Irina

E-group-i që funksionon pranë Akademisë së Shkencave pasqyron situatën e gjendja e pandemisë në Europë dhe në Shqipëri gjatë 24 orëve të fundit, ku thekson se Shqipëria mbyll një javë sipas pritshmërive dhe parashikimeve, forcon vazhdimin e sheshimit të kurbës dhe fillimin e uljes së të sëmurëve faktikë.

E-group shprehet se “një javë më parë, në deklaratën e saj publike, Akademia e Shkencave (nëpërmjet komisioneve të saj të përhershme: komisioni i mjekësisë dhe ai i matematikë-informatikës), paralajmëroi, duke vlerësuar dhe sintetizuar të dhënat, “rolin përcaktues të kësaj periudhe për ecurinë e mëtejshme te pandemisë”.

“Shtimi me 17 të prekur të rinj i numrit tërësor të të sëmurëve gjatë ditës së fundme përbën një rritje prej 4 për qind. Kjo rritje është në vijimësi të logjikës së ecurisë gjatë javës që po mbyllim, me një mesatare rritjeje ditore prej 3.8 për qind. Këto janë ritme karakteristike të fazës se sheshimit të kurbës së rritjes” shprehet E-group.

Po ashtu për situatën në Itali, E-group shprehet se “dje, në Itali dhe specifikisht në Lombardi, Milano e Bergamo, u shënjuan gjegjësisht rritjet prej 2.7 për qind, 2.27 për qind, 2 për qind dhe 1 për qind. Por, në dallim nga Italia, deri tani ritmi i shërimeve në vendin tonë është shumë më i lartë. Shifrat gjegjëse janë 45 për qind dhe 22 për qind. Kjo dinamikë e treguesve ka bërë që Shqipëria të hyjë më shpejt në fazën e daljes nga pandemia. Gjatë javës që po mbyllim treguesit e pandemisë tek ne kanë ecur sipas pritshmërive dhe parashikimeve që janë bërë edhe prej Akademisë së Shkencave, komisionit të përhershëm të mjekësisë, të atij të matematikë-informatikës dhe të anëtarëve të E-group-it tonë “Në ndjekje të pandemisë”.

E-group shprehet se “gjatë javës në vazhdim kërkohet vazhdimi i të njëjtave masa kryesore dhe i së njëjtës përkujdesje, me qëllim që rritja të mbahet nën 3 për qind.Në shkallë botërore dje u shënjua një rritje prej 5.8 për qind, nga 5.6 për qind që u raportua një ditë më parë. Kjo për shkak të gati dyfishimit të numrit të të prekurve të rinj në Britaninë e Madhe (8.680 të infektuar të rinj, kundrejt 4.200 të infektuarve një ditë më parë). Britania e Madhe dhe Rusia janë në fazën e zgjerimit të pandemisë, me 9 për qind deri në 18 për qind rritje në ditë.

Për sa i përket situatës në SHBA, E-group shton se “në SHBA dje u shënjua indeksi më i ulët i rritjes: 7.1 për qind, nga 7.7 për qind një ditë më parë. Por ndërkohë, për fat të keq, humbja e jetëve njerëzore ishte përsëri në nivelet më të larta, me 2.035 veta. Treguesit e lartë të vdekshmërisë mbeten shqetësues edhe per vendet kryesore europiane, ndonëse këta tregues, përveç Belgjikës, dje shënjuan ulje. Kjo u vërtetua në Francë, Spanjë, Itali, Holandë dhe Gjermani. Pritet që kjo tendencë të theksohet në ditët e ardhshme”.

Po ashtu E-group shton se “Europa në tërësi ka shënjuar një rritje të të prekurve të rinj në kufijtë nën 5 për qind. Konkretisht, në Spanjë, Gjermani, Zvicër dhe Austri ky tregues u dëshmua gjegjësisht në nivelet 3.3 për qind, 3.3 për qind, 2 për qind dhe 2.4 për qind. Shmangie të kuptueshme përbëjnë treguesit e Francës dhe Holandës, me 6 për qind. Ndërsa Belgjika, me 6.7 për qind rritje gjatë ditës së djeshme, po njeh një tendencë jostabilizimi”.

