Aktualitet

Mesa duket Fadil Kasemi nuk heq dorë nga përpjekjet për të dalë nga qelia. I akuzuar për vrasjen e ish-bashkëshortes së tij, gjyqtares Fildes Hafizi në 31 Gusht 2017, Kasemi ka ankimuar në Apelin e Krimeve të Rënda një vendim të ndërmjetëm të trupës që po e gjykon në Shkallën e Parë.

Ai kundërshton vendimmarrjen e datës 13 Korrik 2018, që rrëzoi pretendimin e tij për humbje të fuqisë të masës “arrest në burg” dhe urdhërimin e lirimit. Përmes avokatit, Fadil Kasemi ka pretenduar se pas kalimit të dosjes së tij për kompetencë nga Gjykata e Tiranës tek Krimet e Rënda, kjo gjykatë duhet të rivlerësonte masën e sigurisë.

E sipas tij, në kushtet kur nuk është bërë rivlerësim, masa ka rënë. Kasemi po gjykohet në një proces të zakonshëm tek Krimet e Rënda. Ai nuk mundi të fitojë as gjykim të shkurtuar, pasi ndryshimet ligjore të fundit, përjashtuan të akuzuarit për krime në familje nga kjo e drejtë./korrieri

Ai ndodhet i arrestuar në Gjermani, pas shpalljes në kërkim nga drejtesia shqiptare si porositës i 613 kilogramë kokainë të mbërritura në Shqipëri në kontenier bananesh. Por tani Arbër Çekaj, kërkon kthimin e pasurive të sekuestruara.

Mësohet se kërkesa e bërë nga përfaqësuesi ligjor i shoqërive “Arbri Garden shpk” dhe “Ecoalmax sh.p.k” dhe pritet të shqyrtohet nga gjyqtarja e Krimeve të Rënda, Irena Gjoka, në orën 13:00 të së hënës.

Sipas burimeve, përmes saj kërkohet kthimi i kamionit dhe kontenierit, në dyshemenë e të cilit u gjet e fshehur lënda narkotike.

Pak ditë më parë Policia e Shtetit njoftoi bllokimin e dy llogarive bankare në shumat 38 mijë dollarë dhe 10 milionë lekë të këtyre shoqërive, të dyshuara si të përfituara nga aktiviteti kriminal.

Çekaj u arrestua në ditët e para të muajit Maj në Gjermani, bazuar në një masë sigurie “arrest në burg” dhënë për të nga Krimet e Rënda. Ai është në pritje të ekstradimit drejt Shqipërisë./korrieri

Autoriteti Kombëtar i Ushqimit (AKU) ka konstatuar dhe bllokuar një ngarkesë prej 10 ton miell gruri të importuar nga Greqia, që u konstatua me parregullsi në dokumentacion.Në një njoftim për shtyp AKU-së, bën të ditur se, të dhënat sipas dokumenteve shoqërues nuk përputheshin me të dhënat në etiketë e kundra etiketën e produktit.

Trupat inspektuese e AKU-së Korçë gjatë kontrollit të ushtruar në Pikën Doganore Kapshticë, konstatoi se një subjekt i cili pretendonte të fuste në Shqipëri produktin “miell gruri” kishte parregullsi në vërtetësinë e dokumentacionit që shoqëronte ngarkesën, konkretisht, raporti i analizës.

Nga kontrolli fizik i produktit “miell gruri” rezultoi se ky produkt nuk kishte nr.loti, datë

prodhimi dhe datë skadimi të stampuar në thasët prej letre 25 kg, por vetëm një kundra etiketë të ngjitur në gjuhën greke, pa përkthim në gjuhën shqipe.

Menjëherë AKU bëri bllokimin e ngarkesës me sasi 10 ton duke u bazuar legjislacionit në fuqi ku gjithashtu do të ndjek procedurat doganore për kthimin në origjinë.

AKU thekson se do të jetë gjithmonë në mbështetje të konsumatorit me qëllim garantimin e Sigurisë Ushqimore. Gjithashtu inkurajon të gjithë qytetarët të denoncojnë çdo rast, çdo tentativë abuzimi, pranë Autoritetit Kombëtar të Ushqimit në [email protected] si dhe pranë portalit të bashkëqeverisjes “Shqipëria që duam” Siguria Ushqimore është një sfidë e përbashkët.atsh

Mbi 300 fëmijë morën pjesë në kampet verore tre javore të organizuara me mbështetjen e programit “Askush të Mos Mbetet Pas” në disa prej shkollave 9-vjeçare në Fier (fshati Baltez), Lezhë dhe Fushë-Krujë gjatë muajit korrik.

