Aktualitet

Bashkim Dedja, kryetari aktual i Gjykatës Kushtetuese do të kalojë përmes “varrit për së gjalli” sikurse e ka përcaktuar ai vetë procesin e Vettingut.

Dedja e kaloi Vettingun kohë më parë pavarësisht problemeve të shfaqura me pasurinë, por do të rikthehet në pikën e nisjes pasi partnerët ndërkombëtarë SHBA dhe BE e duan me patjetër atë jashtë sistemit të drejtësisë.

Nëpërmjet përfaqësyeses së tyre në procesin e vettingut, OMN, ata kanë kërkuar ankimimin e Dedjes përmes komisionerit në Kolegjin e Posacëm të Apelimit, i cili e pranoi rishqyrtimin dhe njëherë të procesit.

Madje KPA ka bërë publikë emrat e trupës gjykuese që pritet të shqyrtojë së shpejti dosjen e kreut të Gjykatës Kushtetuese, Bashkim Dedja, me mjaft probleme pasurie të evidentuara.

Sipas vetë njoftimit të KPA, “në Kolegjin e Posaçëm të Apelimit është regjistruar çështja (JR ) Nr. 10/2018, datë 31 korrik 2018 që i përket ankimit të Komisionerit Publik, kundër vendimit nr. 24, datë 13 qershor 2018 të Komisionit të Pavarur të Kualifikimit, që lidhet me procesin e rivlerësimit kalimtar të subjektit të rivlerësimit z. Bashkim Dedja.

Sot, në datën 4 shtator 2018, në Kolegjin e Posaçëm të Apelimit, u hodh shorti për caktimin e trupit gjykues, kryesuesin e këtij trupi dhe relatorin e çështjes.Trupi gjykues i caktuar me short është i përbërë si më poshtë vijon: Kryesues: Ardian Hajdari; Relator: Luan Daci; Anëtarë: Albana Shtylla, Natasha Mulaj, Rezarta Schuetz”.

Pra zyrtarisht çështja pritet të shqyrtohet sa më shpejt në KPA, për të vendosur mbi fatin e kryetarit aktual të Kushtetueses, Bashkim Dedja, që bashkë me Vitore Tushën që e ka kaluar Vettingun zyrtarisht, përbëjnë dyshen e vetme të anëtarësisë në Kushtetuese. Pasi të gjithë anëtarët e tjerë të Kushtetueses ose janë dorëhequr ose kanë mbetur në “rrjetën” e Vettingut.

Burime brenda këtij Kolegji bëjnë me dije se që tani kanë filluar presionet për ta kaluar si të pastër Bashkim Dedjan. Dhe presionet janë nga ana e interlokutorëve të politikës, të cilët përcjellin dëshirën e qeverisë, presidencës por dhe opozitës që Bashkim Dedja të mos preket.

Burimi saktëson se KPA dhe në veçanti trupi gjykues i ngritur për të rivlerësuar Bashkim Dedjen është në një trysni të fortë dhe në një dilemë të jashtëzakonshme.

Kjo për shkak se ata gjenden mes kërkesës së partnerëve tanë ndërkombëtarë SHBA dhe BE që Bashkim Dedja të jetë jashtë sistemit të drejtësisë, pasi nuk mund të ketë drejtësi të re dhe të ndershme me të në krye të Kushtetueses.

Por ka dhe një presion në rritje të politikës, që e kërkojnë me ngulm Dedjan të dalë i “pastër” nga procesi i Vettingut për të qënë në krye të Gjykatës Kushtetuese.

Mbetet mister arësyeja e vërtetë e kësaj këmbënguljeje të kryeministrit, Presidentit dhe opozitës deri në përplasje me SHBA e BE, për të mbajtur në “lojë” kryetarin aktual të Kushtetueses./Pamfleti

Numri i veprave penale të kryer nga shtetasit shqiptar në 2016-n në vendin fqnj ishte 7575, të renditur pas rumunëve, me rreth 16348 krime dhe marokenëve me 6115 denoncimeve. Në raport me numrin e shqiptarëve që kanë emigruar në Itali, Il Sole përllogarit se në çdo 100 emigrantë, rreth 1.23 ka kryer një vepër penale.

