Orikuminews

Protokolli i masave antiCOVID-19 përgjatë sezonit turistik/ Higjiena dhe distanca në fokus

Turizem / /

Ministria e Turizmit dhe Mjedisit dhe ajo e Shëndetësisë dhe Mbrojtjes Sociale kanë publikuar protokollin e sigurisë për sezonin e ri turistik, ku parashikohen në detaje se si do operojnë sipërmarrjet në fushën e turizmit, duke nisur nga largësia e çadrave mes tyre dhe duke vijuar me higjienën në dhoma dhe në çdo ambient tjetër të shërbimeve hoteliere, bare e restorante.

Përmes urdhrit të publikuar sot në Fletoren Zyrtare me nr. 353, datë 29 maj 2020, Ministria e Turizmit dhe Mjedisit dhe Ministria e Shëndetësisë dhe Mbrojtjes Sociale kanë përcaktuar “Protokollin e masave antiCOVID-19 përgjatë sezonit turistik”.

Në urdhrin e publikuar dhe në Fletoren Zyrtare saktësohet se: Protokolli i masave antiCOVID-19” është një dokument që rekomandohet të zbatohet nga sipërmarrjet turistike, turistët/pushuesit dhe vizitorët, për mbarëvajtjen e atyre aktiviteteve të miratuara si të lejuara, përmes akteve normative të Ministrisë së Shëndetësisë dhe Mbrojtjes Sociale, si dhe institucioneve të tjera kompetente. Ky Protokoll përmban parakushtet, kushtet dhe rregullat për të orientuar dhe për të rekomanduar industrinë turistike për masat e nevojshme që duhet të ndërmerren përgjatë periudhës së pranisë së infeksionit COVID-19.

Në pikën 2 të protokollit sqarohet se, çdo sipërmarrje turistike që lejohet të ushtrojë aktivitetin rekomandohet të adaptojë këtë protokoll dhe të afishojë masat respektive në vende qartësisht të dukshme dhe pranë korridoreve të kalimit të njerëzve, mbështetur me materiale të ndryshme promovuese dhe informuese që informojnë mbi masat që duhen ndërmarrë për parandalimin e infeksionit COVID-19.

Në pikën 3 të protokollit sqarohet se stafi i shërbimit, që ka kontaktet me pushuesit/vizitorët duhet të përdorë doreza dhe maska mbrojtëse. Mbajtja e dorezave dhe e maskave janë elemente të domosdoshme në parandalimin e transmetimit të COVID-19, e kombinuar me higjienën të duarve.

Sipas protokollit, punonjësit e recepsionit duhet të jenë të mirinformuar në lidhje me masat antiCOVID-19, në mënyrë që ata të mund të kryejnë detyrat e tyre të caktuara dhe të parandalojnë përhapjen e mundshme të infeksionit në strukturën akomoduese. Recepsioni duhet të ketë në dispozicion numrat e telefonit të autoriteteve shëndetësore (Urgjencën Kombëtare dhe Epidemiolgjinë e NJVKSH-së përkatëse), si dhe të afishojë masat antiCOVID-19 në vend të dukshëm dhe lehtësisht të aksesueshëm për të gjithë.

Stafi i recepsionit duhet të mbajë pastër ambientin e tyre të punës dhe në fund të çdo ndërrimi turni të pastrojë me kujdes tryezën dhe pajisjet (për shembull: telefon, tastierë, ekran me prekje, stilolapsa, lapsa etj.). Për të lehtësuar performancën dhe efektivitetin e këtij operacioni, është e përshtatshme të hiqen të gjitha sendet jothelbësore nga sipërfaqja e punës. Nëse mjetet e punës përdoren nga shumë njerëz gjatë të njëjtit turn, rekomandohet që stafi të lajë duart më shpesh dhe t’i dezinfektojë me xhel, me përbërje alkooli 70–85%. Shkëmbimi i telefonave dhe i celularit duhet të shmanget, nëse nuk dezinfektohet siç duhet para se të kalojë nga një operator, tek tjetri.

Rekomandohet që nga sipërmarrja turistike të merren masa për të shmangur mbledhjet e shumë njerëzve në të njëjtin vend, si dhe për të zvogëluar në maksimum kohën e pritjes përgjatë procesit të regjistrimit. Kur është e mundur, të përdoret sistem elektronik për regjistrimin. Në strukturat akomoduese duhet të ruhet distancomi fizik i rekomanduar nga MSHMS-ja.

Në protokollin e publikuar rekomandohet pastrim i përsëritur i ambienteve. Pavarësisht përdorimit të maskave dhe të dorezave me një përdorim, higjienizimi dhe larja e shpeshtë e duarve konsiderohet e domosdoshme. Pasi t’i keni larë duart me sapun dhe ujë, ju duhet t’i thani ato plotësisht. Xheli me përbërje alkoolike për higjienën e duarve duhet të përdoret në mënyrë periodike, madje edhe kur mbahen doreza.

Maska, doreza të disponueshme dhe dezinfektues sipërfaqësor, mund të jenë në dispozicion për vizitorët kundrejt një marrëveshje paraprake mes sipërmarrjes dhe pushuesve/vizitorëve.

Struktura akomoduese duhet të vendosë në holle, korridore dhe ambiente të jashtme kosha të pajisur me qese plastike, për të hedhur mbetjet e mjeteve mbrojtëse higjienike. Rekomandohet të fillohet me ajrosjen natyrale të dhomës, duke hapur dritaret nëse ka.