Qeveria Shqiptare në bashkëpunim me UNDP dhe Agjenci të tjera të OKB-së, në partneritet edhe me pushtetin lokal, kanë nisur zbatimin e programit “Leave No One Behind/ Askush të Mos Mbete Pas”, financuar nga Qeveria Zvicerane në mbështetje të fëmijëve.

Kampet verore ku morën pjesë shumë fëmijë nga komuniteti Rom, ofruan aktivitete dhe shërbime të ndryshme sociale-kulturore, duke synuar në veçanti forcimin e integrimit të fëmijëve të komunitetit Rom dhe Egjiptianë nëpërmjet aktiviteteve jashtëshkollore.

Organizimi i kampeve verore, është një mënyrë dhe model që ata të mund të mos e humbin interesin për shkollën dhe të mësuarin, sidomos në mungesë të mundësive të tjera për aktivitetet verore, që mund të kenë këta fëmijë. /atsh

Rrugë, trotuare të reja, hapësira të gjelbra si dhe kënde çlodhëse për të gjitha grupmoshat, i janë shtuar bllokut të banimit në Tiranë të njohur si ish-Nisharaku, i cili mori një pamje krejtësisht të re.

Në mbyllje të punimeve në bllokun e Rr. “Sali Butka”, kreu i Bashkisë së Tiranës, Erion Veliaj, i shoqëruar edhe nga Zv/ministrja e Mjedisit, Ornela Çuçi dhe deputeti i PS, Besnik Baraj, theksoi sot se ajo që e çon përpara qytetin është ndryshimi dhe modernizimi.

“Gjërat ndryshojnë se preken. Në një qytet filozofia nuk mund të jetë mos ma prek atë, mos ma prek këtë, por vër dorë, ndryshoje, rregulloje, modernizoje; kjo e çon para qytetin. E njëjta gjë edhe me historinë e teatrit. E dini pse thonë: mos ma prek? Sepse e dinë që po e prekëm ajo do dalë një vepër e mrekullueshme. E dinë se po vumë dorë, ajo do dalë një xhevahir. E dinë se po filluam ndërtimin e teatrit të ri, do të jemi të pandalshëm në modernizimin e Tiranës. Kjo është arsyeja e vërtetë. I tremben sepse çdo gjë që prekim me dorë, del më mirë”, – tha Veliaj.

Ai solli në vëmendje edhe disa shembuj të suksesshëm, ku falë ndërhyrjes së Bashkisë së Tiranës janë transformuar zona të ndryshme të qytetit, duke përmirësuar ndjeshëm cilësinë e jetës së qytetarëve.

“Mbaj mend kur filluam projektin te Liqeni, atëherë thoshin mos i prek romët se janë nga një komunitet i vyer. Unë nuk besoj se ka bashki që ka bërë më shumë për strehimin e romëve. I keni parë shtëpitë e reja nga Bregu i Lumit në Lanabregas, nga Lana në Shkozë, si çdo njeri normal? Këta që thoshin mos ma prek komunitetin, sot komuniteti rom është më mirë, pikërisht pse prekëm atë pjesë të djegur të parkut, që sot është kthyer në një pyll të jashtëzakonshëm te liqeni”, tha ai.

Veliaj nënvizoi se edhe me Bulevardin e Ri, pavarësisht se në fillim pati një ngurim, sot Tirana ka një hapësirë ku qyteti mund të zhvillohet për 50 vitet e ardhshme.

“Nuk e di sa prej jush e kanë parë Bulevardin e Ri, se çfarë mrekullie është bërë aty. Në fillim edhe aty thoshin mos ma prek! Po pse? Ke ndërtuar pa leje aty ku do të kalojë Tirana e brezit të fëmijëve të sotëm. Tirana ka nevojë të rritet, se kur ata të bëhen mosha jonë do martohen, do krijojnë familje. Por, pikërisht se e prekëm atë pjesë të qytetit kemi sot për Tiranën një hapësirë të 50 viteve të ardhshme”, – tha kreu i bashkisë.