Ndërsa krimet nga vetë italianët, sipas të dhënave të publikuara nga Infodata e Il Sole 24, është 66,477, ku sipas përllogaritjeve në çdo 100 italianë, 0.11 kanë kryer një vepër penale.

Ky përpunim të dhënash nga portali italian u nxit prej debatit mbi emigrantët dhe “pushtimit” që i kanë bërë Italisë.

Për sa i përket renditjes më poshtë, për numrin më të lartë të denoncimeve bazuar mbi kombësinë, renditet Tunizia me 2233 denoncime, Moldavia me 1400 dhe Bosnja me rreth 1300. denoncime.

Megjithatë Il Sole në analizën e saj jep dy sqarime të rëndësishme. E para, lidhet me faktin se një emigrant që kryen një krim nuk i bën kriminelë të gjithë emigrantët, me të njëjtën kombësi.

E dyta është e natyrës juridike. Supozimi i pafajësisë në fakt do të thotë se, kur flitet për krime, vetëm ato për të cilat ka një person është dënuar me vendim të formës së prerë janë marrë në konsideratë. Të dhënat që janë në dispozicion në faqen e internetit të Institutit italian të Statistikave, por përdorimi i të cilave krijon disa probleme nga pikëpamja kronologjike.

Grupi i të dhënave të institutit kombëtar të statistikave, në fakt, i klasifikon të paraburgosurit në bazë të vitit në të cilin emri i tyre është futur në dosjen penale. /Monitor/

Kryeministri Edi Rama ka qenë sot në familjen Karaj për t’i dhuruar librat dy fëmijëve të tyre Greisit dhe Reit me rastin e nisjes së vitit të ri shkollor.

Rama ka ndarë disa shqetësime me prindërit e nuk ka munguar dhe një bashkëbisedim me fëmijët.
Një nga këto tema ishte dhe ndalimi i celularëve në shkolla. Me sa duket edhe kryeministri ka problemin e celularit me djalin e tij të vogël Zahon pasi tha se nëse do ia kërkonin t’i hiqnin celularin do ishte njeriu më i kënaqur.

“Prindërit kanë hallin kryesor në këtë pikë. Në qoftë se mua shkolla do të më thoshte do ia heqim celularin Zahos, nuk është bërë akoma për shkollë unë do isha njeri më i kënaqur. Sepse është komplet jashtë kontrollit të vetes, jo më të mësuesit dhe tëndit kur është në shkollë. Vetëm keq ka ajo punë, s’ka asnjë të mirë, s’ka asgjë pozitive”, u shpreh Rama.

KPK, ku në të njëjtën kohë është edhe organi bazë i Vettingut ka arsyetuar shkarkimin nga detyra të Artan Lazaj, gjyqtarit të Gjykatës së Tiranës. Atij po ashtu i është refuzuar edhe viza nga Ambasada Amerikane duke mos i lejuar hyrjen në SHBA. Por sipas ”Shqiptarja.com” Komisioni i Pavarur i Kualifikimit ka konstatuar 17 probleme në pasurinë e  gjyqtarit Lazaj. Nga një hetim i thelluar rezulton se gjetjet konstatojnë në mosdeklarim të shpenzimeve në shumat 10 mijë euro,  4.900.000 lekë si dhe në mosdeklarimin e gjendjes cash prej 150 mijë eurosh.

Nga ana tjetër KPK ka konstatuar se gjyqtari Lazaj ka dhënë para Komisionit përgjigje kontradiktore të cilat nuk përkojnë me atë çfarë ai ka deklaruar në deklaratën e pasurisë.

