Sezoni turistik i këtij viti ka qenë një nga më të mirët përsa i përket sigurisë së pushuesve dhe parandalimit të zhurmave akustike, ku Policia e Shtetit ka marr të gjitha masat për t’i siguruar ato.
Ministri i Brendshëm, Fatmir Xhafaj bëri me dije gjatë një takimi për turizmin në Vlorë, se gjatë këtij sezoni turistik u angazhuan më shumë se 1 mijë forca policore, mjete shtesë në funksion të tyre si dhe posta policie, të cilat kanë qëndruar 24 në shërbim të pushuesve.
“Ne premtuam 3 muaj me pare ne nisje të këtij sezoni se do te kishim një sezon me shume qetësi dhe shume rend, si dhe parandalimin e akteve kriminale. Padyshim besoj se me një organizmi më të mirë policor dhe është fakt që në aktivizuam mbi 1000 trupa policore, mjet shtesë në dispozicion të tyre, duke ngritur një sërë stacionesh provizore policie, si në Theth, Valbonë, Talie, Gjirin e Lalëzit,Ksamil etj, si dhe rritëm ndjeshëm shërbimet policore pa uniformë dhe shërbimet policore me mjete të lehta në territoret e plazhit. Si rrjedhojë ky ishte një sezon i sigurt dhe pa pasoja në zonat turistike si dhe me një ulje të ndjeshme të vjedhjeve në territoret e plazheve”, theksoi Xhafaj.
Policia e Shtetit në bashkëpunim me pushtetin lokal kanë marr të gjitha masat për parandalimin e aksidenteve të shkaktuar nga motorët e ujit, duke vendosur tabela informuese si dhe duke përcaktuar qartë vendin se ku motorët e ujit mund të qarkullojnë./atsh
Fjala e ministrit të Brendshëm Fatmir Xhafaj në takimin e mbajtur sot në Radhimë, Vlorë, në përmbyllje të sezonit turistik veror:
Përshëndetje,
në ditët e para të muajit qershor të këtij për të çelur sezonin turistik ishim këtu në Vlorë. Dhe ne premtuam dhe u angazhuam për një sezon turistik shumë më të mirë, shumë më cilësor se vitet e kaluara dhe padyshim një komponente e rëndësishme ishte dhe mbetet ajo që lidhet me çështjet e rendit, të qetësisë dhe të sigurisë gjatë sezonit turistik, si një kusht i domosdoshëm për pushime cilësore, për qytetarët shqiptarë dhe për turistët që zgjedhin si destinacion Shqipërinë.
Mbas tre muajsh, ne sot në këtë event padyshim kemi një detyrim për të parë se çfarë kemi bërë me ato që kemi premtuar. Çfarë kemi premtuar, çfarë kemi realizuar dhe çfarë ka ndodhur realisht?
Ne premtuam tre muaj më parë në nisje të këtij sezoni se do të kishim një sezon me më shumë qetësi, me më shumë rend dhe parandalim më të mirë të incidenteve dhe akteve kriminale. Dhe besoj se përmes një prezence më të madhe, më efikase dhe një organizimi më të mirë policor.
Është fakt që ne gjatë këtij sezoni angazhuam mbi 1 mijë forca policore në funksion të sezonit turistik, mjete shtesë në funksion të tyre, ngritëm një sërë stacionesh policore provizore, si në Theth, në Valbonë, në Tale, në Gjirin e Lalëzit, në Ksamil.
Rritëm ndjeshëm shërbimet policore pa uniformë dhe shërbimet policore duke lëvizur me mjete të lehta të qarkullueshme, me biçikleta në territoret e plazheve dhe si rrjedhojë ky ishte sezoni turistik pa asnjë incident të rëndë me pasoja, gjatë këtyre tre muajve në të gjithë vijën bregdetare, në të gjithë zonat turistike. Dhe me një ulje të ndjeshme të numrit të vjedhjeve në territoret e plazheve.
