Aktualitet

Gëzim Beqiri tregoi në emisionin “Stop” se i ka dhënë 11 mijë Euro avokates Alma Bala në këmbim të nxjerrjes së dhëndrit nga burgu, i cili ishte dënuar në Itali me 6 vjet heqje lirie, por tani ndodhet i burgosur në Shqipëri.

“Dhëndri im është dënuar me 6 vjet burg nga gjykata italiane, nga të cilat bëri 4 vjet. Nga gjykata shqiptare është dënuar me 7 vjet burg për të njëjtën çështje. Dhëndrin e ekstraduan nga Italia këtu në Shqipëri dhe po bën të njëjtin burg. Neve iu drejtuam avokates Alma Bala, e cila kërkoi 11 mijë Euro dhe i ka marrë me këste. Janë bërë 3 gjyqe, por s’na ka bërë asnjë lloj pune. Përkundrazi, ajo e la brenda”, rrëfeu denoncuesi, i cili e quajti avokaten “mashtruese” dhe “intrigante”.

Zoti Beqiri u shpreh se ai nuk është viktima e parë e kësaj avokate, që nuk zgjidh çështjet dhe i zvarrit klientët për u mos kthyer paratë. Kamera e fshehtë e emisionit “Stop” shfaqi premtimet e kota të avokates Alma Bala për likujdimin e parave.

Avokatja – Mirë që të pashë, hajde hyr brenda! Tani deri në 11 nesër nuk të bëj dot gjë, deri në 11 se unë prandaj po lëvizja. Kështu që në 11 e gjysmë hajde tek mua! Tani Gëzimo boll! Nuk diskutohet!

Qytetari – Sot, nesër, sot, nesër.

Avokatja – Nesër në 11 hajde këtu se atëherë bëhen të rimbursueshme!

Qytetari – Pa bërë asnjë diçka, e le brenda djalin, pa ashtu…

Avokatja – Ik tani! Ik, nesër në 11 e gjysmë të jesh këtu! Në 11 e gjysmë, nuk po të bëj telefon. Po e bëra më shpejt, do të marr më shpejt!

Ditën tjetër:

Qytetari – Alma, unë erdha.

Avokatja – Po ti shpejt ke ardhur. Në 11 e gjysmë të thashë dje. Në 11 e gjysmë do i marrësh. Në 11 e gjysmë të thashë, nuk lëviz nga fjala. Këtu jam unë. Në 11 e gjysmë në zyrën time!

Qytetari – Ok!

Më pas e merr në telefon dhe i ndryshon orarin, i thotë të shkojë në orën 12.30.

Avokatja – O Gëzim! Mos më rri vërdallë se do të marr unë, do ta mbyll sot! Do ta mbyll, kur të them unë do ta mbyll, do ta mbyll!

Qytetari – Më the në 12 e gjysëm.

Avokatja – Ja do të marr unë, thashë. Unë e mora numrin e telefonit të asaj, do të më marrë direkt, kam folur 2 herë . Tani unë po të them ik se do të marr unë!

Qytetari – Pse po vonon kaq shumë?

Avokatja – Po vonon kaq shumë, sepse…

Ja, ta them unë! Ajo m’i ka hedh në numër llogarie. Ne jemi të bllokuar nga tatimet, që kemi detyrime atje dhe s’po i marr dot. Po me miq e shokë, t’i lëvroj. Jo, se s’i kam. I kam aty, por i kam të bllokuara nga tatimet, na kanë vënë bllok.

Gazetarja e emisionit “Stop” iu drejtua zyrës së avokates, por ajo sapo e pa u largua me nxitim, duke i thënë ta priste në zyrë sepse do të kthehej.

Pas 5 orësh pritjeje, denoncuesi e telefonoi zonjën Bala për ta pyetur se kur do të kthehej, por ajo i tha se nëse dëshironte një takim me të, atëherë emisioni “Stop” duhej të largohej.

Qytetari – Hajde sot, hajde nesër!

Avokatja – Meri në telefon dhe hiqmi nga këtu. Sot i ke të mbyllur, i kam të marra. Ik! Të zhduken tani se kam frikë! Tani do më shkatërrosh kështu. Meri në telefon! Meri këtu t’i dëgjoj unë!