“Burimi im i vetëm është rroga. Nuk jam si të tjerët me hua tek vjehrri e vjehrra apo xhaxhai. Kam dhënë 4 dënime me vdekje në Shqipëri. Shumë e shumë me burg përjetë. Jam kërcënuar me vdekje. Nëse ka qëllim që gjyqtarin Laze ta hedhim si pre në botën e krimit, atëherë nuk kam çfarë pres. Disa nga këta të dënuar ende policia s’i ka kapur policia. Shtyjeni këtë seancë, merrni të dhëna dhe me vlerësoni. Kam besim se do më rivlerësoni dhe njëherë. Do të jepni një vendim pozitiv rikonfirmimin tim në detyrë. Mos ndërprisni ëndrrën e të dhënit drejtësi gjyqtarit Artan Laze”, ka pohuar ai.

Konstatimet e KPK mbi ligjshmërinë e pasurisë së gjyqtarit Laze

1.    Nuk është deklaruar shpenzimi prej 4.900.000 lekësh, i kryer në vitin 2009 dhe as ai prej 50.000 eurosh i bërë në vitin 2010 – të dy në favor të “***” sh.p.k.

2.    Nuk kishte burime financiare të ligjshme në datën 18 gusht 2010 për pagesën e 50.000 eurove, pasi të ardhurat nga shitja e shtëpisë, e kryer më 19 nëntor 2010, ishin të disponueshme tre muaj më vonë.

3.    Mungesë deklarimi të gjendjes cash prej 50.000 eurosh dhe të burimit të tyre. Kjo sasi likuiditeti duhej të ishte deklaruar gjendje cash e mbartur në datën 31.12.2009, pra në deklaratën e këtij viti, me specifikimin e burimit të kësaj shume, duke u nisur nga fakti që në datën e kryerjes së pagesës në fjalë nuk disponohej ende shuma e përfituar nga shitja e apartamentit në Rrugën ***, Tiranë.

4.    Është bërë deklaratë e rreme në vitin 2008, kur në faqen nr. 3 është deklaruar një gjendje cash 60.000 euro – si pjesë e ngelur nga shuma prej 90.000 eurosh, e përfituar nga shitja e apartamentit (pasi: ishin paguar taksat; ishte shlyer kredia në “Alpha Bank”; ishte blerë një autoveturë).

5.    Nuk janë deklaruar pagesat (që pretendohet) që janë kryer në favor të “***” sh.p.k., përgjatë periudhës 2010 – 2014, – sipas deklaratës së kësaj të fundit, të datës 21.03.2018, – të detyrimit prej 50.543 eurosh (të ngelur nga çmimi i blerjes së apartamentit: 129.000 – 28.457 – 50.000 = 50.543).

6.    Ka mospërputhje midis deklaratës së “***” sh.p.k., të datës 21.03.2018, të cilën subjekti i rivlerësimit e konfirmon, duke iu referuar asaj dhe duke mbështetur në të disa argumentime të tij, dhe veprimeve të kryera, si dhe deklarimeve periodike në të cilat nuk është specifikuar mënyra/vlera/viti i pagesave (e kësteve të pretenduara).

7.    Ka kryer deklarim të pasaktë dhe të pamjaftueshëm në lidhje me çmimin e blerjes së apartamentit në Rrugën ***, Tiranë, të deklaruar të ndryshëm nga sa rezulton në kontratën e datës 25.08.2004.

8.    Ka paraqitur deklarime të pasakta dhe me përmbajtje të ndryshme nga të dhënat e kontratave të nënshkruara prej tij.

9.    Ka paraqitur deklarim në Deklaratën-Vetting të pamjaftueshëm dhe në mospërputhje me deklaratat periodike, si dhe me deklarimet e dhëna prej tij në përgjigje të pyetësorëve të Komisionit.