Gjithashtu ne premtuam gjatë nisjes së këtij sezoni, për menaxhim më të mirë të trafikut dhe forcimin e sigurisë rrugore. Vendosëm shërbime shtesë, në mënyrë të veçantë në akset problematike edhe për shkak të problemeve që lidhen me infrastrukturën dhe sinjalistikën, që ka në disa prej këtyre akseve, siç është aksi që ka të bëjë me daljen nga qyteti i Fierit dhe hyrjen në Vlorë, gjithashtu.
Forcuam regjimin e kontrollit në zbatimin e rregullave të qarkullimit rrugor, futëm komunikimin intensiv publik përmes konferencave javore të shtypit të drejtuesve të Policisë Rrugore, por edhe komunikimin në kohë reale në radiot, ndërmjet Policisë Rrugore dhe drejtuesve të mjeteve për t’i njohur ata me vështirësitë e lëvizjes e trafikut në orët kyç të tij. Dhe natyrisht rezultati, është pozitiv, kemi gati 100 aksidente më pak dhe një ulje të ndjeshme të numrit të aksidenteve me pasoja. Natyrisht duke dhënë këto shifra, dua të them se kjo është një çështje ku ne nuk jemi të kënaqur, përkundrazi.
Pavarësisht përmirësimeve që kemi bërë, jemi të vetëdijshëm se ka shumë për të bërë, qoftë nga pikëpamja e përmirësimit infrastrukturor të rrugëve, por edhe nga pikëpamja e menaxhimit të trafikut. Kjo është arsyeja që pas disa ditësh në muajin shtator, ne do të prezantojmë një Plan konkret Veprimi për të bërë të mundur një sistem të ri menaxhimi të trafikut rrugor dhe që shpresoj se do të krijojë një impakt të ri për të gjithë çështjet e menaxhimit të trafikut dhe funksionalitetit të Policisë Rrugore në vend, por do t’i shërbejë më së miri vitin e ardhshëm edhe sezonit turistik, që besoj se do të ketë një prurje shumë më të madhe njerëzish dhe mjetesh edhe për shkak të kësaj përvoje të mirë të krijuar gjatë këtij viti.
Së treti, ne premtuam forcimin e kontrollit në plazhe dhe sidomos në përdorimin e mjeteve ujore.Të gjithë janë dëshmitarë të faktit që kjo ka qenë një gjë shumë kaotike ndërkohë që sivjet kemi një pamje krejt, krejt të ndryshme në të gjithë vijën bregdetare ku u bë e mundur që në bashkëpunimin me Bashkitë, me operatorët privatë dhe me biznesin vendosëm rregulla për qarkullimin e mjeteve ujore dhe njëkohësisht për zonat e larjes në det të pushuesve dhe natyrisht rregulla më të forta për përdoruesit e mjeteve.
Për herë të parë kemi të vendosur korridore ujore për qarkullimim e mjeteve ujore dhe në mënyrë të veçantë të motorrëve të ujit. Natyrisht fillimi ishte paska i vështirë, kemi patur edhe keqkuptime nëpërmjet Policisë dhe përdoruesve të këtyre mjeteve, por e rëndësishme është që ajo që duhet theksuar, është fakti që ne për herë të parë nuk kemi asnjë incident me mjetet ujore në vijën bregdetare të të gjithë territorit shqiptar.
Jemi dëshmitar, që në vitet e mëparshme kemi pasur disa incidente edhe me pasoja vdekjen për shkak të keqpërdorimit të mjeteve ujore, në mënyrë të veçantë të motorrëve të ujit.
Një premtim tjetër i rëndësishëm në nisje të këtij sezoni, kishte të bënte me mjedisin me rendin dhe qetësinë në zonat turistike, kryesisht me zhurmën akustike, dhe disiplinimin e kohës për përdorimin të muzikës në lokalet në zonat turistike. Edhe në këtë aspekt, kemi qenë dëshmitarë të faktit që ka qenë një gjë shumë kaotike, me orë e pa orar, me shqetësime të ndryshme, me një lloj tensioni ndër qytetarët, për pushuesit në plazhe, edhe natyrisht edhe vetë biznesin që jo rrallë krijonte incidente apo konflikte ndërmjet autoriteteve vendore, Policisë dhe pronarëve të restoranteve.