Pastrimi duhet të përfshijë të gjitha sipërfaqet, siç janë: tavolinat, krevatet, karriget, telefoni, telekomanda, dorezat e dyerve dhe panelet, si dhe çdo pajisje tjetër që konsiderohet se mund të jetë e prekur nga vizitori.

Sipërfaqet që mund të ndoten me sekrecione të frymëmarrjes ose lëngje të tjera të trupit të personit, p.sh: tualeti, basenet e larjes së duarve dhe banjat, duhet të pastrohen me solucion të rregullt dezinfektues që përmban 0.1% hipoklorit të natriumit dhe të lihen pa u shpëlarë me ujë për 10 minuta. Sipërfaqet duhen shpëlarë me ujë të pastër pas 10 minutash kontakti me klorin. Kur përdorimi i klorit nuk është i përshtatshëm, p.sh.: pajisje telefonike, telekomandë, doreza derë, butona në ashensor etj., atëherë mund të përdoret alkooli 70%. Kur është e mundur, të përdoren vetëm materiale pastrimi me një përdorim. Të gjithë artikujt e përdorur me një përdorim (peshqir dore, doreza, maska) duhet të vendosen në një enë me kapak dhe të hidhen sipas menaxhimit të mbeturinave të rrezikshme. Nëse minibari është i pranishëm dhe aktiv, në secilin ndryshim të vizitorit rekomandohet të pastrohen të gjitha sipërfaqet e minibarit në mënyrë sistematike. Dyshemetë pastrohen dhe sanitarizohen me produkte të përshtatshme. Këshillohet të shmangni pajisjen e dhomave ose të dhomave të tjera të strukturës me elementë arredimi, që nuk janë objekte të pastrimit të përditshëm.

Në protokollin e sigurisë sqarohet edhe mënyra e administrimit të ushqimeve dhe pijeve, ku theksohet ndër të tjera se, duhet kryer larja e duarve shpesh dhe sipas kërkesës. Personeli duhet të jetë me maskë dhe doreza kur përgatisni ose përdorni ushqimin. Ndalohet përgatitja ose prekja e ushqimeve, prekja e sipërfaqeve në kontakt me ushqimin pa pasur doreza, si dhe ndalohet shijimi i ushqimit me gishta.

Në protokoll thuhet se ndalohet prekja e flokëve ose e pjesëve të tjera të trupit pa doreza, kur ndodheni brenda zonave të përgatitjes apo të servirjes së ushqimit, pasi mund të rezultojnë në ndotje të ushqimit.

Gjithashtu në protokoll bëhet me dije edhe organizimi i punës në plazhe dhe restorante. Në protokoll theksohet se tavolinat duhet të vendosen në atë mënyrë që distanca nga pjesa e pasme e një karrigeje në pjesën e pasme të një karrigeje tjetër të jetë më shumë se 1 m larg dhe që klientët të përballen me njëri-tjetrin nga një distancë prej të paktën 1 m.

Personeli që shërben ushqimin duhet të jetë i pajisur përgjatë gjithë periudhës së shërbimit me maska dhe dorashka të higjienizuara. Në rastin e ofrimit të shërbimit bufe, administratori/menaxheri i strukturave akomoduese të kapaciteteve të mëdha (hotel/resort) rekomandohet të përcaktojë dhe të shënojë dukshëm korridorin e lëvizjes së klientëve. Klientët rekomandohet të respektojnë distancën e rekomanduar nga Ministria Shëndetësisë dhe Mbrojtjes Sociale. Në rast se përdoren makinat automatike, pijet të shërbehen vetëm në gota kartoni njëpërdorimëshe.

Deri në përfundim të gjendjes së epidemisë së shkaktuar nga infeksioni COVID-19, të gjitha stacionet e plazhit, si dhe plazhet publike duhet të kenë të afishuara këshillat dhe rregullat në kuadër të mbrojtjes nga COVID-19. Këto rregulla konsistojnë, në: Mbani parasysh rregullat bazë për parandalimin e COVID-19: a) lani dhe dezinfektoni duart, vazhdimisht dhe në mënyrën e duhur; b) përdorni maskat sipas udhëzimeve; c) shmangni grumbullimet në njerëz dhe çdo lloj kontakti; d) mos prekni fytyrën dhe hundët me duar të palara e të padezinfektuara; e) kur kolliteni ose teshtini, mbulojeni gojën/hundën me parakrah ose me facoleta njëpërdorimëshe; f) nëse vini re simptomat e COVID-19, telefononi nr. 127.

Në marrjen e shërbimeve në ambientet e stacionit të plazhit, respektoni gjithmonë, sipas masave të miratuara të MSHMS-së (1,5 m). Ruani gjithmonë distancën edhe gjatë shëtitjeve në plazhe, bregun e detit, liqenit, lumit apo përgjatë shëtitoreve.

Stafi që shërben pranë stacioneve të plazhit të ketë uniformë dalluese. Shërbimi për pastrimin dhe mirëmbajtjen e stacionit të plazhit dhe të gjitha ambienteve të tjera të jetë ditore. Të kryhet dezinfektimi i krevateve të plazhit, shërbimeve higjienike dhe aksesorëve të ndryshëm në mënyrë periodike; gjatë orarit të hapjes së stacionit të plazhit duhet të sigurohet vazhdimësia e pastërtisë dhe boshatisja e koshave të mbeturinave. Të gjitha aktivitetet (si bare, beach-bare) duhet të jenë në përputhje me direktivat e Ministrisë së Shëndetësisë dhe Mbrojtjes Sociale.

