Kryeministri Edi Rama, gjatë një interviste televizive, mbrëmjen e sotme, është shprehur se testet për të infektuarit nga koronavirusi i ri në vendin tonë janë në mesataren europiane dhe Organizata Botërore e Shëndetësisë ishte e qartë për këtë.
Duke folur për shifrat të infektuarve deri më sot, Rama tha se “është ende shumë herët për të qenë optimist, apo entuziast”.
Lidhur me numrin e teseteve, Rama u shpreh se “përgjigja është e thjeshtë, OBSH para pak minutash këtu në Shqipëri ka bërë një deklaratë shumë të qartë, që do ju lutesha ta publikoni, se si gjithnjë për fat të keq në vendin tonë të vogël është krijuar konfuzion nga burime që s’kanë qenë ndonjëherë në lartësinë e sfidës njerëzore kur është dashur unitet. Ne jemi absolutisht në mesataren europiane, për sa i përket testeve”,- theksoi Rama.
“Jo më larg se sa para se të hyja këtu, po lexoja një urdhëresë të autoriteteve shëndetësore zvicerane që kanë deklaruar që nuk do bëjnë teste askënd nën moshën 65 vjeç përveçse ato raste që janë kritike. Pra, kjo është tani një histori që zhvillohet duke u bazuar te praktikat më si të thuash të arsyeshme dhe duke u bazuar në çka Italia në përpjekjen e saj thotë se mund të kishte bërë me shpejt dhe siç thotë duhet ta kishte bërë më shpejt. Si edhe në rastin e Kinës, rast që studiohet në vijimësi, kështu që kjo polemika mbi testet është e kotë. Ne po bëjmë gjënë e duhur dhe këtë e konfirmon dhe OBSH përmes përfaqësisë së saj këtu në Tiranë. Ne nuk kemi marrë hapa pa u konsultuar me ekspertët tanë dhe kam shumë besim dhe jam shumë i impresionuar nga profesionalizmi i tyre që marrin vendime në bashkëpunim me ekspertë ndërkombëtarë dhe kolegë dhe patjetër me OBSH”,- theksoi Rama./atsh