Por, ajo që është shumë e rëndësishme në sajë të një marrëdhënie shumë të mirë të krijuar me pushtetin vendor, u vendosën rregulla më të qarta, dhe unë këtu në mënyrë të veçantë, në të gjitha Bashkitë e vendit, dua të falënderoj Bashkinë e Vlorës, për shkak se arriti të marrë një sërë masash të qarta dhe në kohë, për disiplinimin e këtij procesi. Ne mund të themi që sivjet, në numrin 112 kemi gati 90% më pak ankesa nga qytetarët lidhur me zhurmat në orët e vona të natës dhe kjo ishte rrjedhojë jo thjesht dhe vetëm i përdorimit të autoritetit të Policisë, por besoj dhe ajo që është e rëndësishme, i mirëkuptimit të krijuar ndërmjet autoriteteve vendore, Policisë dhe biznesit privat.
Së pesti, dhe që ishte një premtim shumë i rëndësishëm i yni, lidhej me menaxhimin më të mirë të hyrje-daljeve në Pikat e Kalimit Kufitar. Është fakt që ne kemi rreth 25% më shumë hyrje se në vitin 2017 të njerëzve, dhe rreth 15% më shumë mjete të hyra në territorin shqiptar. Kjo krijoi një fluks më të madh dhe në kushte të njëjta me vitet e kaluara nga pikëpamja e objekteve që kemi në dispozicion, por në sajë të një menaxhimi shumë më të mirë të pjesës së kufirit, një menaxhimi më të mirë të pikave të kalimit kufitar, qoftë për lëvizjen e qytetarëve, qoftë për lëvizjen e mjeteve, ne mundëm që sivjet të kishim një qarkullim shumë më të mirë edhe në sajë të faktit që futëm për herë të parë atë që konsiderohet ndryshe dhe lëvizje me procedurë të përshpejtuar, që do të thotë duke lehtësuar edhe hyrjen e qytetarëve dhe të mjeteve në pikat kyç, sidomos në Morinë, në Muriqan, në Kapshticë edhe në Kakavijë.
Rezultati është që shqetësimet në këtë aspekt, kemi patur një përpunim më të mirë të mjeteve dhe të lëvizjes së qytetarëve në pikat hyrës të kalimit kufitar dhe për herë të parë kemi arritur të marrim vlerësime pozitive nga Tour-operatorët, nga shoqëritë turistike, lidhur me mënyrën se si është proceduar me shpejtësi, mënyrën se si janë trajtuar lëvizja e mjeteve dhe turistëve në pikat hyrëse të kalimit kufitar.
Natyrisht këto ishin 5 premtimet kryesore, angazhimet kryesore që bëmë në hyrje të këtij sezoni dhe unë sot mund të them që ne ia arritëm që të mund të ofronim në këtë sezon turistik më shumë qetësi, rend dhe siguri për qytetarët shqiptarë, për turistët që zgjodhën si destinacion Shqipërinë gjatë këtij viti dhe rezultatet në këtë aspekt janë shumë më të mira nga pikëpamja statistikore se në çdo vit tjetër të mëparshëm.
Kjo natyrisht është rezultat i një pune të jashtëzakonshme dhe me sakrifica dhe me orare të zgjatura të punonjësve të Policisë që u angazhuan në këtë proces dhe padyshim edhe i drejtuesve të tyre në nivel rajonal, në Komisariate në Drejtoritë Vendore dhe në Drejtorinë Qendrore të Policisë.
Mjaft t’ju them faktin se ndërsa të gjithëve mund të na ketë rënë rasti të bëjmë një, dy, apo 20 apo 30 ditë pushime, apo të hyjmë në plazh për t’u relaksuar, punonjësit e Policisë që kanë shërbyer, deri tek Drejtori i Përgjithshëm gjatë këtij tre mujori nuk kanë pasur mundësinë të shkojnë një ditë në plazh për të pushuar duke qenë të bindur se duhej të bënin ata një sakrificë në shërbim të qytetarëve, në funksion të qytetarëve, në funksion të sezonit turistik, por një sakrificë besojmë ne, që ja ka vlejtur.