10.    Ka paraqitur deklarata periodike të pamjaftueshme dhe të pasakta, pasi rezultojnë në mospërputhje midis tyre, si dhe me përmbajtjen e kontratave të premtim-shitjes nga ana e tij (2008 dhe 2010) të apartamentit të sipërcituar, në lidhje me çmimin e aplikuar, me pjesën, mënyrën dhe momentin e pagesës së tij;

11.    Ka dhënë para Komisionit përgjigje të pavërteta, të ndryshme dhe kontradiktore midis tyre, që nuk përkojnë me realitetin e fakteve të vërtetuara nga dokumentet.

12.    Ka nënshkruar një kontratë të dytë premtim-shitjeje, fiktive, për të njëjtin send, vetëm për të favorizuar blerësit që të shmangnin detyrimet e kamatëvonesës që lindte, pikërisht nga vonesa me të cilën mund të ishte bërë regjistrimi i kontratës së parë.

13.    Është kryer fshehje e pasurisë, në masën e pjesës takuese, si dhe e deklarimeve periodike të pamjaftueshme në vitet 2003 – 2013, dhe në Deklaratën- Vetting.

14.    Rezulton një mospërputhje midis deklaratave dhe të dhënave konkrete të kontratave, si dhe dy deklarime të rreme, si në Deklaratën-Vetting, po ashtu edhe në deklaratën e vitit 2003.

15.    Janë bërë deklarata të pamjaftueshme në deklarimet periodike të viteve 2015, 2016 dhe 2017, si dhe janë dhënë përgjigje të pavërteta dhe të paplota ndaj këtij Komisioni.

16.    Në periudhën 2003-2016 rezulton se të ardhurat e ligjshme të realizuara nga subjekti i rivlerësimit nuk kanë qenë të mjaftueshme për të përballuar blerjet e pasurive të paluajtshme, gjendjen e likuiditeteve në bankë dhe cash në shtëpi, si dhe për të kryer shpenzimet jetike dhe ato të deklaruara.

17.    Mungesë e theksuar gjendje të ardhurash nga burime financiare të ligjshme, në vitet 2004; 2005; 2006; 2009; 2010; 2011; 2012; 2014; 2015; 2016, që të mund të ishin të mjaftueshme për të përballuar të gjitha shpenzimet e kryera nga familja e subjektit të rivlerësimit në periudhat respektive, si dhe për të realizuar kursimet e deklaruara./korrieri

Ndërkohë që opozita zhvillonte në Shkodër një takim të jashtëzakonshëm, si mesazh kundër krimit në këtë qytet, ministri i Brendshëm, Fatmir Xhafaj, nuk i ka kursyer kritikat. Nga foltorja e Kuvendit, Xhafaj tha se sulmi i opozitës është agresic dhe i qëllimshëm për të nxirë imazhin e policisë dhe të vendit.

Lidhur me ngjarjet e rënda të ndodhur së fundmi në vend, duke iu referuar edhe vrasjeve në Shkodër, ministri i Brendshëm u shpreh se Policia po bën punën maksimale për zbardhjen e dinamikës dhe kapjen e autorëve.

“Ajo që po bën opozita është një sulm agresiv i qëllimshëm për të nxirë imazhin e policisë dhe të vendit. Nuk dua t’i hyjë farë diskutimit se cila është natyra e disa prej viktimave të përfshirë në këto ngjarje, apo sa dhe si këta ta fundit kanë qenë vetë të përfshirë në vrasje të mëparshme.

natyrisht për ne cdo rast vrasje përbën një ngjarje të rëndë sepse janë jetë njerëzish dhe cenojnë sigurinë qytetare. Ne jemi duke iu shkuar në fund këtyre rasteve dhe shumë shpejt do të zbardhim ehde autorët, kjo sa i takon përgjegjësisë sonë. Sa i përket opozitës, kanë zgjedhur një kauzë të gabuar. Në këto muaj kemi bërë një skanim të qartë dhe të hollë të grupeve kriminale që nuk u krijuan sot, por kanë vite. Kemi goditur një pjesë të këtyre grupeve”, tha ministri Xhafaj.