Deri në përfundim të gjendjes së epidemisë së shkaktuar nga infeksioni COVID-19, brenda brezit të shërbimeve në stacionet e plazhit, mund të realizohen këto struktura: kioskë menaxhimi për plazhin, kabina, shërbime higjienike, depo, pika vrojtimi/kulla e vrojtimit, hapësirë për rojën e plazhit (në rastin e plazhit publik), beach-bar, hapësirë për vendosjen e biçikletave. Tavolinat në beach-bar duhet të kenë distancë, sipas udhëzimeve të MSHMS-së.

Deri në përfundim të gjendjes së epidemisë së shkaktuar nga infeksioni COVID-19, kushtet minimale që duhet të përmbushë një stacion plazhi, në plazhet e tipit A, janë si më poshtë vijojnë: a) për çadrat dhe ndenjëset e pushuesve të respektohet një distancë prej të paktën 7 m nga vija e bregut të detit, liqenit, lumit; b) hapësira midis çadrave (nga çadra në çadër) nuk duhet të jetë më e vogël se 3.5 m në linjë horizontale me vijën e ujit, si dhe jo më e vogël se 3.5 m në linjë vertikale me vijën e ujit; c) të ketë në dispozicion të pushuesve 1 dush me ujë të ëmbël për çdo 100 (njëqind) çadra, i cili duhet të pajiset me sapun, xhel higjienizues; d) të gjitha kushtet e tjera, përveç sa më sipër, të përcaktuara nga vendimi i Këshillit të Ministrave nr. 171, datë 27.3.2019, “Për miratimin e rregullores ‘Për kushtet dhe kriteret e ushtrimit të veprimtarisë së stacionit të plazhit’”.

Kushtet minimale, që duhet të plotësojë një stacion plazhi, në plazhet e tipit B, janë si më poshtë vijon: hapësira midis çadrave (nga çadra në çadër) duhet të jetë të paktën 3,5 m; të ketë në dispozicion të pushuesve 1 (një) dush me ujë të ëmbël për çdo 100 (njëqind) çadra, i cili duhet të pajiset me sapun, xhel higjienizues.

Sa i takon pishinave, mbështetur në urdhrin nr. 351, datë 29.5.2020, të gjitha pishinat janë të mbyllura deri në një urdhër të dytë. Uji i pishinës duhet të pastrohet nga qarkullimi përmes një sistemi filtrimi të detyrueshëm. Duhet të largohen rregullisht papastërtitë e dukshme në sipërfaqe të ujit. E gjithë zona dhe të gjitha objektet e pishinës dhe të banjave duhet të pastrohen dhe të dezinfektohen të paktën një herë në ditë, por dhe më shpesh, nëse fluksi i klientëve është i lartë. Klorinimi i ujit të bëhet rregullisht sipas standardeve. Shezlonget e pishinës duhet të jenë me distancë të paktën 2 metra larg nga njëri grup tek tjetri. Hoteli duhet të sigurojë materiale dezinfektuese në zonën e pishinës për të lejuar punonjësit e pishinave dhe klientët të pastrojnë shezlongët. Pishina të ketë kosha dhe peshqirë letre. Punonjësi i pishinës duhet të dezinfektojë shtresat e shezlongëve dhe krahët mbështetëse.

Në protokoll janë parashikuar dhe zonat SPA, Sauna dhe masazhet, ku në fokus do të jetë pastrimi i ambineteve, mureve, dyshemeve. Sipërfaqja e shtratit të masazhit duhet të jetë prej plastike të qëndrueshme për larje ose material tjetër i papërshkueshëm nga uji, i cili është i lehtë për pastrim, dezinfektim dhe mirëmbajtje. Sipërfaqja e shtratit të masazhit duhet të dezinfektohet dhe më pas të shpëlahet me ujë dhe të thahet pas çdo përdorimi. Mbulesa letre me një përdorim duhet të hidhen në një kosh pas përdorimit. Nëse për klientët sigurohen veshje, ato duhet të vendosen në qese plastike të sigurta dhe t’i nënshtrohen procesit të duhur të pastrimit pas çdo përdorimi. Bazuar në madhësinë e ambientit, hoteli/ resorti mund të lejojë një numër maksimal të klientëve në të njëjtën kohë në zonën SPA, duke respektuar distancën 1,5 metra midis tyre.

Për klientët që dëshirojnë të shijojnë një masazh apo të përdorin sauna apo jakuzi, çdonjëri prej tyre duhet të bëjë një rezervim, në mënyrë që të kontrollohet numri i tyre në respekt të distancës 1,5 metra. Materialet e dezinfektimit duhet të jenë të disponueshme përreth zonës SPA.

Po ashtu në protokoll parashikohet dhe mbajtja e konferencave në hotele. sipas këssaj pike, në rast të përmbushjes së kritereve për hapësirat rekomandohet të zhvillohen: zhvillimi i konferencave/eventeve, aty ku është e mundur, në sallat që mund të lejojnë distancimin fizik; rekomandohet që ulja e pjesëmarrësve të jetë e tillë që të respektojë protokollet e aprovuara nga MSHMS-ja. /atsh

Protokolli i masave antiCOVID-19 përgjatë sezonit turistik/ Higjiena dhe distanca në fokus Read More »

NATO flet me ATSH për bazën detare të Pashalimanit

Aktualitet, Lajmi i fundit / /

Pas investimeve për modernizimin e bazës ajrore të Kuçovës, NATO po studion edhe mundësinë për investime edhe në bazën detare të Pashalimanit.