Natyrisht, unë e di shumë mirë që nuk është lajm të bësh detyrën. Ky nuk është lajm që e kanë shumë për qejf mediat kur ka rezultate pozitive, por është një lajm shumë i mirë besoj për qytetarët shqiptarë që kanë mundësinë t’i shohin dhe t’i prekin këto rezultate dhe këto tregues dhe mbi të gjitha këtë angazhim shumë të mirë të Policisë.
Unë sot gjej rastin dhe një herë t’i falënderoj të gjitha strukturat e Policisë për impenjimin dhe angazhimin e tyre të jashtëzakonshëm gjatë këtij sezoni turistik.
Falënderoj drejtuesit vendorë, për mirëkuptimin dhe bashkëpunimin shumë të mirë që kemi ndërtuar në të gjithë territorin e zonave turistike, Ministrinë e Turizmit për kooperimin shumë të mirë që kemi pasur në këtë fushë gjatë këtij sezoni dhe padyshim të gjitha bizneset dhe operatorët turistik për mirëkuptimin dhe mbështetjen që na kanë dhënë. Faleminderit!
Kryeministri EdI Rama ishte sot në Vlorë për bilancin, mësimet dhe objektivat për sezonin e ardhshëm turistik kur u ndal sërish tek bypass-i i Fierit.
Edi Rama: Ndërsa po tregonte për projektet për të ardhmen, kryeministri ndërpreu fjalën dhe tha: E kam shumë të qartë që ndërkohë që ne flasim aty vazhdojnë komentet po By-Pass-i i Fierit, po By-Pass-i i Fierit i cili na është bërë si ByPass-i i fytit nga sikleti. Sinqerisht përditë në fyt nga sikleti, sepse realisht është një legjendë katastrofike paaftësie, papërgjegjshmërie dhe korrupsioni.
Na është dashur të prishim komplet kontratën dhe të bënin gjithça nga e para me Bankën Europiane për Zhvillim. Tani procesi ka filluar dhe shpresojmë shumë që brenda disa javëve të na vijë përgjigjja përfundimtare e bankës, të lidhet kontrata dhe sezonin e ardhshëm ta gjejë rrugën e By-Pass të hapur për të qenë e kalueshme, nëse jo e përfunduar tërësisht. Kështu të kompletohet e gjithë lidhja me Vlorën.
Bulevardi i ri ne Vlore gati sezonin e ardhshem
Më pas Rama foli dhe per rrugen Kashar- Rrogozhinë që e bën Tiranë-Vlorë për 55 minuta dhe premtoi se bulevardi i ri i Vlorës sezonin e ardhshëm do jetë gati.
Edi Rama: “Pak më tutje vjen projekti i tjetër rrugës Kashar- Rrogozhinë që e pret komplet në diagonal rrugën drejt Fierit e Vlorës dhe e bën Tiranë-Vlorë për 55 minuta.
Më vjen mirë që sidoqoftë vlonjatët nuk po nxjerrin zë për bulevardin e ri ku është bllokuar trafiku dhe është ngushtuar rruga. Nuk po dëgjoj më njeri që të thotë pse me rrugë të ngushta, pse na është bllokuar sepse e morën mësimin me Lungomaren. Mësuan se nuk duhet folur përpara se në fund pastaj me Edi Ramën nuk të del fjala. Bulevardi i ri do të jetë një tjetër vlerë e shtuar. Në sezonin e ardhshëm do ta kemi të përfunduar besoj dhe do të jetë realisht një tjetër vepër si Lungomarja për të cilën marrim mesazhe inkurajuese.”/faktor.al
Kryeministri Edi Rama ka qenë në Vlorë sot, në bregdetin e Radhimës për të bërë një përmbledhje të arritjeve dhe problemeve të sezonit turistik që po mbyllet me vrojtuesit e plazheve. Por ndërsa ministrat Fatmir Xhafaj, Blendi Klosi dhe Damion Gjiknuri kanë mbajtur nga një fjalim ka qenë dhe një djalë i ri që ka kërkuar të flasë. Ai ka treguar se kishte shpëtuar një vajzë nga mbytja.
