Pandemia e koronavirusit nuk ka kursyer askënd, qofshin të fortë fizikisht apo me probleme ekzistuese të shëndetit.
Një kontigjent mjaft i prekur janë dhe punonjësit e policisë. Materiali në vazhdim sjell historinë e Altin Çeloaliaj, një oficeri policie i cili më 13 prill u diagnostikua me koronavirus.
Ai është vetëm një prej shumë policëve të prekur nga pandemia në shtetin e Nju Jorkut dhe Nju Xhersit, disa prej të cilëve nuk arritën dot t’i mbijetojnë sëmundjes. Në intervistën dhënë koleges Menada Zaimi, 33 vjeçari shqiptaro-amerikan, rrëfen eksperiencën e tij me sëmundjen, që mund të vërë poshtë siç thotë, edhe më të shëndetshmin.
Krahas punonjësve të shëndetit publik që shërbejnë në vijën e parë të frontit kundër pandemisë, një tjetër grup në rrezik janë punonjësit e policisë.
Një prej tyre është oficeri Altin Çeloaliaj, i cili punon për agjencinë ligjzbatuese që mbulon Nju Jorkut dhe Nju Xhersit, dy shtete të goditura rëndë nga pandemia.
Objekt i punës së tij është anti-terrorizmi dhe zakonisht përfshin pak ndërveprim me publikun. Por në këtë kohë krize misioni i punonjësve të policisë ka qenë edhe më i gjerë, duke i ekspozuar ata jo rrallë herë me persona të prekur nga koronavirusi.
“Iu përgjigja një thirrje për ndihmë ndërsa isha në detyrë, ndihmova dikë. Më tha më fal, por unë jam me koronavirus. Besoj aty e kam marrë virusin, duke punuar. Fillimisht nuk e mendova shumë, pasi nuk iu afrova shumë. Thashë nuk do të jetë ndonjë gjë. Dy tre ditë më pas më filloi kolla dhe simptoma të tjera”, thotë oficeri i policisë Altin Çeloaliaj.
Kolla është një nga simptomat që shoqëron rëndom sëmundjen, e që duket se merr kohë për t’u larguar edhe pas shërimit. Intervista jonë me Altinin ndërpritet disa herë prej kollës…
Por ai thotë se ndihet shumë më mirë sesa dy javë më parë…
“Kisha shumë kollë, mezi flisja dhe kisha dhimbje në gjoks. Pastaj filloi temperatura ajo ishte më e keqja. Sidomos natën bëhej edhe më keq. Ishte e vështirë. Kur ngrihesha nga krevati të shkoja në banjë, më duheshin 20 minuta vetëm të mbushesha me frymë. Prej datës 2 deri në 13 isha keq, tani kam pak kollë, por jam shumë më mirë”, thotë ai.
Altini nuk është i vetmi në departamentin e tij që është prekur nga sëmundja.
“Ka disa të tjerë (kolegë) që janë në shtëpi si unë, që po marrin veten nga sëmundja”, thotë ai.
Kjo ka qenë një periudhë e vështirë në shumë aspekte për 33 vjeçarin. Ka kaluar më shumë se një muaj që ai jeton vetëm në shtëpi pa bashkëshorten shtatzënë e cila po jeton me prindërit e tij. Në një përpjekje për t’i ruajtur ata nga virusi, Altini i kaloi ditët më të vështira të sëmundjes i vetëm. Dhe nuk ishte e lehtë, qoftë edhe për një oficer policie.
“Më e vështirë se të kalosh virusin është ndarja nga familja. Nusja është shtatzënë me binjakë, është shtatë muajshe, ka nevojë të shkojë tek doktori dhe unë nuk jam aty ta ndihmoj, u bë një muaj. Edhe prindërit janë në merak. Kur isha sëmurë vinin çdo ditë dhe më linin ushqim tek dera, por unë nuk ngrihesha dot fare nga krevati për t’i marrë”, shton Altini.
Nisur nga eksperieca e tij oficeri i policisë së Nju Jorkut ka një mesazh për të ndarë.
“Mendova se do të ishte si gripi normal. Thashë do të infektohem e do ta kaloj, nuk është gjë e madhe, por ishte më keq nga sa mendova. Isha me fat që gruaja ime ishte tek prindërit e mi dhe nuk sëmura njeri tjetër. Por do të ishte keq nëse kjo do të kishte ndodhur, pasi është shtatzane me binjakë dhe prindërit e mi janë të moshuar. Babi ka disa probleme shëndetsore.