Pas “largimit” të emisionit “Stop”, avokatja Alma Bala kërcënoi denoncuesin:

Qytetari – Fol shqip tani, ca ashtu?

Avokatja – Ke 500 Euro këtu, mbaji numëroji! Kjo e “Stopit” do ta ndjekësh, do vijnë prapë këto të “Stopit”?

Qytetari –  Në qoftë se nuk mbaron punë me mua, do vijnë prapë.

Avokatja – Më zgjidh këtë pjesën e “Stopit” burrërisht! Më hëngre prapa shpine, deri të hënën, deri sa të ndahemi nga Luani, o do të vras, o do më vrasësh!

Qytetari – Nuk je për të vrarë ti, jo! Po hëëë…

Avokatja – Ik e pirdhu! Unë jam shumë e besës. Ju do më vini lapidar në mes të Lushnjes dhe unë do të vras ty! Ja për këtë ujë!

Qytetari – Hallall! Gjithë të mirat!

Avokatja – Do ta kesh vdekjen nga mua!

Qytetari – Ishalla e paça që sot vdekjen, se unëëëë…c

Avokatja – Ti do ta kesh vdekjen nga mua! Ik zhduku Gimo, se unë do të vras për kokë të… Të më bësh ti mua, të më sjellësh ti mua… Ik, se jam me nerva!

Gazetarja e emisionit “Stop” tentoi sërish të komunikonte me avokaten, që sa e sheh largohet me nxitim. Gjatë ndjekjes për ta pyetur se kur do t’ia kthejë paratë Gëzim Beqirit, Alma Bala tha: “E kam likujduar. Ik moj andej mos më bëj kot! Hajde ditën e hënë, të jesh dhe ti prezente”.

Denoncuesi falenderoi emisionin “Stop”, pasi mundi të merrte të paktën 500 Euro nga 11,000 Euro që i detyrohet avokatja Alma Bala. Tani i mbetet vetëm të presë nëse ajo do t’ia likujdojë edhe pesën tjetër të parave./tvklan.al

Florim Shehu, 33-vjeç, që jeton në Changé, Francë, ka marrë leje qëndrimi nga shteti francez pas heroizmit të tij, ku shpëtoi 6 vetë nga përmbytja qershorin e këtij viti.

Florim Shehu nuk do ta harrojë kurrë datën 9 qershor, kur arriti të shpëtonte 6 vetë, të cilët ishin bllokuar nga përmbytja në shtëpinë e tyre.

Të shtunën, 8 shtator, Florimi mori një letër nga Prefektura duke i bërë të ditur atij se i ishte dhënë leje qëndrimi, e vlefshme për një viti. Po atë ditë, qyteti i Changés, bëri një festë falënderimi për heroin e quajtur Florim.

Qyteti gjithashtu ka hapur një fushatë që të mbledhë para dhe me to Florimit t’i blihet një makinë e re.
Florimi, baba i dy fëmijëve, është shprehur:
“Jam një njeri i lumtur. Unë dhe familja ime janë të integruar mirë në Changé.”

Pa punë dhe pa letra, Florimi kishte aplikuar për azil nga Prefektura e Majuestit që në dhjetor të vitit 2017 dhe tani jeton në Changé bashkë me gruan dhe dy fëmijët e tij.

Aktualisht Artan Shkreli është Zv. Ministri i Energjetikës e Infrastrukturës, një post i lartë ky shtetëror dhe mjaft i lakmuar nga shumëkush.

Por përpara se Rilindja ti jepte një copë në tepsinë e vetë, ai ka qenë mjaft njohur për aktivizimin e tij të fortë, në shoqërinë civile, veçanërisht në lidhje me problematikat që kanë të bëjnë me ekspertizën e tij si arkitekt, siç janë mbrojtja e trashëgimisë historike e kulturore, apo mjedisi.

Në kohën kur Edi Rama ishte në opozitë, Shkreli së bashku me Artan Lamen dhe një shpurë intelektualësh të tjerë që sot kanë poste të lakmueshme ose marrin “punë” nga projektet qeveritare, bërtisnin për çdo qerpiç të Tiranës apo kangjellë te presidenta. që prishej.

Tani që kanë poste shtetërore, janë zhdukur nga “qarkullimi” edhe për krime madhore ndaj trashëgimisë siç ishte  ai i Velierës në Durrës, Butrintit dhe së fundmi, shkatërrimi i Teatrit Kombëtar.

