi tha se, incentiva fiskale që po ndërmerr qeveria për nxitjen e agroturizmit, është tejet agresive. “Ajo konsiton në uljen e Tatimit të Vlerës së Shtuar (TVSH) në 6% nga 20%, Tatim fitimi nga 15% ulet në 5% dhe zero taksë për infrastrukturën”, tha ai.

Agroturizmi është veprimtari që zhvillohet në një fermë, por që është e ndërlidhur me zhvillimin e komponentëve të tjerë historik, tradicional e kulturor e veprimtarive të tjera ndihmëse që zhvillohen në atë mjedis bujqësor, që diversifikojnë zhvillimin rural në tërësi, tha Peleshi./atsh