Kërkesës zyrtare të dorëzuar në tetor të 2019-ës nga ministrja e Mbrojtjes, Olta Xhaçka e cila ka parashtruar planin e qeverisë shqiptare për modernizimin e bazës detare të Pashalimanit, Aleanca e Atlantikut të Veriut deklaron se ka nisur punën në bashkëpunim me autoritet ushtarake shqiptare, për të përcaktuar mënyrën më të mirë se si kjo bazë mund të mbështesë kërkesat operacionale detare të Aleancës.

NATO iu përgjigj zyrtarisht interesit të Agjencisë Telegrafike Shqiptare lidhur me kërkesën e autoriteteve shqiptare për investim në Pashaliman.

“Autoritetet ushtarake të NATO-s janë duke punuar ngushtë me autoritetet ushtarake shqiptare për të përcaktuar mënyrën më të mirë se si baza detare e Pashalimanit mund të mbështesë kërkesat operacionale detare të NATO-s”, konfirmoi për ATSH një zëdhënës i Aleancës.

NATO, tha për ATSH, se e mirëpret mbështetjen e Shqipërisë ndaj planeve dhe sigurisë detare të Aleancës.

“Ne mund të konfirmojmë se NATO ka marrë një letër nga Ministria shqiptare e Mbrojtjes, ku shprehet mbështetja e qeverisë shqiptare për modernizimin e Bazës Detare të Pashalimanit. Ne mirëpresim mbështetjen e Shqipërisë ndaj planeve dhe sigurisë detare të NATO-s nëpërmjet dhënies së aftësive detare të saj për misionet dhe aktivitetet e drejtuara nga NATO”, deklaron për ATSH zyrtari i Aleancës.

Për NATO-n, nënvizon zëdhënësi për ATSH , kjo pasqyron solidaritetin, kohezionin dhe unitetin e përpjekjeve të Aleancës.

“Kjo është në të njëjtën linjë me qëndrimet operacionale të NATO-s dhe pasqyron solidaritetin, kohezionin dhe unitetin e përpjekjeve të Aleancës. Autoritetet Ushtarake të NATO-s janë duke punuar ngushtë me autoritetet ushtarake shqiptare për të përcaktuar mënyrën më të mirë se si kjo bazë mund të mbështesë kërkesat operacionale detare të NATO-s”, nënvizohet në reagimin zyrtar për ATSH-në.

Në tetor të vitit të shkuar, ministrja e Mbrojtjes, Olta Xhaçka iu drejtua përmes një letre zyrtare komandantit të Komandës Supreme për Europën, gjeneralit amerikan Tod D.Wolters që Aleanca të konsiderojë Pashalimanin edhe për shkak të gjeografisë dhe avantazheve që ofron, për të investuar edhe aty një bazë detare.

Ministrja ka theksuar se Shqipëria është gati për zbatimin e një plani të përbashkët për zhvillimin e bazës detare për Aleancën e Atlantikut të Veriut.

Ndërkaq baza ajrore e Kuçovës do të jetë gati së shpejti, sipas projektit të hartuar nga NATO, një investim ky që kap vlerën e 50 milionë eurove./atsh

NATO flet me ATSH për bazën detare të Pashalimanit Read More »

“Pas 3 vjetësh marshim e 3 netësh ngujim”/ Rëndësi ka që Basha do hyjë në zgjedhje me Kodin Zgjedhor siç e deshën

Aktualitet, Opinione, Politike / /

Kryeministri Edi Rama përshëndeti arritjen e marrëveshjes për Reformën Zgjedhore në takimin e mbrëmjes së sotme të Këshillit Politik, me praninë e ambasadorëve të SHBA, BE, OSBE dhe Britanisë së Madhe.

“Pas 3 vjetësh marshim e 3 netësh ngujim na sollën fjalën e fundit: “Mirë e kishim ashtu siç e kishim”. Po mirë, unë kam menduar e mendoj që ka edhe më mirë, po meqë LBPD janë të kënaqur me kaq për zgjedhjet e ardhshme, bujrum, si ta duan ata”, u shpreh Rama.

“Rëndësi ka që: LBPD do hyjë në zgjedhje me Kodin Zgjedhor siç e deshën vetë. ODIHR është dakord që kjo nuk e cenon lirinë e zgjedhjeve. BE është e kënaqur, Shqipëria s’ka më pikëpyetje në prag të vendimit për datën e nisjes zyrtare të negociatave. Ah po, mbaroi edhe revolucioni”, u shpreh Kryeministri Rama.

Pas takimit të mbrëmjes së sotme, bashkëkryetari për Reformën Zgjedhore, përfaqësuesi i mazhorancës në Këshillin Politik, Damian Gjiknuri tha se Partia Socialiste ka hequr dorë nga depolitizimi i administratës zgjedhore, që PD të mos mbetet sërish jashtë zgjedhjeve.

Në një prononcim për mediat pas përfundimit të takimit ku palët arritën marrëveshjen për Reformën Zgjedhore, Gjiknuri tha se “ne nuk mund të linim sërish opozitën jashtë zgjedhjeve dhe t’i jepnim alibi asaj që të thotë se nuk e njoh ligjin zgjedhor”.

“Për ne është i rëndësishëm integrimi, aprovimi dhe pranimi i rregullave të lojës. Në fund të fundit mazhoranca është komode që me çfarëdolloj rregullash loje mjafton që palët politike të jenë komode, të shkojë në zgjedhje”, tha Gjiknuri.

