Aktualitet

Rrugë, trotuare të reja, hapësira të gjelbra si dhe kënde çlodhëse për të gjitha grupmoshat, i janë shtuar bllokut të banimit në Tiranë të njohur si ish-Nisharaku, i cili mori një pamje krejtësisht të re.

Në mbyllje të punimeve në bllokun e Rr. “Sali Butka”, kreu i Bashkisë së Tiranës, Erion Veliaj, i shoqëruar edhe nga Zv/ministrja e Mjedisit, Ornela Çuçi dhe deputeti i PS, Besnik Baraj, theksoi sot se ajo që e çon përpara qytetin është ndryshimi dhe modernizimi.

“Gjërat ndryshojnë se preken. Në një qytet filozofia nuk mund të jetë mos ma prek atë, mos ma prek këtë, por vër dorë, ndryshoje, rregulloje, modernizoje; kjo e çon para qytetin. E njëjta gjë edhe me historinë e teatrit. E dini pse thonë: mos ma prek? Sepse e dinë që po e prekëm ajo do dalë një vepër e mrekullueshme. E dinë se po vumë dorë, ajo do dalë një xhevahir. E dinë se po filluam ndërtimin e teatrit të ri, do të jemi të pandalshëm në modernizimin e Tiranës. Kjo është arsyeja e vërtetë. I tremben sepse çdo gjë që prekim me dorë, del më mirë”, – tha Veliaj.

Ai solli në vëmendje edhe disa shembuj të suksesshëm, ku falë ndërhyrjes së Bashkisë së Tiranës janë transformuar zona të ndryshme të qytetit, duke përmirësuar ndjeshëm cilësinë e jetës së qytetarëve.

“Mbaj mend kur filluam projektin te Liqeni, atëherë thoshin mos i prek romët se janë nga një komunitet i vyer. Unë nuk besoj se ka bashki që ka bërë më shumë për strehimin e romëve. I keni parë shtëpitë e reja nga Bregu i Lumit në Lanabregas, nga Lana në Shkozë, si çdo njeri normal? Këta që thoshin mos ma prek komunitetin, sot komuniteti rom është më mirë, pikërisht pse prekëm atë pjesë të djegur të parkut, që sot është kthyer në një pyll të jashtëzakonshëm te liqeni”, tha ai.

Veliaj nënvizoi se edhe me Bulevardin e Ri, pavarësisht se në fillim pati një ngurim, sot Tirana ka një hapësirë ku qyteti mund të zhvillohet për 50 vitet e ardhshme.

“Nuk e di sa prej jush e kanë parë Bulevardin e Ri, se çfarë mrekullie është bërë aty. Në fillim edhe aty thoshin mos ma prek! Po pse? Ke ndërtuar pa leje aty ku do të kalojë Tirana e brezit të fëmijëve të sotëm. Tirana ka nevojë të rritet, se kur ata të bëhen mosha jonë do martohen, do krijojnë familje. Por, pikërisht se e prekëm atë pjesë të qytetit kemi sot për Tiranën një hapësirë të 50 viteve të ardhshme”, – tha kreu i bashkisë.

Krahas ndërtimit të 31 këndeve në kryeqytet, puna do të vijojë pa humbur kohë në çdo lagje të kryeqytetit, duke theksuar se nga ndërhyrjet e Bashkisë së Tiranës për përmirësimin e infrastrukturës do të përfitojnë si zonat urbane, ashtu edhe ato në periferi.

“Ka ardhur koha që bashkia të merret me çdo qoshe. Ashtu siç kemi nisur me këto 31 kënde, ashtu të shkojmë deri në cepin më të humbur të Tiranës, nga Shëngjergji në Ndroq, nga Krraba në Kashar”, tha ai dhe siguroi se periudha e thatë e verës do të shfrytëzohet maksimalisht për të përmirësuar infrastrukturën.

“Duke qenë se patëm një stinë shumë të gjatë me shira, do të sigurohemi që të shfrytëzojmë hapësirën e verës. Kjo është arsyeja pse një pjesë e madhe e unazës është shqepur për të bërë korsitë e reja të biçikletave buzë Lanës. Kjo është arsyeja pse shumë ndërhyrje nëpër lagje do t’i kryejmë gjatë verës”, – nënvizoi Veliaj.

Deputeti i PS, Besnik Baraj, përgëzoi kryebashkiakun Veliaj për punën në këto tre vite në shërbim të qytetarëve.

“Të vish tre herë brenda një kohe të shkurtër në një bllok të tillë në një qytet me 1 milion banorë, do të thotë se bashkia punon, se është ditë e natë në punë. Një ekip nuk ecën përpara po nuk pati edhe një lider të shkëlqyer, i tillë është edhe Erion Veliaj. Unë e quaj fat për Tiranën që kemi një kryetar bashkie plot energji, fantazi dhe i dedikuar, që u shërben të gjithëve”, – u shpreh Bare.