E me këtë rast kryeministri Edi Rama nuk e ka lënë rehat të riun duke e ngacmuar si vlonjat që ishte dhe për të mishëruar shprehjen e famshme që i karakterizon ‘gjoksin gropë’.
“Do të shesë mend, do të tregojë se është nga Vlora”,- tha Rama. Djali, që administronte edhe një biznes të vetin në plazh, Ariel Lamaj tregoi se si kishte shpëtuar 25-vjeçaren, duke thënë se nuk është ndier shumë mirë.
“Gjatë punës sime unë bëra dhe një shpëtim të një vajze 25 vjeçe. Vajza vuante nga një krizë epilepsie dhe kur e pashë në det që nuk po reagonte siç duhej, u futa menjëherë dhe e kam nxjerrë vajzën në kohë rekord. I kam dhënë ndihmën deri sa erdhi ambulanca dhe u ndjeva shumë mirë”, tregoi i riu.
“Nxirre pak këtë gropën këtu. Ngrije këtë bluzën. Hiqe fare. Shikoni sa e ka gropën këtu, shikojeni!”, tha Rama, duke treguar kraharorin e të riut dhe më pas duke e porositur: “Vishu tani, kemi dhe vajzën këtu”.
Më pas kryeministri ka falënderuar vrojtuesit për punën e tyre gjatë këtij sezoni.
“Shumë respekt për shumë vepra të mëdha humane që keni bërë edhe duke rrezikuar në ndonjë rast veten tuaj dhe na ndihmuan të adresojmë një problem të vjetër të aksidenteve”, tha Rama./faktor
Vitin e ardhshëm para sezonit turistik veror do të fillojë puna për ndërtimin e fushës sanitare të mbetjeve në qarkun e Vlorës, që do t’i japë zgjidhje përfundimtare këtij problemi.
Në një takim mbi ecurinë e sezonit turistik në Vlorë, Kryeministri u shpreh se “ne kemi 4 vjet që punojmë për fushën sanitare të mbetjeve të qarkut të Vlorës”. “Në 4 vjet ne kemi bërë aplikimin, gjithë procedurën e trajtimit të aplikimit nga Banka Gjermane që i financon këto projekte. Kemi marrë aprovimin, është bërë projekti që është tani në procedurë”, tha Rama, duke shpjeguar procedurat që janë ndjekur.
Sipas tij “ky është një proces, pasi projekte të mëdha nuk nisin në momentin kur hidhet lopata e parë, por kur projektohen, futen në gara, kontraktohen e me radhë”.
Trajtimi i mbetjeve në Vlorë deri tani bëhet në mënyrë mesjetare, tha Rama, duke shtuar se “po shtohen kapacitet e bashkive për të bërë pastrimin e përditshëm”.
“Ne e dimë, tha Kryeministri, se bashkitë nuk e përballojnë dot vetëm këtë sfidë, sepse shumëfishohen në numër gjatë sezonit.
Sipas Ramës, problemi kryesor lidhur me pastërtinë nuk janë strukturat dhe infrastrukturat por janë vetë shqiptarët./atsh
Vlora ka përjetuar këtë vit një “bum” turistësh nga vendi fqinj Italia dhe kryesisht janë grupe të rinjsh, të joshur nga çmimet e lira dhe reklama në rrjetet sociale për plazhet e mrekullueshme.
Enrik Mehmeti, gazetar në Vlorë dhe njohës i mirë i sektorit të turizmit në tërësi, tha për “Monitor” se në përgjithësi ky sezon ka qenë më i mirë se ai i viteve të mëparshme për disa arsye, por problematikat nuk kanë munguar.
Ai nënvizoi se Vlora ende vuan numrin e kufizuar të shtretërve, pavarësisht strukturave të reja akomoduese, ndërkohë që edhe trafiku ka zbehur disi shkëlqimin e sezonit. Në Lungomare, sipas tij, u 4-fishuan bizneset e bareve dhe restoranteve ndërkohë që sektori po vuan për ide inovative dhe shërbime ekstra, të cilat mund të shtojnë vlerën e ofertës që Vlora ka për turistët.