“U dakordësuan për pikat që përgjithsësisht i ndanin palët, dhe një gjë dua të them pavarësisht se rekomandimi është që administrata të ishte e depolitizuar, dhe qëllimi i PS e qeverisë ishte që këtë rekomandim bazë ta çonte përpara, fatkeqësisht PD nuk ishte gati dhe e kundërshtoi”, tha më tej Gjiknuri.

Ajo çka fituam, nënvizoi ai, është se tashmë kemi rregulla të pranuara nga gjithsecili edhe me këtë adminsitratë që e kemi në fuqi.

“Sot që flasim, ajo çka u pranua nga palët është që administrata aktuale zgjedhore e balancuar politikisht do të funksionojë edhe në zgjedhjet e 2021. E rëndësishme është që PD hoqi dorë nga kërkesat absurde, nga qeveria teknike apo tranzitore për të administruar zgjedhjet. U pranua që administrimi zgjedhor nuk ka çaluar në Shqipëri. Përtej pretendimeve të ngritura dhe gjithë asaj lufte politike, më në fund u kthyen aty ku duhet të ishin te institucionet. E rëndësishme është që ne ta pranojmë dhe ta zbatojmë këtë sistem dhe në zgjedhjet e tjera, pasi në Kod do të parashikohen dispozita të fillojë depolitizimi”, u shpreh Gjiknuri.

“Ne do të përpiqemi që identifikimi biometrik të shtrihet në çdo qendër votimi, e rëndësishme është që nuk mund të mbahen zgjdhjet peng për shkak të teknologjisë dhe u pranua që administrata zgjedhore edhe kështu siç ka qene ka funksionuar”, u shpreh Gjiknuri.

Këshilli Politik, tha ai do të vijojë për çështjet e tjera ku përfshihet edhe sistemin zgjedhor.

“Këshilli Politik do të vazhdojë të miratojë draftet dhe të trajtojë edhe çështjet e tjera, si sistemi zgjedhor, ligji për referendumet, dhe për financimin e partive politike. Opozita dhe qeveria po dialogojnë, hoqën dorë nga alibitë dhe mbetet që të gjitha palët të përgatiten për zgjedhjet. Kodi do të mbyllet brenda këtij sesioni parlamentar. Nga buxheti i shtetit do të mundësohet identifikimi biometrik. Do të merrte një ekspert i huaj, nga BE për t’u konsultuar me KQZ”, deklaroi Gjiknuri./atsh

“Pas 3 vjetësh marshim e 3 netësh ngujim”/ Rëndësi ka që Basha do hyjë në zgjedhje me Kodin Zgjedhor siç e deshën Read More »

Turizëm në Tragjas/ Në fshat distanca respektohet më lehtë

Te fundit nga zona, Turizem / /

Turizmi po rikonceptohet ne kushte pandemie.

Por ka disa zona në Shqipëri ku për shkak të relievit edhe distanca respektohet më lehtë.

Një prej tyre është dhe fshati Tragjas, ku bizneset e zonës kanë punuar që prej rihapjes së aktiviteteve.

Sofon e gjejmë duke bërë gati mishin e kecit për ta pjekur në saç. Edhe pse larg zonave urbane, puna këtu nuk mungon.

Qetësia, bukuria natyrore por tani edhe mundësia për të qenë larg të tjerëve i bën zona si Tragjasi mjaft tërheqëse, edhe pse ka një problem që mbetet në cdo kohë e që nuk pritet ta rregullojë as pandemia, rruga e pashtruar prej 3 km nga aksi nacional e cila pershkohet per 40 minuta.

Turizëm në Tragjas/ Në fshat distanca respektohet më lehtë Read More »

Basha: Plani ynë i jep fund Shqipërisë që punon për oligarkët

Aktualitet, Opinione, Politike / /

Kryetari i Partisë Demokratike, Lulzim Basha ishte sot në Kombinat ku zhvilloi takime me disa biznese të zonës, i cili shprehet se “ajo që kam konstatuar është se ka një rënie të xhiros dhe të konsumit si kurrë më parë”.

“Varfëria është ulur këmbëkryq si kurrë më parë, është i njëjti realitet si në vendet e tjera, në zona të tjera të kryeqytetit, por, po kështu, edhe në qytete të tjera ku bizneset po mbyllen, po falimentojnë, ku njerëzit nuk janë në gjendje të blejnë as plotësojnë nevojat minimale të konsumit të tyre dhe fjala kryesore tek bizneset e para që kam vizituar janë listat. Janë shtuar listat, janë shtuar numri i njerëzve që nuk kanë mundësi të paguajnë as për nevojat minimale të ditës, në dyqanet e bukës, në dyqanet e ushqimit, tek fruta-perimet”, tha Basha.

Ai thekson se “kjo është situata anembanë Shqipërisë dhe konfirmohet edhe nga raporti i fundit i Bankës Botërore i sapo dalë, gjatë ditëve të fundit, i cili thotë se 50% e shqiptarëve; 1 në 2 shqiptarë, 1 në 2 familje shqiptare tashmë ka prekur fundin, është në varfëri, jeton në varfëri”.

“Nuk ka pse të ishte kështu, nuk ka pse kjo krizë të rrënonte absolutisht gjithçka. Arsyeja e vetme është sepse edhe në kohë krize paratë tuaja, paratë e familjeve tuaja, paratë e taksave tuaja, paratë e faturave të rritura të energjisë, paratë e tarifave të rritura, akcizës së rritur të karburantit, në vend që të vinin tek ju për t’ju ndihmuar, për t’ju çliruar nga pesha e shtuar e varfërisë në kohën e pandemisë, prapë se prapë shkuan aty ku kanë shkuar këto 7 vite, te oligarkët, shkuan tek kontratat selektive korruptive në kohë pandemie, shkuan te vjedhja dhe shkatërrimi i pronës publike dhe grabitja e pronës private”, theksoi Basha.