Zv/ministrja e Mjedisit, Ornela Çuçi, edhe si banore e kësaj lagjeje të kryeqytetit, vlerësoi ndërhyrjen e bërë nga Bashkia e Tiranës, për transformimin e jetës në këtë bllok banimi. “Si banore e lagjes them i pafshim hajrin këtij kryetari dhe të gjitha punëve sepse realisht na i ka ndryshuar jetën. Dalim çdo pasdite këtu me fëmijët dhe nuk shikojmë klubin më të afërt, por shikojmë parkun më të afërt ku të futemi. E falenderoj shumë kryetarin, por mbi të gjitha falenderoj çdo punonjës të bashkisë”, – deklaroi zv/ministrja  Çuçi.

Në një kohë relativisht të shkurtër është bërë i mundur krijimi i tre shesheve në këtë zonë të Njësisë 7, duke mundësuar  rikualifikim të plotë të bllokut urban. Sheshi i sotëm (Nr. 31) është një tjetër hapësirë rekreative që i shtohet Tiranës, duke ruajtur të njëjtën cilësi edhe në ndërhyrjet e tjera në lagje të ndryshme të kryeqytetit./atsh

Agjencia e Zhvillimit Bujqësor dhe Rural (AZHBR) përmes skemave kombëtare, ka rritur për herë të parë këtë vit me 25% subvencionimin për Shoqëritë e Bashkëpunimit Bujqësor (SHBB).

Drejtoresha e Përgjithshme e Agjencisë për Zhvillim Bujqësor dhe Rural Frida Krifca, tha në një emision televiziv se, “kemi raste pozitive të fermerëve të bashkuar që e kanë kthyer bashkëpunimin mes tyre në një model suksesi”.

Sipas saj, ka pika grumbullimi që janë kthyer në agjentë bashkëpunimi të këtyre fermerëve, të cilët i mbledhin fermerët, i bëjnë 20 fermerë bashkë dhe iu kërkojnë të mbjellin një kulturë të posaçme. Kjo eksperiencë do të zgjerohet shumë shpejt dhe ne do të shohim disa të dhëna ekonomike më pozitive.

“Paketa financiare që ka të bëjë me faktin e heqjes së TVSH për fermerët që bashkohen, pra SHBB (Shoqëritë e Bashkimit Bujqësor) është një koncept i modernizuar që synon të nxisë marrëveshjen mes fermerëve për bashkëpunime të përbashkëta, me impakt në rritjen e prodhimit dhe përfitimin e subvencineve”, tha Krifca/.atsh

Kryeministri Edi Rama ka reaguar pas akuzave të opozitës, duke i cilësuar akuzat e kësaj të fundit kundër procesit të Vetting-ut si ato të frontit të dikurshëm Demokratik të lagjes.

Reagimi i kreut të qeverisë ka ardhur në rrjetet sociale.

“Vetingu si ilaç gjarpërinjsh dhe opozita me libër shtëpie kundër Vetingut si Fronti i dikurshëm Demokratik i lagjes!Në vend të Letrave Anonime janë shpifjet dixhitale të Saliut. Në vend të Këndit të Fletërrufeve janë recituesit e Lulit. Në vend të kryetarit është vetë Luli,”, theksoi Kryeministri ne statusin e tij./atsh

Pas ngjarjeve tragjike të ndodhura në zonën e Atikës në Greqi ku shumë persona humbën jetën dhe u plagosën si pasojë e zjarreve masive, janë shtuar masat mbrojtëse ndaj zjarreve nga organet ligjzbatuese shqiptare, të cilat kanë vendosur në gatishmëri flotat e tyre zjarrfikëse.

Në kuadër të këtyre masave, prefektura e Gjirokastrës ka angazhuar rreth 11 zjarrfikëse dhe 130 forca të cilat do t’u përgjigjen emergjencave të shkaktuara në rast zjarri.

Prefekti i Gjirokastrës, Astrit Aliaj bëri me dije për Agjencinë Telegrafike Shqiptare se takimet e jashtëzakonshme të krijuara nga institucioni i Prefektit kanë si synim parandalimin e tragjedive, si ajo e shkaktuar në Atika në zonën e Athinës.

“Janë marrë një sërë masash gjatë gjithë kësaj periudhe ku është bërë një plan masash i detajuar si dhe është bërë sensibilizimi në të gjitha bashkitë e qarkut, me përfaqësimin e administratorëve të njësive administrative me kryetarët e fshatrave, Policinë e Shtetit, me inspektoriatet dhe të gjitha organet ligjzbatuese, ku kemi sensibilizuar për masat që do të marrim dhe në gatishmërinë që do të ofrojmë në çdo situatë që mund të na krijohet në qark”, – theksoi Aliaj.