I pyetur në lidhje me “heshtjen” e tij pikërisht në këto vite të fundit që ai mban poste të larta shtetërore, gjatë një bashkëbisedimi me studentët e UET është përgjigjur se në pozitën e një nëpunësi publik, “nuk mund të jesh edhe mi edhe zog njëkohësisht. Duke lënë kështu të kuptohet se më mirë një “mi” që përfiton nga benefitet e karriges qeveritare, se sa “zog i lirë”, që thua të vërtetat dhe mbron interesin publik.

“Në momentin që kemi marrë një detyrë shtetërore, për arsye të etikës së nëpunësit nuk mundet dot të jesh “lakuriq nate”, të jesh edhe mi edhe zog. Ose do bëhesh nëpunës shtetëror dhe do jesh përgjegjës për detyrën që mbulon, me përgjegjësinë e lartë, ose përkundrazi do bësh kritikun e politikave të qeverisë nga jashtë duke u munduar që të sensibilizosh sa më tepër opinionin publik por edhe qeverinë për këto gjëra.”, ju dha leksion studentëve Shkreli, për mënyrën se si duhet të veprojnë “kur të rriten” nëse ndodhen mes dilemës ; mi apo zog.

Ai ka folur pasi u pyet, edhe për qëndrimin e tij “asnjanës” në lidhje me çështjen e shumëpërfolur të këto kohëve, atë të Teatrit Kombëtar. Artan Shkreli e argumentoi këtë qëndrim në të njëjtën mënyrë, duke u shprehur se pozita e tij si nëpunës shtetëror e “detyron” t’i shohë çështjet, në një tjetër këndvështrim nga ai kur nuk kishte post.

“Nëse unë do të isha sot në ato kushtet e një njeriu të shoqërisë civile, unë me papërgjegjshmërinë e ligjshme që i takon një njeriu në atë pozicion, do thoja ‘gjeni lekët ku të doni, restauroni këtë teatër që është’. Unë këtë nuk e them dot në pozicionin që jam. Po unë jam, i njëjti person, por është i rëndësishëm pozicioni i një njeriu që ka një detyrë ku është i ‘detyruar’ ta shohë një çështje më gjerë sesa e sheh kur ka vetëm një angazhim specifik”, ka thënë ai.

Një operacion me forca të shumta policie po zhvillohet në Nikël të Krujës.

Forcat Speciale, FNSH dhe RENEA, në kuadrin e një operacioni të gjërë që kanë nisur në Nikël të Krujës, kanë arrestuar Flamur Hakën, një person që njihej si i “i forti” i zonës.

Në operacion marrin pjesë një numër i madh efektivësh policie dhe me mjete të blinduara dhe në krye është vetë Drejtori i Përgjithshëm i Policisë së Shtetit Ardi Veliu.

Policia vijon kontrollet për kapjen e personave të dyshuar si dhe për armë e drogë.

Policia vijon aksionin në Nikël të Krujës prej orës 05:00 të mëngjesit të sotëm, për të kapur ‘kokat’ e krimit. Pas tre orësh kontrolle, RENEA e FNSH kanë shkuar në banesën e ‘të fortit’ të Krujës, Durim Bami, duke i dhënë mjaftueshëm kohë atij që t’ia mbathë. Durim Bami është një person i njohur për drejtësinë, pasi në 2004 ka qenë i dyshuar për tentativë vrasje.

Bami përmendet edhe nga familjarët e Enver Stafukës, që sipas tyre, u rrëmbye për shkak se ishte në dijeni të krimeve të bandës. Bami është i njohur edhe për atentatin e pretenduar nga Tom Doshi. Ngjarja rezultoi se ishte e sajuar. Për këtë atentat të pretenduar në dyert e Prokurorisë përfunduan të gjithë zyrtarët e lartë të shtetit.