“Kjo situatë e tmerrshme ekonomike ka një dhe vetëm një përgjegjës: njeriun që ka vënë interesat e tij, xhepat e tij, që nuk i dhimbsen shqiptarët, nuk i dhemb gjendja juaj ekonomike dhe ka vënë gjithçka në funksion të pushtetit të tij, pasurimit të tij dhe një grushti oligarkësh me të cilët mban pushtetin. Kjo mund të ndryshojë vetëm duke kthyer vëmendjen tek ju, duke kthyer tek ju paratë e vjedhura e të grabitura gjatë këtyre viteve dhe në veçanti gjatë këtyre muajve të fundit të vështirë të pandemisë, duke kthyer një qeverisje për ju, duke ulur taksat, duke hapur ekonominë dhe duke bërë të mundur që Shqipëria dhe shqiptarët të gëzojnë të mirat materiale të këtij vendi dhe jo vetëm të një grushti oligarkësh për të cilët punon sot gjithë vendi”, shtoi Basha.

“Kjo situatë mund dhe do të marrë fund përmes një bashkimi shumë të madh, përmes një bashkimi të pandalshëm të shqiptarëve përtej bindjeve politike për një dhe një qëllim të vetëm: që Shqipëria të jetë e gjithë shqiptarëve dhe jo vetëm e Edi Ramës dhe 5 oligarkëve”, shtoi Basha./atsh

Basha: Plani ynë i jep fund Shqipërisë që punon për oligarkët Read More »

Reforma Zgjedhore/ Gjiknuri: Adresuam kërkesat më serioze që opozita i kishte parakushte. Bylykbashi: Të garantohet identifikimi biometrik

Aktualitet, Politike / /

Mbyllet pas katër orësh takimi i Këshillit Politik për Reformën Zgjedhore pa gjetur dakordësi për realizimin e kësaj reforme.

Pas katër orësh diskutime, në prezencë edhe të partnerëve ndërkombëtarë, duket se palët nuk kanë gjetur gjuhën e përbashkët.

Gjiknuri: Kodi Zgjedhor do miratohet brenda këtij seksioni parlamentarë, opozitës i janë pranuar një pjesë e mirë e kërkesave

Bashkëkryetari i Komisionit të Posaçëm për Reformën Zgjedhore, Damian Gjiknuri u shpreh se, janë pranuar një pjesë e mirë e kërkesave të opozitës jo parlamentare, por që kjo e fundit ka nisur të çedojë duke nxjerr kërkesa të reja.

“Duhet të informoj njëherë të gjithë publikun, që gjatë gjithë kësaj kohe dhe komisioni i Reformës Zgjedhore dhe Këshilli Politik ka trajtuar me shumë seriozitet rekomandimet e OSBE dhe problematikat e shfaqura nga palët dhe mbi të gjitha është munduar të adresojë një pjesë të mirë të kërkesave të opozitës. Sot që flasim kemi një produkt, një kuadër gati të përfunduar me të gjitha çështjet dhe rekomandimet e ODIHR, po mbi të gjitha, disa kërkesa thelbësore që ditët e fundit opozita i kishte kthyer si një kusht, pra ne kemi gjetur hapësirën dhe do t’i përfshijmë ato”, tha ai.

Gjiknuri deklaroi se “ne nuk e humbim qetësinë, unë do ndjek rrugën ligjore, do informoj Kuvendin dhe Komisionin e Reformës Zgjedhore, po ashtu dhe partnerët ndërkombëtarë”.

“Por, nuk mundet që pasi të biem dakord dhe pasi reflektojmë një pjesë të mirë edhe të kërkesave që quheshin parakusht për organizimin e zgjedhjeve, dhe me dëshmitarë ndërkombëtarë, të fillohet dhe të çedohet duke hequr dorë dhe duke dalë me kërkesa të reja, megjithatë ne nuk e humbim qetësinë, ne do të vazhdojmë të ndjekim procesin ligjor. Unë nesër do të informoj Kuvendin dhe shumë shpejt do të paraqes edhe paketën e dytë, do të informoj Komisionin e Reformës Zgjedhore, dhe njëkohësisht dyert dhe dritaret e komunikimit janë të hapura me opozitën për të vazhduar për të mbyllur dhe ato pak gjëra që ata kanë filluar të ndryshojnë mendje”, tha ai.

“Kemi shqyrtuar dhe parakushtet e opozitës, e nuk dua të negocioj këtu përmes megafonit, por kemi pranuar dhe ato rrisqe të domosdoshme dhe do ketë depolitizim të komisioneve ku palët do kenë garancitë e tyre. Miqtë ndërkombëtarë kanë inkurajuar dialogun dhe natyrshëm do të mbrojnë ato standarde kushtetuese të arritura për drejtësinë dhe integritetin e procesit të drejtësisë në Shqipëri, kjo është e thënë qartë. Ne kemi adresuar kërkesat që asnjë opozitë shqiptare si ka kërkuar ndonjëherë dhe shumë shpejt do ta shikoni, dhe do informoj publikun dhe do ta shikoni vetë dhe do të habiteni kur të dëgjoni, që një pjesë e mirë e kërkesave janë adresuar”,- shtoi Gjiknuri.