Ndaj nuk duhet të mendojmë vetëm për veten, por edhe për prindërit e të tjerët. Ne të rinjtë e kalojmë, por disa nuk e kanë kaluar, një polic 34 vjeç vdiq pak ditë më parë”, thotë Altin Çeloaliaj.
Altin Çeloaliaj u testua poziv me COVID-19 më 13 prill. Ai thotë se është shëruar ose të paktën kështu mendon pasi simptomat po i fashiten. Por do të donte që gjithë kësaj historie t’i shtonte dhe një konfirmim zyrtar. Për shkak të volumit të madh të kërkesa ai thotë se nuk ka mundur të ritestohet.
“Tashmë ka kaluar më shumë se dy javë që kur u shfaqën simptomat. Më thanë (mjekët) që nuk përbën më rrezik për ta transmetuar virusin, por më kërkuan të rri edhe një javë tjetër në shtëpi që kjo gjë të jetë e sigurt.
Do të doja ta bëja sërisht testin të dilja negativ dhe të hiqja mendjen, sepse tani jam i izoluar nuk vete në asnjë vend, por më thanë që nuk ma bëjnë dot. Marrja e përgjigjes që isha pozitiv me COVID-19 më mori afërsisht nga 9-10 ditë, nëse e bëj tani sërisht testin, do të më kërkojë po aq, unë në datë 27 duhet të kthehem në punë”, thotë oficeri i policisë.
Sipas të dhënave më të fundit të Departamentit të Policisë së Nju Jorkut rreth 20 për qind e punonjësve janë prekur nga COVID-19./VOA
“Para epidemisë kishim vetëm të papunë e të gjithë kishin ikur nga Shqipëria! Tani paskemi vetëm punëtorë e të varfër që duhen paguar”, u shpreh sot Kryeministri Edi Rama.
Duke reaguar ndaj deklaratave të PD-së, Rama tha se “po t’i mbledhësh siç i numëron PD bëhen 2 milionë”.
“Para epidemisë kishim vetëm të papunë e të gjithë kishin ikur nga Shqipëria! Tani paskemi vetëm punëtorë e të varfër që duhen paguar, po t’i mbledhësh siç i numëron PD bëhen 2 milionë! Plus fëmijë, studentë, pensionistë, shtëpiake, s’paska ikur kush nga Shqipëria. Vaj medet PD 7X7?”, tha Rama./atsh
Ministrja e Shtetit për Marrëdhëniet me Parlamentit dhe Zëdhënësja e Qeverisë, Elisa Spiropali, tha se shtyrja e gjendjes së fatkeqësisë natyrore ishte e rëndësishme për garantimin e jetës së qytetarëve, aq sa është e rëndësishme marrja e masave lehtësuese për të patur një dëm sa më të vogël në ekonomi.
Në një komunikim në TV, Spiropali tha se “pikërisht për të ruajtur jetën e qytetarëve dhe për të garantuar që ekonomia të vazhdojë punë të ndizet e funksionojë normalisht, për të patur një dëm ekonomik sa më të vogël, ne duhet patjetër ta votonim shtyrjen e gjendjes së fatkeqësisë natyrore dhe duhet patjetër të respektojmë ligjet sipas Kodit të ri Penal”.
“Shqipëria do jetë në gjendje të fatkeqësisë natyrore, që do të thotë se do të funksionojë me një set rregullash, masash, ligjesh që janë të posaçme për gjendjen e fatkeqësisë natyrore deri më tani. Pra qeveria mund të kufizojë daljen e qytetarëve me fasho siç është bërë më tani, mund të mbyllë biznese të caktuara nëse kanë rrezikshmëri. Pra gjendja që kemi qenë deri më tani, ama nuk do jemi siç kemi qenë në mbyllje totale dhe karantinim, sepse ne kemi një plan të hapjes së mëtejshme me radhë me përshkallëzim të bizneseve të vogla që ndihmojnë ekonominë familjare, të rritjes së fashës së lëvizjes me dy orë e gjysmë e në vazhdim, pra dy javët e ardhshme do jetë një hapje e ngadalësuar e masave dhe lirimit të tyre”, u shpreh Spiropali.
Në lidhje me qëndrimet kundër shtyrjes sot në Kuvend të gjendjes së fatkeqësisë natyrore nga opozita e re, dhe deklarimet e deputetit Murrizi, Spiropali tha se “opozita e re foli shumë për dashurinë mes liderëve, Presidentit dhe Kryeministrit, por harroi se ne nuk jemi në kohë dashurie, por ne jemi në kohë kolere, në kohë flame dhe nuk e kemi mendjen për të tilla histori”.
