Irina

Kryeministri Edi Rama solli sot përmes fjalëve të shenjta, një tjetër mesazh për përballimin e situatës së shkaktuar nga tërmeti i 26 nëntorit.

“Fjalët e shenjta . Të vërtetën nga e pavërteta e ndajnë vetëm 4 gishta. E pyetën për kuptimin e kësaj shprehje. Imam Aliu bashkoi gishtat e dorës, i vuri midis syrit e veshit të tij dhe tha: “Është e pavërtetë kur ju thoni “Unë kam dëgjuar për këtë”: dhe është e vërtetë kur ju thoni “Unë e kam parë këtë”.

Kryeministri Rama zgjodhi shprehjen e Imam Aliut, Ligjërata 141 për të dhënë një tjetër mesazh kurajoje për kapërcimin e situatës së shkaktuar nga tërmeti i 26 nëntorit. /atsh

Shqipëria merr sot zyrtarisht Kryesinë e OSBE-së në Ministerialin e OSBE-së në Bratislavë

Pak përpara fjalës së marrjes së kryesisë së OSBE për vitin 2020 Kryeministri Edi Rama, i cili ndodhet në Bratislavë ka publikuar një video ku tregon momente pune përpara Ministerialit.

Rama deklaron se është “nder dhe përgjegjësi e madhe drejtimi i kësaj organizate ndërkombëtare të dorës së parë, si edhe mundësi e jashtëzakonshme për ta bërë Shqipërisë të shkëlqejë në krye të punëve të mëdha e të sfidave të posaçme të OSBE”.

Rama thekson se gjatë fjalës së tij është e rëndësishme që në hyrje të flasë për tërmetin e 26 nëntorit që goditi Shqipërinë.

Gjithashtu Rama shton se, i duhet vënë theksi bashkëjetesës fetare në Shqipëri dhe mikpritjes si dy prej vlerave më të mëdha të Shqipërisë. Gjithashtu Kryeministri shtoi se si element të mikpritjes është pritja që populli shqiptar bëri për hebrenjtë gjatë Luftës së Dytë Botërore apo dhe pritjen e popullit të Kosovës në vitin 1999.

Sa i përket vlerës së barazisë gjinore, kryeministri Rama evidentoi faktin që Shqipëria është në 5 vendet e para në botë për numrin e grave në kabinetin qeveritar./atsh

Jeta në qytetin bregdetar po i rikthehet normalitetit ku buzëqeshja në fytyrat e qytetarëve dhe sidomos tek fëmijët duket si dritë pas zymtësisë të 26 nëntorit.

Në strukturat hoteliere në Durrës ku janë akomoduar të prekurit nga tërmeti, fëmijët duken se e kanë lënë pas situatën e vështirë dhe po argëtohen mes lojërave, vizatimeve dhe shoqërisë që kanë krijuar me njëri-tjetrin.

Në një nga këto hotele sot fëmijët shijuan një ditë ndryshe plot aktivitete argëtuese ku vullnetarë të shumtë të veshur si personazhe vizatimor i rikthyen buzëqeshjen atyre pas ditëve të vështira.

“Fëmijët e strehuar në hotelin Albania Star në një ditë plot aktivitete argëtuese. Nuk ka asgjë më të bukur se sa buzëqeshja e tyre pas ditëve të vështira. Rikthimi në normalitet është i ngadaltë dhe i vështirë, por aspak i pamundur! Bashkë do t’ia dalim”, tha ministri i Turizmit dhe Mjedisit Blendi Klosi.

Në të gjitha hotelet ku janë akomoduar të prekurit nga tërmeti po zhvillohen aktivitete të ndryshme argëtuese për fëmijë të cilat po i rikthejnë këta fëmijë drejt normalitetit, bukurisë dhe pafajësisë së moshës së tyre. /atsh

Policia e Shtetit ka sekuestruar disa pasuri me vlerë rreth 500 000 euro, që dyshohen se janë përfituar nga veprimtaria kriminale e pastrimit të parave.

Në deklaratën për mediat bëhet ditur se “në vijim të punës për gjurmimin, evidentimin dhe sekuestrimin e pasurive të përfituara nga veprimtaria kriminale, si dhe në kuadër të procedimit penal të nisur prej vitit 2014, Seksioni për Hetimin e Krimit Ekonomik e Financiar pranë Drejtorisë Vendore të Policisë Vlorë, në bashkëpunim me Prokurorinë e Vlorës, bënë zbatimin e vendimit penal të Gjykatës së Shkallës së Parë Vlorë, për vendosjen e sekuestros preventive mbi disa pasuri dhe objekte, si: 2 apartamente banimi në Vlorë dhe Orikum, 1 pemishte në Radhimë, 2 automjete dhe 2 llogari bankare”.