Prefektura e Gjirokastrës për të evituar zjarret e shkaktuara në mënyrë të qëllimshme, siç janë ato për kullota, ka vendosur që të japë me qira disa nga kullotat verore, ku individët që do t’i marrin do të jenë përgjegjës nëse në kullotën e tyre shfaqen vatra zjarri.

“Kjo është materializuar edhe me marrëveshjet që kanë bërë bashkitë për dhënien me qira të kullotave verore, duke bërë që këta njerëz që firmosnin këtë aktmarrëveshje me bashkinë, detyrohen nga ana ligjore që të mbajnë përgjegjësi për këto kullota nëse në to do të shfaqen vatra zjarri. Deri tani raportimi bëhet çdo ditë, ku njësitë administrative bëjnë një raportim ditor në prefekturë për këto masa dhe për çdo situatë që mund të krijohet si pasojë e ndonjë zjarri, – shtoi ai.

Për të evituar rastet e zjarrit dhe mënyrën e ndërhyrjes për shuarjen e tyre trupat zjarrfikëse në këtë qark po zhvillojnë stërvitje të përbashkëta, jo vetëm për të ndërhyrë në zonat pyjore, por edhe në qendrën e qytetit në rast se do të evidentohen vatra zjarri.

“Gjithashtu në gatishmëri janë mjetet zjarrfikëse si dhe trupa e cila ka kryer edhe disa stërvitje, sidomos në qytetin e Gjirokastrës në zonën muzeale për të reaguar nëse në këto zona bie zjarr, pasi vatra zjarri nuk ka vetëm në kullota dhe pyje, por edhe në qytet si rezultat i përdorimit të keq të lëndëve drusore si dhe gazit. Kemi patur tre raste të tilla në Gjirokastër dhe falë ndihmës dhe mbështetjes nga ana e zjarrfikësve këto probleme janë lokalizuar pa pasoja në njerëz”.

I pyetur rreth angazhimit të flotës dhe trupës së zjarrfikësve, Prefekti Aliaj theksoi se: “Aktualisht drejtoria e Gjirokastrës ka disa mjete zjarrfikëse, pasi kjo e fundit trashëgoi flotën në rang prefekture, sepse para 2 vitesh këto vareshin nga prefekti ndërsa me strukturën e re u ka kaluar bashkive. Çdo repart zjarrfikës në 7 bashkitë e qyteti ka nga 13 punonjës ndërsa zjarrfikësja e Gjirokastrës ka rreth 45-50 punonjës të gatshëm për t’ju përgjigjur emergjencave të krijuara nga zjarret. Aktualisht të paplotësuar me mjete zjarrfikëse janë bashkitë Memaliaj dhe Libohovë, të cilat nuk kanë mjete, por disponojnë trupën si dhe mjete më pak të sofistikuara për shuarjen e zjarreve, si pompa, etj”, – theksoi Aliaj.

Me qëllim shmangien e zjarreve dhe humbjeve njerëzore, Prefektura e Gjirokastrës ka urdhëruar që të gjitha rrugët që janë problematike për qarkullimin e mjeteve zjarrfikëse të zhbllokohen. Gjatë natës në zonën muzeale nuk do të bllokohen rrugët, një kërkesë kjo drejtuar policisë bashkiake të Gjirokastrës. /atsh

Ditën e sotme në Sarandë ndaloi një prej jahteve më të mëdha në botë, një ZCEU9, i cili mbante flamurin e ishujve Bermude, por pronar ka rusin 43-vjeçar Andrey Melnichenko.

Vetëm një vit pasi është ndërtuar ky jaht ankoroi në Portin e Sarandës dhe të gjithë u ngazëllyen me pamjen e tij, madje edhe kryeministri Rama e postoi në rrjetet sociale.

Jahti gjigant, i lartë 143 metra dhe i gjerë 91 metra ka ndaluar në Sarandë për t’u furnizuar me naftë, ndryshe nga ç’u “shit” sikur kishte ardhur enkas për të vizituar qytetin bregdetar.

Ky jaht do të do të blejë 840 mijë litra naftë në portin shqiptar. Deri tani, 36 autobotë nafte kanë filluar shkarkimin për furnizimin e anijes. Furnizimi pritet të vazhdojë deri në orët e mëngjesit.

Vlera e jahtit thuhet se është 1 miliard dollarë dhe në ekuipazhin e tij tani që ndodhet në Sarandë janë vetëm 15 persona.