“Skema e rekrutimit të komisionerëve është e hapur, kushdo ka të drejtë të aplikojë për komisioner dhe do ketë proces ekstra teknologjik. Ne jemi të hapur për çdo lloj takimi, por do vijojmë punën pasi Shqipëria ka nevojë për një Kod Zgjedhor, parlamenti është legjitim dhe do vijoj punën, është mirë që opozita jo parlamentare të vijë dhe të gjej dakordësinë. Opozita ka një problem me vetingun e s’do ta njohi, por nuk ka sens, e njeh Kushtetuta shqiptare. Te zgjedhjet opozita se pranon vetingun, janë ca gjëra që s’gjejnë argument logjik kur i drejtohesh të tjerëve. Edhe kërkesat ekstreme të opozitës jo parlamentare do bëhet çmos të pranohen, por do bëjë një parashtesë për të reflektuar kërkesat e opozitës.

Pyeteni z.Bylykbashi atëherë nëse është realizuar 100% identifikimi biometrik, janë dakord, kanë më pretendime?Duhet ta pyesni këtë”,- shtoi Gjiknuri.

“Kryekomisioneri votohet me shumicë të cilësuar dhe do bëjmë konsultime me opozitën jo parlamentare. Zgjedhja e anëtarëve të KQZ dhe trupës tjetër rregullatore zgjidhen në të njëjtën mënyrë siç zgjidhen Gjyqtarët e Lartë. Janë pranuar shumë kërkesa të opozitës sa asnjë opozite më herët. Sa kohë ka dhe dëshmitarë ndërkombëtarë dhe në respekt të tyre Kodi Zgjedhor duhet të mbyllet brenda këtij sesioni parlamentar pasi Shqipëria duhet të ketë një Kod Zgjedhor një vit para zgjedhjeve”,- tha Gjiknuri.

Bylykbashi dhe Vasili: PS të heq dorë nga privilegjet në procesin zgjedhor

Përfaqësuesi i Partisë Demokratike, Oerd Bylykbashi dhe i Lëvizjes Socialiste për Integrim, Petrit Vasilim, pjesë e opozitës jo parlamentare, kanë bërë të ditur se mazhoranca nuk është e gatshme të heq dorë nga “privilegjet” e tyre në procesin zgjedhor.

“Pas disa orësh përpjekje, opozita bëri propozimet e saj. Ofroi konsensus. PS nuk ishte e gatshme për të arritur këtë konsensus, duke kërkuar të mbaj privilegjet e saj. Ne jemi të gatshëm për të vijuar punën për të gjetur konsensusin dhe presim që edhe PS të bëjë koncesionet e saj dhe të jetë e gatshme për të arritur marrëveshjen”,- tha Bylykbashi.

“Gjithë përpjekjet e Partisë Socialiste, që të mbaj privilegjet e të mos heqi dorë nga kapja e komisioneve zgjedhore, KQZ dhe nga vula që do t’i japi trajtë ligjore procesit zgjedhor me gjykatën e saj, tregojnë vlerën dhe rëndësinë që ka bërë opozita me kërkesën e saj për qeverinë kujdestare. Boshllëqet që duan të krijojnë në proces janë të mëdha. Falenderoj kontributin e partnerëve ndërkombëtarë për të gjetur kompromisin, por PS nuk ishte në gjendje të hiqte dorë nga privilegjet e qeverisë mbi procesin zgjedhor”,- shtoi Bylykbashi.

“Ne jemi të gatshëm për të gjetur zgjidhje për kompromis, por pa cenuar garancitë themelore për të pasur zgjedhje të lira e të ndershme. Le ti japim kohë PS për të gjetur forcën për të lëshuar nga privilegjet e saj, jemi të gatshëm për ta zgjidhur këtë çështje.

“Biometrika lidhet me depolitizimin e administratës, dhe këto janë të lidhura mes tyre me qëllim që PS të mos ketë kontroll te KQZ apo në Gjykata, kur të gjejmë kompromis për këto çështje, do të zgjidhen dhe do gjendet edhe zgjidhja për të tjerat”,- tha Bylykbashi.

“Kjo nuk është një çështje pazaresh politike, por bëhet fjalë për themelin e votës së lirë. Kjo, qeveria kujdestare dhe kërkesat tona të tjera janë rritje të garancive, jo rënie të garancive minimale, siç ndodhi më 30 qershor, ku Partia Socialiste e vetme në numërim, votim dhe kandidat, kërkoi ta ligjëroj ato palë zgjedhje dhe ju keni asistuar dhe keni qenë dëshmitarë. PS ka vështirësinë e madhe sepse duhet të dalë nga gjumi parisien Kryeministri, që nuk është i shqetësuar për zgjedhjet në Shqipëri, pasi ose i vjedh vetë, ose bënë marrëveshje që i minon po vetë”,- tha Vasili.

“Propozimet tona i japin fund tjetërsimit të vullnetit të shqiptarëve. Ky është një qëndrim parimor që s’ka arsye se përse të negociohet dhe kështu ne plotësojmë një kusht të BE-së, nga 5 kushte që 2016, ka 3 kushte që lidhen me zgjedhjet ku shkaktari kryesor është Edi Rama dhe PS. Në rast se u pranua depolitizimi, kjo bëhet në sajë të identifikimit biometrik, pa një të tillë nuk ecet në elementë të tjerë. Kur PS ka qenë në opozitë kishte gjysmën e komisioneve zgjedhore dhe në më shumë se gjysmat kishte të drejtë vendimmarrje”, theksoi Vasili.

Hajdari: Palët ranë dakord për të mos u dakordësuar

Deputetja e opozitës parlamentare, Rudina Hajdari nënvizoi se palët ranë dakord për të mos u dakordësuar.