“Shërimet në vendet europiane, ku dhe përhapja e pandemisë është më e gjerë, ndonëse me ulje gjatë ditës së djeshme, si trend janë në nivele të kënaqshme. Arritja e shërimeve në nivelet 46 për qind në Zvicër, 44 për qind në Gjermani, 35 për qind në Spanjë dhe mbi 22 për qind në Francë, përbën një tregues pozitiv, çka përshpejton daljen e Europës nga faza e pikut”, shprehet E-group. /atsh

Bashkia e Vlorës po bën një punë të jashtëzakonshme për identifikimin e grupeve dhe shtresave në nevojë për t’i ndihmuar me ndihma ushqimore dhe ilaçe, në kuadër të luftës kundër përhapjes së COVID-19.

Kryetari i bashkisë së Vlorës, Dritan Leli, thekson se “në një situatë të vështirë të pazakontë bashkisë së Vlorës i ka dalë përballë sfida e identifikimit të grupeve dhe shtresave në nevojë, për të cilën bashkia ka organizuar një strukturë strukture hierarkie, ku për çdo rajon dhe njësi administrative ekziston një grup i i përbërë nga kryetari i rajonit, punonjës social, punonjës policie bashkiake punonjës poste dhe vullnetarë”.

Sipas tij, ky grup luan rolin kryesor në identifikimin e shtresave në nevojë.

“Gjithashtu një pjesë e kërkesave vijnë edhe nëpërmjet rrugëve elektronike si whatsapp duke nisur nga numri im personal, çdo administrator, si dhe 4 numra telefoni që janë vendosur në dispozicion, facebook i bashkisë Vlorë dhe ai i imi personal , portali ‘Shqipëria që duam,” apo dhe numrat jeshil. Çdo kërkesë i shpërndahet kryetarit të rajonit përkatës, i cili merr masat e nevojshme për verifikimin e situatës dhe më tej ndjekjen sipas rasteve”, – sqaron Leli.

Përsa i përket shtresave në nevojë të identifikuara në bashkinë e Vlorës, Leli tha se “janë personat me aftësi të kufizuara, pensionistë të cilët jetojnë vetëm në familje apo individë në nevojë, komuniteti rom dhe egjiptian familje me më shume se 5 anëtarë përfitues të ndihmës ekonomike”,

Kryebashkiaku Leli shprehet se “përveç strukturës së organizimit, e cila krijon gjithëpërfshirje ndërsektoriale në bashkinë e Vlorës, ne nuk kemi patur sfidë të veçantë identifikimin e pjesës informale sepse skema kapilare e shtrirë në çdo qelizë të institucionit të bashkisë na ka lejuar hapësira dhe lehtësira për të shkuar deri te pjesët më të vështira të shoqërisë”.

“Kjo do të thotë që janë marrë në konsideratë dhe janë vlerësuar të gjitha informacionet, kërkesat dhe nevojat e çdo qytetari që ka arritur të aksesojë në kohë reale të gjitha mjetet e vëna në dispozicion, komunikative të vendosura nga bashkia si më lart përmendur”, – tha Leli.

Ai u shpreh se “menaxhimi është realizuar në një frymë profesionale, solidariteti e disponibiliteti të pakushtëzuar nën drejtimin tim si kryetar i bashkisë dhe si kryetar i komisionit qendror në skemën e ngritur të grupit të punës”.

“Jemi në luftë dhe të gjithë duhet të kontribuojmë. Jemi duke diskutuar me të gjitha bashkitë e tjera dhe qeverinë qendrore për marrjen e masave sa më të mira, për këto grupe, të cilët për momentin kanë kaluar si të papunë”, – tha Leli./atsh