Si e përkufizoni këtë sezon turistik veror për Vlorën apo rajonin e Jugut në tërësi? A ka pasur rritje të numrit të vizitorëve të huaj? Cilat janë vendet nga kanë ardhur kryesisht?
E quaj të suksesshëm për bizneset që lidhen me sektorin e turizmit në Vlorë, por më pak të suksesshëm për pjesën tjetër të Jugut, duke nisur nga Dhërmiu dhe në vazhdim. Vlora këtë vit ka pasur një numër të madh turistësh, kryesisht të huaj, dhe “bumi” ka qenë nga “fqinjët”. Është parë një rritje e numrit të turistëve italianë, të cilët kanë qenë të organizuar në grupe të rinjsh.
Nga kontaktet me ta, për të mësuar arsyet e zgjedhjes së Vlorës për pushime, është konstatuar se përgjithësisht janë joshur nga rrjetet sociale dhe media në të cilat tregohen çmimet e lira, vendet e mrekullueshme dhe ndryshimi rrënjësor i Shqipërisë.
Sipas tyre, nga një vend që s’duhet të vizitohej për shumë faktorë, të lidhur me sigurinë dhe deri te cilësia, Vlora tashmë është kthyer në një vend që duhet vizituar patjetër. Ndryshe ka qenë situata këtë vit në Dhërmi. Kjo për shkak të çmimeve të kripura që qarkulluan nëpër rrjete, të cilat i dhanë imazhin e një vendi i cili ishte i papërballueshëm për shumicën e turistëve. E vërteta ishte që çmimet “super të larta” ishin në lokale specifike, ndërsa në të tjera kishte çmime të klasifikuara normale për turistët.
Po lidhur me strukturat akomoduese, si paraqitet situata, a ka ndryshime në çmime, po pjesa e shërbimit?
Ka një përmirësim të ndjeshëm të kushteve të hoteleve, por ndihet mungesa e numrit të shtretërve. Rritja e numrit të turistëve të huaj të cilët kërkojnë parametra bashkëkohorë, ka bërë që investimet e reja të plotësojnë këto kritere, ndërsa të vjetrat t’i shtojnë ato. Vitet e fundit, sektori i hotelerisë ka punuar me paketa për turistët e huaj, si çekë, polakë, nordikë dhe së fundmi rusë duke bërë që shumë hotele të punojnë nga muaji mars deri në nëntor. Realisht, këto hotele janë të pakta, sepse tendenca e turistëve është në rritje, edhe pse për një periudhë të shkurtër.
“Bumi” ishte në 15-ditëshin e dytë të korrikut dhe deri në fund të gushtit, ashtu si shumë destinacione në Shqipëri, ku shumë turistë nuk gjenin vende për t’u akomoduar. Kjo kërkesë bëri që të përfitonin dhe shumë qytetarë, të cilët kanë përshtatur banesat e tyre në zonën e Plazhit të Vjetër apo dhe brenda qytetit. Për sa u përket çmimeve pati një luhatje në ulje në qershor dhe gjysmën e parë të korrikut, por më pas u rikthyen në nivelet e vitit të kaluar.
Cilat kanë qenë problematikat që kanë shoqëruar këtë sezon dhe që duhet të marrin vëmendje në vijim?
Për sa u përket problematikave ka pasur një situatë më të mirë se sa vitet e kaluara, por shumë prej tyre ngelen. Mospërfundimi ende i By Pass-it Vlorë-Orikum, bëri që fluksi i automjeteve të ishte shumë i lartë edhe për këtë sezon në rrugët e qytetit. Shumë turistë, të cilët kanë pasur si destinacion pjesën tjetër të Jugut, kanë qenë të detyruar të qëndrojnë në trafik. Një tjetër problem, i cili vlen të përmendet, është dhe stafi i lidhur me shërbimet në sektorin turistik. Në këtë pikë, pati mangësi nga vetë bizneset por jo për faj të tyre, por të mungesës së specialistëve të mirëfilltë.