“Dua të falenderoj Ambasadën e SHBA që u ngujua në këtë ndërtesë dhe nuk ndalojë deri në momentin e fundit për ti dhënë zgjidhje reformës zgjedhore. Partitë politike dështuan, pasi interesat e tyre janë të ngushta dhe janë thjesht për t’i shërbyer kryetarëve të partive dhe bizneseve të tyre. Pse mendoni ju se vjen këtu Ambasada Amerikane për të negociuar me këta njerëz këtë reformë zgjedhore, vetëm se duan interesin e shqiptarëve, edhe njëherë këta ja mbyllën derën dhe i thanë që nuk janë gati për të mbyllur një marrëveshje, por në momentin e fundit u tërhoqën dhe koha do ti tregojë të gjitha”,- tha Hajdari.

“Kjo reformë zgjedhore duhet të ketë bekimin e shqiptarëve dhe sot nuk e ka bekimin e shqiptarëve dhe pse Ambasada e SHBA u investua për këtë reformë, këta nuk ranë dakord, pasi shohin interesin e kryetarëve të partive të tyre dhe bizneseve të tyre. Në fund bëmë një bisedë të përbashkët dhe ramë dakord në të gjitha pikat për të mos rënë dakord. Ata ishin të investuar që sot të kishte një zgjidhje, dje i propozova të ulenim e të gjenim një dakordësi, edhe dje ishte SHBA dhe BE në tryezë. Se ku e kanë hallin, ju e kuptoni, tek vetja e vetë, jo tek shqiptarët. Ambasada e SHBA vjen këtu pasi duan që kjo reformë duhet të ketë bekimin e shqiptarëve. Duhet ndryshim të sistemit zgjedhor pikërisht për këtë që ndodhi sot. Nëse ne nuk hapim listat këtu do ngelemi, pa asnjë lloj zgjidhje. Këto duan të ndreqin biznesin dhe partitë e tyre. Tani loja është e hapur ende, dhe s’kemi ndryshim sistemi, por kemi një investim tjetër, që ne do rifutemi në lojë. Ne nuk dorëzohemi nga kërkesa jonë për ndryshim sistemi”- tha Hajdari./atsh

Reforma Zgjedhore/ Gjiknuri: Adresuam kërkesat më serioze që opozita i kishte parakushte. Bylykbashi: Të garantohet identifikimi biometrik Read More »

Respektimi i protokolleve të sigurisë shëndetësore, kusht për strukturat hoteliere

Aktualitet, Shendetesi / /

Respektimi i protokolleve të sigurisë shëndetësore nga të gjitha strukturat hoteliere në vend, mbetet një kusht shumë i rëndësishëm sidomos tani me nisjen e sezonit veror.

Ministri i Turizmit dhe Mjedisit, Blendi Klosi solli sot shembullin e një hoteli në kryeqytet, një investim i ri që po përgatitet për të pritur pushuesit e parë duke respektuar protokollet shëndetësore.

“Arte Botique Hotel një investim i ri, i cili po përgatitet për të pritur pushuesit e parë duke respektuar protokollet shëndetësore”, tha Klosi.

Nga data 1 Qershor plazhet do të jenë të hapura, nën masa të sigurisë, sipas një plani i cili përfshin gjithë vijën bregdetare, si një zonë e sigurt.

Plazhet sipas zonave të miratuara do jenë të përcaktuara me autorizime të posaçme nga një Autoritet i Përkohshëm që është ngritur për këtë periudhë dhe do të administrojë lejet për vendosje të pajisjeve të plazhit nëpërmjet një aplikimi online dhe një protokolli të veçante për të siguruar ruajtjen e distancave dhe kushtet higjeno-sanitare në plazhe./atsh

Respektimi i protokolleve të sigurisë shëndetësore, kusht për strukturat hoteliere Read More »

Vlorë/ Gjobiten dy subjekte për krim mjedisor

Aktualitet, Lajmi i fundit / /

Policia e Vlorës vijon operacionin për parandalimin, evidentimin dhe goditjen e krimeve mjedisore. Sipas njoftimit për mediat, Policia e Vlorës gjatë ditës së enjte janë evidentuar dhe gjobitur dy subjekte për shkelje në zonën e Bunavisë, Vlorë.

Dy subjektet e Impianteve të Përpunimit të Inerteve, me administratorët përkatës F. H. dhe V. D., në zonën e quajtur Bunavi, Vlorë, kanë përpunuar dhe transportuar inerte në mënyrë të paligjshme, pasi iu është pezulluar leja e shfrytëzimit të aktivitetit të tyre, dhe pa leje mjedisore.

Në vijim të veprimeve, Komisariati i Policisë Vlorë, në bashkëpunim me Seksionin e Krimit Ekonomik e Financiar pranë DVP Vlorë, ka nisur procedimin penal ndaj administratorëve të këtyre subjekteve, për veprën penale “Shpërdorimi i tokës”.

Gjithashtu, IKMT ka ndëshkuar subjektet në fjalë me masë administrative, në total 4.000.000 lekë të rinj, për veprime në kundërshtim me legjislacionin në fuqi, konkretisht: Subjekti i Impiantit të Përpunimit të Inerteve, me administrator F. H. ka marrë masë administrative 2.000.000 lekë të rinj; Subjekti i Impiantit të Përpunimit të Inerteve, me administrator V. D. ka marrë masë administrative 2.000.000 lekë të rinj. /atsh

Vlorë/ Gjobiten dy subjekte për krim mjedisor Read More »