Aktualitet

“Arturi dhe bashkëshortja e tij kanë investuar në agroturizëm që prej vitit 2015, duke krijuar 6 mijë rrënjë bimë frutore dhe fidanë, me sipërfaqe 7 hektarë e gjysmë.

Edhe pse pa eksperiencë në këtë sektor, pasioni i madh e ka transformuar këtë zonë nga një sipërfaqe pa funksion, në një oaz turistik me emrin shpresëdhënës “PEMA E JETËS””.

Kështu shkruan ministri i Bujqësisë dhe Zhvillimit Rural, Niko Peleshi në rrjetin social “Facebook”, duke përcjellë mesazhin se ky investim, është një histori suksesi në fushën e agroturizmit shqiptar që po lulëzon gradualisht në zona të ndryshme të vendit, inkurajuar dhe mbështetur edhe nga politikat e qeverisë.

Qeveria ka nisur këtë vit, për herë të parë zbatimin e një programi të madh kombëtar për zhvillimin e agroturizmit.

Agroturizmi shihet si mundësia që do të ndryshojë tërësisht situatën në zonat rurale, ku nuk mund të fitosh me bujqësi dhe blegtori, ndaj dhe qeveria ka hartuar një paketë shumë inkurajuese në mbështetje të investimeve në këtë fushë.

Përmes programit “100 fshatrat”, ku po bashkërendojnë punën 4 dikastere të rëndësishme (Bujqësia, Infrastruktura, Kultura dhe Turizëm-Mjedisi) synohet të hapet një faqe e re në diversifikimin e zhvillimit rural, përmes agroturizmit./atsh

Gjyqtari i Gjykatës Administrative të Apelit në Tiranë, Artur Malaj kalon me sukses procesin e Vetting-ut. Komisioni i Pavarur i Kualifikimit ka dhënë sot vendimin për Malaj, duke e konfirmuar në detyrë.

“Trupi gjykues pasi dëgjoi zotin Malaj, e konsideron të përfunduar seancën dëgjimore. Në përfundim të këtij procesi të rivlerësimit trupi gjykues, vendosi konfirmimin në detyrë të zotit Artur Malaj”, deklaroi relatorja Genta Tafa Bungo.

Në seancën dëgjimore, Komisioni i Pavarur i Kualifikimit doli kundër DSIK për Malaj. DSIK e konsideronte të papërshtatshëm Malaj për të vijuar ushtrimin e detyrës pasi ishin zbuluar lidhje të tij me elemente kriminalë.

Gjykatësi administrativ kandidon për postin e inspektorit të lartë të Drejtësisë./atsh

Turistët e huaj që vizitojnë për herë të parë Shqipërinë kanë përshtypje shumë të mira dhe thonë se do ta vizitojnë sërish, ose do ta rekomandojnë në vendet e tyre të origjinës si destinacion për t’u vizituar.

Nga rezultatet e para të anketimeve në kuadër të programit “Smile Albania” rezulton se turistët e huaj tregojnë një përshtypje fenomenale për vendin tonë, sidomos kategoria e turistëve që vijnë për herë të parë në Shqipëri.

Këtë e konfirmoi sot, zv/ministri i Turizmit dhe Mjedisit, Hajrulla Çeku. Sipas tij, “programi Smile Albania, i ka kaluar pritshmëritë dhe ka sjellë një vlerë të shtuar për turizmin tonë.

“Ndaj ne po bëjmë përpjekje që ky program të jetë i përhershëm dhe të vazhdojë të funksionojë edhe gjatë pjesës tjetër të vitit. Kjo lidhet me synimin e qeverisë për një turizëm të qëndrueshëm që shtrihet gjatë gjithë vitit duke sjellë fitime në ekonominë e vendit dhe duke u përdorur si instrument për të luftuar varfërinë dhe krijuar vende të reja të punës”, tha Çeku.

Ai theksoi se “kemi një konfirmim të trendit të rritjes së pushuesve që vijnë në Shqipëri dhe trendi dyshifror i rritjes po vazhdon”./atsh

Eksportet bujqësore për 6-mujorin e parë të vitit janë rritur me rreth 2 miliardë lekë, duke regjistruar shifrën e 16.3 miliardë lekë.

Sipas statistikave të dikasterit të Bujqësisë, në gjysmën e parë të këtij viti, vihet re se harta e produkteve bujqësore që eksportohen jashtë vendit, kryesohet nga zëri blegtori, bujqësi, agroindustri dhe peshkim.

Ekspertët e bujqësisë shprehen se rritja e prodhimit vendas dhe kërkesa e shtuar nga tregjet e huaja për prodhimet “Made in Albania”, po ruan trendin pozitiv të eksporteve bujqësore shqiptare.

Ndër produktet që më të kërkuara mbeten produktet si domate, qepë, karota, rrepa, zarzavate të tjera, agrumet, si dhe një pjesë e konsiderueshme e frutave./atsh