Në Gjykatën e Tiranës ky proces u zhvillua me gjykim të shkurtuar, ndërsa pas 5 seancash gjithçka përfundoi me pafajësinë e Doshit dhe dënimin e Frrokut e Bamit. Por pas një odiseje 3-vjeçare gjyqësore sa në Gjykatën e Krimeve, në Gjykatën e  Lartë, në atë Kushtetuese dhe së fundmi në Dhomën Penale të Tiranës dënimi u dha vetëm për Frrokun e Bamin, por asnjë prej tyre nuk do të qëndrojë në burg, pasi dënimi është konvertuar në shërbim prove./korrieri

Aleatët tanë strategjikë, SHBA dhe BE, pritet të nisin menjëherë punën për të goditur politikanët e korruptuar shqiptarë. Ambasadorët e huaj në vendin tonë kanë gati ‘dosjet e zeza’ të politikanëve kriminelë e të korruptuar, ku në krye të listës qëndron pa asnjë dyshim Sali Berisha dhe Ilir Meta.

Këta dy ‘kokat’ e krimit dhe korrupsionit shqiptar janë paralajmëruar prej kohësh nga ndërkombëtarët se së shpejti i pret fundi i hidhur. Hapja e dosjeve të tyre do të nxjerrë në pah të gjitha skandalet e dyshes kriminale Meta-Berisha, që do të shënojë dhe fundin e tyre politik, duke i çuar në burg, ku do të kalben përjetësisht.

Kjo ju ka futur tmerrin këtyre politikanëve, të cilët po bëjnë lëvizjet e fundit për t’i shpëtuar qelisë. Meta dhe Berisha kanë dalë gjithmonë hapur kundër ambasadorëve SHBA e BE në vendin tonë, duke i sulmuar me çdo ‘gur’ që kishin në dorë. Tashmë, kur nuk ju ka mbetur më asnjë gur, ata janë bashkuar së bashku, duke tërhequr pranë vetes edhe politikanë të tjerë të përfshirë në krim.

E tillë ishte kryetarja e LSI, Monika Kryemadhi, e cila mbajti dje një qëndrim të hapur kundër ndërkombëtarëve, e frikësuar deri në palcë nga Vettingu në politikë. Me të njëjtën gjuhë të ashpër si Meta dhe Berisha, Kryemadhi tha se ambasadorët janë bërë si nënë e babë.

“Sepse na kanë ardhur këta ndërkombëtarët , na janë bërë si me i pas nënë dhe babë, sikur ne të gjithë kemi lindur nëpër shtëpitë e fëmijëve”.

Kryemadhin e ka kapur vonë frika, pasi Berisha i tmerruar nga dora e hekurt e ndërkombëtarëve, flet me një gjuhë të ashpër prej kohësh.

“Një ambasador ka për mision dhe jep një kontribut shumë më të madh nga se e dinë njerëzit në marrëdhëniet midis dy vendeve. Mënyra më e papërshtatshme e veprimit të një ambasadori është të tentojë të bëjë guvernatorin”, është shprehur Berisha më parë.

I ashpër ndaj Donald Lu është treguar edhe Ilir Meta, i cili u frikësua pas deklaratës së tij se do të kapë ‘peshqit e mëdhenj’. Në një përgjigje të fortë dhe aspak të denjë për një Preisdent, Meta shprehej se ambasadori i një vendi si SHBA duhet të jetë serioz dhe jo karagjoz në deklaratat e tij.

Tashmë, teksa po afrohet fundi i tyre, Berisha, Meta dhe Kryemadhi janë bërë bashkë, duke ju shpallur luftë ndërkombëtarëve, një luftë që padyshim do të ketë vetëm një humbës: Frontin e së keqes në Shqipëri./Pamfleti

Ndërmarrja e Ujësjellës Kanalizimeve në qytetin e Vlorës gjatë këtij muaji po intensifikon punën për rritjen e cilësisë së furnizimit me ujë të banorëve, si dhe zbatimin e reformës së ujit.

Gjatë ditës së sotme punonjësit e Ujësjellës Kanalizime Vlorë janë angazhuar në riparimin e një avarie në rrjetin e ujësjellësit në rrugën “Arko Baleno”, si dhe në rrjetin e ujësjellësit pranë Zyrës së Punës, duke rritur edhe cilësinë e furnizimit për banorët.

Në lidhje me reformën e ujit, punonjësit ditën e sotme ishin në zonën e Skelës, ku evidentuan dhe morën masa ndaj debitorëve.

Ndërsa në Orikum po ndërpritet uji i pijshëm për debitorët, si dhe po evidentohen gjithashtu edhe lidhjet e paligjshme. /atsh