“Ajo që ata kritikojnë është në fakt një vendim krejt normal i Presidentit të Republikës për të bashkëpunuar për ndryshimet në Kodin e ri Penal, një domosdoshmëri e plotësimit të së drejtës tonë penale që kishte mangësi të theksuara për sa i përket gjendjes së epidemisë apo gjendjes të fatkeqësisë natyrore. Do kemi kohë për t’u kthyer nga lufta te dashuria e te paqja. Kjo nuk është koha. Presidenti ka bërë një akt normal të kreut të shtetit, pra ka dekretuar një ndryshim në Kod Penal që është i domosdoshëm në një kohë të tillë”, tha Spiropali.
Në lidhje me riatdhesimin e shqiptarëve, Spiropali tha se “të gjithë japin mend se si duhet trajtuar virusi. Ca flasin për teste, ca flasin të mbyllen nëpër shtëpi dhe ne nuk kemi ndërmend të dëgjojmë njerëz që nuk marrin vesh për ketë punë sepse ne këshillat i marrim me Komitetin Teknik të Ekspertëve dhe nuk kemi ndërmend të dëgjojmë amatorë, kur kemi shkencëtarë dhe doktorët që marrin këto vendime”.
“Virusi ka një fazë inkubacioni, nuk është e lehtë të përcaktohet, duhet të rrinë 14 ditë të mbyllur. Ne nuk mund të shkojmë shtëpi në shtëpi për të ruajtur qytetarët sepse janë me mijëra që po riatdhesohen, kjo është gjetja më e mirë, por dhe një praktikë që po e bëjnë edhe vendet e tjera”, tha ajo.
Po ashtu, Spiropali tha se “ne i mirëpresim shqiptarët, kushtet janë të mira, hotelet janë negociouar nga qeveria dhe ministri i Turizmit. Duhet të rrinë aty 14 ditë dhe më pas mund të dalin për të takuar familjarët e tyre”. /atsh
Këshilli i Lartë Gjyqësor ka vendosur që sistemi gjyqësor t’i rikthehet punës në të gjithë vendin duke filluar nga 27 prilli.
Në mbledhjen e tij të radhës, Këshilli i Lartë Gjyqësor vendosi rifillimin e veprimtarisë dhe shërbimeve gjyqësore në të gjitha gjykatat në Republikën e Shqipërisë,më datë 27 prill 2020.
Veprimtaria e gjykatave do të vijojë sipas kufizimeve të përcaktuara në Aktin Normativ nr.9, datë 25.03.2020, “Për marrjen e masave të veçanta në fushën e veprimtarisë gjyqësore, gjatë kohëzgjatjes së gjendjes së epidemisë së shkaktuar nga COVID-19”, i miratuar nga Kuvendi i Shqipërisë në datën 16.04.2020.
Këshilli i Lartë Gjyqësor rithekson se mbetet i angazhuar maksimalisht për të garantuar sigurinë e publikut, gjyqtarëve dhe të gjithë punonjësve të tjerë të gjykatave. Për këtë qëllim, në bashkëpunim me këshillat dhe kryetarët në detyrë të gjykatave, është duke punuar intensivisht për marrjen e masave me karakter organizativ dhe administrativ, në mënyrë që rifillimi i veprimtarisë dhe shërbimeve gjyqësore në çdo gjykatë të bëhet në përputhje dhe respektim të masave për kufizimin e përhapjes së COVID-19.
Gjithashtu, Këshilli i Lartë Gjyqësor vendosi rifillimin e veprimtarisë së tij, në përputhje me rregulloren “Për përcaktimin e masave për kufizimin e përhapjes së COVID-19 gjatë ushtrimit të veprimtarisë së Këshillit të LartëGjyqësor”, si edhe rifillimin e procedurave administrative të pezulluara për ngritjen në detyrë në Gjykatën e Lartë, për ngritjen në detyrë në gjykatat e posaçme për korrupsionin dhe krimin e organizuar, për komandimin në Zyrën e Inspektorit të Lartë të Drejtësisë, për komandimin në Shkollën e Magjistraturës dhe për komandimin në Ministrinë e Drejtësisë, duke zgjatur edhe afatet respektive të kandidimit./atsh
Me këto fjalë të Hipokratit, Kryeministri Edi Rama përcolli një tjetër mesazh inkurajues sot përmes rubrikës “Fjalë të çmuara”.