Do të doja të bëja një propozim për këtë pikë. Nga çdo rreth mund të sigurohen kamerierë, banakierë, kuzhinierë apo punëtorë të tjerë të sektorit të turizmit, për të plotësuar nevojën që ka qyteti. Vlora, nga ana tjetër, ka dy konvikte, ai i Universitetit që shfrytëzohet për turistë dhe i industriales, që rri bosh dhe pikërisht këtu mund të bëhet edhe akomodimi i punonjësve me një kosto disi më të pranueshme për punëdhënësit dhe ku mund të organizohen edhe trajnimet e nevojshme nga specialistet përkatës.
Kjo do të ishte një ndihmë shumë e mirë si për bizneset, por dhe për turizmin në tërësi, duke pasur një shërbim më cilësor. Edhe për të rinjtë nga zona të ndryshme mund të ishte një mundësi e mirë punësimi, edhe pse sezonale, por me një pagesë të kënaqshme.
Turizmi në vetvete po nxit edhe zhvillimin e sektorit të shërbimeve siç janë sportet ujore, udhëtimet me paketa të dedikuara me anije por ende me një zhvillim anemik. Çfarë mund të bëhet për të nxitur plotësimin e paketave turistike, në mënyrë që Vlora të mos konceptohet vetëm si det dhe hotel?
Vitin e fundit, me hyrjen në funksion në mënyrë të plotë të Lungomares, u 4-fishuan baret dhe restorantet përgjatë zonës së Ujit të Ftohtë. Idetë e bizneseve të reja janë ndalur vetëm te këto dy biznese, kryesisht duke lënë pas dore biznese inovative dhe interesante. Vlora ka nevojë ende për shtimin e bizneseve të argëtimeve, ku turisti mund të kalojë dhe kohën e lirë. Një prej gjërave më të pëlqyera që turistët kanë kërkuar ka qenë bota nënujore, pasi në Gjirin e Vlorës janë një numër i madh anijesh të mbytura ku shumë prej tyre mund dhe të vizitohen.
Fatkeqësisht përgjatë viteve, të gjitha anijet janë vjedhur nga zhytës shqiptarë dhe të huaj duke e varfëruar shumë këtë sektor. Nga ana tjetër, pati dhe një rritje të numrit të anijeve turistike ku numri i anijeve shkoi në 7 të tilla nga 2 që ishin më parë. Konkurrenca bëri që shërbimi të kishte dhe mjete të cilat nuk ishin anije standarde. Një prej tyre ishte dhe katamarani Julka Unique i cili u prit shumë mirë për shkak të prodhimit që ishte i 2018-s, stabilitetit për shkak të strukturës dhe paketave me çdo gjë të përfshirë në anije.
Sa është ndier dora e pushtetit vendor në menaxhimin e plazheve, mbetjeve, ndërhyhet në sinjalistikë dhe infrastrukturë?
Ky vit, realisht është viti më i suksesshëm për sa i përket çdo aspekti pozitiv. Duke nisur nga infrastruktura, ku kryefjala është vendosja në funksion i Lungomares. Po ashtu dhe shumë rrugë apo lagje janë rehabilituar. Shtrimi i rrugës së Pyllit të Sodës bëri që kjo zonë së bashku me Zvërnecin të kenë një frekuentim të plazheve. Edhe siguria në plazhe, ndryshe nga çdo vit, këtë vit nuk pati asnjë të mbytur, për shkak të rojeve bregdetare, të cilët u vendosën të detyruar nga bashkia.
Një tjetër meritë, e cila bëri të shmangeshin incidentet ujore ishte dhe organizimi i lëvizjes së mjeteve ujore qindra metra larg plazheve. Asnjë gomone motor deti apo motoskaf nuk u afrua pranë vendeve ku laheshin njerëzit, pasi rrezikonin gjoba të majme. Bashkia pati një përkushtim të madh dhe në aktivitetet kulturore, ku disa prej tyre ishin të niveleve europiane. Vlora këtë vit ofroi një panoramë shumë ndryshe nga çdo vit tjetër./monitor
Qeveria shqiptare po vijon negociatat për ndërtimin e Aeroportit të Vlorës, të cilat Kryeministri Edi Rama i cilësoi të vështira, pasi siç tha ai, “duam të marrim maksimumin për interesin publik dhe të shtetit”.