“Këto sekuestrime pasurore janë në kuadër të procedimit penal proaktiv të vitit 2014, ndaj shtetasit L. B., si person i dyshuar për kryerjen e veprës penale “Pastrimi i produkteve të veprës penale ose veprimtarisë kriminale”. Ky shtetas ka qenë i dënuar në Itali, për veprën penale “Trafikim narkotikësh” dhe dyshohet se këto pasuri i ka ngritur mbi bazën e këtyre veprimtarive të paligjshme. Veprimet e tjera procedurale vijojnë nga Prokuroria pranë Gjykatës së Shkallës së Parë Vlorë”, sqaron policia../atsh

Policia e Shtetit ka depozitua në platformën “e-Albania” 104 milionë e 350 mijë lekë për t’i ardhur në ndihmë banorëve të prekur nga tërmeti i datës 26 nëntor.

Drejtori i Policisë së Shtetit, Drejtues Madhor Ardi Veliu, gjatë një konference për mediet, u shpreh se, menjëherë pas rënies së tërmetit, Policia e Shtetit angazhoi në zonat e prekura mbi 4000 forca policie.

“Më konkretisht, forcat e policisë u përfshinë në operacionet e kërkim-shpëtimit; dhënien e ndihmës së parë për njerëzit që kishin nevojë; garantimin e rendit dhe sigurisë; disiplinimin e qarkullimit, duke i dhënë përparësi qarkullimit të ambulancave dhe ekipeve të zjarrfikëseve; sigurimin e pronës së qytetarëve dhe ruajtjen e objekteve të dëmtuara, për të mos lejuar futjen e banorëve për shkaqe sigurie”, – tha Veliu.

“Gjej rastin sot që të falënderoj publikisht forcat speciale Renea, FNSH-të e Tiranës, Shkodrës e Fierit, Drejtoritë Vendore të Policisë Durrës, Tiranë dhe Lezhë për profesionalizmin dhe ndjenjën e lartë të humanizmit duke rrezikuar edhe jetën e tyre, të cilët u përfshinë drejtpërdrejt të parët në operacionet e kërkim-shpëtimit”, – shtoi kreu i Policisë.

Veliu theksoi se falë kësaj ndërhyrje u shpëtuan 39 jetë njerëzish. “Falë ndërhyrjes së tyre, në bashkëpunim edhe me skuadrat e zjarrfikëseve dhe ushtrinë u shpëtuan 39 jetë njerëzish, që kishin mbetur poshtë rrënojave. Më pas, duke bashkëpunuar edhe me grupet speciale të vendeve mike, u bë i mundur edhe shpëtimi i disa personave të tjerë”.

“Strukturat policore të DVP Durrës, Tiranë e Lezhë, mbas përfundimit të fazës së parë të operacioneve të kërkim-shpëtimit e deri tani vijojnë të kryejnë shërbim me orë të zgjatura vetëm e vetëm që të garantojnë rendin e sigurinë, paprekshmërinë e pronës, duke rritur prezencën policore në të gjitha zonat e prekura nga tërmeti”, – tha Veliu.

Kreu i Policisë së Shtetit, tha se institucioni që ai drejton është organizatë ligj-zbatuese, por është humane dhe solidare.

“Punonjësit e Policisë së Shtetit, ashtu sikundër nuk morën parasysh rrezikun për jetën e tyre gjatë operacioneve të kërkim-shpëtimit, po me këtë ndjenjë të lartë humanizmi dhe solidariteti nisën të parët grumbullimin e ndihmave për familjet e prekura nga tërmeti. Me këtë rast, duke përfituar nga ky komunikim publik, dua të falënderoj një për një, të gjithë punonjësit e Policisë, por edhe familjet e tyre që kontribuuan me vullnet sipas mundësive duke bërë të mundur mbledhjen e shumës 104 milionë e 350 mijë lekë, e cila u depozitua në platformën ‘e-Albania’. Mirëkuptoj edhe 2016 punonjësit e Policisë që nuk kanë kontribuuar me vlera monetare, pasi nuk kanë pasur mundësi”, – nënvizoi Veliu.

Policia e Shtetit ka ngritur grupe të posaçme me specialistë për Hetimin e Krimit Ekonomik e Financiar.

“Dua të bëj me dije për të gjithë qytetarët, por në veçanti për banorët e prekur nga tërmeti se Policia e Shtetit ka ngritur grupe të posaçme me specialistë për Hetimin e Krimit Ekonomik e Financiar nga Drejtoria Hetimore Qendrore në Drejtoritë Vendore të Policisë Durrës, Tiranë e Lezhë dhe në bashkëpunim me Policitë vendore, nën drejtim të Prokurorive përkatëse po fiksojnë, grumbullojnë dhe administrojnë çdo provë që i shërben hetimit për të çuar para përgjegjësisë ligjore të gjithë personat që kanë përgjegjësi për ndërtesat që u shembën apo kanë pësuar dëmtime serioze (qofshin biznesmenë apo nëpunës të administratës)”, – theksoi Veliu.

Drejtori i Policisë së Shtetit e mbylli fjalën duke bërë dhe një apel për ata që sulmojnë Policinë e Shtetit. “Apeloj për të gjithë ata që duan të bëjnë politikë, apo që përbaltin punën tonë për interesa të caktuara, të tregohen humanë, siç janë punonjësit e Policisë dhe të përcjellin realitetin, pasi Policia e Shtetit i shërben komunitetit dhe askujt tjetër”, – tha Veliu. /atsh