Ndërkohë që në Shqipëri vijojnë të zbatohen masat kundër përhapjes së COVID-19, duke kufizuar më tej lëvizjen e qytetarëve, autoritetet shtetërore vazhdojnë t’i bëjnë thirrje qytetarëve të qëndrojnë në shtëpi dhe të zbatojnë të gjitha rregullat e distancimit social./atsh
Grimcat e koronavirusit të ri mbeten pezull në ajër deri në 16 orë, një periudhë shumë më e gjatë se ajo e vërejtur në grimcat e koronavirusit përgjegjës për Sars dhe Mers, sipas studimit të publikuar në faqen e internetit MedRxiv dhe i kryer në SHBA nga Universiteti Tulane në bashkëpunim me Universitetin e Pittsburgh.
Koordinuar nga Alyssa Fears of University Tulane, studiuesit vërejnë se transmetimi i virusit përmes pikave të ajrit mund të jetë më i rëndësishëm nga sa mendohej. Rezultatet, sipas artikullit, tregojnë se “njerëzit me infeksion SarsCoV2 janë në gjendje të gjenerojnë bioerosole virale që mund të mbeten infektive për periudha të gjata kohe”.
Një e dhënë që, sipas autorëve të hulumtimit, do të duhet të merret në konsideratë me qëllim të masave parandaluese.
Eksperimentet e kryera brenda studimit, të gjitha në situata të kontrolluara, matën këmbënguljen në ajrin e grimcave virale të gjetura në pikat pezull me një diametër që varion nga 1 deri në 3 mijë e një milimetri. /atsh
Të punësuarit aktualë dhe punonjësit e larguar nga puna si pasojë e COVID-19 të cilët përfitojnë nga vendimi i qeverisë pagën e jashtëzakonshme prej 40 mijë lekësh mund të aplikojnë që nga dita e sotme me anë të një formulari “Kërkesë për Përfitim të Ndihmës Financiare 2” tek portal i Tatimeve.
Më herët, Drejtoria e Përgjithshme e Tatimeve, ka publikuar mënyrën e aplikimit për pagën e luftës, nga paketa e dytë e ndihmës financiare.
Aplikimi do të kryhet nga subjektet, të cilët do të plotësojnë të dhënat e punonjësve të tyre, përfitues sipas kritereve të përcaktuar në vendimin e qeverisë që janë: Për të punësuarit e subjekteve me të ardhura vjetore mbi 14 000 000 lekë, të mbyllura sipas Urdhrit/ave të MSHMS, të cilët kanë qenë në punë në datën e hyrjes në fuqi të Urdhrit/ave të MSHMS, përfitojnë ndihmë financiare prej 40.000 lekë; të punësuarit e subjekteve të lejuar për të ushtruar aktivitet, të cilët janë larguar nga puna nga data e hyrjes në fuqi të Urdhrit/ave të MSHMS deri në datën 10 prill 2020, përfitojnë ndihmë financiare prej 40.000 lekë. Data e dorëzimit të formularit E-sig 027, nuk duhet të jenë më e vonë së 10 prill 2020; të punësuarit e subjekteve me të ardhura vjetore deri në 14 000 000 lekë, të lejuara për të ushtruar aktivitet sipas Urdhrit/ave të MSHMS, të cilët kanë qenë në punë që në datën e hyrjes në fuqi të Urdhrit/ave të MSHMS, përfitojnë ndihmë financiare prej 40.000 lekë si dhe të punësuarit e subjekteve që ushtrojnë aktivitet në sektorin e strukturave akomoduese, të cilët figurojnë në listëpagesat e subjekteve, deri në datën e Urdhrit/ave të MSHMS, përfitojnë ndihmë financiare prej 40.000 lekë.
“ Nëse subjekti ushtron disa lloje aktivitetesh, përfitojnë vetëm të punësuarit në aktivitetin e strukturës akomoduese”, thuhet në njoftimi e Tatimeve.
Për të dorëzuar formularin “Kërkesë për Përfitim të Ndihmës Financiare 2”, tatimpaguesit të cilët plotësojnë kriteret e mësipërme, do të njoftohen në llogarinë e tyre të deklarimit elektronik në e-filing dhe do t’iu jepet mundësia të aplikojnë nëpërmjet kësaj llogarie duke filluar nga data 21 prill e në vijim. Formulari nr. 2 do të plotësohet me të dhënat e kërkuara vetëm 1 herë./atsh