Në takimin e zhvilluar në Vlorë për sezonin turistik, Kryeministri u shpreh se “jemi në proces negociatash për ndërtimin e aeroportit të Vlorës”.
“Ndryshe nga çfarë u propagandua nuk ishte një pazar i mbyllur, por është një negociatë e vështirë, sepse ne duam të marrim maksimumin për interesin publik dhe të shtetit”, tha Rama.
Kryeministri u shpreh besimplotë se do ta mbyllim negociatën dhe do të fillojmë edhe punën për të ndërtuar aeroportin e Vlorës.
“Pastaj aty do të fillojë një sfidë tjetër për Vlorën sepse ndryshimi i flukseve do të jetë shumë i madh dhe nevojat e jashtëzakonshme për të rritur cilësinë e shërbimeve po ashtu. Në mbi 20 vjet këtu janë bërë investime të gabuara, pasi nuk kemi hotele të mirëfillta dhe vila të mirëfillta turistike, kemi shumë pak”, tha Rama./atsh
Këtë fillimjave gjyqtarët rikthehen në punë. Një nga dosjet që pritet më shumë interes, është ajo e Azem Hajdarit, për të cilën ka një kërkesë nga Izet Haxhia, për t’u rihapur.
Vendimi për hapjen apo jo të kësaj dosje, do të merret nga Gjykata e Apelit në Tiranë. Në rast se dosja do të rihapet, për Sali Berishën do të ishte një problem i madh, pasi ka 8 dëshmitarë dhe disa prova të forta, që mund ta fundosin atë.
Një ndër ta është Zenel Neza, ish-truproja i Azem Hajdarit, i cili u qëllua gjatë atentatit. Ai ishte prezent kur ndodhi sulmi dhe është personazhi kryesor që ka parë në sy vrasësit.
Madje Zenel Neza është personi i parë i cili pati kontakt me Berishën dhe ky i fundit i pëshpëriti në vesh kur ishte në spital.Emër tjetër është Marjan Gryka. Edhe ky i fundit ka qenë truproja i Hajdarit.
Në disa intervista ai ka akuzuar si vrasës të Hajdarit, ish-kryeministrin Berisha. Emra të tjera që kanë qenë në të njëjtën linjë janë Jaho Mulosmani dhe vëllezërit e Izet Haxhisë, Ismet Haxhia, Isamedin Haxhia, të dënuar si autorë të ngjarjes.
Ata e kanë mohuar krimin dhe po ashtu kanë akuzuar Berishën. Grupit i bashkohet Fatos Klosi, ish-kreu i SHISH, që po ashtu pretendon se Berisha ka gisht në ngjarje.
Një tjetër emër është Ylli Rakipi, gazetari i cili ka qenë prezent në rrëfimin që Zenel Neza ka dhënë para Berishës në spital.
Rakipi e ka regjistruar bisedën, por nuk dihet se ku ajo ka përfunduar. Tjetër emër është Astrit Muldaka.
Ai është dëshmitar i penduar i ngjarjes, pasi akuzohet se ka qenë pjesë e atentatit dhe ka qenë ai që ka siguruar makinën me të cilën lëvizën atentatorët.
Ndërkohë, janë dhe 3 prova të reja që mund të ndryshojnë situatën, shkruan Sot. I pari është ditari i Perikli Tetës.
Asnjëherë nuk është përdorur në gjykatë ajo se çfarë thuhet aty. Së dyti janë tabulatet telefonike të personave rreth ngjarjes.
Haxhia pretendon se falë këtyre tabulateve është shumë e thjeshtë të vërtetohet me kë ka folur Hajdari dhe Berisha.
Prova e tretë është regjistrimi i bisedës me diktofon i gazetarit Ylli Rakipi në momentin që i shkuan së bashku me Sali Berishën të plagosurit rëndë Zenel Neza, në Spitalin Ushtarak në Tiranë./korrieri