Krahas ndërtimit të 31 këndeve në kryeqytet, puna do të vijojë pa humbur kohë në çdo lagje të kryeqytetit, duke theksuar se nga ndërhyrjet e Bashkisë së Tiranës për përmirësimin e infrastrukturës do të përfitojnë si zonat urbane, ashtu edhe ato në periferi.

“Ka ardhur koha që bashkia të merret me çdo qoshe. Ashtu siç kemi nisur me këto 31 kënde, ashtu të shkojmë deri në cepin më të humbur të Tiranës, nga Shëngjergji në Ndroq, nga Krraba në Kashar”, tha ai dhe siguroi se periudha e thatë e verës do të shfrytëzohet maksimalisht për të përmirësuar infrastrukturën.

“Duke qenë se patëm një stinë shumë të gjatë me shira, do të sigurohemi që të shfrytëzojmë hapësirën e verës. Kjo është arsyeja pse një pjesë e madhe e unazës është shqepur për të bërë korsitë e reja të biçikletave buzë Lanës. Kjo është arsyeja pse shumë ndërhyrje nëpër lagje do t’i kryejmë gjatë verës”, – nënvizoi Veliaj.

Deputeti i PS, Besnik Baraj, përgëzoi kryebashkiakun Veliaj për punën në këto tre vite në shërbim të qytetarëve.

“Të vish tre herë brenda një kohe të shkurtër në një bllok të tillë në një qytet me 1 milion banorë, do të thotë se bashkia punon, se është ditë e natë në punë. Një ekip nuk ecën përpara po nuk pati edhe një lider të shkëlqyer, i tillë është edhe Erion Veliaj. Unë e quaj fat për Tiranën që kemi një kryetar bashkie plot energji, fantazi dhe i dedikuar, që u shërben të gjithëve”, – u shpreh Bare.

Zv/ministrja e Mjedisit, Ornela Çuçi, edhe si banore e kësaj lagjeje të kryeqytetit, vlerësoi ndërhyrjen e bërë nga Bashkia e Tiranës, për transformimin e jetës në këtë bllok banimi. “Si banore e lagjes them i pafshim hajrin këtij kryetari dhe të gjitha punëve sepse realisht na i ka ndryshuar jetën. Dalim çdo pasdite këtu me fëmijët dhe nuk shikojmë klubin më të afërt, por shikojmë parkun më të afërt ku të futemi. E falenderoj shumë kryetarin, por mbi të gjitha falenderoj çdo punonjës të bashkisë”, – deklaroi zv/ministrja  Çuçi.

Në një kohë relativisht të shkurtër është bërë i mundur krijimi i tre shesheve në këtë zonë të Njësisë 7, duke mundësuar  rikualifikim të plotë të bllokut urban. Sheshi i sotëm (Nr. 31) është një tjetër hapësirë rekreative që i shtohet Tiranës, duke ruajtur të njëjtën cilësi edhe në ndërhyrjet e tjera në lagje të ndryshme të kryeqytetit./atsh

Agjencia e Zhvillimit Bujqësor dhe Rural (AZHBR) përmes skemave kombëtare, ka rritur për herë të parë këtë vit me 25% subvencionimin për Shoqëritë e Bashkëpunimit Bujqësor (SHBB).

Drejtoresha e Përgjithshme e Agjencisë për Zhvillim Bujqësor dhe Rural Frida Krifca, tha në një emision televiziv se, “kemi raste pozitive të fermerëve të bashkuar që e kanë kthyer bashkëpunimin mes tyre në një model suksesi”.

Sipas saj, ka pika grumbullimi që janë kthyer në agjentë bashkëpunimi të këtyre fermerëve, të cilët i mbledhin fermerët, i bëjnë 20 fermerë bashkë dhe iu kërkojnë të mbjellin një kulturë të posaçme. Kjo eksperiencë do të zgjerohet shumë shpejt dhe ne do të shohim disa të dhëna ekonomike më pozitive.

“Paketa financiare që ka të bëjë me faktin e heqjes së TVSH për fermerët që bashkohen, pra SHBB (Shoqëritë e Bashkimit Bujqësor) është një koncept i modernizuar që synon të nxisë marrëveshjen mes fermerëve për bashkëpunime të përbashkëta, me impakt në rritjen e prodhimit dhe përfitimin e subvencineve”, tha Krifca/.atsh